প্রধান মন্ত্রী নরেন্দ্র মোদীনা ঙসি রসিয়ান ফেদরেসনগী রাস্ত্রপতি ঐচ.ই. ব্লাদিমির পুতিনগা লোয়ননা তেলেফোন্দা ৱারী শানখ্রে।
লুচিংবশিংনা হেনগৎলক্লিবা কোবিদ-১৯গী লায়চৎ অসিগী মতাংদা খন্নখি। রাস্ত্রপতি পুতিন্না ভারত সরকার অমসুং মীয়ামগা পুন্না থবক তৌমিন্নবা অমসুং রসিয়ানা হিরম অসিদা অঙম্বা মতেং পাংগনি হায়না ফোংদোকখি। প্রধান মন্ত্রীনা রাস্ত্রপতি পুতিনবু থাগৎপা ফোংদোকখি অমসুং ভারত্তা রসিয়ানা মতেং পাংলকপা অসি ঐখোয়গী মতম শাংনা লৈরক্লবা মরীগী খুদম অমনি হায়না পনখি।  

লুচিংবা অনিনা মালেমগী ওইবা লায়চৎ অসি লান্থেংনবদা লৈবাক অনি অসিগী মরক্তা হৌজিক লৈনরিবা মরী অসি পনখি। ভারত্তা স্পুতনিক-ভি ভেক্সিন অসি খুদক্তা শিজিন্নবগী অয়াবা পীখিবদা রাস্ত্রপতি পুতিন্না থাগৎপা ফোংদোকখি। রুসিয়নগী ভেক্সিন অসি ভারত, রসিয়া অমসুং অতৈ লৈবাক্তা শিজিন্নবা ভারত্তা শাগনি হায়না লুচিংবশিং অসিনা পনখি। 

লুচিংবা অনিনা ঐখোয়গী অখন্নবা অমসুং ফজরবা মরীগী ইথিলদা তোঙান-তোঙানবা সেক্তরদা নাকন অনিগী হেন্না মরী চেৎশিন্নবা অসিগী মরুওইবা পনখি। প্রধান মন্ত্রী মোদীনা ভারতকী গগানয়ান প্রোগ্রামদা রসিয়াগী মতেং ফংবা অমসুং গগানয়ান এস্ত্রোনোত মরিগী ত্রেনিংগী রসিয়ান ফেজ মপুং ফানা লোইশিনখিবা অসিদা থাগৎপা ফোংদোকখি।    
লুচিংবশিংনা হায়দ্রোজেন ইকোনোমী য়াওনা রিন্যুএবল ইনর্জীগী লমদা মতেং পাংনবা হেনগৎনবা মিৎয়েং পনখি।
লুচিংবশিং অসিনা লৈবাক অনিগী ফোরেইন অমসুং দিফেন্স মিনিস্তরশিং য়াওনা মিনিস্তরগী থাক্তা অনৌবা ২+২ দাইলোগ অমা লিংখৎনবা ফিরেপ লৌখি।
লুচিংবা অনিনা ২০১৯গী সেপ্তেম্বরদা ব্লাদিবোস্তোক্তা পাংথোকখিবা অৱাংবা থাক্কী মীফম মনুংদা লৌখিবা মরুওইবা ফিরেপশিং অদুবু অমুক নিংশিংখি। প্রধান মন্ত্রীনা রাস্ত্রপতি পুতিনবু চহি অসিগী অরোইবদা ভারত্তা কোইরক্তুনা নাকন অনিগী ওইবা অৱাংবা থাক্কী মীফম ফমদুনা মখোয়গী মশাগী অমসুং থাজবা য়াবা ৱারী কয়া অমা শানবগী থৌরম অমা ঙাইদুনা লৈরি হায়না খঙহনখি। রাস্ত্রপতি পুতিন্না প্রধান মন্ত্রীদা ২০২১গী বি.আর.আই.সি.এস.গী ইন্দিয়াগী প্রসিদেন্সিগী মায় পাক্নবা অঙম্বা মতেং পীগনি হায়না থাজবা পীখি। লুচিংবা অনিনা নাকন অনিগী ওইবা অমসুং ইন্তর্নেস্নেলগী ওইবা হিরমদা য়াম্না তোইনা পাও ফাওনবা হায়না য়ানখি।

***