ভারত সরকারগী শেল-থুম মন্ত্রালয়না কেপিতেল প্রোজেক্তশিংদা চাদিং তৌনবগীদমক্তা চহি ৫০গী শেন্দোই য়াওদবা লোন ওইনা রাজ্যশিংদা  লুপা করোর ১৫,০০০ ফাওবগী অহেনবা শেম্ফম পীনবা ৱারেপ লৌখ্রে। এক্সপেন্দিচর বিভাগনা হীরম অসিগা মরী লৈননা ইং ২০২১-২২গী “স্কিম ওফ ফাইনেন্সিএল এসিস্তেন্স তু স্তেৎস ফোর কেপিতেল এক্সপেন্দিচর”গী চৎন-কাঙলোন অমা ফোঙখ্রে।

কেপিতেল এক্সপেন্দিচরনা থবক পী, মরু ওইনা লায়রবা অমসুং স্কিল লৈতবা মীওইশিংদা, অৱাংবা মলতিপ্লাইয়র ইফেক্ত লৈ, শেন্মিৎলোন্না তুংদা চাউখৎপা ঙম্বগী চাং হেনগৎহল্লি অমসুং শেন্মিৎলোন্না শাহৌ লৌবগী অৱাংবা চাং লৈহল্লি। মরম অদুনা, কেন্দ্র সরকারনা শেল-থুমগী খুদোংচাদবা লৈরবসু, মমাংগী চহিদা “স্কিম ওফ ফাইনেন্সিএল এসিস্তেন্স তু স্তেৎস ফোর কেপিতেল এক্সপেন্দিচর” হৌদোক্না ৱারেপ লৌখ্রিবনি।

স্কিম অসিগী মখাদা, রাজ্য সরকারশিংদা শেন্দোই লৈতবা চহি ৫০গী লোনগী মওংদা শেলগী তেংবাং পীগনি। শেনবা চহি ২০২০-২১গী ওইনা স্কিম অসিগীদমক্তা লুপা করোর ১২,০০০দগী হেন্দবা শেনফম অমা খাক্তুনা থম্লে অমসুং রাজ্যশিংদা লুপা করোর ১১,৮৩০.২৯গী শেনফম পীথোকখ্রে। মসিনা লাইচৎকী চহিসিদা রাজ্যগী থাক্তা কেপিতেল এক্সপেন্দিচরগী থৌওং পাংথোকপা ঙমহল্লি।

স্কিম অসিদগী ফংবা অফবা মহৈ অমসুং রাজ্য সরকারশিংনা হায়জরকপশিং য়েংলবা তুংদা, কেন্দ্র সরকারনা স্কিম অসিবু ইং ২০২১-২২দসু মখা তানা চত্থনবা ৱারেপ লৌখি।

ইং ২০২১-২২গী “স্কিম ওফ ফাইনেন্সিএল এসিস্তেন্স তু স্তেৎস ফোর কেপিতেল এক্সপেন্দিচর”গী শরুক অহুম লৈঃ

১) শরুক ১- মসিগী শরুক অসি অৱাং-নোংপোক অমসুং চিংগী রাজ্যশিংগীনি অমসুং মসিগীদমক্তা লুপা করোর ২,৬০০ খাক্তুনা থম্লি। মসিগী মনুংদগী, অসম, হিমাচল প্রদেশ অমসুং উত্তরাখন্দনা লুপা করোর ৪০০/৪০০ ফংগনি অমসুং লেমহৌরিবা রাজ্যশিংদা লুপা করোর ২০০/২০০ পীগনি।

২) শরুক ২- মসিগী শরুক অসি স্কিমগী শরুক ১দা য়াওদবা অতোপ্পা রাজ্যশিংগীনি অমসুং মসিগীদমক্তা লুপা করোর ৭,৪০০ খাক্তুনা থম্লি। মসিগী শেনফমশিং অসি ইং ২০২১-২২গী ১৫শুবা ফাইনান্স কম্মিসন্না পীবা রাজ্যশিংগী সেন্ত্রেল তেক্সকী শরুক্কা চাং মান্ননা হায়রিবা রাজ্যশিং অসিদা য়েন্থোকখ্রে।

৩) শরুক ৩- মসিগী স্কিমগী শরুক অসি রাজ্যশিংনা ইনফ্রাস্ত্রকচর এসেৎশিং মনিতাইজ/রিসাইকল তৌবা অমসুং স্তেৎ পব্লিক সেক্তর ইন্তর্প্রাইস (এস.পি.এস.ই.শিং) দিস-ইনভেস্তমেন্ত তৌবগীদমক্তা ইন্সেন্তিব ওইনা পীনবনি। মসিগী শরুক অসিগীদমক্তা লুপা করোর ৫০০০ খাক্তুনা থম্লি। শরুক অসিগী মখাদা, রাজ্যশিংনা এসেৎ মনিতাইজেসন, লিস্তিং অমসুং দিস-ইনভেস্তমেন্তকী খুত্থাংদা শাগৎপা ঙম্বা শেনফমগী ৩৩%দগীনা ১০০%গী ফাওবগী শেন্দোই লৈতবা চহি ৫০গী লোন ফংগনি।

এসেৎ মনিতাইজেসন তৌবনা মখোয়গী ভেল্যু খঙহল্লি, মখোয়গী হোলদিং কোস্ত লৈহন্দে অমসুং মশিং য়ামদবা পব্লিক ফন্দশিংবু অনৌবা প্রোজেক্তশিংদা শিজিন্নবা য়াহন্দুনা নেস্নেল ইনফ্রাস্ত্রকচর পাইপলাইন থবক ওইনা পাংথোকপবু খোঙজেল য়াঙখৎহল্লি।

ভারত সরকারনা রাজ্যশিংদা স্কিম অসিগী মখাদা পীথবা শেনফমশিং অসি রাজ্যশিংনা তুং কোইনা কান্নবা ফংবা য়ানবগীদমক্তা অনৌবা অমসুং চত্থরিবা প্রোজেক্তশিংদা শিজিন্নগনি। শেনফমশিং অসি হৌজিক চত্থরিবা প্রোজেক্তশিংগী পীথোক্ত্রিবা বিল পীবদা শিজিন্নবসু য়াগনি।

*****