ভিদিও কনফরেন্সকী খুৎথাংদা লৌউ-শিংউ অমসুং লৌমীশিংগী য়াইফনবগী মতাংদা বজেত্তা য়াওরিবা খুদোংচাবশিং থবক ওইনা মপুংফানা পাংথোক্নবা ৱেবিনার অমদা প্রধান মন্ত্রী শ্রী নরেন্দ্র মোদী ৱা ঙাংখ্রে। ৱেবিনার অসিদা লৌউ-শিংউ, দাইরি, ঙা য়োকপা, সরকার, লনাই অমসুং কোওপরেতিপ সেক্তরগী মরী লৈনবশিং অমসুং খুঙ্গংদা শেন থাদরিবা বেঙ্কশিংগী মীহুৎশিং শরুক য়াখি। ৱেবিনার অসিদা য়ুনিয়ন এগ্রিকলচর মিনিস্তরশু শরুক য়াখি।

থৌরম অদুদা ৱা ঙাংবদা প্রধান মন্ত্রীনা হায়খি সরকার অসিগী পান্দমদা লায়রবা লৌমীশিং ময়াইদা থম্লি। হায়রিবা অপীকপা লৌমীশিং ফিবম ফগৎহনবা অসিনা ভারতকী লৌউ-শিংউনা মায়োক্নরিবা খুদোংচাদবশিং কোকহনবদা চাউনা মতেং পাংগনি। শা-ষন লোইবা, শঙ্গোম পুথোকপা অমসুং ঙা য়োকপগী থবকশিং মরুওইনা লৌদুনা য়ুনিয়ন বজেত অসিদা লৌউ-শিংউগী লমদা পীগদবা শেন্থং লুপা কোতি ১৬,৫০,০০০দা হেনগৎলে, রুরেল ইনফ্রাস্ত্রকচর ফন্দ লুপা কোতি ৪০,০০০দা হেনগৎলে, অপীকপা ইথৈ-লৌখোঙগী শেনফম শরুক অনি হেনগৎলে, ওপরেসন গ্রিন স্কিমগী খুদোংচাবনা য়াম্না পুমগৎনবা পোৎথোক ২২ কোনশিল্লে অমসুং ই-নামগা মন্দি ১০০০ হেনবগা শম্নরে। লৌউ-শিংউগী পোৎথোক হেনগৎলক্লিবা মরক অসিদা, ভারতনা ২১শুবা চহিচাদা পোস্ত হার্ভেস্ত রিভোলুসন নত্রগা ফুদ প্রোসেসিং রিভোলুসন অমসুং ভেলু এদিসন দরকার ওইরে। করিগুম্বা মসিগী থবক অসি চহি ২০-৩০গী মমাঙদা পাংথোক্লম্লবদি লৈবাক অসিগী ওইনা য়াম্না ফরমগনি।

লৌউ-শিংউগা মরী লৈনবা হিরমশিং হায়বদি মহৈ-মরোংশিং, মনা-মশিং, উহৈ-ৱাহৈশিং, ঙাগী পোৎথোকশিং শেম-শাবগী থবকশিং চাউখৎহনগদবনি হায়না প্রধান মন্ত্রীনা য়াম্না কন্না তকশিনখি। মহাক্না হায়খি মসিগীদমক, লৌমীশিংনা মখোয়গী খুঙ্গংশিংগী অনকপা মফমদা লিদুনা থম্নবা খুদোচাবশিং লৈগদবনি। লৌবুক্কী পোৎথোকশিং প্রোসেশিং য়ুনিতশিং ফাওবা পুরক্নবা থবক ফগৎহনগদবনি অমসুং ফার্মর প্রদুসর ওর্গনাইজেসনশিংনা হায়রিবা য়ুনিতশিং অসিগা পুন্না থবক তৌমিন্নগদবনি।

