প্রধানমন্ত্রীগী লোইশঙ

প্রধান মন্ত্রীনা অতল তনেল জাতিদা কত্থোকখ্রে

হিমাচলগী পির পঞ্জালগী চীংশাং পরেংগী খ্বাইদগী খুদোংচাদবা ফমফ অসিদা অচৌবা মাই পাকপা ওইনা তনেল শাবা ঙমখিবা অসিদা বি.আর.ও. অমসুং ভারতকী ইঞ্জিনীয়রশিংবু থাগৎখি

তনেল অসিনা হিমাচল প্রদেশ, জে অমসুং কে, লেহ অমদি লদাখ খুমাং চাউশিন হল্লগনি: পি.এম.

লৌমীশিং, হৈকোল-লৈকোল শেম্লিবশিং, নহাশিং, লমকোয়বশিং, সেক্যুরিতী ফোর্সশিং প্রোজেক্ত অসিদগী কান্নবা ফংলগনি: পি.এম.

ঙমখৈগী মফমদা লম্বী-থোং ফংগৎহন্নবা অমসুং ইনফ্রাস্ত্রকচর প্রোজেক্তশিং ইমপ্লিমেন্ত তৌনবা পোলিতিকেল ৱিল মথৌ তাই: পি.এম.

শেন্মীৎলোন্দা ৱাংনা খুমাং চাউশিনবা অসি তোঙান তোঙানবা ইনফ্রাস্ত্রকচরগী থবকশিং থুনা-য়াংনা পাঙথোকপগী মখা পোল্লি: পি.এম.

Posted On: 03 OCT 2020 1:05PM by PIB Imphal

প্রধান মন্ত্রী শ্রী নরেন্দ্র মোদীনা ঙসি মনালিগী সাউথ পোর্তেলদা লৈবা মালেমগী ওইনা খ্বাইদগী শাংবা হায়ৱে তনেল – অতল তনেল অসি জাতিগীদমক কত্থোকখ্রে।

কি.মি. ৯.০২ শাংবা তনেল অসিনা চহী চুপ্পা মনালিদগী লহাউল-স্পিতি তম্পাক ফাওবা শম্নহল্লি‍। মমাংদা তম্পাক অসি চহী খুদিংগী থা ৬ উন কন্না তাবনা মরম ওইরগা শম্নদনা লৈরমখি‍।

তনেল অসি হিমালয়াগী পির পঞ্জাল চীংশাংদা মীন সী লৈভেল (এম.এস.এল.)দগী মিতর ৩০০০ (ফুৎ ১০,০০০) ৱাংবা মফমদা অল্ত্রা-মোদর্ন স্পেসিফিকেসন শীজিন্নদুনা শাবনি‍।

তনেল অসিনা মনালি অমসুং লেহগী মরক্কী লম্বীগী অশাংবা কি.মি. ৪৬ অমদি চৎপগী মতমনা পুং ৪ দগী ৫ ফাওবগী চাংদা হন্থহল্লে‍।

মসিদা সেমি ত্রান্সভর্স ভেন্তিলেসন, এস.সি.এ.দি.এ.না কন্ত্রোল তৌবা মৈহৌ লাংপোক থেংননবা, মৈ ঙালহন্নবা অমদি শেন্ননবা সিস্তেম য়াওনা খ্বাইদগী নৌয়া মখলগী ইলেক্ত্রোমেকানিকেল সিস্তেম য়াওরি‍। তনেল অসিদা মতিক চারবা শাফগদবা মচাকশিং য়াওরি‍।

প্রধান মন্ত্রী শ্রী মোদীনা তনেল অসিগী সাউথ পোর্তেলদগী নোর্থ পোর্তেল ফাওবা চৎখি অমসুং মেন তনেল অসিমক্তদা য়াওরিআ ইমর্জেন্সী ইগ্রেস তনেল অদুসু য়েংশিনখি। মহাক্না থৌরম অসিদা “দি মেকিং ওফ অতল তনেল”গী পোক্তোরিএল একজিবিসন অমসু মীৎয়েং তাবা ফংখি।

মহাক্কী ৱারোলদা, প্রধান মন্ত্রীনা হায়খি নুমিৎ অসি ইতিহাসিক ওই মরমদি মসিনা হান্নগী প্রধান মন্ত্রী অতল বিহারী বাচপেয়ীগী মঙলান অদু মহৈ য়ানহনবতা নত্তনা লম অসিগী মীওই করোর কয়ানা চহি কয়া মঙজরকপা মঙলানসু ওইথোকহনবা ঙম্লে।

মহাক্না হায়খি অতল তনেলনা হিমাচল প্রদেশ লোয়ননা অনৌবা য়ুনিয়ন তেরিতরী ওইরিবা লেহ-লদাক্কী চাউরবা শরুক্কী লাইফলাইন ওইরগনি অমসুং মসিনা মনালি অমসুং কীলোংগী মরক্তা লৈরিবা অরাপ্পা অদু পুং ৩-৪ হন্থহনবা ঙম্লগনি।

