উনগুম্না ঙৌবা অমসুং অঙাংবা মচুগী নীংথিরবা অপুনবগী মওংদা শেম্লিবা খাদিগী অনৌবা ফেস মাস্ক অসিগা লোয়ননা হন্দক্কী দিৱালি অসি পাঙথোকপীয়ু। দিৱালিগী কুমহৈবু য়েংলদুনা খাদি অমসুং ভিলেজ ইন্দস্ত্রীজ কম্মিসন (কে.ভি.আই.সি.)না অকক্নবা মশিংদা নোংচুপ বেঙ্গোলগী নাৎকী ওইবা খাদিগী খুৎ-শা হৈবশিংনা মখুৎনা শাবা মরোল অনিগী “হেপ্পী দিৱালি” হায়না থাবা অশেংবা মস্লিন ফিনা শাবা, মগুন লৈবা অমসুং য়াম্না ফবা ফিদা ওইবা মাস্ক অমা পুথোকখ্রে।

কে.ভি.আই.সি.না লাক্কদৌরিবা মতমশিংদা খৃস্তমাস অমসুং ন্যু য়ারদসু অসিগুম্বা মাস্ক পুথোক্কনি।

মসলিন্না শাবা ফেস মাস্ক অসি খাদি কত্তনগী মরোল অনিগী অমসুং সিল্ককী মরোল অহুমগী মাস্কপু মীয়াম্না য়াম্না পাম্নখিবা অদুদগী শাখিবনি। হৌজিক ফাওবদা কে.ভি.আই.সি.না থা তরুক্তদী তাবা মতমগী মনুংদা অসিগুম্বা মখলগী মাস্ক অসি লৈবাক শিনবা থুংবদা লাখ ১৮ হেন্না য়োনখ্রে।

দিৱালি মস্লিন মাস্ক অসি অমদা য়াম্না তাবা মমল ওইনা লুপা ৭৫ পী অমসুং দিল্লীদনা খাদিগী আউৎলেৎশিংদা অমসুং ওনলাইন্দনা কে.ভি.আই.সি.গী ই.-পোর্তেল (www.khadiindia.gov.in) দা ফংগনি।

খাদিগী অতোপ্পা ফেস মাস্ককুম্না মসিগী মস্লিন ফেস মাস্ক অসিসু উন্সাদা শোক্তবা, শুবা-চাম্বা নুংঙাইবা, অমুক হন্না শিজিন্নবা য়াবা, বাইও-দিগ্রেদেবল অমসুং মীপুম খুদিংমক্না লৈবা ঙম্বা ওই। ফেস মাস্ক অসিদা ঙৌরোক ঙৌবা মস্লিন ফিগী মরোল অনি য়াওই। মাস্ক অসিগী মতাইদা অঙাংবা মচু ওইবা অসিনা স্তাইল ফজহল্লি অমসুং মসিবু হরাও-কুমহৈগী ফিজোলশিংগা চান্ননবা হায়দুনা মসিগী মওং-মশক অসি হায়রিবা অসিগুম্না শেম্লিবনি।

কে.ভি.আই.সি.গী চেয়রমেন শ্রী বিনয় কুমার সক্সেনানা হায়খিবদা মরোল অনিগী ফেস মাস্ক অসি য়াম্না হোংই অদুবু মমলদি নাইদে হায়খি। মসিসু নীংথিবা মওংদা হরাও-কুমহৈ পাঙথোকপগা লোয়ননা মীয়াম্বু লাইচৎসিদগী ঙাকথোক্নবা কে.ভি.আই.সি.গী থৌওং অমনি। “মীয়াম্বু লাইনা শন্দোরকপা অসিদগী কনবগী মথক্তা কে.ভি.আই.সি.না মসিগী ফেস মাস্কশিং অসিসু মতমগা চান্নবা মওং-মতৌ চেলহন্নবা লেপ্তনা হোৎনরি। মসিগী মস্লিন মাস্ক অসিনা ঐখোয়গী কত্তন অমসুং সিল্ক মাস্ককী মখল লৈরিবা ঐখোয়গী মাস্ককী মখল ময়াম অসিদা অনৌবা মখল অমসু হাপচিল্লে। অমরোমদনা, মসিনা খাদি আর্তিসানশিংদা অহেনবা থবক পীবসু ঙম্লে”, হায়না সক্সেনানা হায়খ্রে।

নুংশিৎনা মরাং কাইনা ফাওদুনা চৎপা ঙমহনবতা নত্তনা নুংশিত্তা য়াওবা ঈশিংবু মনুংদা ফাজিন্দুনা ঙম্বগী মওং চেনবা অসিগীদমক্তা ফি অসিবু মাস্ক অসি শাবদা শিজিন্ননবগীদমক্তা খনখিবনি। লশিংগী লংবু খুৎনা চিংদুনা অমসুং খুৎনা লোন্দুনা শাবা ফিনা শাবা, উনশাদা য়াম্না মোন-মোন লাওহনবা অমসুং মতম কুইনা শিজিন্নবদা নুংঙাইবা অসিনা মাস্ক অসিবু য়াম্না শীংথানিংঙাই ওইহল্লিবনি।

****