হর হর মহাদেব! হর হর মহাদেব! হর হর মহাদেব!

কাশী কোতৱালনা য়াইফে! ইমা অন্নপুর্নানা য়াইফরে! ইমা গঙ্গানা য়াইফরে!

জো বোলে সো নিহাল, সত শ্রী অকাল! নমো বুদ্ধায়ে!

কাশীদা লৈবীরিবা পুম্নমক্কী মফমদা, ইরৈবাকচা পুম্নমক্কী মফমদা কার্তিক পুর্নিমা দেব দীপাবলীগী হন্না হন্না য়াইফ-পাউজেল পীজরি। পুম্নমকপু গুরুনানক দেবজীগী মঙান ফংবা থৌরম অসিদসু হন্না হন্না নুংঙাইবা ফোংদোকচরি।

উত্তর প্রদেশকী মুখ্য মন্ত্রী য়োগী আদিত্যানাথজী, সংসদতা ঐগী খোংলোই ওইবীরিবা শ্রীমান রাধামোহন সিংহজী, য়ু.পি. সরকারদা মন্ত্রী ওইবীরিবা ভাই আশুতোশজী, রবিন্দ্র জৈস্বালজী, নীলকন্থ তিৱারীজী, প্রদেশকী ভাজপাগী প্রসিদেন্ত ভাই স্বতন্ত্রদেব সিংহজী, এম.এল.এ. সৌরব শ্রীবাস্তবজী, বিধান পরিশদকী মীহুৎ ভাই অশোক ধৱনজী, মফম অসিগী ভাজপাগী মহেশচন্দ্র শ্রীবাস্তবজী, বিদ্যাসাগর রায়জী, অতৈ অহল ওইরবা শক্নাইরবশিং অমসুং ঐগী নুংশিরবা কাশীগী ইচিল-ইনাওশিং,

নরায়নগী অখন্নবা থানি হায়না লৌনরিবা শেংলবা কার্তিক্কী থা অসিবু ঐগী কাশীগী মীয়াম্না কতিকি পুনৱাসী হায়না কৌনৈ। অমসুং হায়রিবা পুনৱাসী অসিদা মমাংঙৈদগী গঙ্গাগী ইরুপ্নৈ, দান-পুন্য তৌনদুনা লাক্লি। চহি কয়াগী মমাংদগী লাইনীংবা কয়ানা পঞ্চগঙ্গা ঘাত্তাবু ওইরো নত্ত্রগা দশাশ্বমেধবু ওইরো, শীতলা ঘাত নত্ত্রগা অসসীদা ইরুপ্নদুনা লাক্নরি। গঙ্গাগী তোর্বান্দ পুম্নমক অমসুং গোদৌলিয়াকী হরসুন্দরী, জ্ঞানৱাপী ধর্মশালা পুম্নমক পীক থন্নৈ। পন্দিৎ রামকিঙ্কর মহারাজনা কার্তিক্কী থা অপুনবা অসিমা রামগী ৱারী লিবীদুনা লাক্লি। লৈবাক অসিগী কাচিন-কোয়া খুদিংমক্তগী মীয়াম্না ৱারী তাবা লাক্নৈ।

কোরোনাগী মতম্না ময়াম অমা হোংদোকচরবসু কাশীগী থৌনা, কাশীগী ভক্তি, শক্তি অসি কনানসু হোংদোকহনবা ঙমদে। অয়ুক্তগী কাশীগী মীয়াম্না ইরুজবা, লাইনীং অমসুং দান তৌদুনা লাক্লি। কাশী অসুম্না থৱাই পানবা ওইরি। কাশীগী লৈরক কোন্সাং খুদিংমক মঙান্তনা থল্লি। কাশী ঘাত অসুম্না অসুম্নমক লৈরি। মসিনি ঐগী মাংবা নাইদ্রবা কাশী।

মরূপশা,

ইমা গঙ্গা মশাইগোন্দা কাশীনা মঙালগী কুম্মৈ পাংথোক্লি অমসুং ঐহাকসু মহাদেবগী থৌজালদগী অসিগুমবা মঙালগী ইপাক অসিদা ইরুপচনবগী তাঞ্জা ফংজরি। ঙসি নুংথিলদা কাশীগী সিক্স লেন হাইৱে মাইখুম হাংদোকপগী থৌরমদা শরুক য়াজবগী তাঞ্জা ফংজখি। নুমিদাংৱাইরম অসিদা দীপাবলী য়েংজরি। মফম অসিদা লাক্ত্রিঙৈদা ঐ বিশ্বনাথ কোরিদোরদসু চৎচবগী খুদোংচাবা ফংজখি অমসুং নুমিদাংদা রামনাথতা লেজর শোসু য়েংজগনি। ঐনা মসি মহাদোবগী থৌজাল অমসুং অদোম কাশীগী মীয়াম পুম্নক্কী থোইদোকপা মীনুংশিনি হায়না লৌজৈ।

