কেন্দ্রগী মন্ত্রীশিংগী কাউন্সিলগী শ্রী রাজনাথ সিংহ,  হিমাচল প্রদেশকী মীয়াম্না পাম্নবা মুখ্য মন্ত্রী ইনাও জয়রাম থাকুর জি, হিমচালগী পার্লিয়ামেন্তকী মেম্বর অমসুং কেন্দ্রদা ঐহাক্কী মরূপ ওইরিবা ছোক্রাগী শ্রী অনুরাগ থাকুর, এন.ই.ই.গী এম.এল.এ., এম.পি. অমসুং হিমাচল সরকারগী মন্ত্রী ওইরিবা শ্রী গোবিন্দ থাকুর জি অমসুং অতোপ্পা মন্ত্রীশিং, এম.পি.শিং, এম.এল.এ.শিং, ইচে-ইচল অমসুং ইয়াম্বা-ইনাওশিংগী মফমদা ঐহাক্না অহানবমক্তদা কোক নোঞ্জরি।

তুসা সেবি রে, নুংশিরবা অতল বিহারি ভাজপায় জিবু থাগৎপা ওইনা রি সোচা কুল্লু, লাহুল, লেহ-লদাখ রে লোকা রে তাইনি আই সুরঙ্গা রা তাউহফা, তুসা সেভি ভে মেলু।

ময়াম্বু অমুক হন্না থাগৎচরি।

মুনি-ঋশিশিংগী লাই নীংফম ওইরিবা অমসুং খুঙ্গং-খুঙ্গংশিংগী তোপ-তোপ্পা কর্দু ১৮গী চৎনবী লৈরিবা ইমা হিদম্বগী মফমদা ঐহাক্না থম্মোই শেংনা খুরুমজরি। হৌজিক মুখ্য মন্ত্রী শ্রী জয়রাম জিনা ঐহাক্না পেরাগ্লাইদিংগী মশানাদা পামজবা অসিগী মতাংদা হায়বীখিবা অমসুং মসিগী চানবা মফম কঞ্চনাগতসু ঐহাক্না নোল্লুকপা ফোঙদোক্লি। পায়বা অসি য়াম্না নুংঙাই অসুবু মসিগী মপোৎ-মচৈশিং অসি থাংগত্তুনা মথক্তা চৎপা মতমদদি ৱাবগী ঙমখৈ লৈতে। মালেমগী মীওই অমনা মসি তৌরম্বা য়াই নত্ত্রগা তৌরমদে হায়বদুদি ঐহাক্না খঙদ্রে। অতলজিনা মনালিদা লাক্লম্মি অমসুং মতম অদুদা ঐহাক্না ঐখোয়গী পার্তীগী শিন্দোক শিঞ্জিন তৌবা মীওই অমা ওইরম্বনা ঐহাক্না খরা ঙন্না লাকখি। মরম অদুনা ঐখোয়না থৌরম অমা শিল্লম্মি। পেরাগ্লাইদর ১১ অমসুং পাইলোৎনা অপুনবা ওইনা মথক্তা পায়দুনা লৈ অমসুং অতল জি না য়ৌরকপদা ঐখোয়না নোংথক্তগী লৈ চায়থখি। মালেমদা অসিগুম্বা মওংদা পেরাগ্লাইদিং অসি মমাংদা শিজিন্নখিদ্রিবা মাল্লি। মরম অদুনা ঐহাক্না নুংথিলদা অতল জি বু উন্নবা চৎপা মতমদা মহাক্না ঐঙোন্দা ঐহাক অসি থৌনা য়াম্না লৈ অমসুং মসিগী থবক অসি করিগী তৌরিবনো হায়না হঙবীখি। নুমিৎ অসি ঐহাক্না মনালিদা লৈবা মতমগী খ্বাইদগী নুংঙাইবা অমসুং নীংশিংনিংঙাই ওইবা নুমিৎ অমা ওইখি অমসুং বাইজপায় জিবু অসিগুম্বা মওংদা তরাম্না ওকপগী ৱাখল্লোন থোক্লকপা অদু য়াম্না নুংঙাইবা ওইখি।

