সংহাই কোওপরেসন ওর্গনাইজেসন (এস.সি.ও.) মেম্বর স্তেতশিংগী ৱায়েল মন্ত্রীশিংগী তরেৎশুবা মীফম ওক্তোবর ১৬, ২০২০দা আইন অমদি ৱায়েল, কম্ম্যুনিকেসন অমসুং ইলেক্ত্রোনিক্স অমদি ইনফোর্মেসন তেক্নোলোজী মন্ত্রী শ্রী রবি সঙ্কর প্রসাদনা পাঙথোকখ্রে‍।

রিপব্লিক ওফ ইন্দিয়াগী আইন অমসুং ৱায়েল মন্ত্রী শ্রী রবি সঙ্কর প্রসাদ, রিবপ্লিক ওফ কজাখস্তানগী ৱায়েল মন্ত্রী মিস্তর এম.বি. বেকেতায়েব, রিপব্লিক ওফ চাইনাগী ৱায়েল মন্ত্রী মিস্তর তাং য়িজুন, কীরগীজ রিপব্লিক্কী ৱায়েল মন্ত্রী মিস্তর এম.তি. ঝামনকুলোব, ইস্লামিক রিপব্লিক ওফ পাকিস্তানগী আইন অমসুং ৱায়েল মন্ত্রালয়গী মীহুৎ মিস অম্ব্রীন অব্বাসি, রসিয়ন ফেদরেসনগী ৱায়েল মন্ত্রী মিস্তর কে.এ. চুইচেনকো, রিপব্লিক ওফ তাজিকিস্তানগী ৱায়েল মন্ত্রী মিস্তর এম.কে. অস্রিয়োন, রিপব্লিক ওফ উজবেকিস্তানগী ৱায়েল মন্ত্রী মিস্তর আর.কে. দাব্লেতোবনা ৱায়েল মন্ত্রীশিংগী মীফমদুদা শরুক য়াখি‍। ৱায়েল মন্ত্রীশিংগী মীফম অদুগী হৌদোক ৱারোল অমসুং লোইশিনবগী ৱারোল আইন অমসুং ৱায়েল মন্ত্রালয়গী দিপার্তমেন্ত ওফ লিগেল এফ্যার্সকী সেক্রেতরী শ্রী অনুপ কুমার মেন্দিরত্তানা পীখি‍।

এস.সি.ও. মেম্বর স্তেতশিংগী ৱায়েল মন্ত্রীশিংনা পুনখিবা মীফম অদুদা ৱা ঙাঙলদুনা আইন অমদি ৱায়েল, কম্ম্যুনিকেসন অমসুং ইলেক্ত্রোনিক্স অমদি ইনফোর্মেসন তেক্নোলোজী মন্ত্রী শ্রী রবি সঙ্কর প্রসাদনা মীপুম খুদিংদা পুবা থাংবা ঙম্বা মওংদা অচুমবা ৱায়েল লায়না ফংহন্নবগীদমক ইকায়খুম্নরবা প্রধান মন্ত্রী নরেন্দ্র মোদীগী মীৎয়েঙ শাল্লবা লুচিং মখাদা ভারত লৈঙাক্না লৌখৎলিবা থৌরাংশিংগী মতাঙদা পাউদমখি‍।

মহাক্না খুন্নাইগী খুদোংচাদ্রবা শরুক্কী মীওইশিংদা লেম্না লিগেলগী তেংবাং পীনবগীদমক্তা প্রো বোনো লিগেল সর্ভিসেস হৌদোকপগী মতাঙদা পনখি‍। ইং ২০১৭দা হৌদোকখিবা তেলি-লো সর্ভিসগী খুত্থাঙদা হৌজিক ফাওবদা ভিদিও কন্ফরেন্সিংগী খুত্থাঙদা লায়রবা মীয়ামদা লেম্না লিগেলগী তাথোক তাশিন লাখ ৩.৪৪ ফংহনখ্রে হায়না মহাক্না হায়খি‍। হান্না লৈরম্লিবা ৱায়েলশঙগী মওং মতৌদগী ওতোমেসন প্রোসেসকী লমদা মায় পাক্না অহোংবা পুরক্লিবা লৈঙাক্কী থৌরাংগী শরুক অমা ওইনা ভিদিও কন্ফরেন্সিং ফেসিলিতী য়াওবা ই-ৱায়েলশঙ প্রোজেক্তশিং অমসুং ভর্চুএল ৱায়েলশঙগী ৱাফমশিং পনখি‍। কোবিদ-১৯ লাইচৎ মনুংসিদা ভারতকী তোঙান তোঙানবা ৱায়েলশঙশিংদা ভিদিও কন্ফরেন্সিংগী খুত্থাঙতা হিয়রিং লাখ ২৫ হেন্না পাঙথোকখ্রে, মসিগী মনুংদা ভর্চুএল হিয়রিং ৯,০০০দি সুপ্রিম কোর্তখক্তদা পাঙথোকখিবনি‍। ভারতপু শেন থাদবগী অমদি লল্লোন ইতিক্কী পাম্নবা পন্থুংফম অমা ওইহন্নবগী মীৎয়েঙদা কম্মর্সিএল কোর্ত এক্ত অমসুং অর্বিত্রেসন লোশিং য়াওনা লল্লোন ইতিক্তা কান্নবা পীগদবা আইন অমসুং চৎন-পথাপশিং শেম্বদা লৈঙাক্না অৱাংবা থাক্তা মীৎয়েঙ পীরিবা অসিগী মতাঙদসু পাউদমখি‍।