মরূপশা,

কাশীগীদমক্তা অতোপ্পা অখন্নবা তাঞ্জা অমসুনি! অদোম্না তাবীরমগনি, ঙরাং মন কী বাত্তসু ঐনা মসিগী মতাংদা পনজখিবনি অমসুং হৌজিক য়োগীজীনা য়াম্না থৌনা ফবা খোঞ্জেলদা ৱাফম অদুবু অমুকসু পনবীখ্রে। চহি ১০০দগী হেল্লবা মতমগী মমাংদা কাশীদগী হুরানখিবা অন্নপুর্নাগী মুতী অদু অমুকহন্না পুরক্কদৌরে। ইমা অন্নপুর্ন অমুক হন্না মাগী য়ুমদা হল্লক্কদৌরে। কাশীগীদমক্তদি মসি য়াম্না লাইবক ফবা ৱাফম্নি। ঐখোয়গী দেবী-দেবতাশিংগী অরিবা মুর্তীশিং অসি, ঐখোয়গী থাজবগী খুদম ওইবগা লোইননা ঐখোয়গী মমল নাইদ্রবা ললসুনি। ৱাফম অসিসু চুম্মি মদুদি অসুম্না হোৎনরম্লবদি অসিগুমবা মুর্তী কয়া লৈবাক অসিনা হান্ননা ফংলমগদবনি। অদুগুম্বা কনাগুমবা খরগী ৱাখল্লোন্দি তোঙাল্লি। ঐখোয়গীদমক্তদি ললগী ৱাহন্থোক অসি লৈবাক্কী ওইবা ললনি! অদুগা মীওই খরগীদি লনগী ৱাহন্থোক অসি মখোয়গী ইমুং-মনুং অমদি ইমুং-মনুংগা মিংনি। ঐখোয়গীদমক্তদি ললগী ৱাহন্থোক অসি ঐখোয়গী চৎনবী-নাৎ, ঐখোয়গী থাজবা, ঐখোয়গী মগুন্নি! মখোয়গীদি ললগী ৱাহন্থোক অসি মখোয়গী মীতমশিংনি, মখোয়গী ইমুং-মনুংগী ফোতোশিংনি। মরম অদুনা মখোয়না ইমুং-মনুংগী লল অদুবু কনবনা পুক্নীং চংখি, ঐখোয়না লৈবাক্কী লন কনবদা, মখোয়বু ঙাক-শেনবদা পুক্নীং চংলি। ঐগী কাশীগী মীয়ামশিং হায়বীয়ু, ঐ অচুম্বা লম্বীদা চৎচরিদনা? ঐনা চু্ম্না তৌরিদনা? য়েংবীয়ু অদোমগী থৌজালদগী পুম্নমক অসি ওইবা ঙম্লিবনি। ঙসি কাশীগী মরল অমুক হল্লকপা অসিদা ইমা অন্নপুর্নানা লাকপগী পাউ তাবদা লৈতেংলি হায়নসু খল্লক্লি।

