প্রধানমন্ত্রীগী লোইশঙ
প্রধান মন্ত্রীনা “পরিক্ষা পে চর্চা ২০২১”দা মহৈরোই, ওজা অমসুং মমা-মপাশিংগা ৱারী শাবগী ৱারোল
Posted On:
07 APR 2021 10:45PM by PIB Imphal
খুরুমজরী, মরুপশিংবু কমদৌবীরিবগে? পরিক্ষাগীদমক্তা নীংথিজনা শেম-শারী হায়বগী থাজবা থম্মি। মসি ‘পরিক্ষা পে চর্চা’গী অহানবা ভর্চুএলগী থৌরম্নি হায়বা অদোম্নসু খঙলে। ঐখোয়না চহি অমদগী কোরোনাগী মরক্তা হিংদুনা লাক্লি, মসিগী মরম্না ঐখোয়না অনৌবা থৌওং পাংথোকপগী মথৌ তারি। ঐহাক্নসু নখোয়গী মরক্তা তিনবা ঙমদ্রে অমসুং অতোপ্পা পাম্বৈগী খুত্থাংদা নখোয়গী নাক্তা তিনবা তারি।
অদোমগা নক্ননা উন্নবা ফংদবা, অদোমগী মাইথোংদা নুংঙাইবগী শক্তম উবা ফংদবা, অদোমগী থৱাই য়াওবা অমসুং হরাওবগী থৌওং থেংনবা ঙমদবা, ময়ামশিং অসি ঐহাক্কী ওইনা য়ম্না মাঙজবা অমনি। অদুবু পরিক্ষা, অদোম, ঐহাক্তি লৈরিবনিনা ঐখোয়না পরিক্ষাগী মতাংদা ৱারী মখা তানা শাসি অমসুং হন্দক্কী চহিসিদা ঐখোয়না থৌওং অসিবু লেপকুমসি।
ঐখোয়না হৌজিক ৱারী শাবা হৌরগনি। ঐহাক্না অহানবদা লৈবাক মীয়াম, মমা-মপা ওইবশিং অমসুং ওজাশিংদা ঐখোয়না পাংথোক্লিবা অসি ‘পরিক্ষা পে চর্চা’নি হায়না হায়জনীংই। অদুবু মসিদা পরিক্ষাগীতা নত্তনা অতোপ্পা ৱারী কয়া অমসু শাবা য়াই। য়াম্না নুংঙাইবা ফিভম অমা ওইহনগদবনি, ইশাদা থাজবগী অনৌবা ইথিল অমা লৈহনগদৌরিবনি। ঐখোয়না য়ুমদা লৈদুনা, ঐখোয়গী মশেলগী মরক্তা, মরুপশিংগা লোয়ননা ৱারী শাবগুম্না ঙসিসু ঐখোয় ৱারী শাসি।
ৱাহং ১-এ.
এম. পল্লভী, অন্ধ্র প্রদেশকী প্রকাসমগী পোদিল্লীগী সরকারগী হাই-স্কুল
ইকায়খুম্ননীংঙাই ওইরবা পি.এম.সরবু খুরুমজরী, (মোদীজীঃ খুরমজরী, নমস্কারম)। ঐহাক্কী মিং পল্লবী কৌই, ঐহাক ক্লাস ৯দা তম্লি। সর, ঐখোয়না অয়াম্বা মতমদা থেংনবদা, নীংথিনা লাইরিক তম্লবসু, পরিক্ষা নকশিল্লকপা মতমদা পাখৎপা ফাওনৈ। মসিগীদমক্তা ঐখোয়না করি ৱারোইশিন পুরক্কনি হায়বা চানবীদুনা অমুক্তা তাকপীয়ু। সরবু য়াম্না থাগৎচরি।
পল্লভীবু থাগৎচরি, অসিগুম্বা ৱাহংগা মান্নবা অমসু য়াওরি হায়না ঐঙোন্দা পাউদমখ্রে।
ৱাহং-১.বি.
অর্পন পান্দে – গ্লোবেল ইন্দিয়া ইন্তর্নেস্নেল স্কুল, মলেসিয়া
ইকায়খুম্ননীংঙাই ওইরবা প্রধান মন্ত্রী, ঐহাক্কী মিং অর্পন পান্দে কৌজৈ, ঐহাক গ্লোবেল ইন্দিয়া ইন্তর্নেস্নেল স্কুল, মলেসিয়াগী ক্লাস ১২গী মহৈরোইনি। ঐহাক্কী তুংগী পুন্সিদা মায়-পাকপা ফংনীংবগীদমক্তা ৱাহং অমা হংবা পামজৈ। মসিদা অদোম্না নীংথিজনা খন্থবীগনি হায়না ঐহাক্না থাজবসু থমজরি। ঐহাক্কী ৱাহংদি, ঐখোয়না পরিক্ষাগী শেম-শাবা মতমদা থোক্লকপা ৱাখল ৱাবা অমসুং পাখৎপা অসিগা মতৌ করম্না মাইয়োক্নগদগে? হায়বদি, মার্ক য়াম্না ফংগদরা নত্ত্রগা কোলেজতা মিং চনবা ফংগদরা হায়বনচিংবা। থাগৎচরি।
পাউখুম-
পল্লভী, অর্পন, অদোম্না অসিগুম্বা অকীবা ফাওবগী মতাংদা হায়বা মতমদা ঐহাক্কী মফমদসু অকীবা ফাওই। মসিদা ঐখোয়না কীগদবা অসি করিনো? নখোয়না অহানবা ওইনা পরিক্ষা থারিবরা? মমাংদা পরিক্ষা অমুক্তা থাদ্রিবরা? মার্চ অমসুং এপ্রিল থাদা পরিক্ষা তৌই হায়বসি অদোম্না খঙদবরা?
লোইনা খঙই। হান্নদগী খঙই। চহিচুপ্পদগী অদুম খঙলবনি। খঙহৌদনা লাকপদি নত্তেদনা। অদুগা খুদক্তা লাকপা নত্তেদনা, অতিয়া তাশিল্লকপদি নত্তেদনা।
মসিনা হায়বদি, নখোয়না কিরিবা অসি পরিক্ষা নত্তে, অতোপ্পা অমনি। মদু করিনো? নখোয়গী অকোয়বদা পরিক্ষা অসিনা ৱাফম খুদিংমক্নি হায়বা ফিভম অমা শাগৎখ্রে। মসি পুন্সিনি অমসুং মসিগীদমক্তা খুন্নাইগী চৎনবী, মরক-মরক্তসু স্কুল, মমা-মপা ওইবশিং অমসুং মরী-মতাশিংনা অসিগুম্বা ফিভম অমা শাগৎলি। করিগুম্বা অচৌবা লানবুং অমা ফাওদুনা অদোম্না চৎকদবনি হায়বগী ফিভম অমা শাগৎলি। ঐহাক্না মমা-মপা ওইবশিংদা মরু ওইনা হায়জনীংবদি, অদোম্না তৌবীরিবসি করিনো?
