ঐগী নুংশিরবা মরূপশিং, নমস্তে !

অহানবমক্তদা ঐহাক্না শ্রী প্রেম ৱতসাবু ফোরম অসি শেম্বগীদমক্তা থাগৎপা ফোঙদোক্লি। মফম অসিদা কেনাদাগী শেল থাদবশিং অমসুং কারবার ময়াম উবা ফংবা অসিদা হরাওবা পোকই। অদোম খ্বাই খিবিক্তা ভারত্তা লৈবা শেল-থাদবা অমসুং কারবার কয়া অমগী খুদোংচাবশিং ফংহনবা অসিদা ঐহাক্না য়াম্না হরাওই।

মরূপশিং, তিল্লিবা মীয়াম মরক অসিদা মীপুম খুদিংগী ওইনা মান্নবা অমা য়াওরি। মীয়াম মরক অসিদা শেল থাদবগী ৱারেপ লৌবা মীওইশিং য়াওরি। শিঙনবশিং য়েংশিনবা ৱারেপশিং লৌবা। শেল থাদবা মতমদা শেন্দোং কয়াম্না লৈগদগে হায়বা মাংজৌননা খঙদোকহনবা ৱারেপশিং।

ঐহাক্না নখোয়দা হংনিংবা অমা লৈঃ লৈবাক অমদা শেল থাদদ্রিঙৈদা অদোম্না করি খনবগে? লৈবাক অসিদা নীংথিরবা গনতন্ত্রগী পথাপ লৈবরা? লৈবাক অসিগী রাজনিতীগী ফিভম অসি ত্নগদু লৈতানা লৈবরা? লৈবাক অদুদা শেল-থাদবা অমসুং কারবারদা পুক্নিং থৌগৎপা পোলিসী লৈবরা? লৈবাক অদুদা হৈ-শিংবা মীওই য়াম্না লৈবরা? লৈবাক অসিগী অচৌবা কৈথেল লৈবরা? মসিগী ৱাহংশিং অসি অদোম্না হঙলমগদবা ৱাহংশিংনি।

ৱাহংশিং অসিগী অমত্তা ওইবা য়েৎননিংঙাই ওইদবা পাউখুম অমা লৈ অমসুং মদুদি ভারতনি।

মফম অসিদা মীওই খুদিংগী খুদোংচাবা লৈ- ইন্সতিত্যুসনেল ইনভেস্তর, পোত্থোক পুথোকপশিং, অনৌবা ইকোসীস্তেম শৌগৎপশিং অমসুং ইনফ্রাস্ত্রকচর কম্পেনীশিং। মফম অসিদা শেল থাদবগী খুদোংচাবা, য়ুনিৎ হাংদোকপগী অমসুং কারবার তৌবগী খুদোংচাবা য়াম্না লৈ। মফম অসিদা ঐখোয়গী প্রাইবেৎ সেক্তরশিং অমসুং সরকারগা খুৎশম্নবগী খুদোংচাবা লৈ। মফম অসিদা শেল তানবা অমসুং অনৌবা লৌশিং তানবগী খুদোঙচাবা লৈবগা লোয়ননা লুচিংবা অমসুং শাহৌ লৌবগী খুদোংচাবসু মফম অসিদা লৈ।

মরূপশিং, কোবিদকী মতুংগী মালেমদদি নহাক্না তোঙান তোঙানবা খুদোংচাদবশিংগী মরমদা তাবা ফংগনি। পোত্থোক শাবগী, সপ্লাই চেনগী, পি.পি.ই.গী খুদোংচাদবনচিংবা কয়াগী মতাংদা তাবা ফংগনি। খুদোংচাদবা হায়বসি মহৌশাগী লৈবনি।

অদুবু ভারত্তদি মখোয়শিং অসি খুদোংচাদবা ওইহন্দ্রে। ঐখোয়না নীংহন্নবা লৈতবগী মওং উত্তুনা ৱারোইশিন পীবা লৈবাক অমা ওইরবনি।

