মরূপশা,

জৈসলমের এয়রবেজদা ঐহাক কয়ারক হন্না লাকচবগী তাঞ্জাদি ফংজখি অদুবু থবকশিংগী পরেংনা অসুম্না লেংখিবনা লেপ্পা লৈতনা, মীয়ামগা ৱারী শানবা ফংদনা হৌখিবা কোংগাইনি অদুবু ঙসিদি ঐ এক্সক্লুসিবলী অদোম ময়ামগী মরক্তা দীপাবলীগী থৌরম পাংথোক্নবা মতম ফংলে। অদোম্বু, অদোমগী ইমুং-মনুংগী মীওই খুদিংমক্তা দীপাবলীগী হন্না হন্না নুংঙাইবা ফোংদোকচরি।

মরূপশা,

দীপাবলিগী নুমিত্তা থোং অমসুং থোঙ্গান্দা শুব-লাভ নত্ত্রগা রিদ্ধি-সিদ্ধিগী অসিগুম্বা রঙ্গোলী শেম্বগী চৎনবী লৈরক্লি। মসিগী মরুমদা লৈরিবা ৱাখল্লোন অদুদি দীপাবলীনা ঐখোয়গী মফম অসিদা ৱাৎত-পাদবা পুরকপা অসিনি। য়ুমদা থোঙ পাল্লিবা অদুগুম্না লৈবাক অসিগী ঐখোয়গী ঙমখৈশিং অসি অমরোমদা ঐখোয়গী লৈবাক্কী থোঙনি। অসিগুম্বা মতাং অসিদা লৈবাক অসিগী ৱাৎ-পাদবা অসি অদোমগী খুত্তা লৈ, লৈবাক অসিগী য়াইফবা অসি অদোমগী খুত্তা লৈ, লৈবাক অসিগী মপুং ফাবা অসি অদোমগী খুত্তা অমসুং অদোমগী থৌনাদা লৈ। মরম অসিমক্না ঙসি লৈবাক অসিগী য়ুমথোং খুদিংদা অদোম পুম্নমক্কী মিংখৈ শোল্লদুনা অদোমগীদমক্তা মৈরা থান্দুনা মীয়াম্না মখোয়গী ৱাখল্লোন ফোংদোক্লি। দীপাবলীগী থাওমৈ অসি অদোমগী থৌনা ফবগী মঙালদা তগুপ তরেং ঙাল্লরি। দিপাবলীগী থাওমৈ অসিনা অদোম্বু ইকাই খুম্নবা উত্তুনা হিন্দুস্তানগী কাচিন খুদিংমক্তা, ইমুং খুদিংমক্তা থাল্লি। ঐনা ৱাখল্লোন পুম্নমক অসিগা লোইননা অদোমগী নরক্তা য়াওজরি। অদোম্বু, অদোমগী লৈবাক নীংববু, অদোমগী দিসিপ্লিনবু, লৈবাক্কীদমক্তা শিব-চংবগী অদোমগী থৌনা অদুবু, ঐনা ঙসি ইকোক নোঞ্জবা লাকচরি।

মরূপশা,

কোরোনানা শোকহল্লবা ঐখোয়গী মীয়াম্বু মীরমদগী শোইদ-ঙামদনা পুরকপদা এয়রফোর্স অমসুং

ঐখোয়গী নেভীনা লৌখিবা থৌদাং শিংথানীংঙাইনি। কোরোনা লাইচৎকী মনুংদা বুহান্দা চৎপগী শিংনবা লৈখি অমসুং তমথিবা অদু হৌরকপদা ঙাইরিবনি অমসুং বুহান্দা মফম মফমদা পন্দুনা লৈখিবা ভারত মচাশিংবু লৌথোকপা তাখিবদা এয়রফোর্সকী মীয়ামনা খ্বাইদগী হান্না থোরকখি। লৈবাক খরনা মখোয়গী মীয়াম্বু বুসান্দা মরাইবক্তা তম্বনি হায়দুনা থাদোক্লম্বা মতমদা ভারতনা শুপ্নগী মসিগী মীওই খুদিংমকপু মফম অদুদগী লৌথোকখিবতা নত্তনা অতৈ লৈবাক কয়ামরুমগী মীয়াম্বুসু লৌথোকপদা ঐখোয়গী এয়রফোর্সকী জৱানশিংনা মতেং পাংখি। ওপরেসন সমুদ্র সেতুগী থোংদসু মীরমদগী ভারত মচা লিশিং কয়া নেভীগী মরমদগী শোইদ-ঙামদনা ভারত্তা হল্লকখি। লৈবাক অসিদা নত্তনা মাল্দীব, মোরিসস, অফঘানিস্তানদগী হৌরগা কুৱেৎ, কাঙ্গো অমসুং সাউথ সুদান য়াওনা মরূপ ওইরিবা লৈবাক কয়ামরুমগী মতেং পাংবদসু এয়রফোর্সনা খ্বাইদগী মাং থাখি। এয়রফোর্গী মতেংদগী অৱাবগী মতম অসিদা তেংবাং তন কয়াগী পোৎলমশিং মথৌ তাবশিংদা মতম চানা য়ৌহনবা ঙমখি।