ঐহাক্কনা মসিবু খ্বাইদগী চাউবা অশোইবনি হায়না খল্লি। ওইফম থোকপদগী ঐখোয়না হেন্না খঞ্জিল্লে, য়াম্না হেন্না খঞ্জিল্লে। মরম অদুনা, ঐহাক্না পুন্সিগী অরোইবা পান্দম লৈতে হায়না খল্লি। পুন্সি অসি য়াম্না শঙই, খুদোংচাদবা কয়া লাক্কনি, মসিদি অপিকপা পোৎশক অমনি। ওজা, মহৈরোই, ইমুং-মনুং, মরুপ-মপাং ওইরো, ঐখোয়না তৌদবা য়াদে হায়বা পাখৎহনবগী পোৎলুম পীরোইদবনি। মসিনা হন্থরবদি, পরিক্ষা কীররোই, ইশাদা থাজবা হেনগৎলক্কনি, pressure থাদোকখ্রগনি অমসুং অঙাংশিংনা ইমুং-মনুংদা নুংঙাইনা লৈগদবনি, নুমিৎ খুদিংগী শান্নবা ৱারী ৱাতাই শাদুনা লৈগদবনি।
মরুপশিংনা য়েংবীয়ু, হান্নদি মমা-মপাশিংনা অঙাংশিংগা য়াম্না তোৎন-তিনদুনা অমসুং তেংবাংদুনা লৈনরম্মি। হীরম কয়া অমদা মখোয়গী শরুক য়াই। হৌজিক মখোয়না শরুক য়ারিবা অসি অয়াম্বা ওইনা কেরিয়র, পরিক্ষা, লাইরিক, সিল্লেবসখক্তদা শরুক য়াবা নত্তে হায়নসু ঐহাক্না লৌই। মসিনা মরম ওইদুনা, মখোয়না মখোয়গী অঙাংশিংগী অশেংবা তৌবা ঙম্বগী মতিক খঙবা ঙমদে। করিগুম্বা মমা-মপাশিংনা য়াম্না হেন্না শরুক য়ারবদি, মখোয়না অঙাংশিংগী অপাম্বা, মওং-মতৌ অমসুং থৱাই য়াওববু নীংথিনা খঙবা ঙমগনি অমসুং অৱাৎপা লৈরে খনবা হীরমশিংবু নীংথিজনা মেনখৎপা ঙম্নবা হোৎনগনি।
মসিনা মরম ওইদুনা, অঙাংগী মশাদা থাজবগী চাং হেনগৎকনি। মমা-মপাশিংনা মখোয়গী পাঙ্গল, অশোনবা খঙই। মরম অদুনা, মসিগী মতাং অসিদা মখোয়না উরিবা অশোনবগী চাংবু মপাঙ্গলদা ওন্থোক্নবা হোৎনবা য়াবা হোৎনৌ হায়দুনা হায়নৈ।
অদুবু, ঙসিগী মতমদা, মমা-মপা খরদি অদুক্কী মতিক য়াম্না চিনখ্রে, মচাশিংগী পুন্সিদা শরুক য়াবগী মতমফাওবা লৈত্রে। মসিগী মহৈদি করি ওইগনি? মচাগী তৌবা ঙম্বগী চাং খঙনবগীদমক্তা মখোয়গী পরিক্ষাগী মহৈগী চেদা য়েংবগী মথৌ তারকই। মরম অদুনা অঙাং অমগী তৌবা ঙম্বা অসি পরিক্ষাগী মহৈদা অদুমক লৈরে। মখোয়না ফংলিবা মার্ক অদু নত্তনা মমা-মপাশিংনা মচাশিংগী চাং ওনবা ঙমদ্রে।
মরুপশিং, ঐখোয়গী মফম অসিদা পরিক্ষাগী অতোপ্পা ৱাহৈ অমা লৈ- ‘চাংয়েং’। হায়বদি, ইশাবু লাকশিনগদবনি হায়বা। পরিক্ষানা অরোইবা খুদোংচাবা নত্তে। মসিদি ঐখোয়না অশাংবা পুন্সি অমা হিংনবগীদমক্তা ইশাবু লাকশিনবগী অখন্নবা খুদোংচাবা অমনি। ঐখোয়না মসিনা পুন্সিগী অরোইবা পান্দম্নি হায়না খনবা মতমদা খুদোংচাদবা থোক্লকপা হৌই। পুন্সি লোইবগী ৱাহং হংবা হৌরকই, অদুবু তসেংবদি, পরিক্ষা অসিদি পুন্সি হৌবগী খুদোংচাবা অমনি। ঐখোয়না অসিগুম্না লৌগদবনি। তসেংবদি, ঐখোয়না ইশাবু চাংয়েংগী ফিভমদা লাকশিন্নবা হোৎনজবা ঙম্নবা খুদোংচাবা থীগদবনি। ইশাবু হেন্না ফহন্দুনা থম্বা ঙমদুনা লৈগদবনি, মসিদগী চেল্লোইদবনি।
মরুপশিং, মথংগী ৱাহংদা অমুক মখা তারসি।
ৱাহং- ২-এ.
মিস পুনয়ো সুন্যা – ভিভেকানন্দ কেন্দ্র ভিদ্যালয়া, পাপুম্পরে, অরুনাচল প্রদেশ
ইকায়খুম্নরবা প্রধান মন্ত্রীবু নোল্লুকচরি (মোদীজীঃ খুরুমজরি), ঐহাক্কী মিং মিস পুনয়ো সুন্যা কৌই, ঐহাক ভিভেকানন্দ কেন্দ্র ভিদ্যালয়া, পাপুম্পরে, অরুনাচল প্রদেশকী ক্লাস ১১গী মহৈরোইনি।
ইকায়খুম্নরবা প্রধান মন্ত্রী, ঐহাক্না পামদবা সবজেক্ত অমসুং পরা খরা লৈ, ঐহাক্না মখোয়দগী নান্থোক্নবা হোৎনদুনা লৈ। ঐহাক্না য়াম্না হোৎনরবসু, ঐহাক্না নীংথিনা খঙবা ঙমদে। ঐহাক্না মসিদা অকীবা ফাওরিবা অসিনা ওইগদরা হায়না ঐহাক্না খল্লি। সর, মসিবু ঐহাক্না করম্না মাইয়োক্নগদগে? সরবু থাগৎচরি।
ফরে, ঐখোয়না অন্ধ্রদগী মলেসিয়াদা চত্তুনা, হৌজিক অরুনাচলদা অমুক য়ৌরে, মসিগা মান্নবা ৱাহং অমসু লৈ হায়না ঐঙোন্দা পাউদমখ্রে।
ৱাহং- ২-বি.
