ঙাকশেল মন্ত্রালয়

দি.জি.সি.আই.না দি.আর.দি.ও.না খুদক্কী ওইনা শিজিন্ননবা পুথোকপা এন্তি-কোবিদ হিদাক্কী অয়াবা পীখ্রে

Posted On: 08 MAY 2021 1:42PM by PIB Imphal

দিফেন্স রিসর্চ অমসুং দিভেলপমেন্ত ওর্গনাইজেসন (দি.আর.দি.ও.)গী লেব, ইন্সতিত্যুৎ ওফ ন্যুক্লিয়র মেদিসিন অমসুং এল্লাইদ সাইন্স (আই.এন.এম.এ.এস.)না দাঃ রেদ্দী’স লেবোরেতরী (দি.আর.এল.), হাইদ্রবাদকা খুৎশম্নদুনা ২-দিওক্সী-দি.-গ্লুকোজ (২-দি.জি.) শিজিন্নদুনা কোবিদ-১৯গী মাইয়োক্তা লাইয়েংনবা হিদাক অমা পুথোকখ্রে। মসিগী ক্লিনিকেল ত্রাইএল তৌবা মতমদা মসিগী মোলিক্যুল অসিনা হোস্পিতালদা লৈরবা অনাবশিংবু য়াম্না থুনা নাবা ফবা হেনগৎহল্লি অমসুং ওক্সীজেনগী তঙাই ফদবা লৈবগী চাংসু হন্থহনবা ঙম্লে হায়বা খঙবা ঙম্লে। ২-দি.জি. শিজিন্নদুনা লাইয়েংখিবা মশিং য়াম্বা কোবিদ অনাবদা আর.তি.-পি.সি.আর. চাংয়েং অসি নেগেতিভ লাকখি। হিদাক অসিনা কোবিদ-১৯ অনাবশিংদা য়াম্না কান্নবা পীগনি।

লাইচৎ অসিগী মাইয়োক্ননবা শেম শাদুনা লৈনবা প্রধান মন্ত্রী, শ্রী নরেন্দ্র মোদীনা হায়বগী মতুং ইন্না, দি.আর.দি.ও.না ২-দি.জি. শিজিন্নদুনা কোবিদ লাইয়েংনবা হিদাক পুথোকপগী থৌদাং লৌখি। লাইচৎ অসিগী অহানবা ৱেভকী মনুং চনবা এপ্রিল ২০২০দা, আই.এন.এম.এ.এস.-দি.আর.দি.).গী সাইন্তিস্তশিংনা হাইদ্রবাদকী সেন্তর ফোর সেল্ল্যুলর অমসুং মোলিক্যুলর বাইওলোজী (সি.সি.এম.বি.)গা খুৎশম্নদুনা লেবোরেতরী এক্সপরিমেন্ত অমা পাংথোকখিবদা মসিগী মোলিক্যুল অসিনা এস.এ.আর.এস.-কোব ২গী মাইয়োক্তা নীংথিজনা মথৌ তৌই অমসুং ভাইরসনা মখা তানা শন্দোকপা থিংই হায়বা খঙবা ঙমখি। মহৈশিং অসিদা য়ুম্ফম ওইরদুনা, দ্রগ কন্ত্রোল্লর জেনেরেল ওফ ইন্দিয়া (দি.জি.সি.আই.)গী সেন্ত্রেল দ্রগস স্তেন্দর্দ কন্ত্রোল ওর্গনাইজেসন (সি.দি.এস.সি.ও.) অসিনা মে ২০২০দা ২-দি.জি.বু কোবিদ-১৯গী অনাবশিংদা ফেস ২গী ক্লিনিকেল ত্রাইএল চত্থবগী অয়াবা পীখি।

দি.আর.দি.ও.না মখোয়গী ইন্দস্ত্রীগী পার্ত্নর ওইরিবা দি.আর.এল., হাইদ্রবাদকা লোয়ননা হিদাক অসিগী তেক্ত-কায়দবা অমসুং মথৌ নীংথিজনা তৌবগী চাং খঙদোক্নবা কোবিদ-১৯গী অনাবশিংদা ক্লিনিকেল ত্রাইএল তৌবা হৌখি। ইং ২০২০গী মেদগী ওক্তোবর ফাওবগী মনুংদা পাংথোকখিবা ফেজ-২গী ক্লিনিকেল ত্রাইএলদা (দোজ খেৎনবগী থৌওং য়াওনা) হিদাক অসিনা কোবিদ-১৯গী অনাবশিংদা খুদোংথীবা থোকহন্দে অমসুং মখোয়বু নাবা ফগৎহনবদা য়াম্না তেংবাংই হায়বা খঙবা ঙমখি। ফেজ-২(এ.) অসি হোস্পিতাল ৬তা অমসুং ফেজ ২(বি.) (দোজ খেৎনবা)গী ক্লিনিকেল ত্রাইএলনা লৈবাক শিনবা থুংবগী হোস্পিতাল ১১দা পাংথোকখি। ফেজ-২গী ত্রাইএল অসি অনাবা ১১০দা পাংথোকখি।

