প্রধান মন্ত্রী, নরেন্দ্র মোদীনা লুচিংদুনা সাইক্লোন য়াসনা শোকহনবশিং য়েংশিনবগী মীফম ফমখ্রে। ওফিসিএলশিংনা শেম-শাদুনা লৈবগী তোঙানবা ফীভমশিং, অমাঙ-অতা য়েংশিনবা অমসুং মরী লৈনবা হীরমশিংগী মতাংদা অকুপ্পা প্রজেন্তেসন অমা পীখি।

নোংচুপ বেঙ্গোল অমসুং ওরিশাদা থাদোকখিবা চাউরাকপা মীওই ১০৬না শাবা এন.দি.আর.এফ.কী কাঙবু ৪৬না মীওই ১০০০ হেন্না কনবা ঙমখিবা অমসুং শোরোক্তা তাশিন্দুনা লম্বী থিংখিবা উ/পোল ২৫০০মুক লৌথোকখিবগী মতাংদা মীফম অসিদা খন্নখি। দিফেন্স ফোর্সশিং, মিং ওইনা পল্লবদা, আর্মী অমসুং কোস্ত গার্দনসু লমহাংনবা মীওই কয়া কনখি অমসুং নেভী অমসুং এয়র ফোর্সনা মিৎকুপ-নাহুম শিংনা লৈখি।

সাইক্লোন য়াসকী মরম্না থোকহনবা অমাঙ-অতা য়েংশিন্নবা রাজ্যশিংনা লৈরবসু, হৌজিক ফাওবদা ফংবা অহানবা পাউদমশিংগী মতুং ইন্না, নীংথিজনা ফোর্কাস্ত তৌখিবা, শোকহল্লবা মফমশিংগী মীয়ামদা নীংথিনা পাউ-ফাওখিবা অমসুং মতম-চানা মীওই কয়া কনবগী থবকশিং রাজ্য অমসুং সেন্ত্রেল এজেন্সীশিংনা লৌখৎখিবদগী মশিং য়াম্বা মীওইগী পুন্সি মাঙহনখিদে। অদুগা নাকল অমদা, মীওই মশিং য়াম্মনবনা মরম ওইদুনা অমাঙ-অতা খরদি থোকখি অমসুং মখোয়গী মতাংদা হৌজিক য়েংশিনবগী থবক চত্থরি। শোকহল্লবা মফম অয়াম্বগী মৈ অমসুং তেলিকোম সর্ভিসশিং হান্নগুম্না মথৌ তৌখ্রে।

সাইক্লোন অসিনা থোকহনখিবা শিংনবশিংবু কেন্দ্র অমসুং রাজ্যশিংগী এজেন্সীশিংনা নীংথিনা অমসুং থৱাই য়াওনা থেংনখিববু প্রধান মন্ত্রীনা খঙবীখি অমসুং মহৌশাগী পুন্সিবু অথুবা মতমদা হান্নগুম্না হঞ্জিল্লকহন্নবা হোৎননবা অমসুং সাইক্লোন অসিনা শোকহল্লবা মীওইশিংদা মতিক চাবা তেংবাং পীনবা মহাক্না এজেন্সীশিংদা খঙহনখ্রে।

পি.এম.গী প্রিন্সিপাল সেক্রেতরী, কেবিনেৎ সেক্রেতরী, হোম সেক্রেতরী, সেক্রেতরী পাৱর, তেলিকোম সেক্রেতরী অমসুং দি.জি. আই.এম.দি.গা লোয়ননা অতোপ্পা মরু-ওইবা ওফিসিএলশিংনা মীফম অদুদা শরুক য়াখি।

****