মরূপশা,

থাওমৈ লাখ কয়ানা কাশীগী ঘাত মরিফুমরিদা তগুপ তরেংনা ঙানবা অসি অমুক্তা ওইখিদ্রিবা মওংনি। গঙ্গাগী ইথক্তা মঙান অসিনা শক্তম অসিবু অমুক্কা হেন্না নীংথিজহল্লি অমসুং কনানো য়েংলিবসি য়েংবীয়ু। ঙসি পুর্নিমা অসিদা দেব দীপাবলী পাংথোক্লিবা কাশী অসি মহাদেবগী লাইবক্তা ঙান্থোইরিবা থাজগী পাংখক্কুম মঙাল নাইরি। কাশীগী মগুন মসিমক্নি। ঐখোয়গী শাস্ত্রদা হায়রি – “কাশ্যাং হি কাশতে কাশী সর্বপ্রকাশিকা”॥ হায়বদি কাশীদি আত্মজ্ঞান্না মঙাল নাইরি মরম অসিনা কাশীনা পুম্নমক্তা মালেম পুম্বদা মঙাল পীরি, লম্বী তাকপীরি। য়ুগ খুদিংদা কাশীগী মঙাল অসিগা কনাগুম্বা মহাপুরুশ অমগী লাইনীংগা মরী লৈনৈ অমসুং কাশীনা মালেমদা লম্বী তাকপীদুনা লাক্লি। ঙসি ঐখোয়না অদুগুম্বা দেব দীপাবলী উজরিবা অসিগী ইথিল অহানবদা পঞ্চগঙ্গা ঘাত্তা আদিশংকরাচার্য় মশামক্না পীবীরম্বনি। মতুংদা অহিল্যাবাই হোলকরজীনা চৎনবী অসি মখা শমথখি। পঞ্চগঙ্গা ঘাত্তা অহিল্যাবাই হোলকরজীনা মহাক্না লিংখৎপীরম্বা থাওমৈ ১০০০গী মঙালগী য়ুম্বী ঙসিসু চৎনবী অসিগী খুদম ওইদুনা লাক্লি।

মরূপশা,

ঙমখৈদা লানশিল্লক্নবা হোৎনববু ওইরো, লম শোন্দোকপা পাম্বা পাঙ্গলশিংগী ফত্ত্রবা থৌরাংবু ওইরো নত্ত্রগা লৈবাক মনুংদা লৈবাক থুগাইনবা শিল্লিবা থৌরাংশিং ভারতনা ঙসি পুম্নমক্কী পাউখুম পীরি অমসুং চপ চাবা পাউখুম পীরি। অদুবু মসিগা লোইননা লৈবাক অসি হৌজিক লাইরবা, চুমদবা ৱায়েল অমসুং খেন্নবা থম্বগী অমম্বা অদুগী মায়কৈদসু অহোংবা পুরক্নবগীদমক অহোংবগী থাওমৈসু থাল্লি। ঙসি লাইরবশিংবু মখোয়গী দিস্ত্রিক্ততা, মখোয়গী খুঙ্গংদা থবক পীনবগীদমক্তা প্রধান মন্ত্রী রোজগার অভিয়ান পায়খৎলি। ঙসি খুঙ্গংদা স্বামিত্ব য়োজনাগী থোংদা মীচম মীয়াম্দা মখোয়গী য়ুমদা কাংলোনগী ওইবা হক পীরি। ঙসি লৌমীশিংদা মখোয়গী ময়াই চাবশিং অমসুং তুহৎপীরিবশিংদগী মনীং তমজরি। ঙসি স্ত্রীৎ ভেন্দর, ত্রোলর অমসুং অমসুং থেলা চিংবশিংদসু তেংবাং অমসুং শেন্থং পীনবগীদমক বেঙ্কশিং চোংথোরক্লি। নুমিৎ খরনিগী মমাংদা ঐনা ‘স্বনিধি য়োজনা’গী বেনিফিসরীশিংগা কাশিদা ৱারীসু শানখি। মসিগা লোইননা, ঙসি আত্মনির্ভরগী খোংজংগা লোইননা লৈবাক অসিনা লোকেলগীদমক্তা ভোকেলসু ওইরি, ওইরিবরা ওইদ্রিবরা?  

মরূপশা,

গুরু নানক দেবজীনা মপুন্সি অদু লাইরবা, তুহৎপীরবা, শোৎথরবশিংগী সেবা তৌবদা কৎথোকখি। কাশীগদি গুরু নানক দেবজীগা আত্মাগী ওইবা মরীসু লৈনৈ। মহাক্না শাংলবা মতম অমা কাশীদা লেনখি। কাশীগী গুরুবাগ গুরুদ্বারা অসি পুৱারী ওইরবা খোংচৎ অদুগী শাখিনি। মতম অদুদা গুরুনানক দেবজীনা মফম অসিদা লাকপীখি অমসুং কাশীগী মীয়ামদা অনৌবা লম্বী তাকপীখি। ঐখোয়না ঙসি রিফোর্মগী ৱাফম পল্লি, অদুবু খুন্নাই অমসুং থৌরাংদা রিফোর্মগী খ্বাইদগী চাউবা খুদমদি গুরু নানক দেবজীমক্না ওইরি। অমসুং ঐখোয়না মসিসু উরে মদুদি খু্ন্নাইগী কান্ননবা লৈবাক্কী কান্নবদা হোংদোকই অদুনা খঙনা অমদি খঙদনা য়ানীংদবগী খোঞ্জেলদি অদুম্মক তাবা তাবনি। অদুবু অহোংবশিং অদুগী অচুম্বশিং মাংদা থোরক্লবা মতমদদি পুম্নমক অফবা ওইরকই। মসিমক ঐখোয়না গুরু নানক দেবজীগী পুন্সিদগী ফংজখি।

