হকশেল অমসুং য়াইফ য়ুম্বালগী কেন্দ্রগী মন্ত্রী দা. হর্শ বর্ধন্না ঙসি আই.সি.এম.আর.গী হেদক্বাতরদা চৎতুনা আই.সি.এম.আর.গী মাই পাকখিবগী ইতিহাস উৎলিবা তাইমলাইন অমগী মাইখুম হাংদোকখি অমসুং আই.সি.এম.আর.গী মোবাইল স্ত্রোক য়ুনিৎ অমসুং আই.সি.এম.আর.না হোস্ত তৌবা কোবিদ বেক্সিন অমসুং ক্লিনিকেল রেজিস্ত্রী পোর্তেল অমা শঙ্গাখি। আই.সি.এম.আর.গী দিরেক্তর জেনরেল, দা বালরাম ভার্গবা, আই.সি.এম.আর.-এন.আই.এন.গী দিরেক্তর দা আর হেমালতা অমসুং মকোক থোংবা ওফিসিএলশিং অমসুং সাইন্তিস্তশিংসু য়াওখি।

আই.সি.এম.আর.গী চহি ১০৮গী খোঙচৎ অদু উৎলিবা ভারতকী অহানবা রিসর্চ কাউন্সিল অসিনা অহানবা ওইনা ১৯১১দা লিংখৎখিবা, ইন্দিয়ন রিসর্চ ফন্দ এসোসিএসন (আই.আর.এফ.এ.) হায়না খঙনরিঙৈ মতমদগী হৌনা ইতিহাসিক ওইরবা খোঙচৎকী তাইমলাইন দা হর্শ বর্ধন্না মাইখুম হাংদোকখি। তাইমলাইন অসিনা আই.সি.এম.আর.না অমদি মখোয়গী ইন্সতিত্যুতশিংনা লায়না লাকশিন্নবা লৌখৎখিবা পোলিসী অমসুং প্রোগ্রাম অমদি চাবোকপী অমসুং অঙাংগী হকশেল, ঐচ.আই.ভি., কেন্সর অমসুং ন্যুত্রিসন লমশিং অসিদা মখোয়না তৌখিবা থবক পুম্নমক অসি উৎলি।

আই.সি.এম.আর.না লিংখৎখিবদগী হৌদুনা চহি ১০৮ শাংবা হিস্ত্রী তাইমলাইন অসি ফোঙবদা মহাক্না নুংঙাইবা ফোঙদোক্লদুনা, দা. হর্শ বর্ধন্না হায়খি, “নাকল অমরোমদা বাইওমেদিকেল রিসর্চকী সাইন্সতিফিক ওইনা খুমাং চাউশিল্লকপগী হেনগৎলক্লিবা দিমান্দশিং অসি ফংহন্নবা আই.সি.এম.আর. মশানা হোৎনখি অমসুং অতোপ্পা অমদনা লৈবাক অসিগী হকশেলগী ওইবা সমস্যাশিংদা ওইথোকপা য়াবা উপাই থিবগী মথৌ তাবা থৌদাংসু লৌখি।” মহাক্না হায়খি, আই.সি.এম.আর.গী মাইপাকপগী ইতিহাস অসি য়াম্না ফজবা মওং অমদা উৎলিবা মীকুপ অসি ইতিস্তা নীংশিংদুনা লৈহৌরনি।

অনৌবা একজিবিৎশিং অসিগী মাইখুম হাংদোক্লদুনা দা. হর্শ বর্ধন্না হায়খি, "লৈবাক অসিগী হকশেলগী ওইবা রিসর্চতা আই.সি.এম.আর.না মাংজিল থারি অমসুং হৌজিক লৈবাক অসিনা অমুক্তা থোকখিদ্রিবা লায়চৎ অসি লাকশিন্নবা হোৎনবদা সাইন্তিফিক্কী ওইবা খ্বাইদগী ফবা পাম্বৈ অমদি ইন্নোবেসনগী খুত্থাংদা মাংজিল থারি। লৈবাক অসিগী য়াইফ থৌরাংদা চাউনা শরুক য়ারি। একজিবিৎশিং অসিগী খুত্থাংদা মেদিকেল সাইন্সকী লমদা আই.সি.এম.আর. অমসুং লৈবাক অসিনা তৌখ্রিবশিং অদু মীয়ামদা খঙহন্দুনা চাউথোকপা পোকহল্লগনি। "