ঐখোয়না অশাংবা মতমগী ওইনা মীওই মিলিয়ন ৮০০দা হৱাই-চেংৱাই লেম্না য়েন্থোকখি অমসুং চাউরাক্না ইমুং মিলিয়ন ৮০দা চাক থোংনবা গ্যাস লেম্না য়েন্থোকখি। লোজিস্তিক্সতা অয়েৎপা কয়া লৈখ্রবসু ঐখোয়না লৌউবা, নুপীশিং, লায়রবা অমসুং তোল্লবা মীওই মিলিয়ন ৪০০ হেনবদা নুমিৎ খরনিগী মনুংদা মখোয়গী বেঙ্ক একাউন্তশিংদা হকথেংনা শেল থাবা ঙমখি।

মসিনা ঐখোয়না হৌখিবা চহি খরগী মনুংদা শেমখিবা লৈঙাকপগী মওং-মতৌ অমসুং পথাপকী মপাঙ্গল উৎলি।

মরূপশিং, ভারতনা মালেমগী ফার্মাসী ওইবগী থৌদাং লৌরি। হৌজিক ফাওবদা ঐখোয়না লায়চৎ অসিগী মনুংদা  লৈবাক ১৫০ মুক্তা হিদাক পীখ্রে।

চহিসিগী মার্চ-জুনগী মনুংদা ঐখোয়গী লৌউ-শিংউগী পোত্থোক মীরমদা থাদোকপা অসি ২৩%গী চাংদা হেনগৎখি। মসিগী থৌওং অসি লৈবাক অসিনা অকনবা লোকদাউনগী মনুংদা লৈরিঙৈদনি।

ঙসিদি ঐখোয়গী পোত্থোক পুথোকপগী থৌওং অসি খ্বাইদগী য়াঙবা খোঙজেলদা পাঙথোক্লি। লায়চৎ অসিগী মমাংদা ভারতনা পি.পি.ই. কিৎ অসি কয়া পুথোক্লমদে। ঙসিদি ভারতনা থা খুদিংগী পি.পি.ই. কিৎ মিলিয়ন অমমম পুথোকপা ঙম্বতা নত্তনা মপান লৈবাক্তা ফাওবা থাদোক্লে।

ঐখোয়না পোত্থোক পুথোকপা হেনগৎহন্নবা খোংফম চেৎলি। কোবিদ-১৯গী বেক্সিন পুথোকপগী মতাংদসু ঐখোয়না মালেম খুদিংদা তেংবাংনিঙই।

মরূপশিং, ভারতকী ৱারী অসি ঙসি মপাঙ্গল য়াম্না কল্লি অমসুং হয়েংনা হেন্না অমুক কনগনি। মতৌ করম্না ওইগদৌরিবনো হায়বা ঐহাক হায়গে।

ঙসিদি এফ.দি.আই.গী থৌওং অসি মীপুম খুদিংনা য়ানবা ওইরে। ঐখোয়না সোভরেন ৱেল্থ অমসুং পেন্সন ফন্দগী ওইনা তেক্স থীবা নুংঙাইবা থৌওং অমা শেম্লে।

ঐখোয়না অচৌবা বোন্দ মার্কেৎ অমা শেম্নবা মশক থোকপা শেমদোকপা কয়া পাঙথোকখ্রে। ঐখোয়না মথৌ নীংথিনা পাঙথোকপা সেক্তরশিংগীদমক্তা ইন্সেন্তিব স্কিম কয়া অমা পুরক্লে।

ফার্মা, মেদিকেলগী খুৎলায় অমসুং ইলেক্ত্রোনিক্সকী পোত্থোক পুথোকপা সেক্তরশিংদা স্কিম কয়া অমা থবক ওইনা পাঙথোকপা হৌখ্রবনি। ঐখোয়না শেল-থাদবশিংগী অয়ৌবী থাক্তা পুক্নিং চিংশিনবা অমসুং থৌওংশিংগী মতাংদা নীংথিনা তাক্নিঙই। মসিগীদমক্তা ওইবা মপাঙ্গল হাপ্লবা সেক্রেতরীশিংগী কাঙবু অমসু শেম্লে।

