ঙসি নিউ দিল্লিদা য়ুথ এফেয়ার্স অমসুং স্পোর্তসকি য়ুনিয়ন মিনিস্তর শ্রী কিরেন রিজিজু শরুক য়াদুনা মেজর ধ্যান চান্দ নেসনেল স্তদিয়মদা ইসক্বাস কোর্ত ৬ শানবা এক্সতর্নেল এফেয়ার্সকী য়ুনিয়ন মিনিস্তর দোক্তর এস. জয়সঙ্করনা উরেপ-উয়ুং তমখ্রে।

মহাক মশামক শান্নবা পামজবা অমসুং অফবা ইসক্বাস শান্নরোয় অমা ওইনা থৌরমগী চীফ গেস্ত ওইখিবা দোক্তর এস. জয়সঙ্করনা প্রোজেক অসি থাগৎলদুনা হায়খি স্তদিয়ম অসি লোইবগা মফম অসিদা ইসক্বাস শান্নবা লাক্কনি হায়না মহাক্না থাজবা থম্লি। ভারত্তা শান্ন-খোৎনবগী হৈথোই-শিংথোইবা মরাংকাইনা লৈরি অমসুং হায়রিবা হৈথোই-শিংথোইবা অদু শেমগৎনবা লৈবাক অসিগী মতিক চাবা অমসুং থৱায় য়াওবা কোচশিংদা মতম পীগদবনি। হৈথোই-শিংথোইবা শান্নরোয়শিংগা কোচশিংগা পুনবা ঙমদবগী অৱাৎপা লৈরি। মসিগী শান্নফম অসি তমজনফম অমা ওইগনি অমসুং অতোপ্পা মফম কয়া লিংখৎনবা ইথিল পীগনি হায়না ঐনা থাজবা থম্লি। ঐখোয়না মী খুদিংমক শান্নবা ফংহনগদবনি, মসি মীওই কাংলুপ খর খক্তগী ওইহল্লোইদবনি। মী খুদিংমক শান্নবা ফংহনবদগী মশান্না অয়াম্বদা ঐখোয়না ফজনা শান্নবা ঙম্বনি। মসিগী মাইকৈ অসিদা ইসক্বাসনা খোঙথাং অমা থাংজিল্লে হায়না ঐনা থাজৈ।

প্রোজেক অসিগী লুপা করোর ৫.৫২ কাইথোক্লে অমসুং ইসক্বার মিতর ৭৫০গী পাক-চাউবা শান্নফম অসি থা ৬গী মনুংদা লোইশিনগনি হায়না পানরি। শান্নফম অসিদা সিঙ্গল ইসক্বাস কোর্ত ৬ লৈগনি অমসুং লৌথোক-লৌশিন য়াবা ফক্লাংশিং খাদুনা মসিগী মনুংদা কোর্ত ৩ দবল কোর্তশিং ওইনা শীজিন্নগনি।

স্পোর্তস মিনিস্তরনা হায়খি অনৌবা শান্নফম অসিদগী অনৌবা ৱার্ল্দ চেম্পিয়নশিং পুথোক্কনি। নেসনেল স্তদিয়মদা মফম অমা ফংবা অসি শিংথানিঙাই ওইবা অমনি। কমপ্লেক্স অসিদা মফম অমা ফংবা অসিনা অফবা খুদোংচাবা অমা ফংলগনি। কোর্ত ৬ লৈবা ইসক্বাস শান্নফম অসি মালেম থাক্কী ওইবতা নত্তনা, মসিনা সেন্তর ওফ এক্সলেন্স অমা ওইনা ঐখোয়না ৱার্ল্দ চেম্পিয়নশিং পুথোকপা ঙমগনি অমসুং মচিন তুমখৎলক্লিবা শান্নরোয়শিংনা মসিগী সেন্তর অসিগী খুদোংচাবা খ্বাইদগী য়াম্না লৌগনি হায়না ঐনা থাজৈ। ঐখোয়গী পান্দমদি শান্নরোয়শিংনা শান্নফম কদাইদা লৈবগে হায়না থিবা অদু নত্তে, ঐখোয়না মখোয়দা খুদোংচাবশিং ফংহনবা অদুনি।

এসিয়ান গেমস অমসুং কম্মনৱেল্থ গেমশিংদা ইসক্বাস অসি ভারতনা খ্বাইদগী য়াম্না মাইপাকপা স্পোর্তস অমা ওইরি। সৌরব গোসাল, দিপিকা পাল্লিকাল অমসুং জোসনা চিনাপ্পানা লৈবাক অসিগী মিংচৎ পুরকখি।

থৌরম অদুদা সাইগী দিরেক্তর জেনেরেল শ্রী সন্দিপ প্রধান, ইসক্বাস রেক্কেতস ফেদেরেসন ওফ ইন্দিয়াগী সেক্রেতরি জেনেরেল সাইরস পোনচা অমসুং এন.বি.সি.সিগী দিরেক্তর(প্রোজেকস) শ্রী নিলেস সাহ শরুক য়াখি।

*****