ঙসি অসামদা হাইৱে প্রোজেক্ত ২৭ রোদ ত্রান্সপোর্ত, হাইৱেজ অমসুং এম.এস.এম.ই.শিংগী কেন্দ্রগী মন্ত্রী শ্রী নিতিন গদকরিনা শঙ্গাখ্রে অমসুং উরেপ-উয়ুং তমখ্রে৷ রাজ্য অদুগী মুখ্য মন্ত্রী শ্রী সর্বানন্দ সোনোৱালনা থৌরম অদুগী মপু ওইখি৷

লুপা কোতি ২,৩৬৬ চংনা শাগদৌরিবা প্রোজেক্তশিং অসি রোদ লেঙ্গ কি.মি. ৪৩৯ শাংই৷ হায়রিবা প্রোজেক্তশিং অসিনা রাজ্য মনুং অমসুং রাজ্য অদুগী মপান্দা ললোন-ইতিক্কী ওইবা পোৎ-চৈ পুথোক পুশিন তৌবদা হেন্না লাইহল্লগনি, লৈবাক অদুগী ঙমখৈশিংগা হেন্না শম্নহল্লগনি, থবক ফংবগী চাং হেনগৎহল্লগনি, মতম অমসুং থাউ কল্লগনি, তুরিজম চাওখৎহল্লগনি অমসুং ইনফ্রা দিভেলপমেন্ত হেন্না লৈহল্লগনি অমসুং লৌউ-শিংউগী ওইবা পোত্থোকশিং মার্কেৎতা হেন্না য়ৌহল্লগনি৷

মন্ত্রী অসিনা মমাংগী প্রধান মন্ত্রী অতল বিহারি বাজপয়ীগী লাইফ সাইজ ওইবা ব্রোঞ্জ স্তেচু অদু মাইখুম হাংদোকখ্রে৷ ঙসি অসি লৈখিদ্রবা লিদর অসিগী পোকপা নুমিৎনি৷

থৌরম অসিগী মতাংদা ৱা ঙাংলদুনা অসামদা এন.ঐচ. নেতৱার্ক শেমগৎপদা রাজ্য অসিগী সরকার অসিনা মতেং পাংগনি হায়দুনা শ্রী গদকরিনা থাজবা পীখ্রে৷ মহাক্কী থমোইদা অসামগী অখন্নবা মফম অমা কন্দুনা লৈ হায়না মহাক্না ফোংদোকখ্রে৷ রাজ্য অসিগীদমক সি.আর.আই.এফ.কী মখাদা প্রোজেক্ত ১৭৪গীদমক লুপা কোতি ২,১০৪গী শেনফম এপ্রুব তৌখ্রে অমসুং মসিগী মনুংদা হৌজিক ফাওবদা লুপা কোতি ১,১৭৭ কাইথখ্রে হায়না মন্ত্রী অসিনা ফোংদোকখ্রে৷ চহীগী ওইবা এক্রুয়েল লুপা কোতি ১৩৯ লৈরিবা অসিগী মাইয়োক্তা হৌজিক চৎলিবা চহী অসিগীদমক সি.আর.আই.এফ.কী মখাদা মন্ত্রী অসিনা লুপা কোতি ২২১গী শেনফম লাওথোকখ্রে৷

হৌজিক চৎলিবা ফাইনান্সিয়েল চহী অসিগীদমক অসামগী এন.ঐচ.ও.গী শেনফম হান্না লুপা কোতি ১,২১৩ থাদরম্বা অদু লুপা কোতি ২,৫৭৮ য়ৌনা থাদরগনি হায়না শ্রী গদকরিনা লাওথোকখ্রে৷ মদু তাবদা মী লিশিং কয়ানা থাগৎপগা লোইননা হরাউ-নুংঙাইবা ফোংদোকখ্রে৷