মরূপশা,

কোরোনাগী মতমদা অদোম পুম্নমক্কী হোৎনখিবশিংগী মতাংদা য়াম্না ঙাংনখিবদি ওইদে অমসুং মরম অসিনা ঐনা অখন্নবা মওংদা লৈবাক অসিগী পুক্নীং মসোমদা চিংশিল্লি। দি.আর.দি.ও.বু ওইরো, ঐখোয়গী লান্মী অহুমবু ওইরো, বি.এস.এফ. য়াওনা ঐখোয়গী পেরামিলিতরী ফোর্স পুম্নমক্না কোবিদকা মরী লৈনবা ইক্বিপমেন্তগী হৌরগা ক্বরেন্তাইন অমসুং লায়েংবা ফাওবদা ৱার ফুতিংদা থবক তৌখিবা অদু অমক্তা ওইখিদ্রিবা মওংদনি। হৌরকপদা সেনিতাইজর অমসুং ফেস মাস্কতগী হৌরগা পি.পি.ই. ফাওবগী শিংনবশিং কয়ানি মতম অদুদা লৈবাক্কী অদুগুম্বা তঙাইফদবশিং মপুং ফাহন্নবগী থৌদাং অদোম্না লৌবীখি। অদোমগী কৎথোকপা অমসুং লাইনীংনা মঙাল নাইরবা অদোমগী পুন্সিদগী ইথিল লৌজদুনা ঙসি ভারত মচা পুম্নমক্না দীপাবলীগী থাওমৈ থাল্লি অমসুং দীপাবলীগী থাওমৈ থান্দুনা অদোমগী মীংখৈ শোল্লি।

মরূপশা,

অদোম পুম্নমক্না পুন্না মসিসু পাংথোকপীখি মদুদি কোরোনা লাইচৎনা ঐখোয়গী ওপরেস্নেল য়ুনিৎশিংদা শোকহনবা অমত্তা ঙমহনখিদে। আর্মী ওইরো, নেভী ওইরো, এয়রফোর্স ওইরো কনানসু ঐখোয়না শেম-শারিবশিংবু কোরোনাগী মরম্না অপনবা পীহনখিদে, লেপহনখিদে। কোরোনাগী মতমদা মফম অসিদা জৈসলমেরদসু অমসুং ঐখোয়গী সমুদ্রদসু লান্মীগী থৌরমশিং লেপ্তনা চৎখি। মালেমগী লৈবাক কয়ানা লেপখ্রবা অসিগুম্বা মতমদা খোংজেল য়াংনা মাংদা চখৎলকপা অসি অদুক য়াম্না লাইবদি নত্তে অদুবু অদোম্না মসিসু তৌদুনা উৎলে। কোরোনাগী মতম অসিদা তেজসকী স্ক্বাদ্রন ওপরেস্নেলাইজ তৌখ্রে। অপাচে অমসুং চিনুক হেলিকোপ্তরগী মপাঙ্গলসু মতম অসিদা ঐখোয়না খঙখি। ভারত্তা শেম-শাজবা সবমেরিন অনিসু কোরোনাগী মতম অসিমক্তদা নেভীনা ফংলে।