মহাক্না মখা তারদুনা হায়খি হিমাচল প্রদেশ অমসুং লেহ-লদাক্কী শরুকশিং অসি লৈবাক্কী লেমহৌরিবা শরুকশিংগা হৌজিক শম্নরগনি অমসুং মসিনা শেন্মীলোন খুমাং চাউশিনহনবা ঙম্লগনি।

মহাক্না হায়খি, লৌমীশিং, হৈকোল-লৈকোল শেম্লিবশিং অমদি নহাশিংনা কেপিতেল ওইরিবা দেল্লীদা অমদি অতোপ্পা কৈথেলশিংদা হৌজিক্তি লায়না চৎপা য়ারগনি।

প্রধান মন্ত্রীনা হায়খি অসিগুম্বা ঙমখৈদা লম্বী থোং শেমগৎপগী প্রোজেক্তশিং অসিনা সেক্যুরিতী ফোর্সশিংদা চাং নাইনা মখোয়গী সপ্লাইশিং ফংহন্নসুনা অমসুং মখোয়গী পেত্রোলিং চৎপদা মতেং পাংলগনি।

মঙলান অসি মঙ ফাওনবা ঙমহন্নবা মখোয়গী থৱায় খুপাক্তা হাপতুনা হোৎনখিবা ইঞ্জিনীয়রশিং, তেক্নিসিয়নশিং অমসুং শিন্মীশিংবু প্রধান মন্ত্রীনা থাগৎপা ফোঙদোকখি।

মহাক্না হায়খি অতল তনেল অসিনা ভারতকী ঙমখৈগী ইনফ্রাস্ত্রকচরদা অনৌবা পাঙ্গল হাপলগনি অমসুং মালেমগী থাক্কী ঙমখৈগী লম্বী-থোং অমগী খুদম অমা ওইরগনি। মহাক্না হায়খি ইনফ্রাস্ত্রকচর অসি ফগৎহন্নবা অমসুং ঙমখৈগী মফমশিংদা চাউখৎ থৌরাং পুরক্নবা মতম শাংনা পন্দুনা লৈরক্লবা দিমান্দ লৈরবসু থৌরাংশিং খক্তদা তৌদুনা খুমাং চাউশিনবা ঙমদনা চহি কয়া লৈরকখি।

প্রধান মন্ত্রীনা হায়খি অতলজিনা তনেল অসিগী উরেপ উয়ুং ২০০২দা তমখি। মহাক্না হায়খি অতলজীগী সরকারগী মতুংদা থবক অসি থৌশাদনা লাকপনা ২০১৩-১৩ ফাওবদা মীতর ১৩০০ খক্তা হায়বদি তনেল অসিগী কি.মি. ১.৫ ফাওবা য়ৌদনা শাখি, চহি অমদা শুপ্নতগী মীতর ৩০০ খক শাখি।

মতম অদুদা এক্সপর্তশিংনা ফোঙদোকখি করিগুম্বা তনেল অসি হায়রিবা খোঙজেল অসিদা শারবদি ২০৪০দা খক্তা লোয়শিনবা ঙমগনি।

প্রধান মন্ত্রীনা হায়খি সরকার অসিনা প্রোজেক্ত অসিগী খোঙজেল য়াংখৎহন্দুনা চহি খুদিংগী মীতর ১৪০০ শাবগী খোঙজেলদা থবক শুখি। মহাক্না হায়খি প্রোজেক্ত অসি চহি ২৬ চংনি হায়রম্বা অদু চহি ৬তা লোয়শিনবা ঙমখি।

মহাক্না হায়খি লৈবাক অমনা শেন্মীৎলোন অমদি খুন্নাইগী মরী লৈনবা চাউখৎ থৌরাং পুক্নবা ইনফ্রাস্ত্রকচর অসি খোঙজেল য়াংনা শেমগৎপা তাই। শ্রী মোদীনা হায়খি মসিগীদমক রাজনিতীগী ওইবা অখং কনবা অমসুং জাতিগীদমক কত্থোকপা মথৌ তাই।

মহাক্না হায়খি অসিগুম্বা মরু ওইবা অমদি অচৌবা ইনফ্রাস্ত্রকচর প্রজেক্তশিং লোয়শিনবদা থেংথবনা মরম ওইরগা শেল মাংবা অমসুং মীওই কয়াদা শেন্মীৎলোনগী কান্নবশিং ফংহন্দবা য়াই।

মহাক্না হায়খি ২০০৫তা, তনেল অসি শাবদা চংগদবা চাউরাকপা শেল অসি লুপা করোর ৯০০ ওইখি। অদুবু লেপ্তনা থেংথরকপা ঙসিদি মসি লোয়শিনবদা শরুক অহুম হেন্না চংলে হায়বদি লুপা করোর ৩২০০।

প্রধান মন্ত্রীনা হায়খি অয়াম্বা মরু ওইবা প্রোজেক্তশিং অসি অতল তনেলদা তোরিবা মওং অসিগা চপ মান্নবা মীৎয়েং চংলি।

