জয় হরি হোল! জয় হরি হোল!
হরি হোল! হরি হোল!জয় হরি হোল!

বঙ্গলাদেশ সরকারগী ইকাই খুম্নরবা মীহুৎশিং, লৌউ-শিংউগী মন্ত্রী, দা. মোহম্মদ অব্দুর রজ্জাকজী, শ্রী শেখ সেলিমজী, লেফ্তিনেন্ত কর্নেল মুহ্ম্দ ফারুগ খানজী, ভারতকী পার্লিয়ামেন্তগী ঐহাক্কা থবক তৌমিন্নরিবশিং অমসুং ঐহাক্কী মরুপ শ্রী শ্রী হরিচন্দ্র থাকুরজী চৎনবী অমসুং অফবশিং মশক তাক্লিবা শ্রী শান্তনু থাকুরজী, ভারত্তগী লাকপা ওল ইন্দিয়া মতুৱা ফেদরেসনগী মীহুৎশিং, শ্রী শ্রী হরিচন্দ্র থাকুরজীদা অখন্নবা ইকাই খুম্নবা উৎলিবা ঐহাক্কী ইচিল-ইনাওশিং অমসুং ইকাই খুম্নরবামুপশিং!
ময়াম পুম্নমকপু খুরুমজরি!

ঙসি শ্রী শ্রী হরিচন্দ্র থাকুরগী থৌজালগা লোইননা ঐহাক্না ওরাকান্দী থাকুবারীগী শেংলবা লাইফম অসিদা খুরুমজবগী খুংদোংচাবা ফংজরি। ঐহাক্না শ্রী শ্রী হরিচন্দ্র থাকুরজী অমসুং শ্রী শ্রী গুরুচান্দ থাকুরজীগী খুয়া খাদা ইকোক নোন্না খুরুমজরি।

মফম অসিদা মশক নাইবা মীওই খরগা ৱারী শাবদা মখোয়না হায়, কনানা ভারতকী প্রধান মন্ত্রীনা ওরাকান্দীদা লাক্কনি খল্লুগনি। ঐহাক্ন ঙসি ভারত্তা লৈরিনা ‘মতুৱা কাংলুপ’কী ইচিল-ইনাও করোর কয়ানা ওরাকান্দীদা লাক্লে হায়না ফাওই। ঙসি মফম অসিদা ঐহাক্না লাকপদা, ঐহাক্না শেংলবা লমদম অসি মখোয়গী মহুৎ শিন্দুনা শোকখি।

ঐহাক্না নুমিৎ অসি, শেংলবা থৌরম অসি চহি কয়াদগী ঙাইজরক্তুনা লাকখি। ২০১৫দা অহানবা ওইনা ঐহাক্না প্রধান মন্ত্রী অমা ওইনা বঙ্গলাদেশতা লাকখিবা মতমদা ঐহাক্না মফম অসিদা লাক্নিংবগী অপাম্বা ফোঙদোক্লমখি। ঐহাক্কী অপাম্বা অদু ঙসিদা থুংজরে।

ঐহাক্না মতম চুপ্পদা শ্রী শ্রী হারীচন্দ থাকুরজীবু তুংইন্নরিবা মীওইশিং অমসুং মহাক্কী ইমুং-মনুংদগী মীনুংশি অমসুং থৌজাল ফংজদুনা লাকখি। ঙসি থাকুরবারীদা ঐহাক্না লাকপা ফংজরিবা অসিসু মহাক্কী থৌজালনি হায়না ঐহাক্না লৌজৈ।

ঐহাক্না নীংশিংলি, ৱেস্ত বেঙ্গলগী থাকুর নগরদা ঐহাক্না চৎপা মতমদা ঐহাক্কী মতুৱা ইচিল-ইনাওশিংনা মখোয়গী ইমুংগী মীওই অমগুম্না ঐহাকপু নুংশিনা লোইনবিখি। মরু ওইনা ‘বোরো-মা’ (ইমা অহল)না ইমা অমগুম্না মহাক্কী থৌজাল পীবি মদু ঐহাক্কী পুন্সিগী খ্বাইদগী অতাংবা মীকুপ অমনি।