ঐহাক্কী হিমাচল প্রদেশকী নুংশিরবা ইচিল ইনাওশিং, অতল তন্নেল লোঞ্চ তৌবা অসিদা নখোয় পুম্নমক্তসু ঐহাক্না য়াইফ পাউজেল পীরি। ঐহাক্না মমাংদা হায়খিবগুম ঙসি অসি মীয়াম তিন্দুনা মীফম পাঙথোক্লবসু সোসিএল দিস্তেন্সিংগী কাঙলোন অসি নীংথিজনা ইনবগী মওং ঐহাক্না উবা ফংই। মীয়াম খুদিংনা সোসিএল দিস্তেন্সিংগী কাঙলোন ঙাক্তুনা লৈরি অমসুং ঐহাক্না খুৎ থাংগত্তুনা মীয়ামগা পুন্না হরাওবা ফোঙদোকপগী খুদোংচাবা অমসু ঙসিদি ঐহাক্না ফংলে। তৌববুদি ঐহাক অসি মফম অমদা য়াম্না কুইনা লৈগনবা মীওই অমদি নত্তে। অদুবু অতল জি না লাকপা মতমদদি মহাক্না লৈরিবা নুমিৎ মখৈসু ঐহাক্না মফম অসিদা লৈ অমসুং মসিনা ঐহাকপু অদোমগা য়াম্না নক্নহল্লিবনি। মতম অদুদা মহাক্কা ঐহাক্কনা মনালিগী চাউখৎপগী মতাংদা ৱারী কয়া অমা শানখি।

অতল জি না মফম অসিগী ইনফ্রাস্ত্রকচর, লম্বী শম্নবা অমসুং তুরিজমগী মতাংদা য়াম্না লুনা খনখি।

মহাক্না মহাক্কী অফাউবা শৈরেং অমা য়াম্না তোয়না পারম্মি। মনালিগী মীয়াম্নদি মসিবু হান্না তারম্লগনি। মফম অসিবু ময়ুম্নি হায়না খনবা, মফম অসিগী পরিনি খুঙ্গংদা মতম লেনবা পামজবা অমসুং মফম অসিবু অতল জি না পামজবা অদুগুম্না পামজবা মীওইশিংগী ওইনা অতল জি না মহাক্কী শৈরেংদা অসুম্না ইরম্মিঃ

মনালি মৎ জাইয়ো,

রাজা কে রাজ মে।
জাইয়ো তো জাইয়ো,
উরিকে মৎ জাইয়ো,
অধর মে লৎকি হে,
বায়ুদুৎ কে জহাজ মে।
জাইয়ো তো জাইয়ো,
সন্দেসা না পাইয়ো,
তেলিফোন বিগ্রে হে,
মির্ধা মহারাজ মে।

মরূপশিং,

মনালিবু য়াম্না নুংশিজবা অতল জি না মফম অসিগী ফিভম কয়া হোংদোক্নিংবগী অপাম্বা লৈরম্মি। মফম অসিগী অতোপ্পা লমশিংগা শম্নবগী ফিভম হোংদোক্নিংঙম্মি। মসিগী ৱাখল্লোন অসিগী মতুং ইন্না মহাক্না রোহতাংদা শুরুং অমা শানবা ৱারেপ লৌখি।

ঙসিদি মহাক্কী ৱারেপ অসিনা মহৈ য়ানবা উবা ফংবদা ঐহাক্না য়াম্না হরাওই। মসিগী তল শুরুং অসিনা অচৌবা চীঙ অসিগী অরুম্বা পুরি (শুরুং অসিগী মথক্তা চাউরাক্না কিলোমীতর ২গী চিঙ লৈ)। লাহাউল-স্পিতি অমসুং মনালিগী মীওইশিংনা পুরম্বা অরুম্বা অসি ঙসিদি শুরুং অসিনা পুরে অমসুং মসিনা মফম অসিগী মীয়াম্বু মওং অমদা পোৎলুম কয়া অমদগী নিং-খা তমহল্লে। অচম্বা মীয়ামগী অ ৱাবা কোকহনবা ঙম্বা, লাহাউল-স্পইতিদা চত্থোক চৎশিন তৌবদা লায়হনবা ঙম্বা অসিদা ঐহাক্না হরাওবা অমসুং চাউথোকচবা ফাওই।

কুল্লু-মনালিদা লাকপা লম-কোয়বশিংনা অয়ুক্তা অশেংবা ঘী চারগা থোক্লকপা অমসুং লাহোলদা লাক্তুনা ‘দু-মার’ অমসুং ‘চিলরে’বু অয়ুক্কী চাক্লেন ওইনা চাবা য়াবগী মতম অদু য়ৌরক্লবনি। মসি হান্নদি ওইথোক্লমদে।