মরূপশা,

কোরোনাগী মতমদা ভেক্সিন শানবা হোৎনরিবা সাইন্তিস্তশিংগা লোইননা মিসাইল শাবা ঐখোয়গী সাইন্তিস্তশিংনা লৈবাক অসিগী পুক্নীং চিংশিনখি। মতম অসিদা পাউ লেপ্তনা লাক্লি মদুদি ঙসি মিসাইলগী তেস্ত তৌখ্রে। ঙসি মিসাইল অদুগী অনৌবা তেক্নোলোজী দিবেলপ তৌখ্রে। অদোম্না খনবীবা য়াই মদুদি হৌখিবা থা খরনি খক্তদা লৈবাক অসিগী লাল্লোংগী মপাঙ্গল কয়াদা হেনগৎলবনো। হৌখিবা থা অনিরোম অসিদা লৈবাক অসিদা মিসাইল কয়া মায় পাক্না তেস্ত তৌখ্রে। সেকেন্দ অমদা কিলোমীতর অনিগী অরাপ্পা চৎপা ঙম্বা হাইপরসোনিক দেমোন্সত্রেতর বেহিকল মায় পাক্না তেস্ত তৌখিবদগী ভারতপু মালেমগী মকোক থোংবা লৈবাক অহুম-মরিগী মনুংদা মকোক্তা পুরক্লে, ভারতপু য়াওহনখ্রে।

মরূপশা,

লানগী অনৌবা খুৎশু-খুৎলাইগা লোইননা লৈবাক অসিগী ঙমখৈদা অনৌবা কনেক্তিবিতী ওইবা মেগা ইনফ্রাস্ত্রকচর প্রোজেক্তসু মতম অদুদা লোইশিনখি। ঙসি অতল তনেলনা লদ্দাখকী কনেক্তিবিতীদা য়াম্না চাউবা পাম্বৈ অমা ওইরে। ঐখোয়গী অৱাং থংবা অমসুং নোংচুপ থংবা ঙমখৈদা থোং কয়ামরুম অমসুং অশাং অশাংবা লম্বীশিংসু মতম অসিগী মনুংদা মপুং ফানা লোইশিনখি। মালেম অপুনবনা হা হা লাওনরবা মতম অদুদা, পুম্নমক্না মাগী মাগী হিংনবগী মতাংদা ৱানরবা মতম অদুদা লৈবাক অসিগী ঙাক-শেলদা মতম চুপ্পা মায় ওশিন্দুনা লৈখি।

মরূপশা,

অদোম পুম্নমক্কী অসিগুম্বা থৌওং অসিনা লৈবাক্কী ঙাক-শেলগী মতাংদা অচেৎপা ওইহল্লি। ঙসি লৈবাক অসিদা অমরোমদা অনৌবা তেক্নোলোজী, অনৌবা পেৎলমদা মিৎয়েং থম্লি। অদুগা অমরোমদা দিফেন্স রিফোর্মদসু অদুক্কী মতিক লুম্না থবক তৌরি। ঙাক-শেলগী লমদা আত্মনির্ভরতাগী মরুমদা পান্দম অসি লৈরি মদুদি অনৌবা খুৎলাইশিং অমসুং তেক্নোলোজীগীদমক্তা মীরমগী মপাল তাংবা হন্থহনবনি। মসিদা মিৎযেং থম্লদুনা ঐখোয়গী লান্মীশিংনা পুন্না অমত্তা ওইনা শিংথানীংঙাই ওইরবা ৱারেপ লৌরে। মখোয়না মসি লেপখি মদুদি হৌজিক ঙাক-শেলগী মরী লৈনবা খুৎশু খুৎলাই ১০০দগী হেনবা মীরমদগী নত্তবদা ঐখোয়গী ইরমদম অসিদা শাজরগনি নত্ত্রগা পুথোক্লিবা পোৎশকশিংবু অমুক্কা হেন্না ফগৎহল্লগনি অমসুং মসিদগী লৌরগনি।

মরূপশা,

ভারত্তা খুৎলাই শাবা কম্পনী মশিং য়াম্না লাক্নবা ঙাক-শেলগী লমদা এফ.দি.আই.গী অকক্নবা অদু হেনগৎহন্দুনা চাদা ৭৪ ওইহনখ্রে। ভারত্তা লাকপা পাম্বা কম্পনীশিং অদুগীদমক্তা মফম অসিদা হেন্না ফবা খুদোংচাবা ফংনবা উত্তর প্রদেশ অমসুং তমিলনাদুদা অচৌবা দিফেন্স কোরিদোর অনিদসু খোংজেল য়াংনা থবক পাইখৎলি।

