হৌজিক চত্থরিবা কোবিদ-১৯গী তীকা থাদোকপগী থৌওং অসিদা ঙসি ভারতনা শীংথনীংঙাই ওইবা মাইলস্তোন অমা য়ৌবা ঙমখ্রে। থৌওং অসিগী ১৩০নি শুবা নুমিৎতা অপুনবা কোবিদকী তীকা থাদোকখিবগী মশিং ঙসি অয়ুক্কী পুং ০৭:০০ তাবদা ফংখিবা দেতাগী মতুং ইন্না করোর ২০ হেনখ্রে (কোবিদ-১৯ বেক্সিনশিংগী অহানবা দোজ ১৫,৭১,৪৯,৫৯৩ অমসুং অনিশুবা দোজ ৪,৩৫,১২,৮৬৩ য়াওনা দোজ ২০,০৬,৬২,৪৫৬)।

হৌজিক ফাওবদা মালেমগী ওইনা খ্বাইদগী চাউবা তীকা থাদোকপগী থৌওং ওইরিবা ভারতকী কোবিদ-১৯গী তীকা থাদোকপগী থৌওং অসি ইকাই খুম্নরবা প্রধান মন্ত্রীনা জনুৱারী ১৬, ২০২১দা হৌদোকখিবনি।

ভারত অসি য়ু.এস.এ.গী মথংদা শুপ্নগী নুমিৎ ১৩০দা কভরেজ অসি তৌখিবা অনিশুবা লৈবাক ওইরি। য়ু.এস.এ.না করোর ২০গী মশিং অসি য়ৌবদা নুমিৎ ১২৪ চংখি।

মসিগী মথক্তা অৱর ৱর্ল্দ ইন দেতা অমসুং তোঙান-তোঙানবা ন্যুজ আর্তিকলশিংদা ফংলিবা দেতাগী মতুং ইন্না, কোবিদ-১৯গী তীকা থাদোকপগী থৌওংদা অতৈ মাংজিল থারিবা লৈবাকশিংদা য়ু.কে.না নুমিৎ ১৬৮নিদা করোর ৫.১ য়ৌখি, ব্রাজিলনা নুমিৎ ১২৮নিদা করোর ৫.৯ য়ৌখি অমসুং জর্মনীনা নুমিৎ ১৪৯নিদা করোর ৪.৫ য়ৌখি হায়না য়াওখি।   

কেন্দ্রগী হকশেল মন্ত্রালয়দা ফংবা খ্বাইদগী নৌবা দেতাগী মতুং ইন্না, ঙসি ফাওবদা ভারত্তা চহি ৪৫গী মথক্কী মীওই কাংলুপকী চাদা ৩৪ হেনবদি য়ামদ্রবদা কোবিদ-১৯গী বেক্সিনগী অহানবা দোজ কাপখ্রে। মসিগা মান্ননা ভারত্তা চহি ৬০+গী মীওই কাংলুপকী চাদা ৪২ হেনবদি য়ামদ্রবদা কোবিদ-১৯গী বেক্সিনগী অহানবা দোজ কাপখ্রে।

ঙসি ফাওবদা ভারতনা কোবিদ-১৯গী মায়োক্তা চত্থরিবা ইম্ম্যুনাইজেসনগী থৌওংদা বেক্সিন অহুম শিজিন্নরি; মসিদা ভারত্তা শাজবা বেক্সিন অনি – সিরম ইন্সতিত্যুত ওফ ইন্দিয়াগী কোভিশীল্দ অমসুং ভারত বাইওতেক্কী কোভেক্সিন য়াওখি। রুসিয়াগী স্পুৎনিক ভী অসি দ্রগ কন্ত্রোল্লর জেনরেল ওফ ইন্দিয়া (দি.সি.জি.আই.)না ইমর্জেন্সী ওইনা শিজিন্নবগী অয়াবা ফংখিবা অহুমশুবা বেক্সিন ওইখি অমসুং মসি লনাই হোস্পিতাল খরদা শিজিন্নরি অমদি লাক্কদৌরিবা নুমিৎশিংদা মসি শিজিন্নবা হেনগৎলবা য়ানা লৈ।

তীকা থাদোকপগী থৌওংগী অহানবা ফেজ, নুমিৎ ১৩০নিগী মমাং, জনুৱারী ১৬তা হৌখিবা অসিদা নেস্নেল এক্সপর্ত গ্রুপ ওন বেক্সিন এদমিনিস্ত্রেসন ফোর কোবিদ-১৯ (এন.ই.জি.ভি.এ.সি.)না হেল্থ কিয়র ৱার্করশিং অমসুং ফ্রন্ত লাইন ৱার্করশিং (সরকার অমসুং প্রাইবেৎ সেক্তর অনিমক্কী) প্রাইওরিতাই তৌখি। তীকা থাদোকপগী থৌওংগী অনিশুবা ফেজ মার্চ ২, ২০২১দগী হৌখি মসিনা খ্বাইদগী খুদোংথিনীংঙাই ওইবা চহি কাংলুপশিংদা ঙাকশেল পীবদা মীৎয়েং থমখি। প্রাইওরিতাইজ তৌরবা চহি কাংলুপশিং অসিদা চহি ৬০গী মথক্কী মীওইশিং অমসুং অখন্নবা কো-মোর্বিদিতীজ লৈবা চহি ৪৫গী মথক্কী মীওইশিং য়াওখি। মসি এপ্রিল ১, ২০২১দা চহি ৪৫গী মথক্কী মীওই পুম্নমক্কীদমক কোমথোকখি। অহুমশুবা ফেজতা ‘লিবরেলাইজ প্রাইসিং এন্দ এসেলরেতেদ নেস্নেল কোবিদ-১৯ বেক্সিনেসন স্ত্রেতেজী’ অসি মে ১, ২০২১দা পাইখৎখি। স্ত্রেতেজী অসিগী মখাদা চহি ১৮গী মথক্কী মীওই খুদিংমক্না কোবিদ-১৯গী তীকা থাদোকপা য়াহল্লি।

****