মরূপশা,

কাশীগীদমক্তা চাউখৎ-থৌরাংগী থবক হৌরকপদা, য়েৎকদবা কাংবুনা য়েৎননবা মতম অদুদসু য়েৎলকখি, য়েৎখিবরা য়েৎকিদবরা? য়েৎলকখিদনা? অদোম্না নীংশিংবীরমগনি, কাশীনা বাবাগী দরবার ফাওবা বিশ্বনাথ কোরিদোর শাগনি হায়না ৱারেপ লৌখিবদা য়ানীংদবা কাংবুনা মসিগী মতাংদা কয়া অমা হায়খি। কয়া অমসু তৌখি। অদুবু ঙসি বাবাগী থৌজালদগী কাশীগী মিংচৎ অমুক হন্না হিংগৎলে। কুইরবা মতমগী মমাংদগী, বাবাগী দরবারগা ইমা গঙ্গাগা লৈনরক্লিবা মরী অদু অমুক হন্না শেমগৎলি।

মরূপশা,

অফবা ৱাখল্লোন্না অফবা থবক তৌই, অদুনা য়ানীংদবা লৈরবা ফাওবদা মদুবু পাংথোকই। আয়োধ্যদা শ্রী রামমন্দিরদগী চাউবা মসিগী অতোপ্পা খুদম করি ওইগনি? চহি তরাগী খুজিং তরাদগী শেংলবা থবক অসিবু চয়েৎ-খোয়েৎননবা তৌখিদবা করি লৈখিদবগে? অকিবা পোকহন্নবা করি করি তৌখিবা! রামজীনা পাম্লবদি, মন্দির শারি।

মরূপশা,

হৌজিক মফম অসিদগী ভগবান বুদ্ধগী মফম সারনাথতা চৎকনি। সারনাথতা নুমিদাংৱাইরমগী মতমদা তুরিজমদা ইনোৎ পীনবগীদমক মীয়ামগী লৌশিংগীদমক্তসু অদোম ময়াম্না মতম কুইনদগী তাল্লকপা অদু হৌদিক মপুং ফারে। লেজর শোদা হৌজিক ভগবান বুদ্ধগী মীনুংশি, থৌজাল অমসুং অহিংসাগী পাউজেল শন্দোক্লগনি। মালেম অসিদা হিংসা, চরাংনবা অমসুং তেরোরিজমগী খুদোংথিবা উরুবদগী অৱাবা পোক্নরিবা মতম অসিদা পাউজেল অসি ঙসি অমুক্কা হেন্না মরী লৈনরক্লি। ভগবান বুদ্ধনা হায়বীরম্মি – নহি বেরেন সম্মনিতী ধ কুদাচন অবেরেন হি সম্মন্তি এস ধম্মো সনন্তনো হায়বদি য়েংথিনবনা কৈদৌঙৈদসু চোংথিনবা কোকহনবা ঙমদে। য়েংথিনদবদগী যেংথিনবা লেপহনবা ঙম্মি। দেব দীপাবলীদগী লাইগী ওইবা মশক খঙহল্লিবা কাশীদগীসু পাউজেল অসি পীরি মদুদি ঐখোয়গী পুক্নীং থাওমৈশিংগুম্না তগুপ-তরেং ঙালহল্লু। পুম্নমক্তা অফবা ৱাখল্লোন চেলহল্লু। চাউখৎপগী লম্বীদা চংশিল্লু। মালেম অপুনবা মীনুংশি, থৌজালগী ৱাখল্লোনবু ইশানা ইকাই খুম্নৌ। ঐনা থাজৈ মদুদি কাশীদগী থোরকপা পাউজেল অসিনা, মঙানগী থৌনা অসিনা লৈবাক অপুনবগী ফিরেপ অদু মপুং ফাহনগনি। লৈবাক অসিনা হৌদোক্লিবা আত্মনির্ভর ভারতকী খোংজং অসি, ইরৈবাকচা করোর ১৩০গী পাঙ্গলনা ঐখোয় মপুং ফাহনগনি।