এয়র ফোর্সনা এয়র স্ত্রিপ অমা মথৌ তারবসু থৌরাংদা তেংবাংগদবা য়াম্না মরু ওইবা এয়র স্ত্রিপ ওইরিবা লদাখকী দৌলাৎ বেগ ওল্দি  অসি চহি ৪—৪৫ লোয়শিনবা ঙমদনা লৈরি। মহাক্না হায়খি বোগিবীল ব্রিজকী থবক অসি অতলজিগী সরকারগী মতমদগী থবক হৌখি অদুবু মতুংদা মসিগী থবক অসি লেপখি। মসি অরুনাচল প্রদেশ অমসুং অৱাং নোংপোক্কী লমদম ফাওনহনগদবা মরু ওইবা থোং অমানি মহাক্না হায়খি মসিগী থবক অসি ২০১৪গী মতুংদা থবক কনখৎপা হৌরকখি অমদি অতলজীগী মপোক কুমওনদা চহি অনিগী মমাংদা শঙ্গাখি।

মহাক্না হায়খি অতলজিনা বিহারগী মিথিলানচলগী মরু ওইবা লমদম অনি ফাওনহনগদৌরিবা কোসি মহাসেতুগী উরেপ উয়ুং তমখি। ২০১৪গী মতুংদা সরকার অসিনা কোসি মহাসেতুগী থবক অসি খোঙজেল য়াংশিনহনখি অমসুং থোং অসি চয়োল খরগী মমাংদা শঙ্গাখি।

প্রধান মন্ত্রীনা হায়খি হৌজিক্তি ফীভম অসি য়াম্না হোংলে অমসুং হৌখিবা চহি তরু অসিদা ঙমখৈগী ইনফ্রাস্ত্রকচর – লম্বীশিং, থোংশিং নত্রগা তনেলশিং ওইরবসু – অসি মপুং ফানা অমদু খোঙজেল য়াংনা চাউখৎ হনবা ঙম্লে।

প্রধান মন্ত্রীনা হায়খি সরকার অসিগী ওইনা লৈবাক অসিগী সেক্যুরিতী ফোর্সশিংগী মথৌ তাবশিং য়েংশিনবা অমদি ফংহনবা হায়বা অসি খ্বাইদগী মরু ওইনা লৌই। অদুবু হায়রিবা অসি মমাংদা থৌশাবীদে অমসুং লৈবাক অসিগী ঙাকশেলগী লান্মীশিং অসিগী অপাম্বসু থৌশারমদে।

ৱান রেঙ্ক ৱান পেন্সন স্কিম ইমপ্লিমেন্ত তৌবা, অনৌবা ফাইৎতর প্লেন লৈশিনবা, এম্ম্যুনিসন, অনৌবা রাইফলশিং, বুলেৎপ্রুফ জেকেৎশিং, ঈংথমগী খুৎশু খুৎলায় লৈশিনবা অসিগুম্বা মমাংগী সরকারনা থৌশাদনা লৈরম্বা ঙাকশেলগী লান্মীশিংগী মথৌ তারিবশিং অদু সরকারনা ফংহন্নবা মহাক্না থৌরাং কয়া শেমখি। মহাক্না হায়খি হান্নগী সরকারশিংনা মসি পাঙথোক্নবা রাজনিতীগী ওইবা অখং কনবা অদু লৈরমদে অমদি ঙসিদি লৈবাক অসিগী হান্না লৈরম্লিবা ফীভম অদু হোংলক্লি।

প্রধান মন্ত্রীনা হায়খি দিফেন্স মেন্যুফেকচরদা এফ.দি.আই. কোমথোকপা অসিগুম্বা অচৌবা অওনবশিং অসিনা পুরক্তুনা লৈবাক অসিমক্তদা অনৌবা খুৎশু খুৎলাইশিং অমসুং এম্ম্যুনিসন শাজনবা হোৎনরি।

প্রধান মন্ত্রীনা হায়খি অওনবশিং অসি অহানবদা চীফ ওফ দিফেন্স স্তাফকী ফম হাপ্নবা অমসুং ঙাকশেলগী লান্মীশিংগী পোৎ লৈশিনবা অমদি পুথোকপদা অফবা মরী অমা থম্নবা মওংদা শেমখি।

মহাক্না মখা তারদুনা হায়খি ভারতকী ওইরক্লিবা মালেমনা ইকাই খুম্নবা হেনগৎলক্লিবা থাক অসি য়ৌহন্নবা ভারতকী ইনফ্রাস্ত্রকচর, শেন্মীৎলোন অমসুং তৌবা ঙম্বশিং অদু চপ মান্নবা খোঙজেলদা চৎহনবা ঙম্নবা হোৎনবা তাই।

প্রধান মন্ত্রীনা হায়খি অতল তনেল অসি লৈবাক অসি আত্মানির্ভর (মরোমদোম লেপচবা ঙম্বা) ওইহন্নবা হোৎনরিবা অসিগী ময়েক লারবা খুদম অমনি।

*****



(Release ID: 1661299) Visitor Counter : 7