হোই, কোরোনা লৈরি, অদুবু নৌহৌননা অমুক হাংদোকপগী থবকসু তপা তপ্না হৌরক্লে। ঐহাক্না থাজবদি লৈবাক অসিগী অতোপ্পা সেক্তরশিং হাংলকপগুম তুরিজমগী সেক্তরসু হাংলক্লগনি অমসুং কুল্লুদা দশেরা পাঙথোকপগী থৌরাংদি মীয়াম্নসু তৌবা হৌনরম্লগনি।

মরূপশিং,

অতল শুরুং অসিগা লোয়ননা হিমাচলগী মীওইশিংগী ওইনা অতোপ্পা অচৌবা ৱারেপ অমসু লৌরে। হমিরপুরদা মেগাৱাৎ ৬৬কী ধোলাসিধ হাইদ্রো পাৱর প্রোজেক্ত অমগী অয়াবা পীখ্রবনি। মসিগী প্রোজেক্ত অসিনা মীয়ামদা মৈ ফংহনবতা নত্তনা নহা কয়াদসু থবক্কী খুদোংচাবা কয়া পীগনি।

মরূপশিং,

লৈবাক অসিদা অচৌবা ইনফ্রাস্ত্রকচর কয়া শেম্বগী থৌরাং য়াৎলিবা অসিদা হিমাচলসু য়াম্না চাউনা খন্নবদা য়াওরি। হিমাচলদা লৈরিবা খুঙ্গংগী শোরোকশিং, হাইৱে , পাৱর প্রোজেক্ত, রেলৱেগী শম্নবা, এয়রৱেগী শম্নবগী থৌওং কয়া অমগী মতাংদা খোঙজেল য়াংনা থবক পায়খৎপা হৌরবনি।

কিরতারপুর-কুল্লু-মনালিগী লম্বী ওইরো, জিরকপুর-পরৱালু-সোলন-কেথলীঘাৎ লম্বী ওইরো, নঙ্গলদেম-তলৱারা রেলগী লম্বী ওইরো, ভানুপল্লি-বিলাস্পুর বেরি লম্বী ওইরো, হীরমশিং অসিগী মতাংদা খোঙজেল য়াঙনা থবক পায়খৎলি। হায়রিবা প্রোজেক্তশিং অসি অথুবা মতমদা লোইশিন্দুনা মসিনা হিমাচলগী মীওইশিংদা মতেং পাঙবা ঙমহন্নবা ঐখোয়না কন্না হোৎনরি।

মরূপশিং,

হিমাচলগী মীওইশিংগী পুন্সি মহিং হেন্না নুংঙাইহন্নবা হায়দুনা লম্বী-শোরোক অমসুং মৈনচিংবা মরু ওইবা অমসুং তঙাই ফদবা হীরমশিং অসি ফগৎহনবতা নত্তনা মোবাইল অমসুং ইন্তর্নেৎ কন্নেক্তিবিতী নুংঙাইহনবা অসিসু য়াম্না তঙাই ফদবনি। লম-কোয়বগী মীওইশিং য়াম্না লাকপা মফমদদি হায়রিবশিং অসি য়াম্না তঙাই ফদবনি। চিঙগী লম ওইবনা হিমাচলগী মফম অয়াম্বদা মোবাইল নেৎৱর্ক্কী খুদোংচাদবা য়াম্না থেংনৈ। অসিগুম্বা থৌওংশিং অসিগী ৱারোইশিন পুরক্নবা হায়দুনা হন্দক্তা লৈবাক শিনবা থুংবগী খুঙ্গং লাখ ৬তা ওপ্তিকেল ফাইবর তিংবগী থবক হৌখ্রে। মথংগী নুমিৎ ১০০০দা হায়রিবা থবক অসি মিসন মোদতা পাঙথোক্তুনা লোইশিল্লগনি। মসিগী মতেংদগী খুঙ্গংশিংদা ৱাই-ফাই হোৎস্পোৎ লৈরগনি অমসুং য়ুম্থোং খুদিংদা ইন্তর্নেৎ কন্নেক্সন লৈরগনি। মসিনা হিমাচলগী অঙাংশিংগী লাইরিক লাইশু, অনাবশিংগী হিদাক অমসুং তুরিজমদগী লাকপা চাগা অমসুং অতোপ্পা হীরম কয়াদা খুদোংচাবা ফংলগনি।