মিস ভিনীতা গার্গ, এস.আর.দি.এ.ভি. পব্লিক স্কুল, দয়ানন্দ ভিহার, দিল্লী
(মোদীজীঃ নমস্কারম) ইকায় খুম্ননীংঙাই ওইরবা প্রধান মন্ত্রী, ঐহাক্কী মিং মিস ভিনীতা গার্গ কৌই অমসুং এস.আর.দি.এ.ভি. পব্লিক স্কুল, দয়ানন্দ ভিহার, দিল্লীদা চহি ২৫ থবক তৌরক্লি। ঐহাক্কী ৱাহংদি, মহৈরোইনা য়াম্না অকীবা ফাওবা সবজেক্ত খরা লৈ, মরম অদুনা মখোয়না মসিদগী নান্থোক্নবা হোৎনৈ। পুৱারী অমসুং অঙ্কগী ওজাশিংনা মসিগী মতাংদা নীংথিজনা খঙই। হীরম অসিবু ঐখোয়না ওজা অমা ওইনা করম্না মাইয়োক্নগনি অমসুং ফিভম অসিবু ফগৎহন্নবা ঐখোয়না করি তৌবা য়াবগে হায়বা অমুক্তা তাকপীয়ু।
পাউখুম-
ঐহাক্কী মাংদা অসিগুম্বা মখলগী তোঙানবা হীরম অমা লাক্লে, ঐহাক্না মহৈরোইগী পুক্নিং ফাথনবা অমসুং ওজাশিংগী ৱাফমশিংগী ৱারোইশিন পীনবা হোৎনগনি। অদোম্না অখন্নবা সবজেক্ত নত্ত্রগা পরাদা অকীবা ফাওই হায়রি। অসিগুম্বা ফিভম মাইয়োক্নবা মীওইশিং অসি অদোমখক্তা নত্তে। মসিগী ৱাফম অসি ফাওদবা মীওই অমত্তা মালেমদা লৈতে।
অদোমগী নাক্তা য়াম্না ফবা ফুরিৎ ৫-৬ লৈ হায়না খল্লসি। মসিদগী ফুরিৎ ১ নত্ত্রগা ২দি নখোয়না য়াম্না পাম্লমগনি অমসুং হঞ্জিন-হঞ্জিন্নসু লিৎলমগনি। মসিনা অতোপ্পা ফুরিৎশিংদি কান্নদ্রে, চাদ্রে হায়বদি নত্তেদনা। ফুরিৎ ২দু নখোয়না য়াম্না হেন্না পামজরুবগী হঞ্জিন্না লিৎপগী ৱাফম্নি। মসিবু কয়াম তোইনা লিত্তোইনো, ঙরাংদসু লিৎখিবতা ঙাইরি হায়না ইমা-ইপাশিংনা শাওবসু য়াওরমগনি।
অপাম্বা-পামদবা হায়বসি মীওইবগী চৎনরোলনি অমসুং করিগুম্বা মতমদা ঐখোয়না অপাম্বা পোৎশক্কা হেন্না নকশিন্নবসু য়াওই। মসিদা অকীবা ফাওবগী করি ৱাফম লৈবগে?
তসেংবদি, অদোম্না করিগুম্বা পোৎশক খরা হেন্না পাম্বা মতমদা মখোয়দা হেন্না খোইদাজবা ফাওই, য়াম্না খোইদাজৈ। অদুবু নখোয়না পামদবা পোৎশকশিংগী মরমদা খনবদা নশাগী পাঙ্গলগী চাউরাকপা ৮০গী শরুক্তি মাঙহল্লি। মরম অদুনা ঐহাক্না মহৈরোইশিংদা হায়নীংবদি, নখোয়গী পাঙ্গল অদু চপ-মান্ননা য়েন্থোক্কদবনি, হীরম সবজেক্ত খুদিংদা চপ মান্ননা য়েন্থোকউ। নখোয়গী নাক্তা লাইরিক পাবগী পুং ২গী মতম লৈরবদি, সবজেক্ত খুদিং পাবা য়ানবা চপ মান্নবা মতম কাইথোকউ।
মরুপশিং, অদোমগী ওজা, ইমা-ইপাশিংনা অরায়বা হীরম হান্না পাথোকউ নত্ত্রগা লোইথোকউ হায়বা য়াম্না তোইনা থেংনরমগনি। অদুগা পরিক্ষাগী মতমদনা অরায়বা হান্না লোইথোকউ হায়না মরু ওইনা হায়নৈ। মতম লেম্লকান্দা অরুবা অমুক তৌ হায়নৈ। অদুবু লাইরিক পাবগী ওইনা য়েংলবদি, মসিগী পাউতাক অসি ওইথোকপা য়ারোই। অদুগা থবক ওইনা পাংথোকপসু য়ারোই। হীরম অসিবু অতোপ্পা মিৎয়েংদা ঐহাক্না অমুক্তা য়েংগে।
ঐহাক্না অমুক হায়নীংবদি, লাইরিক পাবগী মতমদদি অরুবা হান্না পাউ হায়নীংই। অদোমগী ৱাখল অমসুং ইশানা তগৎ-তগৎ তেক্লিঙৈদা মখোয়বু পাউ, অরুবা পারবা তুংদদি অরায়বশিং হেন্না অমুক্কা লায়থোক্লগনি।
