ষষ্ঠ ছানডে সংবাদ অনুষ্ঠানত দেওবাৰে তেওঁৰ ছ’চিয়েল মিডিয়া ব্যবহাৰকাৰীসকলে কৰা বহু প্রশ্নৰ উত্তৰ দিয়ে কেন্দ্রীয় স্বাস্থ্য আৰু পৰিয়াল কল্যাণ মন্ত্রী ডঃ হর্ষবর্ধনে। নবৰাত্রি উৎসৱৰ বাবে আন্তৰিক শুভকামনা জনাই ডঃ হর্ষবর্ধনে ছ’চিয়েল মিডিয়াত তেওঁৰ অনুগামীসকলক প্রধানমন্ত্রীৰ জন আন্দোলনৰ আহ্বানক সন্মান জনাবলৈ আৰু উৎসৱৰ সময়ত কভিড অনুকুল আচৰণ মানি চলিবলৈ অনুৰোধ জনায়। তেওঁ পুনৰবাৰ প্রত্যেককে অনুৰোধ জনাই কয়, পৰম্পৰাগত পদ্ধতি মানি ঘৰতে প্রিয়জনৰ সৈতে উৎসৱ উদযাপন কৰক। উৎসৱৰ এই বতৰত আনন্দ উপভোগ কৰাতকৈ দান দিয়াৰ মানসিকতাক প্রাধান্য দিব লাগিব বুলি মন্তব্য কৰি ডঃ হর্ষবর্ধনে কয়,  বিশ্বজুৰি কৰ’নাৰ বিৰুদ্ধে আমাৰ বাবে যুঁজ দি থকা লাখ লাখ কৰ’না যোদ্ধাৰ ওপৰত কভিড-১৯ৰ যি প্ৰভাৱ পৰিছে তাৰ বাবে এইবাৰ মোৰ নিজৰো উৎসৱ উদযাপনৰ উৎসাহ লোপ পাব।

ডঃ হর্ষবর্ধনে সম্প্রতি কেৰালাত কভিড-১৯ ত আক্রান্তৰ সংখ্যা বৃদ্ধি পোৱা সন্দৰ্ভত তেওঁৰ দৃষ্টিভংগী প্রকাশ কৰি কয়, যোৱা ৩০ জানুৱাৰীৰ পৰা ১৩মেৰ ভিতৰত ৰাজ্যখনত কভিডত আক্ৰান্তৰ সংখ্যা আছিল মাত্ৰ ৪৯৯জন আৰু মৃত্যু হৈছিল ২জন লোকৰ। তেওঁ দুখ প্ৰকাশ কৰি কয়, এই ৰাজ্যখনত শেহতীয়াভাৱে অনাম উৎসৱৰ সময়ত দেখুওৱা চৰম অৱহেলাৰ পৰিণাম এতিয়া ভোগ কৰিব লগা হৈছে। এই সন্দৰ্ভত তেওঁ কয়, কেৰালাৰ এই সাম্প্রতিক ঘটনাই উৎসৱৰ বতৰত উপযুক্ত পৰিকল্পনাৰ ক্ষেত্ৰত অৱহেলা কৰা সকলো ৰাজ্য চৰকাৰক এক উপযুক্ত শিক্ষা দিছে।

নভেল কৰ’না ভাইৰাছ চীনৰ লগতে বিশ্বৰ একাধিক দেশত একে সময়তে বিয়পি পৰা বুলি চীনে যি দাবী কৰিছে  ডঃ হর্ষবর্ধনে সেই সন্দৰ্ভত তেওঁৰ প্ৰতিক্ৰিয়া প্রকাশ কৰি কয়, বিশ্বৰ আন দেশত এই ভাইৰাছৰ উৎপত্তি হোৱাৰ কোনো তথ্য নাই। তেওঁ আৰু কয়, চীনৰ উহান কৰনা ভাইৰাছৰ প্রথম সংক্রমণৰ ঘটনাৰ বাবে সমগ্ৰ বিশ্বজুৰি  পৰিচিত হৈ ৰ’ব।

বজাৰত চীনত নিৰ্মিত অক্সিমিটাৰৰ পয়োভৰ সম্পর্কে আন এক প্রশ্নৰ উত্তৰত ডঃ হর্ষবর্ধনে কয়, বজাৰৰ পৰা বা অনলাইনত পালছ্ অক্সিমিটাৰ কিনাৰ সময়ত গ্রাহকে চাব লাগিব যে ই আইএছঅ’ নাইবা আইইচি হলমাৰ্কযুক্ত হয় নে নাই।

