হৌখিবা চহি কয়াদগী শেল-থুম মন্ত্রালয়না, চহিগী বজেৎ পুথোক্ত্রিঙৈগী মমাংদা ইন্দস্ত্রী/কমর্স এসোসিএসন, ত্রেদ বোদীশিং অমসুং এক্সপর্তশিংদগী বজেৎকী মাংওইনve মীফম পাংথোক্তুনা মখোয়দগী পাউতাক লৌই। অদুবু হন্দক্তি লাইচৎ অসিগী য়েংদুনা শেল-থুম মন্ত্রালয়না বজেৎকী মাংওইননা পাংথোকপা মীফমশিং হান্নদগী চৎনরকপা মওংদা পাংথোকপগী মহুত্তা তোঙানবা মওং অমদা পাংথোক্নবগী সজেসন ফংলি। মীয়াম্না সজেসন পীরকপগী মতুং ইন্না ৱারেপ অসি লৌখ্রে মদুদি তোঙান তোঙানবা ইন্সতিত্যুসনশিং, অখঙ-অহৈশিংদগী সজেসন ফংনবগীদমক তোঙানবা ই-মেল আই.দি. শেমগনি। মদুদা মীয়াম্না মখোয়গী সজেসন পীরকপা য়াগনি। ই-মেল আই.দি.গীদমক্তা তোঙান্না অথুবা মতমদা নোতিস থোক্লগনি।

মসিদা নত্তনা শেনবা চহি ২০২১-২২গী বজেৎ শেম্নবগী থৌওংদা শরুক য়াবা হেনগৎহন্নবা অমসুং হেন্না দেমোক্রেতিক ওইহন্নবা ৱারেপসু লৌখ্রে। মসিনা মীচম মীয়াম্বু বজেৎ শেম্বগী থৌওংদা শরুক য়াবা ঙমহনগনি।

মসিগীদমক্তা ভারত সরকারনা মাই গোব প্লেৎফোর্মদা মাইক্রোসাইৎ (ওনলাইন পোর্তেল) অমা লৌঞ্চ তৌখ্রে। মদু নবেম্বর ১৫, ২০২০দা লাইব তৌরগনি।  মাইক্রোসাইৎ অসিদা মীয়াম্না ২০২১-২২গী বজেৎকীদমক্তা মখোয়গী ৱাখল্লোন, সজেসন থারকপা য়াগনি। মসি তৌনবগীদমক মখোয়না মাই গোব প্লোৎফোর্মদা রেজিস্তর তৌগদবনি। মীয়াম্না পীরকপা সজেসন অদু ভারত সরকারগী মরী লৈনবা মন্ত্রালয়/দিপার্তমেন্তনা য়েংশিনগনি। করিগুম্বা হিরম অমা হেক্তদা মথৌ তারবদি মরী লৈনবা মীওইগা মহাক্কী রেজিস্তর তৌখিবা মোবাইল নম্বরগী ফোংদা পাউসু ফাওনগনি। পোর্তেল অসি নবেম্বর ৩০, ২০২০ ফাওবা সজেসনগীদমক্তা হাংদোক্তুনা থমগনি।

*******