ভারত অমসুং য়ুনাইতেদ কিঙদম্না মখোয়গী মরক্তা লৈনরিবা এজুকেসনগী মতাংদা খুৎশম্নরিবা অসিবু হেন্না মপাঙ্গল কনখৎহন্নবা ৱাফম ফোংদোকমিন্নখ্রে। এজুকেসনগী মন্ত্রী শ্রী রমেশ পোখ্রিয়াল ‘নিশাঙ্ক’ অমসুং য়ু.কে.গী ফোরেন সেক্রেতরী, রিতাইয়র্দ হোনঃ দোমিনিক রাবকী মরক্তা ঙসি পাংথোকখিবা লৈবাক অনিগী মীফম অমদা লৈবাক অনি অসিগী মরক্তা এজুকেসন, রিসর্চকী হীরমদা কুপথনা থবক পাঙথোকপা অমসুং অমনা অমগী একাদমিক ক্বালিফিকেসন অসি মথংগী চহি ফাওবগী মনুংদা শক খঙদোকমিন্ননবা থবক তৌমিন্নবগী মতাংদা য়ানবা পুরকখ্রে। এজুকেসনগী রাজ্য মন্ত্রী, শ্রী সঞ্জয় ধোত্রে; হাইয়র এজুকেসনগী সেক্রেতরী, শ্রী অমিৎ খারে অমসুং মন্ত্রালয় অসিগী সেনিয়র ওফিসিএলশিংসু মীফম অসিদা শরুক য়াখি।

য়ু.কে.গী ফোরেন সেক্রেতরী, রিতাইয়র্দ হোনঃ দোমিনিক রাবনা ভারতকী নেস্নেল এজুকেসন পোলিসী ২০২০বু থাগৎলদুনা মিৎয়েং শানবা অমনি অমসুং হৌদোক্লিবা খোঙথাং অসিনা মহৈরোইশিং, শেন্মিৎলোন অমসুং লৈবাক অনি অসিগী মরক্তা হেন্না কুপথবা খুৎশম্নবগী পাংথোক্লিবা থৌওংশিং অসিদা অনৌবা খুদোংচাবা কয়া অমা পীরগনি হায়খ্রে। ইং ২০১৮দা, প্রধান মন্ত্রী শ্রী নরেন্দ্র মোদীগী য়ু.কে.গী খোঙচত্তা মহাক্না এজুকেসন অসি ভারত অমসুং য়ু.কে.গী মরক্তা লৈরিবা অহিংবা থোং অমনি হায়না থম্লমখিবা ৱাফম্বু নীংশিংলদুনা শ্রী রাবনা পোলিসী অসিনা হায়রিবা থোং অসিবু মপাঙ্গল হেন্না কনখৎহল্লগনি হায়খ্রে। মহাক্না ভারত্তগী থোক্লকপা একাদমিক্কী মগুন অসিবু য়ূ.কে.না য়াম্না ইকায় খুম্নৈ হায়রদুনা ভারতকী মহৈরোইশিংগী খুন্নাই অসিনা লৈবাক অসিদা কান্নবা পীরিবশিং অসি য়াম্না মগুন লৈনা লৌই হায়নসু হায়খি। মহাক্না হায়খিবদা য়ূ.কে.না মহৈরোইশিংনা চত্থোক-চৎশিন তৌবদা হেন্না খুদোংচাহন্নবা হায়দুনা মখোয়গী ভিজা অমসুং ইমিগ্রেসনগী কাঙলোনশিংদা হীরম কয়া অমসু শেমদোকখ্রবনি হায়খি।

ভারত অমসুং য়ু.কে.না লৈবাক অনি অসিদগী মশক নাইরবা অৱাংবা থাক্কী এজুকেসনগী লুপশিংগী মীওইশিং য়াওবা তাস্ক ফোর্স অমা শেমদুনা অমনা অমগী একাদমিক ক্বালিফিকেসন অসি মশক খঙদোকমিন্ননবা য়ানবসু পুরকখ্রে। তাস্ক ফোর্স অসিদা য়াওগদবশিং অমসুং মসিগী কাঙলোনশিংগী ওইনদি ওফিসিএলগী থাক্তা খন্নদুনা ৱারেপ লৌগনি।

থৌরম অসিদা ৱা ঙাংবদা, এজুকেসন মন্ত্রী শ্রী রমেশ পোখ্রিয়াল ‘নিশাঙ্ক’না অমনা অমগী একাদমিক ক্বালিফিকেসনবু মশক খঙদোকমিন্নবগী থৌওং অসি তাস্ক ফোর্স শেম্বা অসিনা খোঙজেল য়াঙখৎহনগনি হায়খ্রে। মসিনা ভারতনা মসিগী হাইয়র এজুকেসনবু মালেমগী থাক্তা পুখৎপগী পান্দম অসিবুসু শৌগৎকনি হায়খ্রে। অমনা অমগী একাদমিক ক্বালিফিকেসনবু মশক খঙদোকমিন্ননবা হোৎনমিন্নবগী য়ানবা পুরক্লিবা অসি চহি অসিগী জুলাইদা থোকখিবা নেস্নেল এজুকেসন পোলিসী (এন.ই.পি.) ২০২০দা হৌদোক্লিবা অসিগী মতুং ইন্না প্রধান মন্ত্রীনা মালেমগী ওইবা মোবাইল ৱর্কফোর্স অমা শেমগৎপা অমসুং ভারতকী হাইয়র এজুকেসনবু মালেমগী থাক্তা পুখৎপগী মঙলান অসিগা মরী লৈনৈ হায়খি।

এজুকেসনগী লমদা ভারতকা য়ু.কে.গা লৈনরিবা মরী অসিগী মতাংদা ঙাংলদুনা শ্রী পোখ্রিয়ালনা লৈবাক অনি অসিগী মরক্তা লৈনরিবা মরী অসি য়াম্না কান্নবা অমসুং মতেং-পাংনবগী থৌওং কয়া লৈনদুনা লাকখি হায়খি। ঙসিগী য়ানবা পুরক্লিবা অসিনা লৈবাক অনি অসিনা মখোয়গী মরক্তা লৈনরিবা মরীবু এজুকেসন, রিসর্চ অমসুং অনৌবা থৌওং পাংথোকপগী খুত্থাংদা হেন্না ফগৎলক্কনি হায়বা তাক্লে হায়খি।

নাকল অনিমক্না এজুকেসন, রিসর্চ অমসুং অনৌবা থৌওং পাংথোকপগী লমদা অমনা অমবু তেংবাংবগী থৌওংবু হেন্না মপাঙ্গল হাপ্তুনা লৈবাক অনি অসিগী মরীবুসু মপাঙ্গল হেন্না কনখৎ হল্লগনি হায়বগী থাজবা ফোংদোক্নখি।

****