কেন্দ্রগী হকশেল মন্ত্রীনা মোবাইল স্ত্রোক য়ুনিৎ লোঞ্চ তৌখি। মহাক্না হায়খি, “মীয়ামদা থম্মোয়গী ওইবা লায়না অমসুং হাইপরতেন্সন নাগনবা অসি উবদা নুংঙাইতাবা ফাওই। মতম চানা লায়েং চত্থবনা শিবা অমসুং শোইনাইবদগী ঙাকথোক্নি। স্ত্রোক মশিং য়াম্না থোকপা অমদি অসামদা স্ত্রোক ক্যের ফেসিলিতীশিং ৱাৎপা অসি য়েংলগা, থৌরাং অসিনা লমদম অসিদা লৈরিবা মীয়ামগী মথৌ তারিবশিং অদু ফংহবদা মতেং ওইরগনি। তেলি-কন্সল্তেসনগী খুত্থাংদা মোবাইল য়ুনিৎনা মীয়ামদা মতম চানা অমসুং চান্নবা লায়েং ফংহল্লগনি”।কোবিদনা মরম ওইদুনা রিসোর্সকী অৱাৎপা লৈবা মতমঅসিদসু কত্থোকপগা লোয়ননা মীয়ামগী শেবা তৌরিবা হেল্থক্যের পর্সনেলশিংবু থাগৎখি।

মহাক্না বেক্সিন পোর্তেল অমসুং কোবিদ ক্লিনিকেল রেজিস্ত্রীগী পোর্তেল লোঞ্চ তৌখি। বেক্সিন পুথোকপগী লৈরিবা ফীভমগী মতাংদা মরিক চুম্না অমদি অরোৎপা লৈতনা ই-পাউ ফংহনবগী মরু ওইবগী মতাংদা ৱা ঙাংলদুনা মহাক্না হায়, “পোর্তেল অসিনা লমদম অসিদা অমদি মালেমগী ওইনা চাই নাইনা বেক্সিন পুথোকপা, চত্থরিবা ক্লিনিকেল ত্রাইএলশিং অমসুং লম অসিদা খুমাং চাউশিনবগা মরী লৈনবা কান্নরবা অমদি মরু ওইবা ই-পাউ ফংহল্লি। ঙসি, কোবিদকী মতম অসিদা বেক্সিন পুথোকপা অসি কুপ্না য়েংশিল্লি। মরম অসিনা লৈবাক অসিদা বেক্সিন পুথোকপগী ফীভম অদু খঙহনবা হায়বা অসি য়াম্না মরু ওই।”

ভারতনা কোবিদ-১৯গী মায়োক্তা লান্থেংনরিবা অসিগী মতাংদা দা হর্শ বর্ধন্না হায়খি, “ভারতকী নাবা ফগৎলকপগী চাং মখা তানা হেনগৎলকপা অমদি লৈখিদবা কেসকী চাংনা লেপ্তনা হন্থরকোআ অসিনা রাজ্য অমসুং য়ু.তি. পুম্নমক্না লৌখৎলিবা কোবিদ-১৯ লাকশিন্নবা লালোং অসি মাই পাক্লে উৎখ্রে। লেব ১ লৈরম্বদগী ঙসি লেব ১৮০০ লৈদুনা ঐখোয়না তৌবা ঙম্বশিং অদুগী মপাঙ্গল কনখৎহনবা ঙমখ্রে। ঐখোয়না নোংমদা তেস্ত তৌবা অসি লাখ ১৫ য়ৌহন্দুনা তেস্ত তৌবগী চাং অসি মাই পাক্না হেনগৎহনবা ঙমখ্রে। ”

দা হর্শ বর্ধন্না মীয়ামদা কোবিদকা চান্নবা লমচৎ-শাজৎশিং ঙাক্না চৎনবা হায়জখি। মহাক্না মীয়ামদা মী তিনবা মফমদা মাস্ক/ফেস কভরশিং উপ্পা, খুৎশা হমদোকপা অমসুং লোকখুবা অমদি হকথি খনবদা তৌগদবা নিতি নিয়ম অমসুং ফিজিকেল দিস্তেন্সিং থম্বা নত্রগা গজ অনিগী অরাপ্পা থম্বগী সোসিএল বেক্সিন অসি ঙাক্না চৎতুনা লায়না অসি শন্দোকপা থিংনবা মীয়ামদা নৌহৌনা নীংশিংহনখি।

****