କୋଭିଡ-19 ମହାମାରୀ କାରଣରୁ ମୃତ୍ୟୁ ସଂଖ୍ୟା ବଢ଼ୁଥିବାରୁ ଶ୍ରମଜୀବୀମାନେ ସେମାନଙ୍କ ପରିବାରବର୍ଗଙ୍କ ସୁରକ୍ଷା ପାଇଁ ଭୟ ଓ ଆଶଙ୍କାରେ ରହୁଛନ୍ତି। ଏହାକୁ ଦୃଷ୍ଟିରେ ରଖି ଶ୍ରମ ଓ ନିୟୋଜନ ମନ୍ତ୍ରଣାଳୟ ପକ୍ଷରୁ ଇଏସଆଇସି ଓ ଇପିଏଫଓ ଯୋଜନା ଜରିଆରେ ଶ୍ରମଜୀବୀମାନଙ୍କ ଲାଗି ଅତିରିକ୍ତ ଲାଭ ଯୋଜନା ଘୋଷଣା କରାଯାଇଛି। ନିଯୁକ୍ତିଦାତାଙ୍କ ଉପରେ କୌଣସି ଅତିରିକ୍ତ ଖର୍ଚ୍ଚର ଚାପ ବିନା ଶ୍ରମଜୀବୀମାନଙ୍କୁ ପରିବର୍ଦ୍ଧିତ ସାମାଜିକ ସୁରକ୍ଷାର ସୁବିଧା ଯୋଗାଇ ଦିଆଯିବ।

ବର୍ତ୍ତମାନ ଇଏସଆଇସି ଅନ୍ତର୍ଗତ ବୀମାଭୁକ୍ତ ବ୍ୟକ୍ତି (ଆଇପି)ଙ୍କର ମୃତ୍ୟୁ କିମ୍ବା କାର୍ଯ୍ୟରତ ସମୟରେ ଆଘାତ ପ୍ରାପ୍ତ ହୋଇ ଅକ୍ଷମ ହୋଇଗଲେ ଶ୍ରମଜୀବୀଙ୍କ ହାରାହାରୀ ଦୈନିକ ମଜୁରିର 90 ପ୍ରତିଶତ ସହ ସମାନ ପେନସନ ରାଶି ପତି କିମ୍ବା ପତ୍ନୀ ଓ ବିଧବା ମା’ଙ୍କୁ ସାରା ଜୀବନ ପାଇଁ ମିଳିଥାଏ। ସେହିପରି ପିଲାମାନେ 25 ବର୍ଷ ବୟସର ହେବା ପର୍ଯ୍ୟନ୍ତ ଏହି ସହାୟତା ପାଇଥାନ୍ତି। ଅନ୍ୟପଟେ, ଝିଅଙ୍କ ପାଇଁ ସେମାନଙ୍କର ବିବାହ ପର୍ଯ୍ୟନ୍ତ ସହାୟତା ମିଳିଥାଏ।

ଇଏସଆଇସି ଯୋଜନା ଅନ୍ତର୍ଗତ ବୀମାଭୁକ୍ତ ପରିବାରବର୍ଗଙ୍କ ସହାୟତା କରିବା ଲାଗି, ଆଇପି ପରିବାରର ସମସ୍ତ ଆଶ୍ରିତ ସଦସ୍ୟ, ଯେଉଁମାନେ କୋଭିଡ ମହାମାରୀରେ ଆକ୍ରାନ୍ତ ଏବଂ ଏହି ରୋଗ କାରଣରୁ ମୃତ୍ୟୁ ପୂର୍ବରୁ ଇଏସଆଇସିର ଅନଲାଇନ ପୋର୍ଟାଲରେ ପଞ୍ଜିକୃତ ହୋଇସାରିଛନ୍ତି, ସେମାନେ ମଧ୍ୟ କାର୍ଯ୍ୟ ସମୟରେ ମୃତ୍ୟୁବରଣ କରୁଥିବା ବୀମାଭୁକ୍ତ ବ୍ୟକ୍ତିଙ୍କ ଆଶ୍ରିତମାନଙ୍କୁ ମିଳୁଥିବା ଲାଭ ପାଇପାରିବେ । ସେମାନେ ଏହାକୁ ସେହି ସମାନ ସ୍ତରରେ ହିଁ ହାସଲ କରିବାକୁ ସକ୍ଷମ ହେବେ। ତେବେ ଏହା ନିମ୍ନଲିଖିତ ଯୋଗ୍ୟତା ସର୍ତ୍ତ ଅଧୀନରେ ହେବ:

