কমর্স অমসুং ইন্দস্ত্রী মন্ত্রালয়

শ্রী পিয়ুশ গোয়লনা ‘প্রারম্ভঃ স্তার্ত-অপ ইন্দিয়া ইন্তর্নেস্নেল সম্মিৎ’ হৌদোকখ্রে

ভারতকী স্তার্ত-অপ ইকোসীস্তেম অসিনা হৌখিবা চহি ৫দা মশক থোক্না চাউখৎপা ঙম্লেঃ শ্রী গোয়ল

স্তার্ত-অপ লিশিং ৪১ হেনবনা সরকারগা লোয়ননা রেজিস্তর তৌদুনা লৈরে

সম্মিৎ অসি য়ুম্লোন্নবনা হান্না হায়বা পোলিসী অসিবু থবক ওইনা তাকপনি

Posted On: 15 JAN 2021 3:44PM by PIB Imphal

নুমিৎ নিনি চত্থগদবা ‘প্রারম্ভ’, স্তার্ত-অপ ইন্দিয়া ইন্তর্নেস্নেল সম্মিৎ অসি ঙসি নই-দিল্লীদা বি.আই.এম.এস.তি.ই.সি. (বে ওফ বেঙ্গোল ইনিসিএতিব ফোর মলতি সেক্তোরেল তেক্নিকেল অমসুং ইকোনোমিক কো-ওপরেসন)গী মেম্বর লৈবাকশিংনা হৌদোকপগী থৌরম অসিদা শরুক  য়াদুনা হৌদোকখ্রে। সম্মিৎ অসি কম্মর্স অমসুং ইন্দস্ত্রী মন্ত্রালয়গী প্রোমোসন ওফ ইন্দস্ত্রী অমসুং ইন্তর্নেল ত্রেদ বিভাগনা প্রধান মন্ত্রী, শ্রী নরেন্দ্র মোদীনা ওগস্ত, ২০১৮দা কাথমন্দুদা পাংথোকখিবা ৪শুবা বি.আই.এম.এস.তি.ই.সি. সম্মিত্তা লাউথোকখিবা অদুগী মখা তারকপা ওইনা শিনবনি।

সম্মিৎ অসি হৌদোক্লে হায়না লাউথোক্লদুনা, রেলৱেজ, কম্মর্স অমসুং ইন্দস্ত্রী, কঞ্জ্যুমর এফিয়র্স অমসুং ফুদ অমসুং পব্লিক দিস্ত্রিব্যুসনগী মন্ত্রী, শ্রী পিয়ুশ গোয়লনা হায়খিবদা সম্মিৎ অসি মেম্বর লৈবাকশিংগী মরক্তা তেংবাংনবগী মরী হেন্না ফগৎহন্নবা য়ুম্লোন্নবনা হান্না হায়বা পোলিসী অসিবু থবক ওইনা তাকপগী থৌওংনি হায়খি। মসিগী সম্মিৎ অসিনা স্তার্ত-অপ মালেমগী তোঙান-তোঙানবা থৌওংশিং উত্তুনা অনৌবা মতম অমা হৌদোক্লগনি হায়বগী থাজবা থম্মি হায়খি। মহাক্না হায়খিবদা ভারতকী স্তার্ত-অপ ইকোসীস্তেম অসিনা স্তার্ত-অপ ইন্দিয়া হেদোকখিবগী মতুংগী হৌখিবা চহি ৫ অসিদা মশক থোক্না চাউখৎপা ঙমখ্রে হায়খি। মন্ত্রীনা বি.আই.এম.এস.তি.ই.সি.গী মেম্বর লৈবাকশিংগী মরক্তা সেক্তর অসিগী মতাংদা তেংবাংনবা  অসিনা স্তার্ত-অপশিংবু অনৌবা মহৌশা অসিগী অনৌবা ভারত, অনৌবা মালেম, অনৌবা কৈরোল-লৈকাইগী মমাংদা পুখৎলগনি হায়খি।