ৱেস্ত বেঙ্গলগী থাকুর নগরদগী বঙ্গলাদেশকী থাকুরবারী ফাওবদা চপ মান্নবা ভক্তি, চপ মান্নবা থাজবা অমসুং চপ মান্নবা অৱা-নুংঙাই ফংজখি।

ঐহাক্না বঙ্গলাদেশকী জাতিগী নুমিৎকী থৌরম অসিদা ভারতকী ইচিল-ইনাও করোর ১৩০গী মহুৎ শিন্দুনা নখোয়দা য়াইফ-পাউজেল পীজরি। বঙ্গলাদেশনা নীংতম্বা ফংখিবা চহি ৫০ মপুং ফাবদা ঐহাক্না ময়াম পুম্নমক্তা নুংঙাইবা ফোঙদোকচরি, য়াইফ-পাউজেল পীজরি।

ঙরাং ধাকাদা পাঙথোকপা জাতিগী নুমিৎকী থৌরমদা ঐহাক্না লৈবাক অসিনা য়োকখৎতুনা থম্লিবা চৎনবী, বঙ্গলাদেশকী মথৌনা-মরিংজেলগী ফজরবা তেব্লো অমা উজখি অমসুং নখোয়না হায়রিবা অসিগী য়াম্না মরু ওইবা শরুক অমা ওইরি।

মফম অসিদা লাক্ত্রিঙৈ মমাংদা ঐহাক্না জাতির পিতা বাঙ্গোবৌন্ধু শেখ মুজিবুর রাহমানগী ‘সমাধি শোধৌ’দা চৎতুনা হৈকৎ-লৈকৎ থমখি। শেখ মুজিবুর রাহমানগী লুচিং পুরেল, মহাক্কী মঙলান অমসুং মহাক্না বঙ্গলাদেশকী মীয়ামদা থমখিবা থাজবা অসি শিংথানিংঙাইনি।

ঙসি ভারত-বঙ্গলাদেশ সরকারশিংনা লৈবাক অনিগী মরক্তা লৈরিবা মহৌশাগী মরীশিং অসি চেৎশিনহন্নবা হোৎনরিবা অসি চৎনবী অমা ওইনা চপ মান্নবা থবক অসি চহি কয়াদগী থাকুরবারী অমসুং শ্রী হারীচন্দ থাকুরজীনা পাঙথোক্তুনা লাকখি।

অমরোমদদি মফম অসি ভারত অমসুং বঙ্গলাদেশকী লৈরিবা স্পিরিচ্যুলগী মরীশিংগী ওইনদি লাইফম অমনি। ঐখোয়গী লৈনরিবা মরী অসি মীয়ামগা মীয়ামগগী মরক্তা লৈনরিবা মরী অমনি, থম্মোই অমগা থম্মোই অমগগী লৈনরিবা মরী অমনি।

ভারত অমসুং বঙ্গলাদেশ অনিমক্না মখোয়গী চাউখৎ-থৌরাংগী খুত্থাংদা মালেম পুম্বনা চাউখৎপা উবা পাম্মি। লৈবাক অনিমক্না তংদু লৈতদবা, অকি-অখংগী মহুৎতা তংদু লৈতবা, নুংশি চান্নবা অমসুং শান্তি পাম্মি।

মমল য়াম্লবা গুন অসি ঐখোয়দা শ্রী শ্রী হারীচন্দ দেবজীনা পীবিরমখি। শ্রী শ্রী হারীচন্দজীনা মালেম পুম্বনা শোন্নরিবা মমল য়াম্লবা গুনশিং অমসুং মীওইবা খুন্নাইনা পাম্লিবা গুনশিং অদুগীদমক মহাক্কী পুন্সি কত্থোকখি। মহা কবি শ্রী মহানান্দো হালদারনা শ্রী শ্রী গুরুচান্দ চারিতোদা অসুম্না ইরমখি-