କ. ଆଇପିଙ୍କୁ ଇଏସଆଇସି ଅନଲାଇନ ପୋର୍ଟାଲରେ କୋଭିଡ ରୋଗରେ ଆକ୍ରାନ୍ତ ହେବା କିମ୍ବା ଏହି କାରଣରୁ ହେଉଥିବା ମୃତ୍ୟୁ ଠାରୁ ଅତିକମରେ ତିନି ମାସ ପୂର୍ବରୁ ପଞ୍ଜିକୃତ ହେବାକୁ ପଡ଼ିବ।

ଖ. ବୀମାଭୁକ୍ତ ବ୍ୟକ୍ତି ନିଶ୍ଚିତ ଭାବେ ବେତନରେ ନିୟୋଜିତ ହେବା ଆବଶ୍ୟକ ଏବଂ ମୃତକ ବୀମାଭୁକ୍ତ ବ୍ୟକ୍ତିଙ୍କ ସନ୍ଦର୍ଭରେ କୋଭିଡ ରୋଗରେ ଆକ୍ରାନ୍ତ ହେବା, ଏବଂ ଏହି କାରଣରୁ ତାଙ୍କର ମୃତ୍ୟୁ ହୋଇଥିଲେ, ଏହାର ଠିକ ପୂର୍ବବର୍ତ୍ତୀ ଗୋଟିଏ ବର୍ଷ ସମୟରେ ସେ ଅତିକମରେ 78 ଦିନର ଯୋଗଦାନ ଦେଇଥିବା ଆବଶ୍ୟକ।

ଯୋଗ୍ୟତା ସର୍ତ୍ତ ପୂରଣ କରୁଥିବା ବୀମାଭୁକ୍ତ ବ୍ୟକ୍ତି କୋଭିଡ ରୋଗ କାରଣରୁ ମୃତ୍ୟୁବରଣ କରିଥିଲେ ତାଙ୍କର ଆଶ୍ରିତ ନିଜର ଜୀବନକାଳ ସମୟରେ ବୀମାଭୁକ୍ତ ବ୍ୟକ୍ତିଙ୍କ ହାରାହାରୀ ଦୈନିକ ବେତନର 90 ପ୍ରତିଶତ ମାସିକ ପରିଶୋଧ ପ୍ରାପ୍ତ କରିବା ଲାଗି ହକଦାର ହୋଇପାରିବେ। ଏହି ଯୋଜନା 24.03.2020 ଠାରୁ ଦୁଇ ବର୍ଷର ଅବଧି ନିମନ୍ତେ ଲାଗୁ ହେବ।

ଇପିଏଫଓର କର୍ମଚାରୀ ଜମା ସଂଯୁକ୍ତ ବୀମା ଯୋଜନା (ଇଡିଏଲଆଇ) ଅନ୍ତର୍ଗତ ଏହି ଯୋଜନାର ସଦସ୍ୟମାନଙ୍କର ମୃତ୍ୟୁ ହେବା କ୍ଷେତ୍ରରେ ତାଙ୍କ ପରିବାରର ସମସ୍ତ ଜୀବିତ ଆଶ୍ରିତ ସଦସ୍ୟମାନଙ୍କୁ ଇଡିଏଲଆଇର ଲାଭ ହାସଲ କରିବା ପାଇଁ ଯୋଗ୍ୟ ହୋଇପାରିବେ। ବର୍ତ୍ତମାନ ଏହି ଯୋଜନା ଅନ୍ତର୍ଗତ, କର୍ମଚାରୀଙ୍କ ମୃତ୍ୟୁ ମାମଲାରେ ମିଳୁଥିବା ଲାଭକୁ ସମ୍ପ୍ରସାରିତ କରାଯାଇଛି। ଏବେ ଗ୍ରାଚ୍ୟୁଟିର ପରିଶୋଧ ପାଇଁ ସର୍ବନିମ୍ନ ସେବାର ଆବଶ୍ୟକତା ନାହିଁ। ପାରିବାରିକ ପେନସନର ପରିଶୋଧ ଇପିଏଫ ଏବଂ ଏମପି ଆଇନର ବ୍ୟବସ୍ଥା ଅନୁସାରେ କରାଯାଉଛି। କର୍ମଚାରୀ ରୋଗାକ୍ରାନ୍ତ ହେଲେ ଏବଂ କାର୍ଯ୍ୟାଳୟକୁ ଆସିନପାରିବା ସ୍ଥିତିର ବର୍ଷକୁ 91 ଦିନ ପାଇଁ ରୋଗର ଲାଭ ରୂପରେ ମୋଟ ମଜୁରିର 70 ପ୍ରତିଶତ ପରିଶୋଧ କରାଯିବ।

ମନ୍ତ୍ରଣାଳୟ ପକ୍ଷରୁ ଜାରି ଏକ ଅଧିସୂଚନା  ଜରିଆରେ ଏଥିରେ ନିମ୍ନଲିଖିତ ସଂଶୋଧନ କରାଯାଇଛି:

କ. ମୃତ କର୍ମଚାରୀଙ୍କ ପରିଜନଙ୍କୁ ମିଳୁଥିବା ସର୍ବାଧିକ ଲାଭ ରାଶିକୁ 6 ଲକ୍ଷରୁ ବୃଦ୍ଧି କରାଯାଇ 7 ଲକ୍ଷ କରି ଦିଆଯାଇଛି।

ଖ. ମୃତ କର୍ମଚାରୀ ନିଜ ମୃତ୍ୟୁ ପୂର୍ବରୁ ଗୋଟିଏ କିମ୍ବା ଅଧିକ ପ୍ରତିଷ୍ଠାନରେ 12 ମାସର ନିରନ୍ତର ଅବଧି ଲାଗି ସଦସ୍ୟ ସଦସ୍ୟ ଥିଲେ ତାଙ୍କ ଯୋଗ୍ୟ ପରିବାର ସଦସ୍ୟମାନଙ୍କୁ 2.5 ଲକ୍ଷ ଟଙ୍କାର ସର୍ବନିମ୍ନ ଆଶ୍ବାସନାର ଲାଭ ମିଳିବ। ବର୍ତ୍ତମାନର ବ୍ୟବସ୍ଥାରେ ଗୋଟିଏ ପ୍ରତିଷ୍ଠାନରେ 12 ମାସ ପର୍ଯ୍ୟନ୍ତ ଲଗାତାର ନିୟୋଜନର ବ୍ୟବସ୍ଥା ରହିଛି। ଏହାଫଳରେ ଚୁକ୍ତିଭିତ୍ତିକ/ଅସଂଗଠିତ ଶ୍ରମିକମାନଙ୍କୁ ଲାଭ ମିଳିପାରିବ ଯେଉଁମାନେ ଗୋଟିଏ ପ୍ରତିଷ୍ଠାନରେ ଲଗାତାର ଗୋଟିଏ ପର୍ଯ୍ୟନ୍ତ କାମ କରିବାର ବାଧ୍ୟତାମୂଳକ ସର୍ତ୍ତ କାରଣରୁ ଲାଭରୁ ବଞ୍ଚିତ ରହୁଥିଲେ।

ଗ. 15 ଫେବୃଆରୀ 2020 ପୂର୍ବର ବ୍ୟବସ୍ଥା ଅନୁଯାୟୀ, ସର୍ବନିମ୍ନ 2.5 ଲକ୍ଷ ଟଙ୍କାର କ୍ଷତିପୂରଣ ବ୍ୟବସ୍ଥାକୁ ପୁଣିଥରେ ପ୍ରଚଳନ କରାଯାଇଛି।

ଘ. ଆସନ୍ତା 3 ବର୍ଷ ମଧ୍ୟରେ, ଆକ୍ଚୁଆରୀଙ୍କ ଆକଳନ ଅନୁଯାୟୀ ଯୋଗ୍ୟ ପରିବାରର ସଦସ୍ୟମାନଙ୍କୁ 2021-22ରୁ 2023-24 ପର୍ଯ୍ୟନ୍ତ ଇଡିଏଲଆଇ ପାଣ୍ଠିରୁ 2185 କୋଟି ଟଙ୍କାର ଅତିରିକ୍ତ ଲାଭ ମିଳିପାରିବ।

ଙ. ଯୋଜନା ଅନ୍ତର୍ଗତ ମୃତ୍ୟୁ କାରଣରୁ ହେଉଥିବା ଦାବି ସଂଖ୍ୟା ପ୍ରତିବର୍ଷ ପାଖାପାଖି 50,000 ପରିବାର ହେବ ବୋଲି ଅନୁମାନ କରାଯାଉଛି। ଏଥିରେ ପାଖାପାଖି 10,000 ଶ୍ରମଜୀବୀଙ୍କ ମୃତ୍ୟୁ ସଂଖ୍ୟାକୁ ସାମିଲ କରାଯାଇଛି, ଯେଉଁମାନେ କୋଭିଡ କାରଣରୁ ପ୍ରାଣ ହରାଇପାରନ୍ତି।

ଏସବୁ କଲ୍ୟାଣକାରୀ ଯୋଜନା କୋଭିଡ-19 ରୋଗ କାରଣରୁ ପ୍ରାଣ ହରାଉଥିବା ଶ୍ରମଜୀବୀଙ୍କ ପରିବାରବର୍ଗଙ୍କୁ ଅତି ଆବଶ୍ୟକ ସହାୟତା ଯୋଗାଇ ଦେବ ଏବଂ ମହାମାରୀ ସମୟରେ ସେମାନଙ୍କୁ ଆର୍ଥିକ ସଙ୍କଟରୁ ସୁରକ୍ଷିତ ରଖିବ।

*******

P.S