শ্রী গোয়লনা স্তার্ত-অপশিং অসিনা ৱাখল্লোন লৈ, থৱাই য়াওবগী মওং উৎলি অমসুং অনৌবা থৌওং পাংথোকপা ঙম্মি অমসুং মসিনা মরম ওইদুনা লাইচৎ অসিগী মনুংদা সম্মিৎ পাংথোকপগী মতম অসি চপ চারে হায়খি। সম্মিৎ অসিনা অনৌবা পান্দমগী মাইকৈদা থাজবা অমসুং পুক্নিং থৌগৎপগী ইথিলগা লোয়ননা অনৌবা খোঙচৎ অমগীদমক্তা খোঙশানবগী থৌওং ওইরগনি হায়বগী থাজবা ফোংদোকখি। “সরকার অমসুং কারবারগী মরক্তা খুৎশম্নবগী থৌওংশিংদগী হেন্দোক্তুনা সম্মিৎ অসিনা স্তার্ত-অপ মশেলনা ৱাখল্লোন কয়া লান্নদুনা অমসুং নহা ওইরিবা মীওইশিংনা ৱারোইশিন পুরক্নবা পুন্না হোৎনমিন্নদুনা লমদম অসিদা য়াইফবা অমসুং শাহৌ লৌবগী ফিভম লৈহন্নবা খুৎশম্নবগী থৌওং শোইদনা লৈহল্লগনি”, হায়না মহাক্না মখা তানা হায়খি।

শ্রী গোয়লনা ঙসিগী মতমগী নহাশিং অসিনা ওন্তোপ্রিনর ওইনিংবগী ইথিল উত্তুনা মখোয় অসি থবক থিবা মীওই নত্তে, তৌবতবু থবক লৈহনবা মীওইনি হায়বগী ৱাখল্লোন চেনবা অসিদা নুংঙাইবা ফাওই হায়না ফোংদোকখি। ভারত্তা হৌজিক হৌজিক সরকারদা রেজিস্তর তৌদুনা লৈরবা স্তার্ত-অপ ৪১,০০০ হেন্না লৈরে অমসুং মখোয়শিং অসিগী মরক্তগী কয়া অমদি গ্রাসরুতকী থাক্তা থবক তৌদুনা নীংথিবা থবক-থৌওং কয়া পাংথোক্লি। মন্ত্রীনা হায়খিবদা মহাক্না কেন্দ্রদা ভারতকী স্তার্ত-অপশিং অসিবু মখোয়গী অঙনবা থাক্তা পুক্নিং থৌগত্তুনা শৌগৎপীনবা হায়দুনা লাক্লি অমসুং হৌজিক্তি ভারতকী শেল থাদবা মীওইশিং অমসুং কেন্দ্রদসু বি.আই.এম.এস.তি.ই.সি.গী স্তার্ত-অপশিং অসিদা মিৎয়েং চঙদুনা মখোয়বু লমজিং লমতাকপীদুনা মখোয়বু শৌগৎপীয়ু হায়রগনি হায়খি।

মন্ত্রীনা ভারতনা বি.আই.এম.এস.তি.ই.সি.গী লৈবাকশিংগা লোয়ননা কোবিদকী লাইচৎকী মতুংদদি মমাংদা অমুক্তা লৌখিদ্রিবা মওংদা শোইদনা শাহৌ লৌরগনি অমসুং চাউখৎ-খোঙথাংগী মালেমগী মফম অমা হৌদোক্লগনি হায়বগী থাজবা লৈরে হায়না ফোংদোকখি। মহাক্না হায়খিবদা প্রধান মন্ত্রী, শ্রী নরেন্দ্র মোদীনা ঐখোয়গী স্তার্ত-অপশিং অসিদা পুক্নিং থৌগৎলিবা অমসুং অনৌবা থৌওং, পোত্থোক পুথোকপগী মওং অমসুং ইন্তর্প্রাইসনা থল্লবা ইকোসীস্তেম অমা শেম্নবা হোৎনরিবা অসিনা থাজবা ৱাখল্লোন অমসুং তৌবা ঙম্বগী মতিকনা স্তার্ত-অপশিং অসিগী তুংদা লাক্কদৌরিবা মতমশিংদা পাঙ্গল অমসুং থৌনা হাপ্পগী ফিভম অমা ওইহন্নবা বেত্তরী অমা ওইনা শোইদনা থবক তৌগনি হায়না হায়খি। মহাক্না হায়খিবদা স্কিল দিভেলপমেন্ত অসিসু ওন্তোপ্রিনরশিপকী ইথিল লৈহনবা অমসুং ঐখোয়গী ওন্তোপ্রিনরশিং অসিবু মশাদা থাজবা লৈহনবদা অচৌবা থৌদাং লৌগদবা য়াম্না মরু ওইবা লম অমনি হায়খি। মহাক্না মখা তানা হায়খিবদা, মহাক্না ভারতকী শেল-থাদবশিংদা থৌওং অসিদা হেন্না শরুক য়াদুনা স্তার্ত-অপশিং অসিবু ঐখোয়গী তুংদা লৈরক্কদৌরিবা চাউখৎপা শেন্মিৎলোনগী য়ুম্বী অমা ওইহন্নবা খোঙফম চেৎলি হায়বসি মালেমদা তসেংনা উৎসি হায়না মখোয়শিংদা পুক্নিং থৌগৎপা পাম্মি হায়খি। মহাক্না বি.আই.এম.এস.তি.ই.সি.গী লৈবাকশিংনা অপুনবগী খোঙফম চেৎপগী থৌওং উৎলিবা অসিনা অতোপ্পা লৈবাক খুদিংমক্তসু স্তার্ত-অপশিংগী পুক্নিং থৌগৎকনি হায়খি। খুৎশম্নবগী থৌওংশিন অসিদা চাউখৎপগী মতিক য়াম্না লৈ, মরমদি পুল্লবা মতুংদা ঐখোয়না নহা ওইরিবা মীওইশিংনা অমত্তা ওইনা পুল্লক্তুনা অনৌবা ৱাখল্লোন, অনৌবা থৌওং পাংথোরকপগী থৌওং কয়া উবা ফংগনি হায়না মহাক্না ফোংদোকখি। স্তার্ত-অপ মশেল খুৎশম্নবা অসিনা মথক্তা পনখ্রিবা অসিগুম্না চাউখৎপা কয়া পুরকপা য়াবগী মতিক লৈ হায়নসু মহাক্না ফোংদোকখি।