মরূপশা,

দীপাবলীদা অদোম পুম্নমক্না ৱাফম অমগা নোৎ তৌরি। ঐখোয়না থাওমৈ থানবা মতমদা মতম পুম্নমক্তা থাওমৈ অমনা অতৈ থাওমৈশিংবু চুখৎলি। থাওমৈ অমখক্তদগী চুখৎখিবনা থাওমৈ লিশিং ঙালহল্লি, অদোমসু থাওমৈ অমগুম্না লৈবাক অপুনবা অসিবু মঙাল পীবীরি, মসিবু থৌনা হাপ্পীরি। ঙমখৈদা অদোমগুম্বা লান্মী অমমমগী থৌনানা লৈবাক মচাশিংদা লৈবাকনীংবগী থৌনা হাপ্পীরি। অদোমদগী ইথিল লৌজদুনা লৈবাক মচাশিংনা মাগী মাগী মওংদা লৈবাক্কী কান্ননবগীদমক মাংদা থোরক্লি। কনানা লুব-নানবগী খোংজংদা য়াওররি, কনানা শেনজা-থুমজাগী মায়োক্তা চংশিল্লিবা খোংজংদা শরুক য়াররি, খনানা য়ুমথোং খুদিংদা ঈশিং ফংহনবগী মিসন্দা শরুক য়ারি, কনানা তি.বি. লৈতবা ভারতকীদমক্তা থবক তৌররি, কনানা মেলন্যুত্রিসনগী মায়োক্তা চংশিল্লিবা খোংজংদা পাঙ্গল হাপ্লি, কনানা অতোপ্পশিংদা দিজিতেল ত্রান্সেক্সনগী মতাংদা তাকপী-তম্বীদুনা মা মাগী থৌদাং য়ারি।

মরূপশা,

হৌজিক্তি, আত্মনির্ভর ভারতকী খোংজং অসিবু লৈবাক অসিগী মীয়ামগী মশাগী খোংজং ওইররে। ভোকেল ফোর লোকেল ঙসি ভারত মচা খুদিংমক্কী মিসন ওইরে। ঙসি ইন্দিয়া ফর্স্ত, ইন্দিয়ন ফর্স্তকী মশানা মশাবু থাজজবা অসি মায়কৈ মরিদা শন্দোকখ্রে। পুম্নমক অসি ওইবা ঙম্লিবা অসিগী মরুমদা অদোমগী থৌনা, অদোমগী থাজবনা লেপ্লি। লৈবাক অসিগী থাজবা হেনগৎলকপদা মালেমনা অদুক্কী মতিক খোংজেল য়াংনা লৈবাক অসিনা কাখৎলকপসু উরি। লাকলো, থাজবগী, ইশানা ইশাবু থাজবগী ৱাশক অসি মপুং ফাহন্নবগীদমক্তা ঐখোয় পুম্নমক মাংদা চখৎলসি। দীপাবলীগী শেংলবা থৌরম অসিদা অনৌবা ৱাশকশিংগা লোইননা, অনৌবা থৌনাগা লোইননা লেংথোংননা, খোংথাং মান্ননা ৱন লাইফ ৱন মিসনগী মোদতা পান্দম ফংনবগীদমক্তা হোৎনরিবশিং মায় পাকহন্দুনা লাকলো, করোর ১৩০গী লৈবাক অসি ঐখোয় পুম্নমক্না অমত্তা ওইনা চংশিল্লসি অমসুং ইমা ভারতীবু মথৌনা লৈবী, ৱাৎত-পাদবী ওইহনবা পাম্বা মওং অদুদা ঐখোয়না মপুং ফাহন্নবা ৱাখল্লোন অদুগা লোইননা ঐগা লোইননা হায়বীয়ু, ভারত ইমানা... য়াইফরে, ভারত ইমানা... য়াইফরে, ভারত ইমানা... য়াইফরে। অমুক্কা হন্না অদোম পুম্নমকপু দীপাবলীগী থৌরম অসিগীদমক হন্না হন্না য়াইফ-পাউজেল পীজরি, থাগৎচরি।

***