ঐহাক্না থেংনখবশিং হায়জগে, ঐহাক্না মুখ্য মন্ত্রী ওইরিঙৈদা ঐহাকসু লাইরিক য়াম্না পাবগী মথৌ তারম্মি, য়াম্না তম্বা তারম্মি। পোৎল কয়া অমা নীংথিনা খঙদবা য়াদে। অরুবা ৱাফম অমসুং থবকশিং অসি ঐহাক্না মতৌ করম্না থেংখিবগে হায়ববু ঐহাক্না অয়ুক্তগী হৌনা অরুবা থবক্তগী হান্না হৌই। ঐহাক্কী ওফিসারশিংনা লুর-লুরবা থবক কয়া ঐহাক্কী মাংদা পুরগা লাকই অমসুং ঐহাক্কী পোৎলমশিংবু য়াঙনা খঙবা ঙম্বা অমসুং করম্বা মাইকৈদা ৱারেপ লৌগদগে হায়না খনবা ঐহাক্কী তোঙানবা ৱাখল্লোন লৈ হায়বসু মখোয়না খঙই। ঐহাক্কী তোঙানবা কাঙলোম অমা শেমজৈ। হোৎনজৈ। অদুগা ৱাখল য়াম্না থাদদ্রগসু য়াবা অরায়বা থবকশিংদি থেংলবা অহিঙদা, নুমিৎ চুপ্পগী থবক তৌবদগী ৱারবা তুংদা পাংথোকই। মদুদসু ঐহাক্না থেংলবা অহিঙ ফাওবা পাংথোকই। অদুগা অয়ুক্তা হৌগৎলকপা মতমদা ঐহাক্না লুরবা থবক কয়া অমুক্কা মাইয়োক্নৈ।
মরূপশিং, অতোপ্পা ৱাফম অমদি, ঐখোয়না ইশাদগী তম্ফম থোকই হায়বসিনি। মশাগী পুন্সিদা চাউনা মায়-পাকপা মীওইশিংনা হীরম খুদিংদা লোইনা হৈ-শিংবা নত্তে, করিগুম্বা হীরম অমদা য়াম্না নীংথিনা খঙ-হৈবনি।
খুদম ওইনা য়েংবদা, মালেম শিনবা থুংনা ফাউরবা, ভারতকী মীওই খুদিংনা শোন্নরিবা ইচে লতা। মহাক্কী মফমদা চত্তুনা ঐখোয়দা জীওগ্রাফী তাকপীয়ু হায়রুবা মতমদা মহাক্না য়ারক্তবা য়াই, য়ারক্লবসু নীংথিনা তাকপা ঙমগনি হায়বা ঐহাক থাজদে। অদুবু মহাক্না জীওগ্রাফীদা হৈ-শিংবা ওইদ্রবসু, ঈশৈ-নোংমাইগী লমদদি মহাক্না পাংথোকখিবা খুদিংমক, মপুন্সি কত্থোক্লিবা অসি ঐখয় খুদিংদা ইথিল পীনীংঙাই ওইরি। মরম অদুনা, অদোম্না সবজেক্ত খরা অসি য়াম্না লুবা ওইরবসু, অদোমগী পুন্সিদা অৱাৎপা লৈবা নত্তে। অদোম্না কাওরোইদবদি, মসিগী অরুবা সবজেক্ত অসিবু ইশাদগী লাপথোকহনগনু, মসিদগী চেনবীগনু, থেংনবীয়ু।
ঐহাক্না ওজাশিংদা হায়নীংবদি মহৈরোইশিংদা মখোয়গী মতম শেন্নবগী মরী লৈনবা থৌওংশিং, পাম্বৈশিংগী মতাংদা সীলেবসকী ৱাংমা লাল্লগা তাকপীয়ু, খন্ন-নৈনবীয়ু হায়বসিনি। মখোয়বু হীরম অসিগী মতাংদা লমজিং লমতাকহন্নীংই। চৈবগী মহুত্তা তাকপীবা। ঙাংবা-চৈবনা মখোয়দা পামদবা ৱাখল্লোন লৈহল্লি। মখোয়দা পুক্নিং হাপ্পীবনা মখোয়দা ৱাখল খন্দবা ঙম্বগী পাঙ্গল হাপ্পি। মখোয় খুদিংগী ৱাখল ফানবগীদমক্তা ক্লাস্তা পুক্নিং থৌগৎপগী ৱারোল হায়বীয়ু, অদুগা মহৈরোই অমদা চৎন-চৎনা মকোক্তা খুৎ থম্বীদুনা নুংশীবা ৱাহৈ-ৱাতা শিজিন্নদুনা মখোয়না য়াম্না নীংথিজনা হোৎনরিবা অদুদা খরা হেন্না থৱাই য়াওরবদি হেন্না অফবা ওইগনি হায়বনচিংবা ৱাফমসু থমহন্নীংই। মখোয়দা হায়রিবশিং অসি পাংথোকপা ঙম্বগী পাঙ্গল লৈ অমসুং মতৌ অসুম্না নীংথিনা হোৎনরবদি মসিনা কান্নবা কয়া অমা পুরকপা ঙমগনি হায়না হায়হন্নীংই।
করিগুম্বা অমতা তৌবীয়ু। অদোমগী পুন্সিদা য়াম্না লুবা ওইনা থেংনখিবা অদুবু হৌজিক্না য়াম্না লায়না পাংথোকপা ঙম্বা ৱাফম অমা নীংশিংবীয়ু। অসিগুম্বা থৌওং কয়া অমগী পরিং শেম্বীয়ু। খুদম ওইনা হায়রবদা, সাইকল থৌবা অসি য়াম্না লুখিবনি, অদুবু হৈরবা তুংদা য়াম্না লায়না থৌবা ঙমখি। ইরোইবা হৈরবা তুংদদি, ঈশিং কীরক্তে। লুই হায়না লৌরম্বা অদু ঐখোয়না পাঙ্গল ওইহনখি। অসিগুম্বা কয়া অমা অদোমগী পুন্সিদা থেংনরমগনি। মসিবু নীংশিংদুনা চেদা ইশিন্দুনা থম্লবদি, অদোম্না কনা অমত্তদা, ঐহাক্কী ইফমদা ফাওবা অরুবা ৱাহং অমত্তা হংবগী মথৌ তাররোই। মসিগী মরমদি, অদোম্না করিগুম্বা অমত্তা লুই হায়না লৌররোই। ঐহাক্না হায়রিবা অসিদা থাজবীদুনা, অদোম্না মসি অমুক্তা পাংথোকপীয়ু।
ৱাহং-৩.
