ঙসি ভর্চুএল ওইনা ২০সুবা শ্রী লঙ্কা ইকোনোমিক সম্মিৎ(এস এল ই এস)হৌদোকপদা ফাইনান্স অমসুং কোর্পোরেত এফেয়ার্সকী য়ুনিয়ন মিনিস্তর শ্রীমতি নিরমালা সিতারমন্না মরুওইবা ৱারোল ফোঙদোকখ্রে। শ্রী লঙ্কা ইকোনোমিক সম্মিৎ অসি শেন্মিৎলোন অমসুং ললোন-ইতিক্কী ৱাফমশিং খন্ননবা শ্রী লঙ্কাগী মাংজিল থারিবা ফোরম সিলোন চেম্বর ওফ কমর্স(সি সি সি)না চহিগী ওইনা শীনবা থৌরমনি। চহি অসিগী থৌরমগী পান্দমদি “ রোদমেপ ফোর তেক-ওফ: দ্রাইভিং এ পিপল-সেন্ত্রিক ইকোনোমিক রিভাইবেল” হায়বনি। হৌদোকপা থৌরমদা শ্রী লঙ্কাগী প্রসিদেন্ত গোতাবায়া রাজপাকসানা চীফ গেস্ত ওইনা শরুক য়াখি।

লাইচৎনা থোকহনবা খুদোংচাদবশিং কোকহন্নবা ভারতনা পায়খৎলিবা থবকশিংগী মতাংদা ফাইনান্স মিনিস্তরনা পাউদমখি। ফাইনান্স মিনিস্তরনা হায়খি ভারতকী ‘অত্মানির্ভর ভারত অভিয়ান’ অমসুং ‘মশাগী ওক্নবা পুথোকপা শ্রী লঙ্কা’গী পান্দম অসি মতেং পাংনবা অমসুং অমনা অমবু শৌগৎনবনি অমসুং মসিনা লৈবাক অনিমক্কী শেন-থুমগী থবকশিং অমুক হন্না হিঙ্গৎহনবদা মতেং পাংনবদা মখা তানা শীজিন্নগনি। ভারত অমসুং শ্রী লঙ্কাগী মরক্তা মতেং পাংনবা অসিনা তুংকোইনা চাউখৎপদা মতেং পাংগনি অমসুং মসি লৈবাক অনিমক্কী মীয়াম চাউখৎহন্নবা তঙাইফদবনি।

ফাইনান্স মিনিস্তরনা হায়খি শ্রী লঙ্কাগা চাউখৎ-থৌরাংগী মতেং পাংনবদা ভারতনা অচেৎপা মরুপ অমা ওইদুনা লাক্লি অমসুং নাকল অনিমক কান্নবশিং ফংনবা মখা তানা ৱাহন্থোক লৈবা শেন-থুমগী মতেং পীন্নবা থৌরাং তৌদুনা লৈরি। ইন্দস্ত্রি অমসুং প্রাইবেত সেক্তরগীদমক চৎন-কাংলোন অমসুং থৌশিল ফজনা শেম্বগী মরুওইবা অদু মহাক্না ফোঙদোকখি।

****