মহাক্না হায়খি লৈবাক অসিগী লৌমীশিংনা মখোয়গী পোৎথোকশিং য়োন্নবগী খুদোংচাবশিং হেনগৎহনবা দরকার ওইরে। শেম-শারবা চীঞ্জাক্কীদমক ঐখোয়গী লৈবাক্কী লৌউ-শিংউগী থবকশিং ঐখোয়না মালেমগী কৈথেল য়ৌহনগদবনি। খুঙ্গং অমগী মীয়াম লৌউ-শিংউগা মরী লৈনবা থবক খুঙ্গং অদুদা ফংনবা ঐখোয়না খুঙ্গং ময়া নক্না এগ্রো-ইন্দস্ত্রি ক্লস্তরশিং হেনগৎহনগদবনি। মসিদা ওর্গনাইক ক্লস্তর অমসুং এক্সপোর্ত ক্লস্তরনা মরুওইবা থৌদাং অমা লৌগনি। লৌউ-শিংউদা য়ুম্ফম ওইবা পোৎথোকশিং খুঙ্গংদগী সহরশিং য়ৌনবা অমসুং ইন্দস্ত্রিগী পোৎথোকশিং সহরশিংদগী খুঙ্গংশিংদা য়ৌনবা ফিবম অমা শেমগৎনবা ঐখোয় মাঙলোমদা চঙশিনগদবনি। ঐখোয়গী পোৎথোকশিং মালেমগী কৈথেলশিং য়ৌনবা জিলা অমা, পোৎথোক অমা স্কিম থবক ওইনা পাংথোক্নবা পাম্বৈশিং থিদোকপা দরকার ওইরে।

প্রধান মন্ত্রীনা হায়খি মালেমদা ঙা য়াম্না পুথোকপা অমসুং মপান্দা থাদোকপা লৈবাকশিংগী মনুংদা ভারত য়াওরবসু, ঐখোয়গী শেম-শারবা ঙা মালেমগী কৈথেলদা খজিক্তং য়োল্লি। ফিবম অসি অহোঙবা পুরক্নবা, খুদক্তা চাবা য়ারবা, খুদক্তা থোংবা য়ারবা পোৎথোকশিং, শেম-শারবা উহৈশিং অমসুং ইন্সাং-নাপীশিং, শেম-শারবা সমুদ্রগী চীঞ্জাক অমসুং মোজারেলা পুথোকপা হেনগৎহন্নবা মতেং পাংনবা সরকারনা লুপা কোতি ১১,০০০গী শেনফম লাউথোক্লে। ওপরেসন গ্রিন স্কিমগী মখাদা উহৈশিং অমসুং ইন্সাং-নাপীশিং পুথোক-পুশিন তৌবদা চঙবা শেনফমগী চাদা ৫০ সবসিদি পীরে। হৌখিবা থা ৬ অসিদা কিষান রেল ৩৫০ চেল্লে অমসুং হায়রিবা ত্রেনশিং অসিনা উহৈ-ৱাহৈ অমসুং ইন্সাং-নাপী মেত্রিক তন ১,০০,০০০ রোম পুথোক-পুশিন তৌখ্রে। মসিগী কিষান রেল অসি লৈবাক শীনবা থুংনা কোল্দ স্তোরেজ শেমগৎনবগী পাম্বৈ অমনি।

