ঙসি ফেদেরেল ওফ এসোসিয়েসন্স ইন ইন্দিয়া তুরিজম অমসুং হোস্পিতেলিতী(এফ.এ.আই.তি.ঐচ.)না শিল্লিবা অহুমশুবা ইন্দিয়া তুরিজম মার্ত হৌদোকপগী থৌরমদা হকশেল অমসুং য়াইফ য়ুম্বালগী কেন্দ্রগী মন্ত্রী দা. হর্শ বর্ধননা ভিদিও কনফরেন্সিংগী খুৎথাংদা ৱা ঙাংখ্রে৷

অসিগুম্বা থৌরম অসি শিনবগীদমক এফ.এ.আই.তি.ঐচ.পু থাগৎলদুনা থৌরম অসিদা লৈবাক ৬০দগী লাক্লিবা দেলিগেৎ ২৫০ হেনবনা ভর্চুয়েল্লী ওইনা শরুক য়াখিবা অসিদা দা. হর্শ বর্ধননা নুংঙাইবা ফোংদোকখ্রে৷ লাইনা-লাইচৎ অসিনা মরম ওইদুনা মালেম অসি অমম্বদগী লিথোরকপা মতম অসিদা মসিগী অহুমশুবা ইন্দিয়া তুরিজম মার্ত শিনবা অসিনা থৌরম অসি হেন্না মশক মঙাল নাইহল্লে অমসুং মালেম অসিদা লৈরিবা লৈবাকশিংনা হকশেল অমসুং সেক্যুরিতীগী চেকশিন থৌরাংশিং নিংথীনা তৌদুনা চত্থোক-চশিন য়াহন্নবা হোৎনরি৷” হায়না মহাক্না ফোংদোকখ্রে৷

ভারততা মেদিকেল তুরিজম ওইবা ঙমহল্লিবা ভারতকী য়াম্না খুমাং চাওশিল্লবা হেল্থকেয়র ফেসিলিতীশিং অসিগী মতাংদা ৱা ঙাংলদুনা মন্ত্রী অসিনা অসুম্না ফোংদোকখ্রে, “ভারত লৈবাক অসি মমিং লৈরবা তুরিস্ত পন্থুংফম অমা মতম পুম্নমক্তা ওই অদুবু হৌখিবা চহী তরুক অসিদা লৈবাক অসি মেদিকেল তুরিজমগী মমিং লৈরবা পন্থুংফম অমসু ওইবা ঙমখ্রে ঐখোয়গী হেল্থকেয়র ইন্দস্ত্রীদা কা হেন্না খুমাং চাওশিল্লকপা অসিনা মালেম অসিদা লৈরিবা খ্বাইদগী ফরবশিংগা চাংদম্নবা য়াহল্লে৷ ৱাল্দ-ক্লাস দোক্তরশিং, নর্সশিং অমসুং পেরামেদিকেল স্তাফশিং পুথোক্তুনা লাক্লিবা ঐখোয়গী এদজুকেসন সিস্তেম অসি মালেম অসিনা নিংথীনা মশক খঙলে৷ লৈবাক অসি য়াম্না তোইনা তোইনা মালেম অসিগী ফার্মাসী হায়নসু কৌনৈ, ইন্দিয়া অসি ফার্মক্যুতিকেলশিং খ্বাইদগী চাওনা পুথোকপা লৈবাকশিংগী মনুংদা অমা ওইরি অমসুং মালেম অসিগী মীয়াম্না শিজিন্ননবা ভেক্সিন চাং ৱাংনা পুথোক্লি৷”

ইন্তরনেস্নেল তুরিজম অসি অমুক হন্না হিংগৎহন্নবা হোৎনবদা তুরিজম মন্ত্রালয়না লৌখিবা থৌদাংশিং অদুদা মহাক্কী মন্ত্রালয়না মতেং পাংখিবা অদু দা. হর্শ বর্ধননা ফোংদোকখ্রে৷

থৌরম অসি শিনবগীদমক এফ.এ.আই.তি.ঐচ.পু অমুক হন্না থাগৎলদুনা কেন্দ্রগী মন্ত্রী অসিগী ৱারোল অদু লোইশিনখি অমসুং থৌরম অদুদা শরুক য়ারিবা দেলিগেৎ পুম্নমক্তা মহাক্কী য়াইফ পাউজেল পীরি৷

                                                                                        ******