ইনফোর্মেসন অমসুং ব্রোদকাস্তিংগী য়ুনিয়ন মিনিস্তর শ্রী প্রকাস জাবরেকারনা হায়খি কোরোনাভাইরসতা য়ুম্ফম ওইবা অতেনবা ফিল্মশিং উৎনবা ফিল্ম ফেস্তিবেল অমা পাংথোক্নবা ৱাখল্লোন অসি অঙকপনি। ইন্তরনেসনেল কোরোনাভাইরস সোর্ত ফিল্ম ফেস্তিবেলদা ৱা ঙাংবদা শ্রী জাবরেকারনা হায়খি তোপিক অমদা ফেস্তিবেল অসিদা লৈবাক ১০৮কী ফিল্ম ২,৮০০ শরুক য়াবা অসি মীয়ামগী অঙকপা হৈশিংবগী খুদম অমনি। ফেস্তিবেল অশীন-অরাং তৌরিবশিং মিনিস্তরনা থাগৎখি। 

শ্রী জাবরেকারনা হায়খি লাইচৎ অসিনা মালেম শীনবা থুংনা লৈবাকশিং অৱাবা তাহল্লে। অদুবু, লাইচৎ অসি ২০২০গী অঙনবা শরুক্তা খঙদুনা, প্রধান মন্ত্রী শ্রী নরেন্দ্র মোদীগী লমজিং মখাদা ভারতনা মসিগী অৱাবা অসি লাকশিনবা ঙম্লে অমসুং লাইচৎ অসিগী মায়োক্তা লেপ্পা লৈতনা থবক পায়খৎতুনা লাক্লি।

মিনিস্তরনা হায়খি হৌজিক কোরোনাভাইরসকী অৱাবা কোক্নবা পাম্বৈ ফংলে অমসুং ভারতসু অথুবা মতমদা তিকাশিং ফংলগনি। এন্তি বোদিশিং শেমদ্রিঙৈ মমাঙ অমসুং অনিসুবা দোজগী তিকা কাপত্রিঙৈদা মীয়াম্না কোমথোক্লোইদবনি।

গৱাদা পাংথোক্কদবা ৫১সুবা ইন্তরনেসনেল ফিল্ম ফেস্তিবেল ওফ ইন্দিয়া মতাংদা শ্রী জাবরেকারনা হায়খি ইন্তরনেসনেল ফিল্ম ফেস্তিবেল ওফ ইন্দিয়া হায়ব্রিদকী মওং অমদা পাংথোক্কনি। ভাবক মশিং য়ামদনা মফম অমদা পাংথোক্কদবা হৌদোকপা অমসুং লোইশিনবগী থৌরমশিং মীয়াম্না ওনলাইন্দা য়েংবা য়াগনি। ইন্তরনেসনেল ফিল্ম ফেস্তিবেল ওফ ইন্দিয়াগী ইদিসন অসিদা নন-ফিচর ফিল্ম ২১ শরুক য়াগনি।

থৌরম অদুদা ৱা ঙাংবদা মাইনোরিতি এফেয়ার্সকী য়ুনিয়ন মিনিস্তর শ্রী মুক্তার অব্বাস নাগবিনা ভারতগুম্বা অচৌবা লৈবাক অমদা মাইপাক্না কোরোনাভাইরসকী মতাংদা মীয়ামদা ৱাখল তাহনবগীদমক শ্রী জাবরেকার অমসুং ইনফোর্মেসন অমসুং ব্রোদকাস্তিং মিনিস্ত্রি থাগৎখি। য়াম্লবা অতেনবা ফিল্মশিং মফম অমদা পুরকপগীদমক জুরি অমসুং অশীন-অরাং তৌরিবশিং মহাক্না থাগৎখি।

*****