তেওঁ আৰু কয় যে  বৰ্তমান পর্যন্ত কৰনা ভাইৰাছৰ গঠনগত কোনো পৰিবর্তন ভাৰতত দেখা পোৱা নাই।

যোৱা খণ্ডৰ ছানডে সংবাদৰ এক প্রশ্নৰ আঁত ধৰি ডঃ হর্ষবর্ধনৰ পৰা ৰাজ্যসমূহক দিয়া দ্বিতীয় পর্যায়ৰ কভিড-১৯ অনুদান সম্পৰ্কে জানিব বিচৰা হয়। ইয়াৰ উত্তৰত তেওঁ কয় যে  ইতিমধ্যে ৩৩খন ৰাজ্য আৰু কেন্দ্ৰীয় শাসিত অঞ্চলক কভিড-১৯ পেকেজৰ ধন মুকলি কৰি দিছে। দ্বিতীয় পেকেজত মুকলি কৰা মুঠ ধন হৈছে ১৩৫২ কোটি টকা। দ্বিতীয় পৰ্যায়ত ৩টা কিস্তিত আগষ্ট, ছেপ্টেম্বৰ আৰু অক্টোবৰ মাহত এই অনুদান মুকলি কৰি দিয়া হৈছে।

ডঃ হর্ষবর্ধনে সন্তোষ প্রকাশ কৰি কয়, মহামাৰীৰ সময়ত অনলাইন শিক্ষণ পদ্ধতিৰ ক্ষেত্রতো তেওঁৰ মন্ত্রালয়ে বহু পিছ পৰি নাই। মেডিকেল কলেজ আৰু চিকিৎসা প্রতিষ্ঠানসমূহত এমবিবিএছৰ ছাত্র-ছাত্রীসকলৰ বাবে অনলাইন ক্লাছ আয়োজন কৰা হৈছে।

ডঃ হর্ষবর্ধনে আৰু এক প্রশ্নৰ উত্তৰত কয়, বাতৰি কাকতৰ পৰা কৰ’না ভাইৰাছ সংক্রমণৰ বৰ্তমান পর্যন্ত বৈজ্ঞানিক কোনো প্রমাণ নাই। এই সম্পর্কে তেওঁ কয়, মহামাৰীৰ সময়তো নিয়মিত সংবাদপত্র পঢ়াটো ভাইৰাছ সংক্রমণৰ পৰা সম্পূর্ণ নিৰাপদ।

দেশত কভিডজনিত কাৰণত হোৱা মৃত্যুৰ সংখ্যাৰ খেলিমেলি সম্পৰ্কত মন্ত্ৰীগৰাকীয়ে কয়, ইতিমধ্যে বিষয়টোক লৈ সকলো ৰাজ্য আৰু কেন্দ্ৰীয় শাসিত অঞ্চলৰ সৈতে আলোচনা কৰা হৈছে। আনকি কভিড-১৯ত মৃত্যু সম্পৰ্কীয় তথ্য আৰু মৃত্যু সম্পৰ্কীয় প্ৰমাণ পত্ৰ জাৰি কৰাৰ ক্ষেত্ৰত প্ৰয়োজনীয় উদ্যোগ লবলৈ ৰাজ্যসমূহক কোৱা হৈছে যাতে ৰাষ্ট্ৰীয় স্তৰত কভিডজনিত মৃত্যুৰ সংখ্যাত স্বচ্ছতা বজাই ৰাখিব পৰা যায়।

স্বাস্থ্য মন্ত্রীয়ে আশ্বস্ত কৰি কয়, বর্তমানে দেশত মেডিকেল অক্সিজেনৰ কোনোধৰণৰ ঘাটি হোৱা নাই। দেশত দৈনিক ভিত্তিত প্ৰায় ৬হাজাৰ ৪০০মেট্ৰিক টন অক্সিজেন উত্পাদন হৈছে। মহামাৰীজনিত কাৰণত দেশত অক্সিজেনৰ চাহিদা বৃদ্ধি পালে চৰকাৰে উত্পাদন বৃদ্ধি কৰিবলৈ প্ৰস্তুত থকা বুলিও তেওঁ জনায। কেন্দ্রীয় গৃহ মন্ত্ৰালয়ে  মেডিকেল অক্সিজেনৰ চাহিদাৰ ওপৰত নজৰ ৰখাৰ বাবে যি ক্ষমতাপ্রাপ্ত গোষ্ঠী গঠন কৰিছে,  সেইসমূহে অক্সিজেনৰ চাহিদা আৰু যোগানৰ ওপৰত ধাৰাবাহিকভাৱে নজৰ ৰাখি আছে। ইতিমধ্যে ১ লাখ ২ হাজাৰতকৈও অধিক মেডিকেল অক্সিজেন চিলিণ্ডাৰ ৰাজ্য আৰু কেন্দ্ৰীয় শাসিত অঞ্চলসমূহলৈ সৰবৰাহ কৰা হৈছে। নেচনেল ফাৰ্মাচিউটিকেল প্ৰাইচিং অথৰিটীয়ে তৰল মেডিকেল অক্সিজেনৰ দাম স্থিৰ কৰি দিছে। আনকি কভিডৰ চিকিত্সাৰ বাবে অক্সিজেনৰ ন্যায়সংগত ব্যৱহাৰ সম্পৰ্কেও নীতি-নিৰ্দেশনা জাৰি কৰিছে।

