খাদি পাম্বশিংগী থৱাই য়াওবগী চাংনা হেনখিদুনা হন্দক্কী গান্ধী জয়ন্তি অসিদা দিল্লীগী কননাউৎ প্লেস্তা লৈবা খাদি ইন্দিয়াগী আউৎলেৎনা মশক থোকপা ওইনা লুপা করোর ১দগী হেনবগী পোৎ য়োনখি। হৌজিক্কী ওইরিবা কোরোনাগী ইরাং মরক অসিদা ওক্তোবর ২, ২০২০ (ইরাই) নুমিত্তা খাদি য়োনবগী শেনফম অসি য়াম্না ৱাংবা ওইনা লুপা ১,০২,১৯,৪৯৬কী পোত্থোক য়োনখি। মমাংগী চহিদা নুমিৎ অসিদা সি.পি.গী খাদিগী আউৎলেৎনা লুপা করোর ১.২৭কী পোত্থোক য়োনখি।

বিল অমদা চাংচৎকী ওইনা লুপা ৬২৫৮গী চাংদা নুমিৎ অসিদা অপুনবা বিল ১৬৩৩ ককখি। তোঙান তোঙানবা কাঙলুপ অমসুং চহিগী মীওইশিংনা অয়ূক্তগী হৌনা খাদি ইন্দিয়াগী আউৎলেত্তা পোৎ লৈনবা ক্যুদা লেপ্নখি। পনবা য়াবা ওইনা খাদি অমসুং ভিলেজ ইন্দস্ত্রীজ কম্মিস (কে.ভি.আই.সি.)না মহাত্মা গান্ধীগী মপোক কুমওন পালন তৌবা ওইনা মখোয়গী পোত্থোক খুদিংগী মমলদা অখন্নবা ওইনা ২০%গী চাংদা তাগনি হায়না লাঊথোকখি।

কে.ভি.আই.সি.গী চেয়রমেন শ্রী বিনয় কুমার সক্সেনানা মসিগী চাং ৱাংনা য়োনবা ঙম্বগী থৌওং অসিবু প্রধান মন্ত্রীনা খাদিগী পোত্থোক লৈনবা তত্তনা হায়রিবা অমসুং হৌরক্লিবা নহশিংনা মসিবু য়াম্না পাম্নরক্লিবা অসিগী মরমননি হায়খি। “কোরোনাগী লায়চৎ লৈজরবসু প্রধান মন্ত্রীনা তত্তনা হায়বদগী মীওই কয়া অমনা খাদিগী পোত্থোক লৈবা লাক্নখি। খাদি অসি য়ুম্থোং খুদিংনা খঙনবা মমিং অমা ওইরে অমসুং মসিবু পামজবা মীওইশিংগী মশিং অসি য়াম্না য়ামখৎলক্লি। পূথোকপগী চাংদা য়াম্না হেনগৎহনবা লৈরবসু মসিগী পোত্থোকশিংগী অফবা মগুন লৈহন্নবা হোৎনবা অসিনা ঐখোয়গী কস্তমর মশিং লেংদনা লৈরি”, হায়না সক্সেনানা হায়খি। হন্দক্কী পোৎ য়োনবগী শেনফম অসি মমাং ছিদা ওইখিবা অদুদগী শুপ্নগী লাখ ১ তমক তাখি, অদুবু লায়চৎকী মনুংদা লুপা করোর অমগী পোৎ য়োনবা ঙম্বা অসিসু অচৌবা মাই-পাকপা অমনি।

হন্দক্কী চহিসিদা খাদি য়োনবগী চাং য়াম্না ৱাংবসি মশক থোক্নিংঙাইনি। কোবিদ-১৯গী মনুংদা থবক থরম অয়াম্বশিং অসি থিংখ্রবসু কে.ভি.আই.সি.না মসিগী তোঙান তোঙানবা থবকশিং অসি লৈবাক শিনবা থুংনা মখা তানা চত্থখি অমসুং থবকশিং অসিগী মনুংদা য়াওরিবশিং অদুদি ফিরোল মখল কয়া অমসুং খুঙ্গংগী ইন্দস্ত্রীশিংগী পোত্থোক কয়া শাবগী মথক্তা ফেস মাস্ক শাবা অমসুং হেন্দ ৱাশ অমসুং হেন্দ সেনিতাইজরগুম্বা পর্সনেল হাইজিনগী পোত্থোকশিং শাবা অসিনি।

****