ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀ ଅକ୍ଟୋବର 2 ତାରିଖ ଦିନ ସନ୍ଧ୍ୟା 6.30 ମିନିଟରେ ବୈଶ୍ୱିକ  ଭାରତୀୟ ବୈଜ୍ଞାନିକ (ବୈଭବ) ଶିଖର ସମ୍ମିଳନୀକୁ ଭିଡିଓ କନଫରେନ୍ସିଂ ଯୋଗେ ଉଦ୍ଘାଟନ କରିବେ ।

“ବୈଭବ” ସମ୍ମିଳନୀ ଏକ ବୈଶ୍ୱିକ ଭର୍ଚୁଆଲ ସମ୍ମିଳନୀ ଯେଉଁଥିରେ ଦରିଆପାରି ଏବଂ ଆବାସିକ ଭାରତୀୟ ଗବେଷକ ତଥା ଶିକ୍ଷାବିତମାନେ ଅଂଶଗ୍ରହଣ କରିଥାନ୍ତି ଏବଂ ଏହି ସମ୍ମିଳନୀ ଅକ୍ଟୋବର 2 ତାରିଖ ଠାରୁ ଅକ୍ଟୋବର 31, 2020 ପର୍ଯ୍ୟନ୍ତ ଆୟୋଜନ କରାଯାଉଛି । ଏହି ସମ୍ମିଳନୀର ଉଦ୍ଦେଶ୍ୟ ହେଲା ଶିକ୍ଷାନୁଷ୍ଠାନରେ ଏବଂ ଗବେଷଣା ଓ ବିକାଶ ପ୍ରତିଷ୍ଠାନମାନଙ୍କରେ ସାରା ବିଶ୍ୱରେ ସୁନାମ ଅର୍ଜନ କରିଥିବା ଭାରତୀୟ ବଂଶୋଦ୍ଭବ ବିଶିଷ୍ଟ ଗବେଷକ ଓ ବୈଜ୍ଞାନିକମାନଙ୍କୁ ଗୋଟିଏ ପ୍ଲାଟଫର୍ମରେ ଏକତ୍ରିତ କରି ସେମାନଙ୍କ ସହ କିଭଳି ଭାବେ ସହଯୋଗ ଭିତ୍ତିକ ଗବେଷଣା ବ୍ୟବସ୍ଥାକୁ ସୁଦୃଢ଼ କରାଯାଇପାରିବ ଏବଂ ସେଥିରୁ ଶୈକ୍ଷିକ ତଥା ବିଜ୍ଞାନ ଓ ପ୍ରଯୁକ୍ତିଗତ ସୁଫଳ ଭାରତକୁ ମିଳିପାରିବ ଯଦ୍ୱାରା ବୈଶ୍ୱିକ ବିକାଶ ପ୍ରକ୍ରିୟା ମଧ୍ୟ ତ୍ୱରାନ୍ୱିତ ହୋଇପାରିବ, ସେ ଦିଗରେ ମାନସମନ୍ଥନ କରିବା । 

ଏହି ସମ୍ମିଳନୀ ଉଦ୍ଘାଟିତ ହେବା ପରେ ଅନଲାଇନ ମୋଡ଼ରେ ବିଭିନ୍ନ ଶିକ୍ଷାବିତ୍ ଏବଂ ବୈଜ୍ଞାନିକମାନଙ୍କ ମଧ୍ୟରେ ଭିନ୍ନ ଭିନ୍ନ ଅଧିବେଶନରେ ଆଲୋଚନା ଓ ବିଚାରବିମର୍ଶ ଜାରି ରହିବ । ଏହି ପ୍ରୟାସରେ ବିବିଧ ସ୍ତରୀୟ ଭାବ ବିନିମୟ କାର୍ଯ୍ୟକ୍ରମର ବ୍ୟବସ୍ଥା କରାଯାଇଛି ଯେଉଁଥିରେ ଦରିଆପାରି ବିଶେଷଜ୍ଞ ତଥା ସେମାନଙ୍କର ଭାରତୀୟ ପ୍ରତିପକ୍ଷ ଦୀର୍ଘ ପ୍ରାୟ ଏକ ମାସ କାଳ ଧରି ୱେବିନାର, ଭିଡ଼ିଓ କନଫରେନ୍ସ ଇତ୍ୟାଦି ଜରିଆରେ ଆଲୋଚନା କରିବେ । ଏଥିରେ  ବିଶ୍ୱର 55ଟି ରାଷ୍ଟ୍ରର 3000ରୁ ଊର୍ଦ୍ଧ୍ଵ ଭାରତୀୟ ବଂଶୋଦ୍ଭବ ଶିକ୍ଷାବିତ୍ ଓ ବୈଜ୍ଞାନିକ ଏବଂ 10 ହଜାରରୁ ଅଧିକ ଆବାସିକ ଶିକ୍ଷାବିତ୍ ଓ ବୈଜ୍ଞାନିକ ଅଂଶ ଗ୍ରହଣ କରିବେ । ସେହିଭଳି ଭାରତ ସରକାରଙ୍କ ପ୍ରମୁଖ ବୈଜ୍ଞାନିକ ଉପଦେଷ୍ଟାଙ୍କ ନେତୃତ୍ୱରେ ଭାରତର ପ୍ରାୟ 200 ଶୈକ୍ଷିକ ତଥା ବିଜ୍ଞାନ ଓ ଗବେଷଣା ପ୍ରତିଷ୍ଠାନ ଦୀର୍ଘ ଏକ ମାସ (ଅକ୍ଟୋବର) ଧରି ଚାଲିବାକୁ ଥିବା ଏହି କାର୍ଯ୍ୟକ୍ରମରେ ଯୋଗଦାନ କରୁଛନ୍ତି ।

ଏହି ସମ୍ମିଳନୀରେ 40ଟି ଅଧିକ ଦେଶରୁ 1500ରୁ ଅଧିକ ପାନେଲିଷ୍ଟ, 200 ପ୍ରମୁଖ ଭାରତୀୟ ଗବେଷଣା ଓ ବିକାଶ ପ୍ରତିଷ୍ଠାନ ଏବଂ ଶୈକ୍ଷିକ ଅନୁଷ୍ଠାନ ଭର୍ଚୁଆଲ୍ ମୋଡ଼ରେ 18ଟି ଭିନ୍ନ ଭିନ୍ନ କ୍ଷେତ୍ର ତଥା 80ଟି ପ୍ରସଙ୍ଗ ଉପରେ 200ରୁ ଅଧିକ ଅଧିବେଶନରେ ଆଲୋଚନା କରିବେ । ସର୍ଦ୍ଦାର ବଲ୍ଲଭ ଭାଇ ପଟେଲଙ୍କ ଜୟନ୍ତୀ ଅବସରରେ ଅକ୍ଟୋବର 31, 2020 ତାରିଖ ଦିନ ଏହି ସମ୍ମିଳନୀର ଚୂଡ଼ାନ୍ତ ଅଧିବେଶନ ଅନୁଷ୍ଠିତ ହେବ ।

**********