তপশীল জাতি মাধুজ্জ জা কিছূ হোয়চে।

হারীচন্দ কল্পৱর্শ সোকলী ফেলেছে।।

মসিগী অর্থদি কান্নবা ফংদ্রবা, অৱাবা, দলিদ, শোত্থরবা খুন্নাইনা ফংখিবা অমা হেক্তা ওইরবসু মদু শ্রী শহরী হারীচন্দজীগুম্বা কল্পৱর্শগী মহৈনি।

শ্রী শ্রী হারীচন্দজীনা তাকপীখিবা লম্বীদা ঐখোয়না চপ মান্নবা, শান্তি লৈবা খুন্নাই অমগীদমক ঙসি চংশিল্লি। মহাক্না নুপীশিংগী এজুকেসন অমসুং চহিচা অদুদা মখোয়না খুন্নাইগী থবক-থৌরমদা শরুক য়ান্নবা থবক পাইখৎপা হৌখি। ঙসি ঐখোয়না মালেম পুম্বদা নুপীশিংদা শক্তি পীনবা হোৎনবা উবা ফংলে।

শ্রী শ্রী হারীচন্দ থাকুরনা পীখিবা পাউজেল অদু ঐখোয়না খঙলবা মতমদা, ‘হোরী-লীলা-অমৃতো’ থীবা মতমদা মহাক্না মাংদা লৈরিবা চহিচা অসি হান্নদগী উখিবগুম্না তৌখি। মহাক্না শান্না উবা ঙমখি, ঈশ্বরগী ৱাখল্লোন চেনবা গুম্না তৌখি।

মীনাই-নাইথাংগী চহিচাদসু মহাক্না খুন্নাইদা তশেংবা চাউখৎপা ঙম্নবগী লম্বী তাকখি। ঙসি ভারত নত্ত্রগা বঙ্গলাদেশ ওইরবসু ঐখোয়না খুন্নাইদা অমত্তা ওইবগী ফীরেপ, নুংশি-চান্নবা, চাউখৎ-থৌরাংগী অনৌবা পন্দুপ য়ৌবা হায়রিবা চপ মান্নবা লাইৱাশিং অসিগা লোইননা ঐখোয়গী তুংলমচৎ শেমগৎলি।

মরুপশিং,

শ্রী শ্রী হারীচন্দ দেবজীগী পুন্সিনা ঐখোয়দা অতোপ্পা পরা পীখি। মহাক্না নুংশিবগী পাউজেল অমা পীবতা নত্তনা ঐখোয়গী থৌদাংশিংসু মশক খঙহনখি। মীওৎ-মীনৈ অমসুং অৱা-অনাগী ময়োক্তা মেদিতেসন তৌগদবনি হায়না মহাক্না ফোঙদোকপিরমখি।

ঙসি শ্রী হারীচন্দ দেবজীগী ভক্তা লাখ অমসুং করোর কয়ানা ভারত্তা ওইরবসু, বঙ্গলাদেশতা ওইরবসু নত্ত্রগা অতোপ্পা মফমদা ওইরবসু মহাক্না তাকপীরম্বা লম্বীদা চৎলি, মীওইবা খুন্নাইনা মায়োক্নরিবা খুদোংথিবা মতেং পাংনদুনা কোকহল্লি।