প্রধান মন্ত্রীনা হায়খি অত্মানির্ভর ভারত কেম্পেনগী মখাদা, লৈবাক অসিগী জিলা শীনবা থুংনা উহৈ-ৱাহৈশিং অমসুং ইন্সাং-নাপীশিংগী ক্লস্তরশিং শেমগৎনবা থবক পায়খৎলে। প্রাইম মিনিস্তর মাইক্রো ফুদ প্রোসেশিং ইন্তরপ্রাইজেস অপগ্রেদেসন স্কিমগী মখাদা, মাইক্রো ফুদ প্রোসেশিং য়ুনিত মিল্লিয়ন কয়া মতেং পাংলে। ত্রেক্তরশিং, স্ত্রো মেছিনশিং নত্রগা অতোপ্পা লৌবুক্কী মেছিনশিং পুং মশিংদা পারগা মমল হোঙনা অমসুং নিংথিনা নেকপা য়াবগী মতেংগা লোয়্ন্না লৌমীশিং অনৌবা মতমগী তেক্নোলোজি শীজিন্নহনবা দরকার ওই। লৌউ-শিংউগী পোৎথোকশিং কৈথেলদা মমল হোঙনা অমসুং ফজনা য়ৌরকপা ঙম্নবা ত্রক এগ্রেগেতরশিং শীজিন্নগদবনি। লৈবাক অসিদা সোইল হেল্থ কার্দকী খুদোংচাবা হেন্না ফংহনবা দরকার ওইরে। মখোয়গী লৈবাক-লৈহাওগী ফিবমগী মতাংদা লৌমীশিং ভাব তাবা হেনগৎহনবা অসিনা পোৎথোক পুথোকপা হেনগৎহনবা ঙমগনি।

প্রধান মন্ত্রীনা হায়খি লৌউ-শিংউগী লমদা রিছর্স অমসুং দিবলপমেন্তদা প্রাইভেদ সেক্তরগী থৌদাং হেন্না দরকার ওইরে। মখোয়না গেহু অমসুং ফৌ খক থাবা তোক্নবা হৌজিক ঐখোয়না লৌমীশিংদা অসিগুম্বা খুদোংচাবশিং পীগদবনি। ঐখোয়না ওর্গনিক ওইবা চীঞ্জাক্তগী হৌরগা সালাদকা মরী লৈনবা ইন্সাং-নাপীশিং পুথোক্নবা হোৎনগদবনি। সিৱিদ অমসুং বিসৱেক্সকী কৈথেল ফানবা হোৎনবা দরকার ওইরে। সিৱিদ থাবা অমসুং বিসৱেক্সনা ঐখোয়গী ঙামীশিং অমসুং খোই লোইবা লৌমীশিং অহেনবা শেন্থোক ফংবা ঙমহনগনি। প্রাইভেদ সেক্তর শরুক য়াবা হেনগৎলকপা অসিনা লৌমীশিংগী থাজবা হেনগৎহনগনি।

মওং অমা নত্রগা মওং অমদা মতম কয়াগী মমাঙদগী ভারত্তা কন্ত্রেক ফার্মিং লৈরক্লে। কন্ত্রেক ফার্মিং অসি শুপ্নগী ললোন-ইতিক্কী নমুনা অমা ওইনা লৈরোইদবনি অদুগা লৈবাক অসিগীদমক ঐখোয়না পাংথোকফম থোকপা থৌদাং ঐখোয়না পাংথোক্কদবনি হায়না প্রধান মন্ত্রীনা ফোঙদোকখি।

প্রধান মন্ত্রীনা হায়খি ইথৈদগী হৌরগা মরু হুনবা, লোকপা অমসুং য়োনবা ফাওবদা তেক্নোলোজিশিং শীজিন্ননবা লৈবাক অসিগী লৌউ-শিংউগী থবকশিং পায়খৎকদবনি। লৌউ-শিংউগী থবকশিংগা নহারোলশিংগা শম্ননবা ঐখোয়না স্তার্দ-অপশিং য়োকখৎকদবনি। হৌখিবা চহি খর অসিদা তপ্না-তপ্না লৌমীশিং, শা-ষন লোইবশিং অমসুং ঙামীশিংদা কিসান ক্রেদিদ কার্দ ফংহল্লে অমসুং হৌখিবা চহি ১দা লৌমী কোতি ১.৮০ হেনবদা কিসান ক্রেদিদ কার্দশিং পীখ্রে। হৌখিবা চহি ৬-৭গা চাংদম্নবদা শেন্থং পীবগী চাং শরুক অনি হেনগৎলে। লৈবাক অসিদা এফ.পি.ও ১০,০০ লিংখৎনবা পায়খৎলিবা থৌরাং অসিনা কো-ওপরেতিপশিং মপাঙ্গল কনখৎহনগনি।

*****