ডাঃ হর্ষবর্ধন কয়, বর্তমান দেশত কোনো ইন্ট্রানেজেল কভিড টীকাৰ পৰীক্ষা-নীৰিক্ষা কৰা হোৱা নাই। চিৰাম ইণ্ডিয়া আৰু ভাৰত বায়োটেক-এ সংশ্লিষ্ট কর্তৃপক্ষৰ পৰা অনুমতি পোৱাৰ পাছত এই ধৰণৰ টীকাৰ ক্লিনিকেল ট্রায়েল আৰম্ভ কৰিব বুলি আশা কৰা হৈছে।

ডাঃ হর্ষবর্ধনে বিজ্ঞান আৰু প্রযুক্তি তথা ভূ-বিজ্ঞান সম্পৰ্কীয় বিভাগৰ দায়িত্বপ্ৰাপ্ত মন্ত্ৰী হিচাপে এক প্ৰশ্নৰ উত্তৰত জনায়, ইতিমধ্যে মুম্বাই আৰু চেন্নাই চহৰৰ বাবে আগন্তুক বাৰিষা কালত সতর্কতা ব্যৱস্থা আৰম্ভ কৰা হৈছে। অতি শীঘ্রে কলকাতাৰ বাবে এই ধৰণৰ সতর্কতামূলক ব্যৱস্থা আৰম্ভ কৰা হব বুলিও তেওঁ জনায়।

চিএছআইআৰ-আইআইপি আৰু গেইল– ৰ ফালৰ পৰা ডেৰাডুনত যি বিশেষ এটা ডিজেল উৎপাদন কেন্দ্র আৰম্ভ কৰা হৈছে, সেই সম্পর্কে ডঃ হর্ষবর্ধনে কয়, এই উৎপাদন কেন্দ্রত ১ হাজাৰ কেজি বর্জ্য প্লাস্টিকৰ পৰা দৈনিক ভাৰতত ষ্টেজ-৬ গুণমান বিশিষ্ট ৮০০ লিটাৰ ডিজেল উৎপাদন কৰা সম্ভৱ।

বিজ্ঞান আৰু প্রযুক্তিবিদ্যা বিভাগে যোৱা ছয় বছৰত, বিশেষভাৱে মহিলা বিজ্ঞানীসকলৰ বাবে একাধিক কর্মসূচী আৰম্ভ কৰিছে বুলি জনাই ডঃ হর্ষবর্ধনে কয়, এই কর্মসূচীসমূহৰ ফলত বিজ্ঞানভিত্তিক প্ৰতিস্থানসমূহত নিম্ন পৰ্যায়ত লিংগ সমতাৰ অগ্ৰগতি হৈছে।  আনকি, বিদ্যালয়সমূহত বিজ্ঞান শিক্ষাত মহিলাসকলৰ অংশগ্রহণৰ হাৰ বৃদ্ধি হৈছে। একেদৰে, চৰকাৰী গবেষণাগাৰসমূহতো মহিলাসকলৰ আধিক্য ক্রমবর্ধমান।

বিজ্ঞান আৰু প্রযুক্তিৰ ক্ষেত্রত মহিলাসকলৰ সক্রিয় অংশগ্রহণ আৰু বৃদ্ধি কৰাত বিজ্ঞান আৰু প্রযুক্তি বিভাগে ধাৰাবাহিক প্রয়াস চলাই যোৱা বুলি ডাঃ হর্ষবর্ধনে পুনৰবাৰ ব্যক্ত কৰে।

ছানডে সংবাদৰ ষষ্ঠ খণ্ড চাবলৈ তলৰ লিংকসমূহত ক্লিক কৰক –

টুইটাৰ : https://twitter.com/drharshvardhan/status/1317730112872226817?s=20

ফেচবুক : https://www.facebook.com/watch/?v=1114364852316144

ইউটিউব : https://www.youtube.com/watch?v=OYQw5Q8ISPk

ডিএইচভি এপ : http://app.drharshvardhan.com/download

 *****

MV/KG