লুপা কোতি ৮৫,০০০গী শেনফম ওইগদবা রোদ অমসুং ইনফ্রাস্ত্রকচর ৱার্কশিং রাজ্য অসিদা পাংথোক্লগনি হায়না মন্ত্রী অসিনা ফোংদোকখ্রে৷ ২০২১দা লুপা কোতি ১৪,০০০গী শেনফম ওইগদবা থবকশিং পাংথোকহল্লগনি অমসুং অতোপ্পা লুপা কোতি ২৬,০০০গী শেনফম ওইগদবা প্রোজেক্তশিংগীদমক দি.পি.আর. শেম্লি৷ ২০২০গী মতমদা রাজ্য অসিদা লুপা কোতি ১,১০২গী শেনফম চংদুনা অশাংবা লম্বী কি.মি. ২১৭ মপুং ফানা শেম্বা লোইশিনখ্রে হায়না মহাক্না ফোংদোকখ্রে৷ লাক্কদৌরিবা চহী অসিদা লুপা কোতি ২,৫১১গী শেনফম থাদদুনা কি.মি. ৩৫৭ শাংবা লম্বী মপুং ফানা লোইশিল্লগনি হায়না মহাক্না ফোংদোকখ্রে৷ হন্দক্কী চহী অসিগী ওইনা লুপা কোতি ১৩,৬২০গী শেনফম চংদুনা কি.মি. ২৯৫ শাংবা প্রোজেক্ত ১৯ শেম্বা লোইশিনখ্রে৷ লুপা কোতি ২৫,৭০০গী শেনফম চংদুনা শাগদৌরিবা কি.মি. ৮৪৫ শাংবা লম্বীগী প্রোজেক্ত ২০গীদমক দি.পি.আর. শেম্লি৷

সিল্চরদা মল্তি মোদেল লোজিস্তিক পার্ক (এম.এম.এল.পি.) অমা শাবগী মতাংদা শ্রী গদকরিনা লাওথোকখ্রে৷ মসিনা জোগিঘোপাদা শারিবা অদুগী মতুং তারকপদা অসামদা অনিশুবা এম.এম.এল.পি. ওইরগনি৷ রাজ্য সরকারনা বরাক তুরেল মপান্দা লৈরিবা হরিনচ্রা খুঙ্গংদা বিঘা লম ২০০ ফংহল্লগনি৷ মসিনা লম্বীশিং শেমগৎতুনা অমসুং ইশিংগী লম্বী শমজিন্নহন্দুনা মফম অদুগী মীয়ামশিংদা কান্নবা পীরগনি৷

লাক্কদৌরিবা থা অসিদা ধুব্রি-ফুলবরি থোং শাবা হৌরগনি হায়না মন্ত্রী অসিনা লাওথোকখ্রে৷ মসিগী কি.মি. ১৯ শাংবা থোং অসিদা লুপা কোতি ৪,৪৯৭ চাদিং তৌরগনি হায়না মহাক্না লাওথোকখ্রে৷ মসিনা অসাম অমসুং মেঘলয় অনিগী মরক্তা লৈরিবা অরাপ্পা অদু কি.মি. ২০৩ হন্থহল্লগনি৷ মদুগী উরেপ-উয়ুং তম্বা অদু লাক্কদৌরিবা নুমিৎ ১৫ অসিদা পাংথোকপিনবা প্রধান মন্ত্রীদা মহাক্না হায়জরি হায়না মহাক্না ফোংদোরকখ্রে৷

দি.পি.আর. অসি শেম শাদুনা লৈরে অমসুং লুপা কোতি ৯০০ চংনা শাগদৌরিবা কি.মি.১৩১ শাংবা মজুলি প্রোজেক্ত অসিগী শরুক অমা ওইরিবা কি.মি. ৬.৭৫ শাংলিবা মজুলি থোং অসিগীদমক তেন্দর অদু পুথোকখ্রে৷

কেন্দ্রগী মন্ত্রী অসিনা হায়রম্বা সজেসন পুম্নমক থবক ওইনা ওন্থোক্কনি হায়না মুখ্য মন্ত্রী শ্রী সর্বনন্দ সোনোৱলনা থাজবা পীরকখ্রে৷ রাজ্য অসি চাওখৎননবগীদমক অমসুং মহাক্কী প্রজাশিংগী পুন্সি মরেল অদু হেন্না ফনা লৈহন্ননবগীদমক মহাক্কী সরকার অসিনা হোৎনৈ হায়না মহাক্না ফোংদোকখ্রে৷ মহাক্কী সরকার অসিগী পান্দমশিং অসি ফংবা ঙম্নবা মহাক্না কেন্দ্রগা কোওপরেসন পীনরি হায়না মহাক্না ফোংদোকখ্রে৷

*****