ঐখোয়না এয়রপোর্তশিং, রেলৱেজশিং, হাইৱেশিং, পাৱর পুবগী লাইনশিংনচিংবা সেক্তর কয়া অমদা এসেৎ কয়া হকথেংননা শেলদা ওন্থোক্লি।  পব্লিক অমসুং প্রাইবেৎ এসেৎ অনিমক্কী ওইবা রীএল ইস্তেৎ ইনবেস্তমেন্ত ত্রস্তস (REIT) অমসুং ইনফ্রাস্ত্রকচর ইনবেস্তমেন্ত ত্রস্তস (InvITs) শিং অসি এসেৎপু শেলদা ওন্থোক্নবা শেম-শাবা লোয়রে।

মরূপশিং, ঙসিদি ভারত অসি ৱাখল্লোন অমসুং কৈথেলদা অথুবা অহোংবা লাক্লি। ঙসিদি ভারত অসি কম্পেনী এক্তকী মখাদা লৈবা অরানবা থৌওং কয়া অমবু দীরিগ্যুলেসন অমসুং দীক্রিমিনেলাইজেসন তৌবগী লম্বীদা চৎলি।

হৌখিবা চহি ৫গী মনুংদা ভারতনা গ্লোবেল ইন্নোভেসন ইন্দেক্সকী মকোক মথংদা ৮১গী থাক্তগী ৪৮দা হেনগৎপা ঙম্লে। হৌখিবা চহি ৫গী মনুংদা ৱর্ল্দ বেঙ্ককী কারবার তৌবা নুংঙাইবগী মকোক মথংদা ১৪২গী থাক্তা লৈরম্বদগী ৬৩গী থাক্তা লৈরে। মসিগী ফগৎলকপা অসিগী মহৈদি মীপুম খুদিংনা উবা ফংনরে। জনুৱারি ২০১৯দগী জুলাই ২০২০ ফাওবগী চহি অমা অমসুং তংখায়গী মনুংদা ইন্সতিত্যুসনেল ইনভেস্তরশিংদগী চাউরাকপা য়ু.এস.দি. বিলিয়ন ৭০মুক ফংখ্রে। মসিগী শেনফম অসি ইং ২০১৩ অমসিং ২০১৭কী মনুংদা ফংখিবা অদুগা মান্নৈ। মালেমগী শেল থাদবশিংগী খুন্নাইনা ভারত্তা লেপ্তনা থাজবা থম্বগী থৌওং অসি ইং ২০১৯দা মালেমগী ওইনা এফ.দি.আই. ইনফ্লো অসিনা ১%গী চাংদা তাথবা মতমদা ভারত্তা চঙলকপা এফ.দি.আই. অসিনা ২০%গী চাংদা হেনগৎখিবা অসিনা তাক্লি।

হৌজিক ফাওবদা হন্দক্কী চহিগী অহানবা থা তরূক অসিদা মালেম শিনবা থুংবদগী য়ু.এস.দি. বিলিয়ন ২০গী মথক্তা ফংখ্রে। মসিগী মতম অসি মালেমদা কোবিদ-১৯না কন্না শোকহল্লিবা মতম অদুমক্তদনি।

জি.আই.এফ.তি. শহরদা লৈরিবা ইন্তর্নেস্নেল ফাইনেন্সিএল সর্বিস সেন্তর (আই.এফ.এস.সি.) অসি ঐখোয়গী য়াম্না মশক থোকপা খোঙথাং অমনি। শেল থাদবশিংনা মসিগী প্লেৎফোর্ম অসিবু শিজিন্নদুনা মালেম শিনবা থুংনা শেল থাদোক থাজিন তৌবা য়াগনি। ঐখয়না মসিগী মতাংদা মপাঙ্গল লৈরবা অমসুং অপুনবা কাঙলোন অমসু হন্দক্তা শেমখ্রবনি।

