ভারতকী রাস্ত্রপতি শ্রী রাম নাথ কোবিন্দনা গান্ধী জয়ন্তিগা মাংওইননা লৈবাক মীয়ামদা মখাদা পীরিবা ৱারোলশিং অসি পাউজেল ওইনা পীখ্রে।

মহাক্কী ৱারোল অদুদা রাস্ত্রপতিনা হায়খি, “ ঐখোয়গী লৈবাক্কী মপা মহাত্মা গান্ধীগী ১৫১শুবা মপোক কুমওন অসিদা ঐহাক্না হরাওরবা লৈবাক অসিগী মহুত শিন্দুনা মহাক্কী মফমদা ইকায় খুম্নবা উৎলি”।

চহি খুদিংগী ওইনা ওক্তোবর ২দা গান্ধী জিবু ভারত্তা খক্তা নত্তনা মালেম শিনবা থুংনা নীংশিংনরি। মহাক্না মতম পুম্বদা মীওইবা খুন্নাইদা ইথিল পীরি। মহাক্কী পুন্সি ৱারীনা খুন্নাইগী শোত্থরবা মীওইশিংদা পাঙ্গল হাপ্তুনা পুক্নিং থৌগৎপীরে। মহাক্কী অচুম্বা, হিংশা শিজিন্নদবা অমসুং নুংশিবগী পাউজেল অসিনা খুন্নাইদা তংদু লৈতাবা অমসুং মান্নবা থাক পুরক্তুনা মালেমগী য়াইফ য়ূম্বালগী অফবা ওইনবা লম্বী য়াৎপীরি। মহাক্কী ৱাখল্লোনশিং অসি মমাংদা মগুন লৈরম্বগুম ঙসিসু অদুমক মগুন লৈরি অমসুং তুংদসু অদুমক লৈখিগনি।

গান্ধী জিনা হায়বীরম্বগী মতুং ইন্না খ্বাইদগী চাউবা খুদোংচাদবশিংগী ৱারোইশিন অসি অফবা তৌবা অমসুং খাঙবা কনবগী খুত্থাংদা ফংবা য়াই হায়বসি মীয়াম খুদিংনা হৌজকিতি খঙলে। মহাক্কী পুন্সি অসিনা অসিগুম্বা লম্বীদা চৎপগী ফজরবা খুদ্ম অমা ওইরি। মহাক্না ঐখোয়দা তাকপীবদা ঐখোয়গী অফবা খন্দবা মীওইদসু ঐখোয়না নীংথিজনা লোয়নগদবনি অমসুং মীওই খুদিংদা ঐখোয়না নুংশিবা, থৌজাল হৈবা অমসুং ঙাকপীবগী ৱাখলগা লোয়ননা চৎকদবনি হায়না হায়বীরম্মি। ঐখোয়গী ৱাখলদা, ৱাঙাং অমসুং থৌওংশিংদা ইং তপ্পা অমসুং নুংশিবগী মওঙ্গ চেনগদবনি।

গান্ধী জিনা মহাক্কী থৌওং খুদিংদা মীওইবগী লিচৎ, অশেংবা পান্দম লৈবা অমসুং অফবা পাম্বৈশিংদা মরু ওইবা পীদুনা লাকখি। স্বচ্ছ ভারত মিসন, নুপীশিংবু মপাঙ্গল হাপ্পা, লায়রবশিং অমসুং শোত্থরবশিংবু মপাঙ্গল হাপ্পা, লৌউবশিং তেংবাংবা অমসুং খুঙ্গংশিংদা তঙাই ফদবা কান্নবশিং পীবনচিংবা ঐখোয়গী সরকারনা পায়খৎলিবা লৈবাক চাউখৎপগী খোঙথাংশিং অসিগী ময়োলদা গান্ধী জিগী ৱাখল্লোন অমসুং পাউতাকশিং শিজিন্নবা অসিদা ঐহাক্না য়াম্না নুংঙাইবা ফাওই।

মসিগী শেংলবা গান্ধী জয়ন্তিগী থৌরম অসিদা ঐখোয় খুদিংনা লৈবাক্কী য়াইফ য়ূম্বাল অমসুং চাউখৎপা, অচুম্বা অমসুং হিংশা শিজিন্নদবগী লাইশোল ইনবা, লু-নানবা, তৌবা ঙম্বা, অকনবা অমসুং নুংঙাই য়াইফবা ভারত অমা শেম্বা অমসুং গান্ধী জিগী মঙলানশিং অসিবু মঙফাওনহল্লসি হায়না নৌহৌননা অমুক পুক্নিং চঙলসি হায়না রাস্ত্রপতিনা হায়খি।

রাস্ত্রপতিগী ৱারোল অসিবু হিন্দীদা পানবা মফম অসিদা নম্বীয়ু

***