মথৌ নীংথিনা তৌবগী মতাংদা, ২-দি.জি. শিজিন্নদুনা লাইয়েংবা অনাবশিংদা তোঙান-তোঙানবা ফীভমশিংদা চাংদম্নবদা স্তেন্দর্দ ওফ কেয়র (এস.ও.সি.)দগী হেন্না সিপম্পতম হন্থহনবগী চাংদা হেন্না ৱাংবগী মওং উখি। খ্বাইদগী মশক থোকপা ফীভমদি, এস.ও.সি.গা চাংদম্নবদা অখন্নবা হকশেলগী হীরম খরবু মহৌশাগী মওংদা হল্লকপদা চঙবা মেদিয়ন তাইমদা নুমিৎ ২.৫নি খেৎনবগী থৌওং উখিবা অদুনা ওইখি।

মায়-পাকপগী মহৈ অসিদা য়ুম্ফম ওইরগা, দি.সি.জি.আই.না নবেম্বর ২০২০দা ফেজ-৩গী ক্লিনিক্লেল ত্রাইএল তৌবগী অয়াবা পীখি। ফেজ-৩গী ক্লিনিকেল ত্রাইএল অসি দিসেম্বর ২০২০দগী মার্চ ২০২১ ফাওবদা দিল্লী, উত্তর প্রদেশ, নোংচুপ বেঙ্গোল, গুজরাৎ, রাজস্থান, মহারাস্ত্রা, অন্ধ্র প্রদেশ, তেলঙ্গানা, করনাতকা অমসুং তমিল নাদুগী কোবিদ হোস্পিতাল ২৭কী অনাবা ২২০দা পাংথোকখি। ফেজ-৩গী ক্লিনিকেল ত্রাইএলগী অকুপ্পা দেতাশিং দি.সি.জি.আই.গী মফমদা উৎখি। ২-দি.জি.গী মতাংদা মশিং য়াম্লবা অনাবশিংনা সিম্পতমদা মাংলক্তুনা মখোয়গী ফীভম য়াম্না ফগৎনখি অমসুং এস.ও.সি.গা চাংদম্নবদা নুমিৎ ৩নিগী মতুংদা ওক্সীজেন তঙাই ফদবগী ফীভম লৈরক্তবগী (৩২%গা চাংদম্নবদা ৪২% ওইদুনা) মওং উবা ফংদুনা অঙনবা মতমদা ওক্সীজেন থেরাপী পাংথোক্ত্রবসু য়ারে হায়বগী মওং উৎখি।

মান্নবা থৌওং অসি চহি ৬৫গী মথক্কী অনাবশিংদসু উবা ফংখি। দি.সি.জি.আই.না মে ১, ২০২১দা ময়াই ওইরপ্পা অমসুং শাথীনা নারবা কোবিদ-১৯গী অনাবশিংদা হিদাক অসিবু অহেনবা হিদাক ওইনা খুদক্তা শিজিন্নবা হৌবা য়াবগী অয়াবা পীখি। জেনেরিক মোলিক্যুল অমসুং গ্লুকোজকী এনালোগ অমা ওইবনা মরম ওইদুনা, হিদাক অসি পুথোকপদা লাইগনি অমসুং লৈবাক অসিদা মশিং য়াম্না ফংহনবা ঙমগনি।

হিদাক অসি সেচেত্তা হাপ্পা পাউদর অমা ওইনা লাক্কনি অমসুং মসিবু ঈশিংদা তুমহল্লবা মতুংদা থক্কদবনি। মসিনা ভাইরসনা শোকহল্লবা সেলশিংদা তুংশিন্দুনা লৈদুনা ভাইরেল সীন্থেসি লেপহন্দুনা ভাইরস মখা তানা শন্দোকপা অমসুং মখোয়গী ইনর্জী পুথোকপবু থিংজিল্লি। মসিনা ভাইরসনা শোকহল্লবা সেলশিং খন্দুনা তুংশিন্দুনা লৈবা ঙম্বগী মগুন অসিনা হিদাক অসিবু অতৈদগী তোপ-তোপ্পা ওইহল্লি।

হৌজিক চৎলিবা কোবিদ-১৯গী অনিশুবা ৱেভ অসিদা অনাবা মশিং য়াম্বনা ওক্সীজেনগী তঙাই ফদবা কয়া লৈদুনা হোস্পিতালগী লৈবগী মথৌ তাবা য়াম্না লৈরি। হিদাক অসিনা শোক্লবা সেলশিংদা পাংথোক্লিবা মথৌ অসিগী মরম্না মসিনা মীওই কয়াগী পুন্সি কনবা ঙমগনি হায়বগী থাজবা থম্নরি। মসিনা কোবিদ-১৯গী অনাবশিংনা হোস্পিতালদা লৈবগী মতমদা হন্থহনবদসু তেংবাংগনি।

***



(Release ID: 1717099) Visitor Counter : 151