মরূপশিং, কোবিদ-১৯না ওইহনবা শিংনবশিং থেংননবা ভারতনা তোপ তোপ্পা থৌওং অমা পাঙথোক্লি।

ঐখোয়না লায়রবা অমসুং অপিকপা কারবারশিংগী তেংবাংবা অমসুং স্তিম্যুলস পেকেজ পীরি। ঐখোয়না মসিগী খুদোংচাবা অসি লৌদুনা স্ত্রকচরেল রিফোর্ম পাঙথোক্নবা হোৎনরি। মসিগী শেমদোকপশিং অসিনা কান্নবা অমসুং নুংঙাই য়াইফবা হেলহনগনি।

ভারতনা এজুকেসন, লেবর অমসুং লৌউ-শিংউগী মতাংদা শেমদোকপা অহুম পাঙথোক্লে। মখোয়শিং অসিনা পুল্লগা ভারত মচা খুদিংদা কান্নহনগনি।

ভারতনা লেবর অমসুং লৌউ-শিংউগী হীরমশিংদা শেমদোকপা লৈহন্নবা হোৎনখ্রে। মখোয়না সরকারগী সেক্যুরিতীগী হীরমশিং অসি কনখৎহনবতা নত্তনা প্রাইবেৎ সেক্তরনা শরূক য়াবসু হেনগৎহল্লগনি।

মসিগী শেমদোকপশিং অসিনা ওন্তোপ্রিনরশিং অমসুং থবক কন্না শুজবা মীওইশিংদসু কান্নবা পীগনি। এজুকেসনগী হীরমদা শেমদোকপা অসিনা ঐখোয়গী নহাশিংগী হৈ-শিংবগী কান্নবা লৌবা হেনগৎহনগনি। মসিগী শেমদোকপশিং অসিনা মীরমগী য়ূনিবর্সিতী কয়ানা ভারত্তা লাকপগী য়ূম্ফম শেম্লবনি।

লেবরগী আইন্দা শেমদোকপা অসিনা লেবর কোদ মশিং য়াম্না হন্থহল্লে। মখোয়শিং অসি থবক তৌবা মীওই অমসুং থবক পীবা মীওই অনিমক্তা নুংঙাইহল্লি অমসুং মসিনা কারবার তৌবগী থৌওং হেন্না নুংঙাইহল্লগনি।

লৌউ-শিংউগী হীরমদা শেমদোকপা অসিনা য়াম্না পাক চাওই। মসিনা লৌউবশিংদা অপাম্বা কয়া খনবা ঙমহনবতা নত্তনা মীরমদা পোত্থোক থাদোকপসু হেন্না হেনগৎহনগনি।

মসিগী শেমদোকপশিং অসিনা ঐখোয়না আত্মানির্ভর ভারত নত্ত্রগা মরোমদোম লেপচবা ঙম্বা ভারত অমা শেম্নবা হোৎনরিবা অসিদা য়াম্না তেংবাংগনি। হীরম অসিগী মাইকৈদা চঙশিন্দুনা ঐখোয়না মালেমগী অফবা অমসুং নুংঙাই য়াইফবা ওইহনবা পাম্লি।

মরূপশিং,

করিগুম্বা নহাক্না এজুকেসনগী হীরমদা খোঙলোয় পাম্লবদি, নহাক্না চৎকদবা অসি ভারতনি।

করিগুম্বা নহাক্না পোত্থোক পুথোকপা নত্ত্রগা সর্ভিসকী হীরমদা শেল থাদনিংলবদি, নহাক্না চৎকদবা অসি ভারতনি।

করিগুম্বা নহাক্না লৌউ-শিংউবগী হীরমদা খোঙলোয় পাম্লবদি, নহাক্না চৎকদবা অসি ভারতনি।

