প্রধান মন্ত্রী শ্রী নরেন্দ্র মোদীনা লুচিংবা মহাক্কী কেন্দ্রগী মন্ত্রী-মন্দোলনা ঙসি ভারত সরকার অমসুং ভুতানগী রোয়াল গভর্নমেন্তকগী মরক্তা আউতর স্পেস্পু শান্তি ওইনা শিজিন্নবগী মতাংদা খুৎশম্ননা চৎমিন্ননবা বেঙ্গালোর/থিম্পুদা নবেম্বর ১৯, ২০২০দা নাকল অনিমক্কী মরক্তা খুৎয়েক পীনখিবা মেমোরেন্দম ওফ অন্দর্স্তেন্দিং (এম.ও.য়ু. ) অদুগী অয়াবা পীখ্রে।

অকুপ্পা ৱারোলশিং:

মসিগী এম.ও.য়ু. অসিনা ভারত অমসুং ভুতান্না পৃথীবিগী রিমোৎ সেন্সিং তৌবা; সেতিলাইৎ কম্ম্যুনিকেসন অমসুং সেতিলাইত্তা য়ুম্ফম ওইদুনা লম্বী তাকপা; স্পেস সাইন্স অমসুং প্লেনৎশিং থিদোকপা; স্পেস্ক্রাফ অমসুং স্পেস সীস্তেম অমসুং গ্রাউন্দ সীস্তেম শিজিন্নবা; অমসুং স্পেস তেক্নোলোজী শিজিন্নবগী হীরমশিংদা খুৎশম্ননা চৎমিন্নবা য়াহনগনি।

মসিগী এম.ও.য়ু. অসিনা দি.ও.এস./আই.এস.আর.ও. অমসুং ভুতানগী ইনফোর্মেসন অমসুং কম্ম্যুনিকেসন্স (এম.ও.আই.সি.)তগী মীহুৎশিং য়াওদুনা জোইন্ত ৱর্কিং গ্রুপ অমা লৈহনগনি অমসুং মসিনা অকক্নবা মতমগী মনুং অমসুং থবক ওইনা পাংথোকপগী পাম্বৈ য়াওনা থবক-থৌরমশিংগী থৌরাং য়াৎপগী থৌওং পাংথোক্কনি।

থবক পাংথোকপগী থৌওং অমসুং পান্দমঃ

খুৎয়েক পীনখ্রবা এম.ও.য়ু. অসিনা খুৎশম্ননা চৎমিন্নবগী অকক্নবা লম খরদা থবক পাংথোকপগী থৌরাং য়াৎমিন্নবা অমসুং জোইন্ত ৱর্কিং গ্রুপ অমা শেমদুনা এম.ও.য়ু. অসিবু থবক্তা ওন্থোক্নবা অকক্নবা মতম অমসুং পাম্বৈ য়াওনা অতোপ্পা থবকশিংগী থৌরাং য়াৎপগী থৌওংশিংবু ওইথোকহনগনি।

মরু ওইবা চৈথেং:

খুৎয়েক পীনখ্রবা এম.ও.য়ু. অসিনা পৃথীবিগী রিমোৎ সেন্সিং তৌবা; সেতিলাইৎ কম্ম্যুনিকেসন; সেতিলাইৎ নেভিগেসন; স্পেস সাইন্স অমসুং আউতর স্পেস্পু থিদোকপগী হীরম কয়াদা খুৎশম্ননা চৎমিন্ননবগী অনৌবা খুদোংচাবা কয়া খঙদোকমিন্নবগী লম্বী য়াৎকনি।

বেনিফিশরীশিংগী মশিং:

এম.ও.য়ু. অসিগী খুত্থাংদা ভুতানগী রোয়াল গভর্নমেন্তকা খুৎশম্ননা চৎমিন্নবা অসিনা মীওইবগী খুন্নাইদা কান্নবা পীনবগীদমক্তা স্পেস তেক্নোলোজী শিজিন্নবগী হীরমদা খোঙথাং কয়া খুৎশম্নদুনা পায়খৎমিন্নবগী ওইথোকপা লৈহনগনি। মতৌ অসুম্না, লৈবাকশিং অসিগী কাঙলুপ অমসুং মফম খুদিংনা মসিগী কান্নবা ফংগনি।

বেকগ্রাউন্দঃ

ভারত অমসুং ভুতান্না স্পেসকী মতাংদা খুৎশম্নদুনা চৎমিন্নবগী মতাংদা খন্নদুনা লাকখিবনি। স্পেসকী মতাংদা খুৎশম্নবগীদমক্তা নবেম্বর ২০১৭তা সরকার অনিগী মরক্তা খুৎয়েক পীনগদবা এম.ও.য়ু. অমগী তেমপ্লেৎ অসি ভুতানগা মখা তানা খন্ননবগীদমক্তা এম.ই.এ.দা খুৎশিন্নখি। লৈবাক অনি অসিগী মরক্তা ফেব্রুৱারি ২০২০দা পাংথোকখিবা মীফমদা মসিগী দ্রাফ অসিগা লোয়ননা অতোপ্পা খুৎশম্নদুনা চৎমিন্নবগী ৱাহৌদোক কয়াগী মতাংদা খন্ন-নৈনখি।

দিপ্লোমেতিক্কী থোঙদা খরা খন্নরবা অমসুং শেমদোক-শেমজিন তৌরবা তুংদা, নাকল অনিমক অসিনা চৎনবা য়ারবা এম.ও.য়ু. অমগী দ্রাফ শেমখি অমসুং নাকল অনিমক্না য়াশিন্নবা পুরক্নবা মখা তাবা থবকশিং পাংথোকখি। তঙাই ফদ্রবা অয়াবা পীবগী ৱারোল  ফংলবা তুংদা নাকল অনিমক্না নবেম্বর ১৯, ২০২০দা খুৎয়েক পীনরবা মতুংদা অমগা অমগগী মরক্তা লান্নখি।

******