মরূপশিং,

অচম্বা মীওইশিংগী খুদোংচাদবশিং মতৌ করম্না হন্থহনগদগে অমসুং মখোয়গী হকশিং মতৌ করম্না ফংহনগদগে হায়বগী মতাংদা সরকারনা মতম পুম্বদা খন্নদুনা লৈরি অমসুং মসিগী থৌওং অমা ওইনা সরকারগী সেবা খুদিংমক দিজিতাইজ তৌরিবনি। হৌজিক্তি থাগী তোলোব, পেন্সন্নচিংবা তোঙান তোঙানবা কান্নবা ফংনবগীদমক্তা সরকারগী লোইশঙশিংদা হঞ্জিন হঞ্জিন্না চত্ত্রবসু য়ারে।

মমাংদদি হিমাচলগী মনুং হঞ্জিনবা মফমশিংদা ঐখোয়গী নহা ওইবশিংনা থবক্তগী পোত্থারবা মীওইশিং, ওফিসারশিং অমসুং রাজনিতী তৌবগী মীওইশিংগী মনাক্তা চে-চাং এতেস্ত তৌনবা য়াম্না তোয়না চৎনরম্মি। হৌজিক্তি চে-চাং স্তেস্ত তৌবগী চৎনবীসু লৈহন্দ্রে।

হান্নদি তেলিফোন অমসুং মৈগী বিল পীবদা নুমিৎ চুপ্পা অমা চঙলম্মি হায়বসি অমুক্তা নীংশিংবীয়ু। হৌজিক্তি থবক অসি য়ুমদা লৈনা লৈনা খুৎনা ক্লিক অমা তৌদুনা পাঙথোকপা য়ারে। বেঙ্ককা মরী লৈনবা সেবা কয়া বেঙ্কতা চৎলুদ্রগদি পাঙথোক্লমদবা য়াদবশিং অদুসু য়ূমদগী লোইনা তৌবা য়ারে।

মরূপশিং,

অসিগুম্বা শেমদোকপগী থৌওং কয়া অসিনা মতমসু মাংদ্রে, শেলসু তিংদ্রে অমসুং শেঞ্জা থুমজা তৌবগী ওইথোকপা কয়া অমসু লৈহন্দ্রে। কোরোনাগী মতম অসিদসু হিমাচলগী পেন্সনর লাখ ৫দগী হেনবা অমসুং জন-ধনগী একাউন্ত লৈবা নুপী লাখ ৬ হেনবদা ক্লিক অমগী মতেংদগী শেনফম কয়া অমা পীখ্রবনি। লায়রবা নুপী লিশিং ৭৫০০০ হেনবদা উজ্বালাগী মখাদা লেম্না পীবা গ্যাস সিলিন্দর কয়া অমসু ফংহনখ্রে।

মরূপশিং,

লৈবাক অসিদা হৌজিকসু শেন্দোকপগী থৌওং কয়া পাঙথোক্লি অমসুং মসিনা মশাগী রাজনিতীগী কান্নবা খক্তা পাঙথোক্তুনা লাকপা মীওইশিংদি য়াম্না অৱাবা পীরি। চহি কয়া অমা হৌখ্রে অদুবু মখোয়গী ৱাখল্লোন্দি হোংবা লৈত্রি। হৌজক্তি চহি হৌখিবগা লোয়ননা ৱাখল্লোনসু হোংদোক্কদবনি অমসুং লৈবাকসু শেমদোকপা পুরকপা চাউখৎহনগদবনি। অসিগুম্বা মীওইশিংনা শেম্বা ময়ায়দা লৈবা মীওইশিংগী মথক্তা থবক লৌখৎপা হৌরকপা অসিদা মখোয় য়াম্না নুংঙাইত্রে। দলালি চাবা মীওইশিংদা পুক্নিং থৌগৎপা অসিনা লৈবাক্কী লৌউবশিংবু করি ফিভমদা থম্বীরি হায়বসি হিমাচলগী মীওইশিংনসু নীংথিনা খঙলবা ৱাফম্নি।

