মোবাইল ফোনশিংদা পামদবা মেসেজশিং লাকপা, এস.এম.এসকী খুৎথাংদা ঙাইহাক লৈতনা ওৎপা, লোন পীগনি হায়না লান্না থাজবা পীবদগী কঞ্জুমরশিংনা খোইদৌ শাওগৎপা অমসুং নুংঙাইতবা হেনগৎলক্লিবা অসি থেংন্নবা অমসুং দিজিতেল ত্রান্সসেক্সনশিং অশোই-অঙাম থোকহন্দনবা ঙসি য়ুনিয়ন ইলেকত্রোনিক্স অমসুং ইনফোর্মেসন তেক্নোলোজি, কম্মুনিকেসন্স অমসুং লো অমসুং জজতিসকী য়ুনিয়ন মিনিস্তর শ্রী রবি সঙ্কর প্রাসাদনা লুচিংদুনা অৱাংবা থাক্কী মীফম অমা পাংথোকখ্রে। মীফম অদুদা সেক্রেতরি(তেলিকোম), মেম্বর(তেলিকোম)অমসুং দি.দি.জি(এসেস সর্বিস)শু শরুক য়াখি।

সবস্ক্রাইবরশিংদা অৱাবা পীবদা চেন্নবা লনাই মীওইশিং অমসুং তেলিমার্কেত্তরশিংগী মথক্তা অকনবা থবক লৌখৎনবা মীফম অদুদা মিনিস্তরনা ওফিসিএলশিংদা খঙহনখি। নুংঙাইতবা থোকহনবা থবকশিংগী মনুংদা পামদবা মেসেজশিং নত্রগা কোলশিং লাকপা য়াওরি। মিনিস্তরনা মখা তানা হায়খি শেন-থুমগী নমথাক তৌনবা অমসুং মীচম মীয়াম্না ৱানা তানবা শেন লৌথোক্নবা তেলিকোমগী পাম্বৈশিং শীজিন্নরে। অসিগুম্বা থবকশিং খুদক্তা লেপহন্নবা অকনবা থবক লৌখৎনবা ওফিসিএলশিংদা য়াথং পীখ্রে।

সবস্ক্রাইবরশিংনা দু-নোত-দিস্ত্রব(দি এন দি)দা রেজিস্তার তৌরবসু মখা তানা রেজিস্তার তেলি-মার্কেত্তরস(আর তি এম)দগী কোলশিং লাক্লে হায়বা খঙলে অমসুং অনরেজিস্তার তেলি-মার্কেত্তরস(য়ু তি এম)দগীশু সবস্ক্রাইবরশিংদা কোল লাক্লে হায়বা খঙলে হায়না ওফিসিএলশিংনা ফোঙদোকখি।

ৱাফম অসি হকচিন্নবা লৌনবা অমসুং পীরিবা নিয়মশিং ফজনা ঙাক্নবগী মতাংদা মখোয়দা খঙহন্নবা তেলিকোম সর্বিস প্রোবাইদর(তি এস পি) অমসুং তেলি-মার্কেত্তরশিংগা মীফম অমা পাংথোক্নবা মিনিস্তরনা ওফিসিএলশিংদা খঙহনখ্রে। করিগুম্বা নিয়ম ইন্দবা য়াওরবদি, তেলি-মার্কেত্তরশিংদা শেন-থুমগী পেনালতি লৌবা য়াওনা করিগুম্বা য়াম্না তোইনা অরানবা তৌরবদি কন্নেক্সন পীদনবা মীফম অদুদা খন্নখি।

অনসোলিসিতেদ কমর্সিএল কম্মুনিকেসন(য়ু সি সি) অমসুং তেলিকোমগী পাম্বৈশিং লান্না শীজিন্নদুনা শেন-থুমগী নমথাক তৌবদগী মপুংফানা লাকশিন্নবা ৱেব/মোবাইল এপ্লিকেসন অমসুং এম.এম.এসতা য়ুম্ফম ওইবা থবক সিস্তেম অমা শেমগৎনবা মীফম অদুদা ৱারেপ লৌখি। মসিনা তেলিকোম সবস্ক্রাইবরশিংনা য়ু.সি.সিগা মরী লৈনবা ৱাফমশিংগী মখোয়গী ৱাকৎ পীশিনবা ঙমহনগনি।

তেলিকোমগী পাম্বৈশিং শীজিন্নদুনা জামতারা অমসুং মেৱাত লমদমদা অরানবা থবকশিং চৎথরিবা অসি লাকশিন্নবা তেলিকোম ওপরেসনশিং থিংবা য়াওনা অখন্নবা লাল্লোং পুথোক্নবা মিনিস্তরনা য়াথং পীখি।

য়ু.সি.সি অমসুং শেন-থুমগী নমথাক তৌবগা মরী লৈনবা ৱাকৎ অসি মতম অসিগী ওইনা খ্বাইদগী মরুওইবনি অমসুং অথুবদা অকক্নবা মতমগী মনুংদা থবক পায়খৎলবদি অসিগুম্বা খুদোংচাদবশিং কোকহনবা ঙমগনি হায়না ওফিসিএলশিংনা মিনিস্তরদা পুখৎখি। থবক অসিগীদমক দিজিতেল ইন্তিলিজেন্স য়ুনিত(দি আই য়ু) কৌবা নোদেল এজেন্সি অমা লিংখৎলগনি। য়ুনিত অসিগী মরুওইবা থবক্তি তেলিকোমগা মরী লৈনবা অরানবা থবক থিজিন্নবা তোঙান-তোঙানবা এল.ই.এশিং, শেন-থুমগী লুপশিং অমসুং তেলিকোম সর্বিস প্রোভাইদরশিংগা পুন্না থবক তৌমিন্নবনি। লাইসেন্স সর্বিস এরিয়াগী থাক্তা তেলিকোম এনালাইতিক ফোর ফ্রোদ মেনেজমেন্ত এন্দ কঞ্জুমর প্রোতেক্সন(তাফকোপ) সিস্তেম শেমগদবনি।

মথক্কী থবকশিং অসিনা দিজিতেলগী থবকশিংদা মীয়ামগী থাজবা হেনগৎহনগনি অমসুং মোবাইলগী খুৎথাংদা পাংথোকপা শেন-থুমগী থবকশিং হেন্না অশোই-অঙাম থোকহল্লোই অমসুং মসিনা দিজিতেল ইন্দিয়া য়োকখৎকনি।

*****