থৌরম অসিদা ৱা ঙাংবদা, সিবিল এভিএসন অমসুং হাউসিং অমসুং অর্বান এফিয়র্সকী রাজ্য মন্ত্রী (আই./সি.), শ্রী হর্দীপ সিংহ পুরিনা স্তার্ত-অপ ইন্দিয়াগী খোঙথাং অসিনা কেন্দ্র অমসুং রাজ্যগী মন্ত্রালয়শিংবু স্তার্ত-অপশিং অসি তেংবাংনবা নীংথিজনা শেম-শারবা স্কিম কয়া অমা পুথোরক্নবা অঙকপা ফংবা নিকহনখি হায়না ফোংদোকখি। সম্মিৎ অসিনা স্তার্ত-অপশিং অসিনা মখোয় মশেলদগী অফবা থৌওং কয়া তম্নদুনা মদুগী কান্নবা লৌবা ঙম্নগনি হায়বগী থাজবা থম্মি হায়না মহাক্না ফোংদোকখি। মহাক্না স্তার্ত-অপশিংবু মতিক চানা শৌগৎনবা সরকারনা খোঙফম চেৎনা লৈরিবা অসিগী মতাংদসু পনখি।

কম্মর্স অমসুং ইন্দস্ত্রীগী রাজ্য মন্ত্রী, শ্রী ওম প্রকাশনা হায়খিবদা সরকার অসিনা স্তার্ত-অপশিং অসিনা শাহৌ লৌবা অমসুং চাউখৎপা ঙম্নবা মতিক চাবা অকোয়বা অমা শেম্নবা খোঙফম চেৎলি অমসুং হীরম অসিগা মরী লৈননা তোঙান-তোঙানবা শেমদোকপগী থৌওং কয়া অমসু পাংথোকখ্রে হায়খি। আত্মানির্ভর ভারত অসি স্তার্ত-অপ ইকোসীস্তেমগা মপুং ফানা মরী লৈনৈ হায়নসু মহাক্না হায়খি। সম্মিৎ অসি স্তার্ত-অপশিংনা অমত্তা ওইনা লাক্তুনা, খুৎশম্নদুনা, পুন্না চাউখৎমিন্নবা য়াবগী য়াম্না ফবা খুদোংচাবা অমনি হায়না মন্ত্রীনা ফোংদোকখি।