হিমাচল অসি লৈবাক অসিগী উহৈ য়াম্না পুথোকপা রাজ্য অমনি হায়বসি মীয়াম্না খঙনরবনি। মফম অসিগী খামেন অশিনবা, মশ্রুমগুম্বা মনা-মশিং অসিনা শহর ময়াম অমগী তঙাই ফদবশিং মনিং থুংহল্লি। অদুবু মসিগী ফিভম অসি করি ওইরম্মি? কুল্লু, শিম্লা অমসুং কিন্নোরগী শেমশিং অসি লৌউবশিংদগী কিলদা লুপা ৪০-৫০গী চাংদা লৈরগা দিল্লীদা লৈরিবা মীওই কয়াদা লুপা ১০০-১৫০দা য়োল্লি। মসিগী মরক্তা লৈরিবা শেনফম অসি লৌউবশিংদসু য়ৌদে, য়োল্লিবা মীওইশিংদউ য়ৌদে, মসি কদায়দা চৎখ্রবগে> লৌউবশিং অমসুং মসিবী শহরশিংদা য়োন্নবা পুরিবা মীওইশিংদসু মাংজবা ওইরে। মসিদা নত্তনা শেমগী কুম অসিনা লোইশিল্লকপগী মতুং ইন্না শেমগী মমলসু অসুম হন্থরকই হায়বা বগান চলায়রিবা মীওই খুদিংনা খঙনরবনি। মসিদা খ্বাইদগী মাঙজরিবা অসি অপিকপা বগান লৈবা মীওইশিংনি।

মরূপশিং,

লৌউবা চাউখৎপগী আইন অসিগী মায়োক্তা লৈরিবা মীওইশিংনা হায়বগী মতুং ইন্না হৌজিক লৈরিবা ফিভম অসিদা অদুমক লৈজসনু, মমাংগী চহি চাদা হিংগদবনি অমসুং হিংহল্লু অদুবু লৈবাক অসিনা চাউখৎপা পুরক্নবা খোঙফম চেৎলি। মরম অসিনা লৌউবশিংগী চাউখৎনবা অসিগুম্বা আইশিং অসিদা পুৱারী ওইবা মওংদা শেমদোকপগী থৌওং চত্থরিবনি। মসিগী শেমদোকপশিং অসিগী মতাংদা মখোয়নসু হান্না খনলম্লবনি অমসুং মখোয়সু মসিগী কান্নবশিং ঐখোয়না খঙলিবা অসিগুম্না খঙলিবনি অদুবু মখোয়দা মসিবু ওইথোকহন্নবা হোৎবগী থৌনা লৈতে। মখোয়গী ওইনদি মমাংদা মীখল উই, ঐখোয়নদি মাংদা লৈবাক উই। ঐখোয়গী মাংদা লৈবাক অসিগী লৌউবশিংগী চাউখৎপা উই, মরম অদুনা মসিগী ৱারেপ অসি লৌদুনা লৌউবশিংবু চাউখৎহনবা পাম্মি।

হৌজিক হিমাচলগী বগান অপিকপা চলায়রিবা মীওইশিংনা পুন্সিন্দুনা অতোপ্পা রাজ্যশিংদা চত্তুনা হকথেংননা সেম য়োনবা চৎপগী নিং-তম্বা অদু ফংলবনি। মখোয়না হান্নদি লৈরিবা চৎনবীগী মতুং ইন্না মনাক নকপা মন্দিশিংদা য়োনবদা কান্নবা ফংলবদি মদুসু করিশু কায়বা লৈতে। মদুগী চৎনবী অদুসু অদুমক লৈরি। মসিনা হায়বদি লৌউবশিংবু হীরম খুদিংদা চাউখৎহন্নবা খুদোংচাবা কয়া পীরি হায়বনি।

মরূপশিং,

কেন্দ্র সরকারনা লৌউবশিংগী শেন্থোক হেনগৎহন্নবা অমসুং মখোয়না থেংনরিবা অপিকপা খুদোংচাদবা কয়া লৈহন্দনবা খোঙফম চেৎলি। প্রধান মন্ত্রী কিসান সম্মান নিধিগী মখাদা লৈবাক্কী লৌউবা চাউরাক্না করোর ১০গী ইমুংশিংদা হৌজিক ফাওবগী ওইনা মখোয়গী একাউন্ততা চাউরাক্না করোর লাখ ১ হাপখ্রবনি। মসিগী মনুংদগী হিমাচলগী চাউরাকপা লৌউবা লাখ ৯গী ইমুংদা করোর ১০০০গী শেনফম পীখ্রবনি।

