কেন্দ্রগী হকশেল অমসুং য়াইফ য়ুম্বাল মন্ত্রী দাঃ হর্শ বর্ধন্না ঙসি এফ.এস.এস.এ.আই. অমসুং তোঙান তোঙানবা মন্ত্রালয়শিংগা লোয়ননা মন্ত্রীশিংগী ওইবা মীফম অমা পাঙথোক্তুনা ইৎ রাইৎ ইন্দিয়া মুবমেন্তকী ‘ভিজন ২০৫০’গী পান্দম ফংনবা ‘হোল ওফ গবর্নমেন্ত’কী থৌওং অমা শেমগৎনবা খন্নখ্রে।

কেন্দ্রগী মন্ত্রীনা চিঞ্জাক্তগী শন্দোকপা লায়নানা ভারত্তা মাঙহল্লিবা শেন্মিৎলোনগী ওইবা শেনফম অসি বিলিয়ন দোল্লর ১৫নি হায়বা খঙদোকখি। নুপী অমসুং অঙাংগী ৫০%না এনেমিয়া নাবগা লোয়ননা ৱেস্তিং (২১%), অন্দরৱেতিং (৩৬%), স্তন্তিং (৩৮%) অসি অঙাংশিংদা য়াম্না তোয়না থোক্লিঙৈ অসিদা নুপাশিংগী মরক্তা কা-হেন্না নোয়বগী চাং অসি দিকেদ (২০০৫-২০০১৫) অসিদা ৯.৩%দগী ১৮.৬%কী চাংদা শরুক অনি থোক্না হেনগৎপা অমসুং নুপীশিংদনা ১২.৬%তগী ২০.৭%তা হেনগৎপগা লোয়ননা এন.সি.দি.না মরম ওইদুনা মী শিবগী চাংসু হেনগৎলি। মতৌ অসুম্না ফুদ সেক্যুরিতীদগী ন্যুত্রিসন সেক্যুরিতীরোমদা লাক্নবা মসিগী মরী লৈনবা মন্ত্রালয়শিং অসিনা অমত্তা ওইনা পুন্দুনা মান্নবা প্লেৎফোর্ম অমদা লাক্তুনা হীরম অসিগী মতাংদা থনক পায়খৎনবা অমত্তা ওইবা পান্দম অমসুং থৌরাং য়াৎপগী থৌওংশিং পাঙথোক্কনি হায়বগী থাজবা থম্মি।

দাঃ হর্শ বর্ধন্না কিনিংঙাই ওইরবা স্তেতিস্তিক্স অসিবু য়েংলদুনা অসুম্না হায়খি, “ইৎ রাইৎ ইন্দিয়া অমসুং ফিৎ ইন্দিয়া মুবমেন্ত অসিনা লৈবাক অসিদা অনৌবা ফিভম অমা শোইদনা পুরক্কনি। মসিগী মহৈ অসি ঐখোয় খুদিংনা মথংগী চহি ১০দা উবা ফংগনি। পথাপ অমদা য়ুম্ফম ওইদুনা পাঙথোকপা থৌওংনা চিঞ্জাক ফংফমশিংবু লেংদনা লৈহন্দুনা ফুদ সেক্যুরিতী ফংহনবা ঙমগনি অমসুং মসিনা তুং কোইনা চৎকদবা থৌওংগী খুত্থাংদা অকোয়ববু ঙাক-শেন্দুনা থম্বগা লোয়ননা হকশেল ফবা চানবা চিঞ্জাকসু খুমাং চাউশিলহনগনি”।

ভারতকী মীওই বিলিয়ন ১.৩গী ৫০%দি মরু ওইবা মাইক্রোন্যুত্রিএন্তশিং ফংনবগীদমক্তা তঙাই ফদ্রবা দাইতরী এলাৱেন্সকী চাং ফংদবা অসিবু য়েংলদুনা মহাক্না ‘ফুদ সেক্যুরিতী তু ন্যুত্রিসন সেক্যুরিতী’গী থৌওং অসিবু নীংথিনা শৌগৎখি। “তোঙান তোঙানবা মন্ত্রালয়শিংনা প্রাইমরী প্রদক্সন, ফুদ প্রোসেসিং, লেম্না মাঙবা অমসুং হাইজিন অমসুং চাবগী হীরমগা মরী লৈনবা চৎনগদবা কাঙলোনশিং ইলহনবগী মতাংদা মরু ওইবা খোঙথাং কয়া পায়খৎপা য়াই। মসি পাঙথোক্লবা মতমদতা ‘ইৎ রাইৎ ইন্দিয়া’ অসিনা মহাক্কী ৱাহন্থোক অসিগী মতুং ইনবা অশেঙবা ইহৌ অমা ওইবা ঙমগনি”।

তোঙান তোঙানবা মন্ত্রালয়শিংগী মীহুৎশিংনা মখোয় মখোয়গী ৱাখল্লোনশিং অমসুং ইহৌ অসিগী পান্দম ফংনবা মরু ওইবা হীরমশিংদা পুন্না হোৎনমিন্নখিবগী ৱাফমশিং পুথোক্নখি।

কেন্দ্রগী হকশেলগী সেক্রেতরী শ্রী রাজেশ ভুশন; এফ.এস.এস.এ.আই.গী সি.ই.ও. শ্রী অরুন সিংহ; নুপী অমসুং অঙাংগী য়াই-য়ুম্বালগী সেক্রেতরী শ্রী রাম মোহন মিশ্রা; এনিমেল হসবেন্দরী অমসুং দাইরীয়িংগী সেক্রেতরী শ্রী অতুল চতুর্বেদী; লৌউ-শিংউবগী এদিস্নেল সেক্রেতরী মিস অল্কা ভারগবা; কঞ্জ্যুমর এফিয়র্সকী এদিস্নেল সেক্রেতরী শ্রীমতি নিধি খারে; দি.জি.ঐচ.এস. দাঃ সুনিল কুমার অমসুং ফুদ, ফিশরীজ, এম.এস.এম.ই. মন্ত্রালয়শিংগী জোইন্ত সেক্রেতরীশিংসু থৌরম অদুদা শরুক য়াখি।

****