প্রধান মন্ত্রী শ্রী নরেন্দ্র মোদীনা ঙসি স্পেস সেক্তরগী মরুওইবা ইন্দস্ত্রীশিং, স্তার্তঅপশিং অমসুং একাদমিয়াশিংগা লোইননা মখোয়না স্পেসকী থবক-থৌরমদা শরুক য়াবদা পুক্নীং থৌগৎনবা ভিদিও কনফরেন্সকী থোংদা ৱারী শানখ্রে।

প্রধান মন্ত্রীগী লুচিংবা কেন্দ্রগী মন্ত্রীমন্দলনা জুন, ২০২০দা স্পেস সেক্তর হাংদোক্নবা অমসুং স্পেসকী থবক-থৌরমদা ভারতকী প্রাইবেৎ সেক্তরনা শরুক য়াবা ঙমহন্নবা পুৱারী ওইরবা ৱারেপ লৌখ্রে। ইন্দিয়ন নেস্নেল স্পেস প্রমোসন এন্দ ওথোরাইজেসন সেন্তর (ইন-স্পেস) শেমগৎপগা লোইননা, রিফোর্মশিংনা প্রাইবেৎ কম্পনীশিং অমসুং স্তার্ত-অপশিংগীদমক্তা খুদোংচাবা পীরগনি। মসিগী মতুংদা, ভেঞ্চর কয়ামরুম্না স্পেস দিপার্তমেন্তকী মখাদা ইন-স্পেসতা প্রপোজেলশিং পীশিনখ্রে। প্রপোজেলশিং অদুদা সেতিলাইৎ কন্সতেলেশন, অপীকপা সেতিলাইৎ লোঞ্চ ভেহিকলশিং, গ্রাউন্দ স্তেসন, জিওস্পাসিএল সর্বিসশিং, প্রপুল্সন সিস্তেমশিং অমসুং এপ্লিকেসন প্রদক্তশিং য়াওরি।

স্পেস সেক্তরদা ভারতকী ওইথোকপা য়াবশিং হেনগৎহনবা

প্রধান মন্ত্রীনা শরুক য়াখিবশিংদা হৌজিক ফাওবগী মখোয়না থেংনরকখিবশিংগী মতাংদা ফীদবেক ফংহনবীবগীদমক থাগৎপা ফোংদোকখি। মহাক্না হায়খি মদুদি স্পেস সেক্তরদা ভারতকী ওইথোকপা য়াবশিং হেনগৎহন্নবগী ৱারেপ অসিদগী লম অসিদা অনৌবা মীরোলগী পব্লিক-প্রাইবেৎ পার্তনরশিপ হৌদোক্লে। মহাক্না শরুক য়াখিবা পুম্নমক্তা মায়কৈ অসোমদা সরকারগী মায়কৈদগী মপুং ফানা অমসুং থমোই শেংনা শৌগৎনবা থাজবা পীখি। মহাক্না হায়খি মদুদি প্রোফেস্নেলিজম অমসুং পোলিসীদা নুং-পান উবগা লোইননা সরকারগী ৱারেপ লৌনবগী থৌওংনা স্পেস সেক্তরগী শম্নরিবা কম্পনীশিংগীদমক কান্নবা ওইগনি।

কম্পনীগী রোকেৎ অমসুং সেতিলাইৎশিং শানবগী থৌরাংশিংদা খন্নরদুনা প্রধান মন্ত্রীনা হায়খি মদুদি মসি য়াম্না চাউবা অহোংবা অমনি অমসুং মসিদগী তুংলমচৎতা স্পেস সেক্তরদা ভারতকী ফিভম হেন্না ফগৎলগনি। মহাক্না হায়খি মদুদি সেক্তর অসিদা প্রাইবেৎ ইনভেস্তমেন্ততগী হাই-তেক জোবশিং ফংহল্লগনি, মসিদগী আই.আই.তি./এন.আই.তি. অমসুং অতৈ তেক্নিকেল ইন্সতিত্যুসনশিংগী তেলেন্ত পুলদা চাউনা খুদোংচাবা ফংহল্লগনি। মহাক্না হায়খি, মহাক্না থাজৈ মদুদি ভারতকী তেলেন্তনা মালেমগী থাক্তা আই.তি. সেক্তরদা শরুক য়াবা ফংবা অসিগুম্না, স্পেস সেক্তরদসু মখোয়না অসুম্না তৌবা ঙমগনি।

ইজ ওফ দোইং বিজিনেস্তগী হেন্না চখৎকনি

প্রধান মন্ত্রীনা হায়খি মদুদি স্পেস সেক্তরদা রিফোর্ম তৌবা অসি শুপ্নগী ইজ ওফ দোইং বিজিনেস্তা লোইবা নত্তে, তেস্তিং ফেসিলিতীশিং অমসুং লোঞ্চপেদ ফংহনবা য়াওনা তাঙ্কক খুদিংদা শরুক য়ারিবশিংগীদমক্তা মতেং পাংনবগীদমক্তা মথৌ তাবা মেকানিজম হৌদোকখ্রে। মহাক্না হায়খি মদুদি রিফোর্মশিং অসিগী থোংদা, শুপ্নগী ভারতপু কম্পিতিতিব স্পেস মার্কেৎ শেম্নবা হোৎনবতা নত্তনা, স্পেসকী থবক-থৌরমগী কান্নবা অসি লাইরবদগী লাইরবা মীওই ফাওবদা য়ৌহন্নবা হোৎনবনি।

আত্মনির্ভর ভারত অভিয়ান্দা চেৎনা শরুক য়াবা

স্পেস দিপার্তমেন্ত (দি.ও.এস.)কী সেক্রেতরী অমসুং ইসরোগী চিয়রমেন দা. কে. সিবন্না প্রধান মন্ত্রীদা ইন-স্পেস্তগী অয়াবা লৌননবা ইন্দস্ত্রীদগী ফংবা তোঙান তোঙানবা প্রপোজেলশিং অমসুং স্পেস দিপার্তমেন্ততগী ফংবা সপোর্তকী মতাংদা পাউদমখি। মহাক্না হায়খি মদুদি স্পেসকী থবক-থৌরমশিং পায়খৎনবা ইন্দস্ত্রী ২৫দগী হেনবরোমনা হান্ননা দি.ও.এস.কা পাউ ফাওনরে।

*****