মমাংগী সরকারগী মতম অসিদা হিমাচলগী ওইনা অসিগুম্বা করোর ১০০০গী পেকেজ অসি লৈরম্লবদি মসিগী শেনফম অসি কনা কনাগী ফুরিৎখাওদা চঙলমগনি হায়বগী মতাংদা অমুক্তা খন্থবীয়ু। মসিদ্গী রাজনিতীগী কান্ননবা করি করি তৌরম্বা ইয়াই? মসিগী শেম্ফম অসি লৌউবশিংদা হৌজিক্তি য়ৌরে মরম অদুনা ইহৌ অমত্তা লৈত্রে।

মরূপশিং,

হন্দক্তসু ঐখোয়গী লৈবাক অসিগী মেনপাৱরশিং, মরু ওইনা ইচলশিং অমসুং ইচানুপীশিংগী মপাঙ্গল হাপ্নবা শেমদোকপা অমা লৈখি। হিমাচলগী নুপীশিংদি হান্নগী হৌনা অরুবা হীরম খুদিংদা মাং থাদুনা লাক্লি। অদুবু হৌজিক ফাওবদা লৈবাক অসিদা পথাপ অসিগী মতুং ইন্না তোঙান তোঙানবা সেক্তরশিংদা নুপীশিংনা থবক তৌবদা অথিংবা লৈরম্মি। হন্দক্তা শেমদোকপা কুরকখিবা আইন অমদা নুপীশিংবু নুপাশিংগা মান্নবা থাক্তা পুরক্তুনা মফমশিং অসিদা থবক তৌবা য়াহনখ্রবনি।

মফম খুদিংদা লৈবা মীয়ামগী মশাদা থাজবা লৈবা হেনগৎহন্নবা অমসুং আত্মানির্ভর ভারত ওইহন্নবা শেমদোকপগী থৌওং কয়া অমা লেপ্তনা চত্থরি। মমাংগী চহি-চাদা চৎনবা কাঙলোনশিং অসিনা মথংগী চহি-চা য়ৌনবা চৎপা ঙম্লোই। খুন্নাই অমসুং পথাপতা লৈরকপা ৱাহন্থোক অমসুং কান্নবা লৈরবা শেমদোকপশিং অসিগী মায়োক্তা মীওই কয়া অমনা য়েৎলবসু শেমদোকপগী থৌওং অসি কৈদৌনুংদা লেপ্লরোই।

হিমাচল, মফম অসিগী নহাশিং, লৈবাক অসিগী মীয়াম খুদিংগী মঙলান অমসুং অপাম্বশিং অসি ঐখোয়গী ওইনা য়াম্না মরু ওই। অমসুং মসিগী ইথিলশিং অসি পুদুনা ঐখোয়না লৈবাক অসিবু চাউখৎপগী অনৌবা থাক্তা য়ৌহনগনি।

মরূপশিং,

ঐহাক্না ঙসি অতল শুরুং অসিনা অহোংবা কয়া অমা পুরক্কনি হায়বগী মতাংদা হায়রি। খুদোংচাবা কয়া অমগী থোং হাংলবনি। মসিদগী লৌবা য়াবা কান্নবা খুদিংমক লৌবীয়ু।

ঐহাক্না অদোম খুদিংদা য়াইফ পাউজেল পীরি। তুংদসু অফবা ওইবা ওইসনু।

কোরোনাগী ইরাং অসিসু হিমাচলগী মীয়াম্না নীংথিনা শেন্ননখি। অদুবু মসিদগী তেক্ত কায়দনা লৈনবা হোৎনদি লেপকনু।

দেব্ধারা অমসুং কাঞ্চানাগপু খুরুম্বা ওইনা অদোম পুম্নমক্কা অমুক হন্না পুনবগী মতম অমা ফংলে। কোরোনা লৈরমদ্রবদি হেন্না নুংঙাইরমগদবনি, অদোমগা হকথেংননা থেংনবা য়ারম্বনি। অদুবু হৌজিক ওইরিবা ফিভম অসিনা মদু ওইথোকহন্দ্রে অদুবু মীয়ামগা উন্নবগী তাঞ্জা অমা ফংবা অসিদা ঐহাক্না পেল্লে। ঐহাক মফম অসিদা অথুবা মতমদা থোকখিগদবনি মরম অদুনা অদোমগী অয়াবা লৌবগা লোয়ননা অদোম্বু অমুক হন্না থাগৎচরি।

ময়াম্বু থাগৎচরি।

******