বি.আই.এম.এস.তি.ই.সি.গী সেক্রেতরী জেনেরেল, হিস এক্সেলেন্সী, শ্রী তেঞ্জিন লেকফেলনা সম্মিৎ অসিনা লুচিংবা, শেল থাদবা, স্কোলর, পোলিসী শেম্বা মীওই, স্তার্ত-অপ ইন্নোভেতর অমসুং ওন্তোপ্রিনর্শিংবু অমত্তা ওইনা পুরক্লে হায়খি। মীওইবা খুন্নাইনা করিগুম্বা খুদোংথিবা হেক-হেক নঙবা মতমদা, মীওইবগী পুকশেল শেঙবা অমসুং নীংহন্নবা লৈতবগী মগুন অসিনা খুদোংচাদবশিং অদুবু মাইথীবা পীবা ঙম্নবা মালেমদা তেংবাংদুনা লাক্লি হায়খি। শেন্মিৎলোন, থবক, পুন্সি-মহিং, কারবার, ত্রেদ অমসুং কম্মর্স অসি কোবিদ লাইচৎ অসিনা য়াম্না শোকহল্লে, অদুবু স্তার্ত-অপশিং অসিনা অনৌবা থৌওং পাংথোকপা ঙম্বা অমসুং শিংনবা অমা হেক্তগী অথুবা ৱারোইশিন পুরকপা ঙম্বগী মওং-মতৌ অসিনা ঐখোয়দা থাজবা পীরি হায়না মহাক্না হায়খি। মহাক্না মেম্বর লৈবাকশিংদা পোলিসীগী তেংবাং পীদুনা স্তার্ত-অপশিং অসিবু তেংবাংনবা অমত্তা ওইনা পুল্লসি হায়খি। অসিগুম্বা কনক্লেবশিং  স্তার্ত-অপশিংদা তেংবাংনবা চহি খুদিংগী শিনগদবনি হায়না মহাক্না ফোংদোকখি। মহাক্না বি.আই.এম.এস.তি.ই.সি.গী সেক্রেতরিএত্তা স্তার্ত-অপকী হব অমা শানবগী ৱাফমসু হৌদোকখি।

থৌরম হৌদোকপগী সেসন্দা পীপল্স রীপব্লিক ওফ বঙ্গলাদেশ সরকারগী ইনফোর্মেসন অমসুং কম্ম্যুনিকেসন তেক্নোলোজীগী রাজ্য মন্ত্রী, ঐচ.ই. শ্রী জুনাইদ অহমদ পালক; ভুতানগী রোয়াল গভর্নমেন্তকী ইকোনোমিক এফিয়র্সকী মন্ত্রী, ঐচ.ই. শ্রী ল্যোনপোলোকনাথ শর্মা; ফেদেরেল দেমোক্রেতিক রীপব্লিক ওফ নেপালগী ইন্দস্ত্রী, কম্মর্স অমসুং সপ্লাইগী মন্ত্রী, ঐচ.ই. শ্রী লেখরাজ ভত্তা; কিংদম ওফ থাইলেন্দ সরকারগী নেস্নেল ইন্নোভেসন এজেন্সীগী একজেক্যুতিব দাইরেক্ত, ঐচ.ই. দাঃ পুন-আর্গ চাইরাত্না অমসুং দি.পি.আই.আই.তি.গী সেক্রেতরী, দাঃ গুরুপ্রসাদ মোহাপাত্রাসু ৱা ঙাংখি।

প্রধান মন্ত্রী, শ্রী নরেন্দ্র মোদীনা হয়েং নুমিদাং পুং ৫ তাবা মতমদা ভিদিও কনফরেন্সিংগী খুত্থাংদা স্তার্ত-অপশিংগা ৱারী শাদুনা সম্মিৎ অসিদা ৱা ঙংগনি। লৈবাক ২৫ হেনবা অমসুং মালেমগী ৱাঙাংলোই ২০০ হেনবনা শরুক য়াবা সম্মিৎ অসি ইং ২০১৬তা স্তার্ত-অপ ইন্দিয়া হেক হৌদোকখিবদগী ভারত সরকারনা শিনবা খ্বাইদগী চাউবা স্তার্ত-অপ ইন্দিয়া ইন্তর্নেস্নেল সম্মিৎনি। সম্মিৎ অসিদা সেসন ২৪ লৈদুনা মালেম শিনবা থুংনা লৈরিবা লৈবাকশিংগী মরক্তা লৈনরিবা মরী হেনগৎহনবদা মিৎয়েং চঙদুনা লৈবাকশিং অসিনা পুন্দুনা স্তার্ত-অপ ইকোসীস্তেম অসিবু শেমগত্তুনা মপাঙ্গল কনখৎহন্নবা থৌওং কয়া পাংথোক্কনি।

*****



(Release ID: 1688862) Visitor Counter : 33