লৌউ-শিংউবা অমসুং লৌমীশিংগী য়াইফ-য়ুম্বাল, খুঙ্গং চাউখৎপা অমসুং পঞ্চায়তী রাজ অমসুং ফুদ প্রোসেসিং ইন্দস্ত্রীগী কেন্দ্র মন্ত্রী শ্রী নরেন্দ্র সিংহ তোমারনা ব্লোক অমসুং জিলা চাউখৎহন্নবগী থৌরাং য়াৎনবা শেম শাবা ফ্রেমৱর্ক অমা ভিদিও কনফরেন্সিংগী খুত্থাংদা পুথোকখ্রে। মসিগী ফ্রেমৱর্ক অসিদা ব্লোক অমসুং জিলাগী পঞ্চায়ৎশিংনা মরী লৈনবা থৌরাং য়াৎনবা অমসুং থৌরাং য়াৎপা মীওইশিং, মরী লৈনবা স্তেকহোলদরশিংবু চানবা থাক্তা তেংবাংবগী খোঙকাপ নায়বা কাঙলোনশিং য়াওরি।

শ্রী তোমারনা থাজবা ফোঙদোকখিবদা ফ্রেমৱর্ক অসিনা ব্লোক অমসুং জিলাগী থাক্তা লোকেলদা ফংবা রিসোর্সশিং, লোকেলগী মীয়ামগী ৱাখলশিং অমসুং অহানবা ওইনা থবক পাঙথোক্কদবা মফমশিংদা মিৎয়েং চঙদুনা পুম্নক মনুং চন্দুনা চাউখৎপগী থৌওংদা খুমাং চাউশিলহনগনি হায়না ফোঙদোকখি। ফ্রেমৱর্ক অসিনা রিসোর্স পর্সনশিং, ইন্তর্মেদিএত/ব্লোক অমসুং জিলাগী পঞ্চায়ৎশিংদা দিসেন্ত্রেলাইজদ প্লান্নিংগী মরী লৈনবা স্তেকহোলদর্শিংগী মরু ওইবা খুৎলায় অমা ওইনসু তেংবাংগনি অমসুং মসিনা ভারতকী খুঙ্গংশিংবু খোঙজেল থুবা, মীয়াম্না শরুক য়াবা অমসুং মীয়াম পুম্বগী শাহৌ লৈবাখুদোংচাবশিং পীদুনা শেমদোকপদা মরু ওইবা থৌদাং লৌগনি।

প্রিন্সিপাল সেক্রেতরী, সেক্রেতরী, দাইরেক্তর, রাজ্য/য়ু.তি.শিংগী পঞ্চায়তী রাজ বিভাগ, এস.আই.আর.দি.শিংগী দাইরেক্তরশিং য়াওবা রাজ্য/য়ু.তি.শিংগী মীহুৎশিং অমসুং এন.আই.আর.দি.পি.আর.গী মীহুৎশিংনা থৌরম অসিদা ভিদিও কনফরেন্সকী খুত্থাংদা শরুক য়াখি।

ভারতকী সংবিধানগী ৭৩শুবা শেমদোকপা অসিনা তাঙ্কক অহুম খায়বা পঞ্চায়তী রাজকী পথাপ অসি চৎনহনখি, (১) খুঙ্গংগী থাক্তা গ্রাম পঞ্চায়ৎ, (২) ব্লোক ৭এ./তালুকা/মন্দাপল থাক্তা ইন্তর্মেদিএৎ পঞ্চায়ৎ, (৩) জিলাগী থাক্তা জিলাগী পঞ্চায়ৎ। ১৫শুবা ফাইনান্স কম্মিসনগী মখাদা পীথবা শেন্থংশিংসু ইং ২০২০-২১দগী হৌদুনা ইন্তর্মেদিএৎ অমসুং জিলাগী পঞ্চায়ৎশিংদা য়েন্থোক্লি। ইং ২০২০-২১ পঞ্চায়ৎশিংদা অপুনবা শেনফম লুপা করোর ৬০৭৫০ য়েন্থোকখ্রে। মসিগী মনুংদগী লুপা করোর ৪৫৭৭৪.২০দি গ্রাম পঞ্চায়ৎকীনি, লুপা করোর ৮৭৫০.৯৫ অসিনা ইন্তর্মেদিএৎ পঞ্চায়ৎকীনি অমসুং লুপা করোর ৬২২৪.৮৫ অসিনা জিলা পঞ্চায়ৎকীনি। মসিগী ইন্সতিত্যুসনশিং অসিবু খুঙ্গংগী মফমশিংগী পাক শনবা ব্লোক চাউখৎপা অমসুং জিলা চাউখৎপগী থৌরাংশিং য়াৎপদা তেংবাংফম থোকই।

ৱাফমশিং অসিবু খন্নদুনা পঞ্চায়তী রাজ মন্ত্রালয়গী হান্না স্পিসিএল সেক্রেতরী ওইরম্বা দাঃ বালা প্রসাদনা লুচিংবা ভারত সরকারগী পঞ্চায়তী রাজ মন্ত্রালয়না শেম্বা কম্মিত্তী অমনা ইন্তর্মেদিএত/ব্লোক অমসুং জিলা পঞ্চায়ৎকী থৌরাং য়াৎনবা অকুপ্পা ফ্রেমৱর্ক অসি শেমখিবনি। কম্মিত্তী অসিদা মরী লৈনবা মন্ত্রালয়শিংগী মীহুৎশিং, এন.আই.আর.দি.পি.আর., এস.আই.আর.দি., কে.আই.এল.এ.গী মীহুৎশিং, হীরম অমগী অখঙ-অহৈশিং, রাজ্য সরকারগী মীহুৎশিং, মীয়াম্না খল্লবা জিলা অমসুং ব্লোক পঞ্চায়ৎকী মীহুৎশিংনা শরুক য়ারি।

ফ্রেমৱর্ক অসি শেম্বা মতমদা কম্মিত্তী অসিনা পঞ্চায়ৎকী অৱাংবা থাক্তা লৈবা স্কিমশিংগী তোঙান-তোঙানবা হীরমশিংগী মতাংদা খন্ন-নৈনখি অমসুং থৌওং অসিদা শরুক য়ারিবা স্তেকহোলদরশিংগা কুপ্না খন্ন-নৈনখি। থৌরাংশিং শেম-শাবগী মতাংদা য়েংশিনবগী থৌওংশিং, রাজ্য সরকার অমসুং অতোপ্পা এজেন্সীশিংগী থৌদাংশিং, তোঙান-তোঙানবা থাক্তা পুন্সিন্নবা অমসুং পুন্না থবক শুমিন্নবদা পুরক্কদবা কান্নবশিং অসিনা মসিদা শরুক য়ারিবা এজেন্সীশিংগী মরক্তসু ভাব তাবা হেলহনগনি অমসুং থৌওং অসিগা মরী লৈনরিবা মীওইশিংগী পুন্সি মহিং ফগৎহন্নবা হ্যুমেন প্লান্নিং তৌবগী ফিভমশিং অসিবুসু মমুৎ তানা খঙহল্লি।

*****