নীল অনন্থ, কে.এম.- শ্রী অব্রাহম লিংদম, ভিভেকানন্দ কেন্দ্র বিদ্যালয়া মেত্রিক, কন্যাকুমারী, তমিল নাদু।
ইকায় খুম্নরবা প্রধান মন্ত্রীজী, বনক্কম (মোদীজীঃ বনক্কম বনক্কম), শ্রী অব্রাহম লিংদম, ভিভেকানন্দ কেন্দ্র বিদ্যালয়া মেত্রিক, কন্যাকুমারী, তমিল নাদুদা ক্লাস ১২ তম্লিবা মহৈরোইনি।
লাইচৎ অসিগী মনুংদা ওনলাইন্দা মহৈ তম্বগী ফীভম লাকপা অসিদা ঐখোয়দা অহাঙবা মতম য়াম্না লৈখি। ঐখোয়না মসিগী মতম অসিবু মতৌ করম্না খ্বাইদগী ফবা মওংদা শিজিন্নবা য়াবগে? ঐহাক্না মসিগী খুদোংচাবা ফংবগীদমক্তা প্রধান মন্ত্রীদা কোক নোঞ্জরী।
পাউখুম-
বনক্কম, অদোম্না পরিক্ষা মতমদা অহাঙবা মতমগী ৱারী শাবসিদা অদোমগী ইমা-ইপানা তাবদা করি ওইবগে অমুক্তা য়েংবীয়ু। ফরে, অদোম্না পরিক্ষাগী মতম য়ৌরক্লবা ফাওবদা অহাঙবা মতমগী ৱারী শাবসিদা ঐহাক্না য়াম্না নুংঙাইবা ফাওই। অহাঙবা মতমগী মতাংদা ৱারী শারি। য়েংবীয়ু মরুপশিং, অহাঙবা মতম অসি অরেম্বা মতম্নি হায়না খক খনবীগনি, মসিদি লন্নি, লন। মসি খুদোংচাবা অমনি। অদোমগী নোংমগী পুন্সিদা অহাঙবা মতম অসি শোইদনা লৈগদবনি, নত্ত্রবদি অদোমগী পুন্সি অসি রোবোৎকুম্বা অমা ওইগনি।
অহাঙবা মতম অসি য়াম্না অশম্বা মওংদা মখল অনি থোকপা য়াই-
অহানবদা, অদোম্না অয়ুক্তগী হৌনা ঙসিগী নুমিত্তা পুং ৩দগী ৪ ফাওবা, নত্ত্রগা লাক্কদৌরিবা নোংমাইজিং অসিদা নুমিৎ তঙখায় অমা হাঙগনি হায়বা খঙই। নত্ত্রগা তাং ৪দি ছুতীনি, নুংথিল ফাওবদি থবক অমত্তা লৈররোই হায়বা অদোম্না খঙই। অদুগা অতোপ্পা অমনা, অদোম্না খুদক্তা খঙবা অহাঙবা মতম। অদোম্না হান্নদগী মতম হাঙলগনি খঙলবদি অদোমগী ইমা-ইপা নত্ত্রগা ইচিল-ইনাওশিংদা মতম অসিদা মতেং পাংগে, মখোয়না করি থবক তৌগদৌরি হায়না হায়বা য়াই।
অনিশুবদা, অদোম্বু নুংঙাইহনবা করি করি লৈ হায়না অমুক্তা খন্থবীয়ু।
খরা মগুন লৈবা অমসুং অরূম্বা ৱাহৈনি- স্বান্ত সুখায়। হায়বদি, মসিদগী অদোম্না নুংঙাইবা, ৱাখল পোথাবা অমসুং পুক্নিং লৈতাবা ওইবা। অদোম্না অসিগুম্বা থবক তৌবা য়াই। অদোম্না ঐঙোন্দা হঙলবনিনা ঐহাকসু করি তৌবা পাম্বগে হায়বা খল্লক্লে। ঐহাক্না ঐহাক্কী নোংমগী পুন্সিদা অহাঙবা মতম ফংলবা অদুগা চৌক্রি অহাইবীসু লৈরবদি, ঐহাক্না মদুদা ফমদুনা ঙৈহাক্তি শোইদনা ফমগনি। য়াম্না ৱাবা মতমদা মিনিৎ ৫গী মতম ফংলবা, নত্ত্রগা করিগুম্বা অমা তৌরিঙৈদা অহাঙবা মতম হেক ফংলবদি ঐহাক্না মদুদা শোইদনা ফমগনি। করিগীনো হায়বদি ফজনা খঙদ্রে, অদুবু মসিনা ঐহাক্কী ৱাখল য়াম্না নুংঙাইহল্লি।
অদোম্না করিগুম্বা অহাঙবা মতম ফংবা ঙম্লবদি, মদুগী খ্বাইদগী হেন্না কান্নবা লৌগদবনি। অদুগা অদোমগী পুন্সি অসি অহাঙবা মতম ফংবা মতমদা, নুংঙাইবা থবক অমা তৌবা ঙম্বা পুন্সি অমা ওইহনগদবনি।
অদুগা অহাঙবা মতমদা করম্বা থবক্তগী নাথৈগদগে হায়বা খঙবসু য়াম্না মরু ওইকো, নত্ত্রবদি, মসিগী থবকশিং অসিনা অদোমগী মতম লোইনা মাংহনগনি। খঙবসু খঙহৌরোই অমসুং লোইশিল্লকপা মতমদা ইশা তেকখৎপগী মহুত্তা হেন্না ৱাগনি।
অহাঙবা মতমদা ঐখোয়না লাংতক্নবা ফাওবা থবকশিং তৌদুনা খঙবা হেনগৎনবা অমসুং অসিগুম্বা অতোপ্পা করি লৈ হায়না থিদোকপা য়াই হায়নসু ঐহাক্না খল্লি। অদুগুম্না তৌবদা য়াম্না কান্নবা ওইবসু য়াই। অদোমগী ইমানা চাক থোংলিবা ওইরবদি, য়েংবীয়ু, অনৌ-অনৌবা থবক কয়া মনুং হুৎনা খঙনবা হোৎনবা য়াই। অমসুং মদুনা হকথেংনবা চৈথেং পীরক্ত্রবসু, অদোমগী পুন্সিদা কান্নবা থবক কয়া অমা ওইহল্লকপসু য়াই।
অহাঙবা মতম অসিদা অসিগুম্বা থবক-থৌরম কয়া অমগা শাগোন্নদুনা অদোমগী ৱাখল্লোন ফোংদোকপা য়ানবা অমসুং তোপ-তোপ্পা মগুনবু মপান্থোংদা পুরকপা ঙম্নবা হোৎনবসু য়াই।
মসিদা অদোম্না ইশাগী নুংগী মতিক্কা মরী লৈনহনবা য়াই। থৌওং অসি পাংথোক্নবা পাম্বৈ কয়া অমা লৈ। অদোম্না অসিগুম্বা পাম্বৈ কয়া অমসু খঙলবনি। শান-খোৎনবা, ঈশৈ-নোংমাই, লাই য়েকপা, ৱারী ইবনচিংবা থৌওং কয়া অমা তৌবা য়াই।
ইশাগী ৱাখল, অনীংববু ফোংদোকপগী অনৌবা পাম্বৈ অমা থিবীয়ু, খুদোংচা অমা পিবীয়ু। লৌসিংগী ঙমখৈ অসি অয়াম্বা মতমদা নখোয়গী নাক্তা লৈবা, উবা অসিদা লোইশিল্লি। অদুবু অনৌবা থৌওংগী খুত্থাংদা মসিবু য়াম্না পাকথোক-চাউথোকহনবা য়াগনি। য়াম্না মনুং হুৎনা খঙহনবসু য়াগনি। মমাংদা কনা অমত্তনা য়ৌখিদ্রিবা মফমদা ফাওবা অনৌবা থৌওং পাংথোকপনা য়ৌহনবসু ঙমগনি। রবিনা য়ৌবা ঙমদবা মফমদা কবিনা য়ৌই হায়না ঐখোয়গী মফমদা হায়নবা অমা লৈ, মসি অনৌবা থৌওং পাংথোকপগী মতাংদনি।
ৱাহং-৪-এ.
