দিবলপমেন্ত ওফ নোর্থ ইস্তর্ন রিজন(দোনর)গী রাজ্য মন্ত্রী(মনিংতম্বা), পি.এম.ও, পর্সোনেল, পব্লিক গ্রিভান্সেস, পেন্সন্স, এতোমিক ইনর্জি অমসুং স্পেসকী রাজ্য মন্ত্রী দোক্তর জিতেন্দ্র সিংহনা ঙসি হায়খি মদুদি কোবিদ লাইচৎ মতুংদা ভারত্তা অৱাং-নোংপোক লমদম লমকোয়বা অমসুং ললোন-ইতিক্কী পাম্নবা মফম অমা ওইরক্লগনি। ভর্চুএল ওইনা পাংথোকপা ৮সুবা নোর্থ ইস্ত ফেস্তিবেলদা চীফ গেস্ত ওইনা ৱা ঙাংবদা মহাক্না হায়খি লমদম অসিদা মরাংকাইনা লৈরিবা মহৌশাগী লনশিং অমসুং মীওইবগী লৌশিংগী লনশিংগী মতেংনা শেন-থুমগী শক্তি অমা ওইরক্নবা অৱাং-নোংপোক লমদম্না ভারত লমজিংগনি। লমদম অসিনা শেন্মিৎলোন্দা “অনৌবা ইঞ্জিন” অমা ওইনা থবক তৌগনি অমসুং মালেমগী অতোপ্পা মফমশিং ভাইরসকী চৈথেং ফংদুনা লৈরিঙৈ মতমদা, অৱাং-নোংপোক লমদম অসি য়ুরোপকী লমকোয়ফমশিংগী মহুৎশিনবা মফম অমা ওইরক্লগনি।

মহাক্না হায়খি লাক্লিবা মতম অসিদা লমকোয়বা পামজবশিংনা মালেমগী অতোপ্পা লমকোয়ফমশিংদগী হেন্না ফজবা মহৌশাগী ফজবা কয়া লৈরিবা অৱাং-নোংপোক লমদম অসিনা হেন্না পাম্নরগনি। লাইচৎ মতুংদা ললোন-ইতিক পাংথোক্তুনা মালেমগী অতৈ লৈবাকশিংনা শেন-থুমগী ফিবম অমুক ফগৎনবা হোৎনরিঙৈ মতমদা, অৱাং-নোংপোক লমদম্না ভারত চাউখৎনবা অনৌবা ইঞ্জিন অমা ওইরগনি।

মহাক্না মখা তানা হায়খি লমদম অসিদা ৱা য়াওনা মসিগী শীজিন্নদনা লৈরিবা মহৌশাগী লনশিং শীজিন্নদুনা “লমদম অসিগী পোৎথোক শীজিন্নবা” হায়বা লাইৱা অসিগা লোয়ন্না প্রধান মন্ত্রী নরেন্দ্র মোদীগী অত্মানির্ভর ভারত অভিয়ান খুমাঙচাউশিনবা ঙমহনগনি। হন্দক কেন্দ্র সরকারনা ৱাগী পোৎলমশিংগী ইমপোর্ত দিউতি চাদা ২৫দা হেনগৎখিবা অসিনা লৈবাক অসিদা ৱাগী ইন্দস্ত্রিশিং, হেন্দিক্রাফ অমসুং অগরবতি শাবগী থবক্তা মতেং পাংলগনি অমসুং য়ুম-কৈ শাবদা ৱা শীজিন্নবা পুক্নিং থৌগৎলগনি। ২০১৭দা মোদী সরকারনা চহি ১০০ শুরবা ইন্দিয়ান ফোরেস্ত এক্ত শেমদোকপদগী লৈবাক অসিদা ফংলিবা ৱা অসি কোমথোকপদগী ৱাগী মতেংনা হিংলিবশিংগী খুদোংচাবশিং মরাংকাইনা ফংলে।

দোক্তর জিতেন্দ্রনা হায়খি লম্বী, রেল অমসুং মথক্কী চৎথোক-চৎশিনগী ফিবম ফগৎলকপদগী লমদম অসিদা পোৎ-চৈ পুথোক-পুশিন অমসুং মী চৎথোক-চৎশিনগী খুদোংচাবা হেনগৎলকপগা লোয়ন্না লৈবাক শীনবা থুংনা চৎথোক-চৎশিনগী খুদোংচাবসু হেনগৎলে। লমদম অসিগী নহারোলশিংনা লমদম অসিগী শেন-থুমগী ফিবম অৱাংবা থাকশিংদা পুখৎনবা হোৎনবদা মরুওইবা থৌদাং অমা লৌগনি।

সরকারগী এক্ত ইস্ত পোলিসিগী মতাংদা দোক্তর জিতেন্দ্রনা হায়খি, শেন-থুমগী ফিবম ফগৎলক্লিবা খা নোংপোক এসিয়াগী লৈবাকশিংগী লমদম অসিনা থোঙ্গাল ওইনা অসিয়ান লৈবাকশিংগা ললোন-ইতিক্কী মরীশিং ফগৎহনবদা অৱাং-নোংপোক লমদম্না মরুওইবা থৌদাং অমা লৌরি। লৈবাকশিংগী মরক্তা লৈনরিবা মতেং পাংনবা অসি অৱাংবা থাক অমদা পুখৎনবা প্রধান মন্ত্রী শ্রী নরেন্দ্র মোদীনা “লুক ইস্ত” পোলিসি অসি “এক্ত ইস্ত”তা ওন্থোক্লে।

থৌরম অদুদা অসাম, ত্রিপুরা, মনিপুর, সিক্কিমগী চীফ মিনিস্তরশিং অমসুং অৱাং-নোংপোক রাজ্যশিংগী সেনিয়র মিনিস্তরশিং অমসুং ওফিসিএলশিং শরুক য়াখি। ফোরেন সেক্রেতরি শ্রী হর্স ভর্ধন শ্রিংলানা অখন্নবা ৱারোল থমখি।

*****