মরূপশিং,

ভারত-কানাদা বাইলেতরেল মরী অসি ঐখোয়দা পুন্না লৈমিন্নরিবা গনতন্ত্রগী ইথিল অমসুং অতোপ্পা মান্নবা অপাম্বশিং অসিনা খুমাং চাউশিলহল্লিবনি। ঐখোয়গী মরক্তা লৈনরিবা লল্লোন-ইতিক অমসুং শেল-থাদনবগী মরী অসিনা ঐখোয়গী মায়থোঙ য়াম্বা মরী অসিদা য়াম্না মরূ ওইবনি।

কেনাদা অসিনা ভারত্তা শেল থাদবা খ্বাইদগী চাউবদা ২০শুবদা লৈরি। ভারত্তা কেনাদাগী কম্পেনী ৬০০ হেন্না থবক তৌরি। ঐঙোন্দা পাউদম্লকপগী মতুং ইন্না হৌজিক ফাওবগী মনুংদা কেনাদিয়ান পেন্সন ফন্দনা ভারত্তা চাউরাক্না য়ু.এস.দি. বিলিয়ন ৫০ থাদগনি হায়রে হায়রি।

ঐখোয়গী লৈনরিবা মরী অসি মশিংনা তাক্লিবা অসিদগী হেন্না চেৎলি। অমসুং মদুনা তাকপদি, ঐখোয়না পুন্না চৎমিন্নদুনা মাই-পাকপা কয়া অমা ফংগনি হায়বনি।

কেনাদা অসি ইনফ্রাস্ত্রকচরদা শেল থাদবা খ্বাইদগী চাউবা অমসুং হৈ-শিংলবা মীওইশিং লৈবা মফম্নি। কেনাদিয়ান পেন্সন ফন্দ অসিনা ভারত শেল থাদবা হৌখিবা খ্বাইদগী অহানবশিংনি। মখোয় কয়া অমনা হাইৱে, এয়রপোর্ত, লোজিস্তিক্স, তেলিকোম অমসুং রীএল ইস্তেৎকুম্বা হীরম কয়া অমদা খুদোংচাবা লৈবা কয়া অমা খঙখ্রবনি। মখোয়না মখোয়গী থবক তৌবগী চাং হেনগৎনিঙই অমসুং শেল থাদবা য়াবা অনৌবা মফমশিংসু ফংবা ঙম্লি। ভারত্তা চহি কয়াদগী লৈরক্লবা মপুং মরৈ ফারবা কেনাদাগী শেল থাদবশিংনা ঐখোয়গী খ্বাইদগী মতিক চাবা ব্রান্দ এম্বেসেদর ওইবা য়াগনি।

মখোয়গী লৈজরিবা থবক্কী লৌশিং, হেন্না চাউথোক্কে অমসুং তোঙান তোঙানবা হীরমশিংদা চঙগে হায়না থৌরাং য়াৎলিবা অসিনা নখোয় খুদিংনসু মফম অসিদা লাকপা য়াবগী খুদম অমনি। মসিগী মথক্তা নখোয়না ভারতপু নীংথিজনা খঙবগী খুদোংচাবসু ফংগনি। আদুগা মালেমগী ওইনা ভারত মচা খ্বাইদগী য়াম্না লৈবা মফম অমা কেনাদাসু ওইরিবনি। ঐখোয়গী মফম অসিদা নখোয়দা অপনবা ওইগদবা করিমত্তা লৈরোই। নখোয়গী লৈবাক্তা তরাম্না ওক্লিবা মঅং অদু মফম অসিদসু মান্নবা মওংদা লৈগনি।

ঐহাকপু থৌরম অসিদা ৱা ঙাংনবা পাউজেল পীবিরকপগীদমক্তা থাগৎচরি। মীয়াম্বু অমুক্কা হন্না থাগৎচরি।

****