শ্রী শ্রী হারীচন্দ থাকুরজীগী লেগেসীবু শৌগৎলিবা শান্তনু থাকুরজীবু ভারতকী পার্লিয়ামেন্তদা ঐহাক্কা থবক তৌমিন্নবা ফংজবা ঐহাক্কী লাইবক ফবনি। ঐঙোন্দগী চহী নৌজরবদি মঙোন্দগী ঐহাক্না কান্নরবা কয়া তমশিনজবা ফংঙি। মসিগী মরমদি মহাক্কী পুন্সি অসি শ্রী শ্রী হারীচন্দ থাকুরজীগী অথোইবা পাউতাকশিংনা থল্লি। মহাক অসি মথৌ মশক য়াম্না খংঙি। মহাক্না খুন্নাই অসিগী মীয়ামগী য়াইফনবা অয়ুক নুংথিল নাইদনা হোৎনখি।

মরুপশিং,

শ্রী হারীচন্দ দেবজীনা পীরিবা ইথিল অসি ঙসি ভারত অমসুং বঙ্গলাদেশনা মায়োক্নরিবা মান্নবা শিংনবশিং কোকহনবদা য়াম্না মরু ওই। লৈবাক অনিমক্না শিংনবশিং অসি পুন্না মায়োক য়ামিন্নবা তঙাই ফদে। মসি ঐখোয়গী থৌদাংনি; মসি লৈবাক অনিমক্কী মীওই করোর কয়াগী য়াইফনবা লম্বীনি।

কোরোনাগী লাইচৎ মনুংদা ভারত অমসুং বঙ্গলাদেশ অনিমক্না মখোয়গী মথৌনা উৎখ্রে। ঙসি লৈবাক অনিমক্না লাইচৎ অসি খোঙফম চেৎনা পুন্না মায়োক্নরি। মশাগী মথৌদাং ওইনা ভারতনা ‘মেদ ইন ইন্দিয়া’ বেক্সিনশিং বঙ্গলাদেশকী নাগরিকশিংদসু য়ৌহনবা পাম্মি।

শ্রী শ্রী হারীচন্দজীনা মতম চুপ্পদা মোদর্নিতী অমসুং অহোংবা হায়বা অসি শৌগৎতুনা লাকখি। লাইচৎকী খুদোংথিবা হৌখিবা মতমদা ওরাকান্দীদা লৈরিবা নখোয় পুম্নমক্না তেক্নোলোজী শিজিন্নখি, ওনলাইন কীর্তন পাঙথোকখি, খুন্নাইদা থাজবা হেনগৎহনখি হায়না ঐঙোন্দা তম্লকখি। মসিনা তাক্লি মদুদি শ্রী শ্রী হারীচন্দনা পীখিবা ইথিলনা ঐখোয়না অৱাবা তারবা মতমদা মাংদা চাংশিনবা ঙমহল্লি।

মহাক্কী মফম শিলহৌবা শ্রী শ্রী গুরুচন্দ থাকুরকীনা শ্রী শ্রী হারীচন্দ দেবজীনা তাকপীরম্বশিং মীয়ামদা য়ৌহনবদা, দলিত অমসুং শোত্থরবা খুন্নাই পুনশিনবদা অচৌবা থৌদাং অমা লৌখি। শ্রী শ্রী গুরুচন্দজীনা ঐখোয়দা ‘বক্তি, ক্রিয়া অমসুং জ্ঞান’গী লাইৱা অসি তাকপীখি।

শ্রী শ্রী গুরুচান্দ চারিতোনা হায়রম্মি:

অনুনাতা জাতি মাজে শিখখা বোস্তারিদ।
আগ্যা করেন হোরি চান্দ তারে বীধিমাতে ॥

মদুদি, হারীচন্দজীনা ঐখোয়দা খুন্নাইদগী শোত্থরবা শরুক্তা এজুকেসন ফংহন্নবা য়াথং পীখি। শ্রী গুরুচন্দজীনা হারীচন্দজীনা পীখিবা য়াথং অসি মহাক্কী পুন্সিদা ঙাক্তুনা চৎখি। মহাক্না চোকথবা লৈতনা হোৎনখি মরু ওইনা ইচানুপীশিংগী এজুকেসন ফংহন্নবা হোৎনখি।