আশয় কেকাৎপুরে – বেঙ্গালুরু, করনাতকা
ইকায় খুম্নরবা প্রধান মন্ত্রীবু খুরুমজরি, ঐহাক বেঙ্গালুরু, করনাতকগী আশয় কেকাৎপুরেনি। অঙাংদা good values তাকপীবগী খ্বাইদগী ফবা পাম্বৈ অসি করিনো হায়না ঐহাক্না হঙজনীংই। থাগৎচরি।
ঐহাক্কী মফমদা হৌজিকা হঙলক্লিবা ৱাহং অসি নমো এপ্তসু য়াওখ্রে, মসিগী ভিজুএলদি ঐহাক্কী নাক্তা লৈত্রে। ৱাহং অসি ঐহাক্না য়াম্না পামজখি, মরম অদুনা ঐহাক্না অদোমগী মফমদা থমজনীংবনি। পত্নাদগী প্রবিন কুমারনা হঙখিবা ৱাহংনি।
ৱাহং-৪-বি. – প্রবিন কুমার, পত্না, বিহার
সর, হৌজিক্কান অসি মমা-মপাগী ওইনা অঙাং য়োকপদা য়াম্না লুবা অমা ওইরে। মসিগী মরমদি হৌজিক্কানগী মতম অমসুং অঙাংনি। অসিগুম্বা ফীভম অসিদা ঐখোয়গী অঙাংশিংগী লিচৎ-শাজৎপু মতৌ করম্না অফবা ওইহনগদগে?
পাউখুম-
য়াম্না খঙ-হৈবা মপা অমা ওইনা প্রবিন কুমারনা হংলক্লিবা ৱাহং অসি ঐহাক্কী ওইনা য়াম্না লুবা ৱাহংনি। অদোম্না অহানবদা ইশাগী ওইনা অমুক্তা হান্না খন্থহন্নীংই। পুন্সি হিংবগী মওং অসি অদোম্না খনবদি নত্তেকো, অদোম্না মদুগী মান্নবা পুন্সি মহিংদু অদোমগী অঙাংশিংসু হিংহন্নীংই। অসুম্না তৌবদি নত্তেকো? অহোংবা অমা লাকপা মতমদা শোইরে, valueগী মগুন লৈরক্ত্রে হায়না অদোম্না খল্লি। স্তার্ত-অপকা মরী লৈনবা নহাশিংগী থৌরমদা ঐহাক্না ৱা ঙাংখিবা অমা ঐহাক্না নীংশিংলি। মতমদুদা বেঙ্গোলগী ইচানুপী অমনা মশাগী career থাদোক্তুনা স্তার্ত-অপ অমা হৌখিবদা থেংনখিবশিং পাউদমখি। ঐহাক্না মদুবু কৈদৌনুংদা কাওবা ঙম্লোই। ঐহাক্না ইশাগী থবক, career থাদোক্তুনা স্তার্ত-অপ তৌরে হায়না খঙবদা ইমানা “পুম্লোই লোইরে” হায়খি। হায়বদি, মহাক্কী মমাদা য়াম্না থাজদবা অমা ফাওখি, অদুবু তুংদা স্তার্ত-অপ অদু য়াম্না মায়-পাকখি।
অদোম্না অদোমগী অপাম্বা পুন্সিদা ইচাশিংসু চীংশিল্লিবরা হায়না অদোম্না খনফম থোকই। মরম অদুনা, অদোমগী ইমুং, চৎনবী অদুদা value করম্না হাপকদগে হায়বসি ঐখোয়না খঙফম থোকই।
মীয়াম সেবা তৌবনা, ইশ্বরগী সেবা তৌবনি হায়না ঐখোয়গী হায়নবী অমা লৈরি। মসি ঐখোয়গী চৎনবীদা মগুন হায়না কৌনৈ। অদুবু অদোমগী য়ুমদা লাই-তিন খুরুম্বগী থবক্তি তৌরমগনি, মালেমদা অদোম অসি লাইদা য়াম্না থাজবনি হায়না তাক্লি, লাই-তিনগী থৌওংনা থল্লবা পুন্সিনি হায়না তাক্লি। অদুবু অদোম অসি মীয়ামগী সেবাদদি কয়া উবা ফংদে। হৌজিক অদোমগী ইচাশিংনা অসিগুম্বা মিৎয়েং য়েংলকপা মতমদদি অদোমদা নুংঙাইতবা ফাওরে। ৱাহং ময়াম অমা হংনীংলে, হংফমসু থোকই।
ঐহাক্না অদোমগী মফমদা ৱাহং হংবা নত্তে, মীয়ামগী চৎনবী অমগী মতাংদা হায়বনি। মীওই খরদি অসিগুম্না তৌদে। অঙাংশিংগী মপোক নুমিৎ পাংথোকই, য়াম্না শেম-শাদুনা পাংথোকই। অদোমগী য়ুমদা থবক তৌরিবা মীওইশিংদা পুং অসুফাইবদা থবক লোইশিল্লো, মী লাকপা হৌরগনি, নখোয়সু হল্লো অমসুং নীংথিজবা ফি-রোল শেত্তুনা ইমুং মনুংগী মীওইশিংগা লোইননা অমুক লাক্কদবনি হায়না কনা কনা হায়নবা য়াওবগে? মখোয়দা অদোম্না মরি হায়বগে হায়বা অমুক্তা য়েংথবীয়ু। ঙসি য়ুমদা মী লাক্কনি, অদুনা খরা থেংনা লৈথরো। অসুম্না হায়বগী মহুত্তা অদোম্না করি হায়বগে? য়েংউ, হয়েং মী য়াম্না লাক্কনি, থবক য়াম্না লৈগনি, য়ুমদা থেংলক্কনি হায়রম্লগা লাকউ। ঐহাক্কী থবক অমগীদমক্তা মীয়াম লাক্কনি হায়না লাংনরি, ঐহাকসু নুংঙাইরি, অদুবু মসিগীদমক্তা শু-নোম্লিবা মীওইদুদি শরুক য়ারোইদৌরি হায়বা অদোমগী অঙাংশিংনা উবা ফংই। তাঞ্জা অসিদা অঙাংগী ৱাখলদা চরাংনবগী ফিভম লাক্কল্লি।
অদোমদা ঐহাক্না খুদম অমগা পীগে। ঐখোয়না ইচানুপা, ইচানুপী অমত্তনি হায়নৈ। মসি ঐখোয়গী মগুন্নি, ঐখোয়গী মফমসিদা লাইগী শাওইনবু খন্নরিবা অসিগুম্না লাই নুপীশিংসু য়াম্না মরু ওইনা লৌনৈ। অদুবু ঐখোয়গী ইমুং-মনুংশিংদা নুপামচা অমসুং নুপীমচাশিংদা খঙদনা চত্থরিবা থৌওংশিংদা চাং মান্নদবা য়াওই। অসিগুম্বা নুপামচাশিং অসিনা মহাক্কী পুন্সিগী মখা তারকপা মতমশিংদা নুপীদা মান্নবা মিৎয়েং য়েংবগী ফিভমদা অৱাৎপা অদুমক লাকই।
ইমুং-মনুং অমগী চৎনরোলনা ফজরবদি অকায়বা থৌদোক্না মায়-পাকপা ঙমদে হায়বসি অচুম্বনি, অদুবু নুপামচা অমসুং নুপীমচাগী মরক্তা খেৎনবা খরদি অদুমক লৈগল্লি। মরম অদুনা ঐখোয়না চৎন-লোনচৎ খরা শেম্বা অদুদা শিংনবা খরা অদুমক লাকই, অঙাংশিংগী ৱাখল্লোন্দা খেৎনবা অদুম লাকই। মরম অদুনা মসি তৌগদবনি হায়বসি হকথেংননা হায়বগী মহুত্তা, মসিগী মতাংদা পন্দুনা ইথিল পীনবা হোৎনবনা হেন্না অচুম্বা ওইগনি।
অকোনবদদি, অঙাংশিংনা য়াম্না হৈ-শিংবা ওইরকই। অদোম্না হায়বা অদু মখোয়না পাংথোকপা নত্ত্রগা পাংথোক্তবা য়াই, মসিমক তৌগনি হায়বদি য়াম্না লুবা ওইগনি। অদুবু অদোম্না হায়রিবা অদুদা মখোয়না লুনা খন্থদুনা মতৌ তম্নবা হোৎননীংবদি য়াই। অদুগা ঐখোয়না ঐখোয়গী মগুন, পুৱারী, চৎনবী, হৌনা-লোনচৎকী ৱারী তৌদুনা অঙাংসিংদা ইথীল পীরবদি, মখোয়না অদোমগী অপাম্বা লিচৎ-শাজৎ ইলহনবদা অরায়বা ওইগনি।
ৱাহং-৫.