ঐগী নুংশিরবা কাশীগী মীয়াম, য়াইফ-পাউজেল অসিগা লোইননা, অদোম পুম্নমকপু অমুক্কা হন্না দেব দীপাবলীগী অমসুং মঙালগী থৌরম অসিগী হন্না হন্না য়াইফ-পাউজেল পীজরি। কোরোনানা মরম ওইদুনা, পুম্নমক্কীদমক্তা কাংলোন শেম্লিবা অসিনা, অহানবদা ঐনা হন্না হন্না অদোমগী নরক্তা লাকচরম্মি, অদুবু হন্দক্তি ঐহাক লাকপদা অপনবা খরা ওইরে। মতম অসুক কুইরবা অসিদা, ঐ ইশনা করিগুম্বা করা মাংজরবগুম্না ফীল তৌজরি। অদোম্বু উবা ফংজদ্রবগুম্না ফাওজরি। ঙসি লাকচরবা অসিদদি পুক্নীং অসি অদুক্কী মতিক নুংঙাইবা ফাওই। অদোম্বু উজবদা, পুক্নীং অসি অদুক্কী মতিক পেঞ্জরে। অদুবু ঐনা কোরোনাগী মতম অসিদসু নোংমতসু অদোমদগী লাপ্না লৈখিদে ঐনা অদোমদা হায়জরি। কোরোনাগী কেস অসি করম্না হেনগৎলক্লিবা, হোস্পিতালগী করি থৌরাং লৈরিবা, সোসিএল ইন্সতিত্যুৎনা করম্বা মওংদা থবক তৌরিবা, লাইরবা কনানা চরাদি হেন্দেদনা। ৱাফম পুম্নমক্তা ঐ য়াওদুনা লৈরি মরুপশা অদুগা ঐ ইমা অন্নপুর্নাগী লমদম অসিদা অদোম্না সেবাগী ৱাখল্লোন্দা তৌরিবা থবক, কনাবুসু চারা হেলহন্দবা, কনাবুসু হিদাক ফংদবা তৌহনদবা, মরম অসিনা ঐনা অসিগুম্বা সেবাগী ৱাখল্লোন অসিগীদমক্তা, শাংলবা মতম অসি থবক অসিবু তৌবীদুনা লৈবীবগীদমক্তা ঐনা ঙসি অমু্কা হন্না ইমা গঙ্গাগী তোর্বান্দগী অদোম কাশীগী মীয়াম পুম্নমক্তা ইকোক নোঞ্জরি। অদোমগী সেবাগী লাখল্লোন অসিবু খুরুমজরি অমসুং ঐখোয়গী লাইরবদগী লাইরবগীদমক ৱাবীরিবা অসি ঐগী থমোইদা পাল্লরে। ঐনা অদুক্কী মতিক অদোমগী সেবা তৌজবা অসি ৱাৎলবনি। ঐনা অদোমদা থাজবা পীজরি মদুদি ঐগী মায়কৈদগী অদোমগী সেবাদা অৱাৎপা অমত্তা লৈহল্লোই।

ঐগীদমক্তদি ঙসি অসি চাউথোকচনীংঙাইগী থৌরমনি মদুদি ঙসি ঐনা তগুপ-তরেং ঙাল্লিবা ফিভম অসিদা অদোমগী নরক্তা লাকচবগী তাঞ্জা ফংজরে। কোরোনাবু মায়থিবা পীদুনা চাউখৎপগী লম্বীদা খোংজেল য়াংনা চংশিনগনি, ইমা গঙ্গাগী চেন্থরিবা ইচেল অসিগুম্না। অপনবা, অৱাবা কয়াগী মতুংদসু চেন্থরি, মতম কয়াদগী চেন্থরক্লি। চাউখৎপগী ইচেলসু অসুম্না চেন্থদুনা লৈগনি। থাজবা অসি পুদুনা ঐসু মফম অসিদগী দিল্লীদা চৎকনি। ঐনা অমুক্কা হন্না অদোম ময়ামদা তৌবীমল খঙবা উৎচরি
কাশীনা য়াইফরে। ইমা ভারতীনা য়াইফরে।

হর হর মহাদেব!

*****