ৱায়েল মন্ত্রীশিংগী ফোরমগী থৌওংশিংগী শরুম ওইনা মন্ত্রীনা এস.সি.ও. মেম্বর স্তেতশিংদা খঙদোক্লবা হীরমশিংদা ফম্পাক অসিগী খুত্থাঙদা ৱাখল্লোন, খ্বাইদগী ফবা থৌওং অমসুং থেংনরকপা ৱাফমশিং তাথোক তাশিন তৌমিন্ননবা ৱাফম হৌদোকখি‍। মহাক্না অকক্ননা ফোরম অসিদা অমদি চাউনা য়েংবদা এস.সি.ও. অসিনা পায়খৎলিবা থবক থৌরমশিংগী মফম হেন্না পাকথোক চাউথোকহন্নবা ৱাফমসু থমখি‍।

মমাঙদা, এস.সি.ও. মেম্বর স্তেতশিংগী এক্সপর্ত ৱর্কিং গ্রুপনা য়েৎনবা ৱাফমশিংগী ৱারোইশিন পুরক্নবা অতোপ্পা থৌওং অমা পুরকপা অমদি কোরোনাভাইরস লাইচৎ শন্দোরকপা অসিগী য়েংলগা লিগেল য়াওনা হীরম খুদিংদা মতেং পাংনবগী মরুওইবা ৱাফমগী মতাঙদা খন্নখ্রে‍।

এস.সি.ও. মেম্বর স্তেতশিংগী ৱায়েল মন্ত্রীশিংগী তরেৎসুবা মীফম অদুদা মতেং পাংনবগী হীরমশিংদা নৈনখি; কোরোনাভাইরস লাইচৎ শন্দোরকপা অসি থেংননবগীদমক লিগেলগী ওইপা ঈ-পাউ ফাওদোক ফাউজিন তৌনবগী য়াম্না মরুওইবা ৱাফমশিং থম্নখি অমদি অতৈ হীরমশিংগী মরক্তা এ.দি.আর. মেকানিজমগী লমশিংদা মতেং পাংনবা মথৌ তাবগী ৱাফমশিং য়ানখি‍। এস.সি.ও. মেম্বর স্তেতশিংগী ৱায়েল মন্ত্রীশিংগী তরেৎসুবা মীফমদা তারকপা মহৈগী মতুং ইন্না অপুনবা ৱারোল অমা য়ানখি‍।

অপুনবা ৱারোলগী পনবা য়াবা ৱাফম খরা মখাদা পীরি:

১.      এ.সি.ও. মেম্বর স্তেতশিংগী ৱায়েল মন্ত্রীশিংগী মরক্তা মতেং পাংনবগী য়ানখিবা ৱাফম (দুসানবে, ওগস্ত ১৮, ২০১৫) থবক ওইনা পাঙথোকপগী থৌওং মপাঙ্গল কনখৎহনবা‍।

২.      ২০১৮-২০২০গী ফোরেন্সিক থৌওংশিং অমসুং লিগেল সর্ভিসশিংগী মতাঙদা ৱর্কিং গ্রুপ ওফ এক্সপর্তসগী এক্সন প্লানশিং মখা তানা পায়খৎপা অমদি ২০২১-২০২৩গী এক্সন প্লান শেমবা‍।

৩.      খ্বাইদগী ফবা থৌওং অমসুং চয়েৎনবা ৱাফমগী ৱারোইশিন পুরক্নবা অতোপ্পা পাম্বৈ থিজিন্নবা মন্ত্রালয়শিংগী (এস.সি.ও. মেম্বর স্তেতশিংগী আইন অমসুং ৱায়েল) মীহুৎশিংগী এক্সচেঞ্জ থৌরমশিং পাঙথোক্নবা খন্নবা‍।

৪.      লৈবাক্কী লেজিসলেসনগী মতুং ইন্না পুম্নমক্না য়ানবা লিগেলগী তেংবাং অমসুং লিগেল সর্ভিসশিং শেমগৎপগী মতাঙদা পার্তীশিংগী খোঙফম মখা তানা খন্ন-নৈনবা‍।

৫.      এস.সি.ও. ওবজার্ভরশিংগী ৱায়েল মন্ত্রীশিংগা মতেং পাংনবগী থৌরাং ইচঙ থৌনা লৌখৎপা অমদি খোঙবু ওইরিবা স্তেতশিংগা ৱারী ৱাতায় শানবা‍।

৬.      লৈবাক্কী আইনশিং য়েংলগা লিগেলগী ঈ-পাউ তাথোক তাশিন তৌননবা ওনলাইন প্লেতফোর্ম অমা শেমগৎনবগী থৌরাং মখা চত্থবা‍।

ভারত, কজাখস্তান, চাইনা, কীরগীজ রিপব্লিক, পাকিস্তান, রসিয়ন ফেদরেসসন, তাজিকিস্তান অমসুং উজবেকিস্তানগী আইন অমসুং ৱায়েল মন্ত্রালয়শিংগী (আইন অমসুং) ৱায়েল মন্ত্রীশিং, মকোক থোংবা ওফিসিএলশিং/এক্সপর্তশিংনা নুমিৎ হুম্নি চত্থখিবা খন্ন-নৈনবগী থৌরমদুদা শরুক য়াখি‍। মন্ত্রীশিংগী মীফম অদুগী মাঙওইননা ওফিসরশিংগী থাক্তা খন্ন-নৈনখি‍। আইন অমসুং ৱায়েল মন্ত্রালয়গী দিঈপার্তমেন্ত ওফ লিগেল এফ্যার্স সেক্রেতরী শ্রী অনুপ কুমার মেন্দিরত্তানা ওক্তোবর ১৩ অমসুং ১৪, ২০২০দা এক্সপর্ত ৱর্কিং গ্রুপকী অনিসুবা মীফমসু পাঙথোকখি‍। মীফমশিং অদু ভিদিও কন্ফরেন্সিংগী খুত্থাঙদা পাঙথোকখিবনি‍।

****