প্রতিভা গুপ্তা, লুধিয়ানা, পঞ্জাব।
খুরিমজরী, ঐহাক প্রতিভা গুপ্তনি অমসুং লুধিয়ানাগী কুন্দন বিদ্যা মন্দীরদগীনি। সরদা ঐহাক্না হংজনীংবা ৱাহংদি, ঐখোয়না থবক অমা তৌহন্নবা অঙাংশিনবু তানৈ, ঐখোয়না মখোয়গী থবকশিংবু মশা মথন্নতা তৌহন্নীংনবা মতৌ করম্না ইথিল হাপকদগে? থাগৎচরি।
পাউখুম -
অদোম্না ৱারৌদ্রগদি, ঐহাক্কী ৱাখলগা অদোমগা ৱাখলগগি মরক্তা মতাং অসিদা খেৎনবা অমা লৈ হায়নীংই। অঙাংশিংনা ঐখোয়দগী য়াঙবা হেল্লি, অদুনা ঐখোয়না মখোয়বু তানরীবনি।
অঙাংশিংদা তাকপীনবা, তম্বীনবা, হৌন-লিচৎ খঙহন্নবগীদমক্তা, মথৌদাং খঙহন্নবা হোৎনবা অসি ইমুং-মনুংগী তৌফম থোকপনি হায়বসি অচুম্বনি। অদুবু মখোয়না চাউরবা ফাওবা মখোয়দা ৱাফম অসি খঙহন্নবা হোৎনবগী মথৌ তাবসু লৈ। ঐখোয়না করিগুম্বা কাঙলোন অমা শেম্মি অমসুং অঙাংশিংবু ইলহন্নবা হোৎনৈ। শিংনবা অসি মসিদগী হৌরকই। ঐখোয়না মসিবু খুন্নাইগী থাক্কী খুদম ওইনা উহল্লি। মমা-মপাশিংনা মখোয়গী ৱাখল্লোন্দা অঙাংশিংগীদমক্তা পান্দম অমা থম্মি, হীরম খরা য়াৎথোকই অমসুং নীংজবা খরসু শাগৎলি। অদুগা মসিবু মঙফাওনবগী থৌদাংবুনা অঙাংশিংদা পীশিল্লি। অঙাংশিংবু করিগুম্বা কান্দা খুৎলায় ওইনা শিজিন্নৈ। ঐহাক্কী ৱারোল অসি খরা কল্লবসু, ৱারৌবীরোই নীংজৈ। অদুগা অঙাংশিংনা হীরম অসিদা মায়-পাকপা ঙমদ্রবদি, মখোয়দা ইথিল নত্ত্রগা পুক্নিং লেপ্তে হায়না খল্লি অমসুং হায়নৈ।
মীওই অমবু ইথিল পীবগী অহানবা তাঙ্কক্তি – ত্রেনিং পীবনি। নীংথিজনা ত্রেনিং তৌবীবা। অঙাং অমগী ৱাখলনা ত্রেন তৌরবা তুংদা ইথিল পীবগী তাঙ্কক অমুক হৌরকই। ত্রেনিং তৌবগী পাম্বৈ অমসুং থৌওং কয়া অমা লৈ।
অফবা লাইরিক, অফবা সিনেমা, অফবা ৱারী, অফবা শৈরেং, অফবা পাউতাক নত্ত্রগা পুন্সি থেংনবগী অফবা থৌদোকশিং, মখোয়শিং অসি ত্রেনিং তৌবগী খুৎলায় মখল অমনি। অদোম্না অদোমগী অঙাংশিংনা অয়ুক ঙন্না হৌগত্তুনা লাইরিকা পাবা পাম্মি, মখোয়দসু মসিগী মতাংদা হায়বী, চৈবসু য়াওই, অদুবু অদোম্না মায়-পাকপদি ঙমদে। অদুবু অয়ুক ঙন্না হৌগৎপগী কান্নবগী মতাংদা নাকোইননা পনবা লাইরিকশিংগী মরমদা অদোমগী ইমুংদা ৱারী শাবদি য়াওবরা? ঐখোয়গী মফম অসিদদি মীওইশিংনা ব্রহ্ম মুহুরতকা লোয়ননা মখোয়গী নোংমগী পুন্সি হৌদোকই। মসিবু মখোয়গী কাঙলোন অমনি খন্দুনা ইন্দুনা চৎনৈ।
নাকল অমদনা, হৌজিক্কান্দি অয়ুক্কী পুং ৫গী ক্লবকী মতাংদা ৱারী শানবা হৌরে। অসিগুম্বা লাইরিক্কী মতাংদা অদোম্না ইমুং-মনুংদা হৌদোকপা য়াওরবরা? নত্ত্রগা মসিগী মতাংদা থোকপা হীরম অসিগী মতাংদা সাইন্তিফিক ওইবা মওংদা নৈনবা দোক্যুমেন্তরী ফিল্ম য়েংবা য়াওরবরা? মসিবু অমুক্তা তৌদুনা য়েংবীয়ু। অঙাংশিংদা অয়ুক ঙন্না হৌগৎনবা ত্রেনিংদি মশা মথন্নতা অদুমক তৌরগনি, অমসুং ইশামকসু ইথিল লৈরগনি। মসিবু অকোয়বগী ফিভম শাগৎপা কৌই অমসুং ইমুং অমদা মসি খ্বাইদগী মথৌ তাই।
অদোম্না ইচাবু তম্বাক্তা থম্লিঙৈগী মখোয়গী অঙাং ওইরিঙৈগী পুন্সিবু অমুক্তা নীংশিংদুনা য়েংউ। অদোমগী ফুরিৎখাউদা কোলোম থেৎপা নত্ত্রগা অনোক উপ্পা উবদা, মখোয়না মদুদতা পায়নবা চিংনবা হোৎনবনি, মদুদা অদোম্না করি তৌই? অদোম্না অঙাংদগী অনোক লৌনবা হোৎনবদা মখোয়না কপ্পি, মসিদা ৱাখল খন্থবা মমা-মপাশিংনা করি তৌনৈ? মখোয়গী মমাং-মক্তদা করিগুম্বা অমা থম্বী, মদুদা মখোয়না ঙাদুনা লেপ্পি। অনোক থাদোকই, পোৎ অনৌবদুগা শান্নন্দুনা লৈ। কপ্পসু কপ্ত্রে, অদোমগী অনোকসু লৌরে, ৱারোইশিন ফংলে। মহাক্কী ৱাখল চিংথোক্তুনা হেন্না পাম্বা অমদা মখোয়গী ৱাখল থৈদোকই, কান্নবা অমা উহন্দুনা, ইথিল পীবগা মান্নৈ। থৌওং অসি অঙাংনা য়াম্না পিক্লিঙৈদা অদোম্না তৌবীখি, চাউরবা মতুংদসু করিগী তৌবা য়াদবগেনে?