ঙসি শ্রী গুরুচন্দজীনা হোৎনখিবশিং অদুগা লোইননা ভারত মচা খুদিংমক্না বঙ্গলাদেশতা লাকপা ফংজবা অসি লৈবাক ফবনি। ওরাকান্দীদা চত্থরিবা এজুকেসনগী কেম্পেন অসিদা হৌজিক্তি ভারতকী মীয়ামদগীসু মতেং ফংলগনি।

ভারত সরকারনা ওরাকান্দীদা লৈরিবা নুপীমচাশিংগী মিদ্দল স্কুল অসি অপগ্রেৎ তৌদুনা অনৌবা মতমগা চুন্নরবা ফেসিলিতীশিং হাপচিল্লগনি। লোইননা মফম অসিদা ভারত সরকারনা প্রাইমরী স্কুল অমসু লিংখৎলগনি।

মসি ভারত মচা করো কয়াগী মহুৎ শিন্দুনা শ্রী শ্রী হারীচন্দ থাকুরজীদা কৎচবা ইকাই খুম্নবা অমনি। থবক অসি পাইখৎপদা শাহজোক পীবিরকখিবা বঙ্গলাদেশ সরকারবুসু ঐখোয়না তৌবিমল খঙবা উৎচরি।

চহী খুদিংগী শ্রী শ্রী হারীচন্দ থাকুরজীগী মপোক কুমওনগী য়াইফরবা নুমিৎতা ঐখোয়গী মাতুৱা কাংলুপকী ইচিল-ইনাওশিংনা ‘বারোনী শ্নান উৎশব’ পাল্লন তৌদুনা লাক্লি। ভারত্তগী মশিং য়াম্লবা ভক্তাশংনা ওরাকান্দীদা লাক্তুনা কুহ্মৈ অসিদা শরুক য়ারি। ভারত সরকানা লাইফম অসিদা ঐখোয়গী ভারতকী ইচিল-ইনাওশিংনা চৎবদা খুদোংচানবা হোৎনগনি। ঐখোয়না থাকুর নগরদা মতুৱা কাংলুপকী নীংথিজবা পুৱারী অসি উৎনবা অচৌবা থৌরমশিং অমসুং তোঙান তোঙানবা থবকশিং পাইখৎখি।

মরুপশিং,

ভারতনা ‘সবকা সাথ, সবকা বিকাদ, সবকা বিশ্বাস’ অমসুং বঙ্গলাদেশনা ‘শোহো জাত্রি’ হায়বা লাইৱাগা লোইননা ঙসি মাংদা চংশিল্লি। মসিগা ইরোইননা বঙ্গলাদেশনা ঙসি মালেমদা চাউখৎপা অমসুং অওনবগী অচেৎপা খুদম অমা উৎলি  অমসুং হোৎনবা অসিদা ভারতনা নখোয়গী ‘শোহো জাত্রি’ ওইরি।

শ্রী শ্রী হারীচন্দ দেবজীগী থৌজালশিং অমসুং শ্রী শ্রী গুরুচন্দ দেবজীগী ইথিলগা লোইননা ঐখোয়গী লৈবাক অনিমক্না ২১শুবা চহিচাদা মান্নবা পান্দমশিং অসি ফংবা ঙমগনি। ভারত অমসুং বঙ্গলাদেশনা মালেমদা চাউখৎ-থৌরাং অমসুং নুংশি চান্নবগী লম্বী অসিদা মখা তানা লমজিংগনি।

য়াইফ-পাউজেলশিং অসিগা লোইননা ঐহাক্না ময়াম পুম্নমকপু য়াম্না থাগৎচরি!!

জয় বঙ্গলা, জয় হিন্দ,

ভারত-বঙ্গলাদেশকী মরু ওইবগী মরী অসি তুংকোইবা ওইরসনু!

জয় হোরী-বোল ! জয় হোরী-বোল!
হোরী-বোল! হোরী-বোল! জয় হোরী-বোল!