“থাউমৈ অমনা অতোপ্পা থাউমৈ অমবু থাল্লি” হায়বসি অদোম্না তারম্লগনি। অদোমগী অঙাংবু নম্ফুদা তাকপীগদবা নত্তে, মশানা পামজনা তমহন্নীংবা ওইগদবনি। অদোম্না য়েংনীংলিবা অঙাংগী নুংদা য়াওরিবা করিগুম্বা অমা খঙনীংবগী ইথিল অদু মশাগী মনুংদগী লাকচগদবনি। অদোমগী থবক্কী পাম্বৈনা মদুবু ওইথোকহনবা ঙম্লগদি, অদোম্না থবক ওইনা পাংথোক্তুনা অঙাংগী মাংদা মখোয়না য়েংদুনা তম্নবা মওংদা উৎকদবনি।
অঙাংদা কিহন্দুনা, মসি তৌরবদি, মসি ওইগনি হায়না মখোয়দা অকিবা ফাওহনবগী থবক অসি অদোম্না পাংথোক্লোইদবনি হায়বসি ঐহাক্না অমুক্কা হন্না নীংশিনহন্নীংই। চানবীদুনা, অসিগুম্বা থৌওংসি তৌবীগনু। মসিগী থৌওং অসি শিজিন্নদুনা মখোয়বু অনীংবা অপাম্বা তৌহনবা অসি য়াম্নদি লায়, অদুবু মসিনা negative motivation লৈহনবগী ওইথোকপা য়াবা য়াম্না লৈ। মসিবু অমুক হেক পাংথোকখ্রবদি, অঙাংদা ইথিল পীবগী থৌওং লোইরবনি। মরম অদুনা অফবা ইথিল পীবদা হেন্না পুক্নিং চঙগদবনি।
অঙাংশিংবু ইথিল পীবগী মন্ত্রা অসি ঐখোয় অহলশিংগী ওইরিবনি। মীওইবা খুন্নাইগীনি।
ৱাহং-৬-এ.
তনয়, মীরমগী মহৈরোই, সামিয়া ইন্দিয়ন মোদেল স্কুল, কুৱেৎ
প্রধান মন্ত্রী সরবু খুরুমজরি। (মোদীজীঃ খুরুমজরি) ঐহাক্কী মিং তনয় কৌই অমসুং ঐহাক সামিয়া ইন্দিয়ন মোদেল স্কুল, কুৱেৎকী মহৈরোই অমনি। ঐখোয়না পুন্সিগী লানফম্বু মতৌ করম্না থেংনগদগে হায়বা ৱাহং অসি হংজনীংই। সরবু থাগৎচরি।
ৱাহং-৬-বি.
অশ্রফ খান, মুসোরি, উত্তরাখন্দ
নমো এপ্তা মুসোরি, উত্তরাখন্দগী শ্রীমান অশ্রফ খান্না অসুম্না ইবীরকখি।
সর, ঐখোয়না ঐখোয়গী মথক্কী ইখুরাগী মচাশিং অমসুং মরুপশিংগা ৱারী শাবদা মখোয়না ঐখোয়না স্কুল তম্লিবনীনা পুন্সি অসি উদ্রি হায়না হায়বী। পুন্সিগী অশেংবা লানফমদি স্কুল লোইরবা তুংদা লাক্কনি। অদু ওইরবদি, ঐখোয়না লাক্কদৌরিবা শিংনবশিং অসিবু থেংননবা মতৌ করম্না শেম-শাগদগে?
পাউখুম-
তনয়, অদোম্না ঐহাক্কী কুৱেত্তগী ৱারী শারি, অদুবু কনাগুম্বা অমনা অদোমগী খোঞ্জেল অসি খঙজিনবা য়াওবগে? মরমদি, অদোমগী খোঞ্জেল অসি ইশ্বরগী খুদোলনি। মসিনি অদোমগী ইমা-ইপা, মরুপ অমসুং ওজাশিংনা হায়বরা? মসি অদোম্না খনলুবরা? অদোমগী খোঞ্জেল তারবা তুংদা ইশ্বরনা অদোমগী মফমদা য়াম্না নীংথিবা খোঞ্জেল অমা পীবি হায়বসি ঐহাক্তি য়াম্না কন্না থাজরে। অদোমগী খোঞ্জেল অসি রেকোর্দসু তৌরি। করিগুম্বা মতমদা, মসিগী মতাংদা অমুক্তা খন্থবীয়ু, মসিনা অদোমগী খ্বাইদগী চাউবা লন ওইগনি। ফরে, তনয়গী ৱারীদা ঙৈহাক তাউরুরে, হৌজিক অদোমগী ৱাহংদা লাক্লসি।
অহানবা ওইনদি, অদোমদা অসিগুম্বা ৱাফম হায়রিবা অসি পাউতাকপুদি পীবনি, অদুবু মখোয়গী নুংগী ৱাখল্লোন্দদি মশাবু হেরো ওইহন্নবা হোৎনরিবনি। নত্ত্রগা মখোয়গী মাইথীবা কয়াদগী নান্থোকপা য়ানবা হায়দুনা ৱা য়াম্না চাউথোকহল্লিবনি। মরম অদুনা পুন্সিদা শিংনবা য়াম্না লৈ হায়না ফোংদোক্লিবনি।
(Release ID: 1714017)
Visitor Counter : 215
Read this release in:
Punjabi
,
Hindi
,
Marathi
,
Telugu
,
Urdu
,
Odia
,
English
,
Bengali
,
Bengali
,
Assamese
,
Gujarati