রাজ্য সভাগী চেয়রমেন শ্রী এম. বেঙ্কয়া নাইদুনা ঙসি হৌজিক চৎলিবা লায়চৎ অসিগী মনুংদা মীয়াম অমসুং পারলিয়ামেন্তকী মীওইশিংগী তেক্ত কায়দনা লৈবগী হীরমগী মতাংদা ৱাফম ফোঙদোকখ্রে।

চেয়রমেন শ্রী নাইদুনা ঙসি মেম্বরশিংদা হায়খিবদা মহাক্না হকশেল অমসুং য়াইফ য়ুম্বালগী হোম সেক্রেতরী, জোইন্ত সেক্রেতরী অমসুং আই.সি.এম.আর.গী দি.জি. অমসুং রাজ্য সভাগী সেক্রেতরিএৎকা ফমখিবা মীফম অমদা কোবিদ-১৯ লায়চৎ অসিবু থেংননবা খোঙথাংশিং লৌখৎলি অমসুং মসিগী মতুং ইন্না মেম্বরশিংনা ইনগদবা চৎন-কাঙলোনগী মতাংদা খন্নখ্রে হায়না পাউদমখি।

চেয়রমেন শ্রী নাইদুনা হায়খিবদা মীফম অসিদা মরু ওইবা চেকশিনবগী ৱাফম মরি খন্নখি হায়খি। মীফম অসিদা খন্নখিবগী মতুং ইন্না লায়চৎ অসিগী মনুংদা মাস্ক উপ্পা অসিনা ভাইরস অসিদগী ঙাকথোকপগী খ্বাইদগী ফবা পাম্বৈনি হায়খি। “নহাক্না নহাক্কী য়ুমগী মপান্দা নত্ত্রগা মপান্দগী লাক্তুনা নখোয়গী য়ুমদা থবক তৌবা মীওই অমগা থেংনবা মতমদা মাস্ক উপ্পা অসি য়াম্না মরু ওই। মসি তসেংনা য়াম্না মরু ওইবনি”, হায়না মহাক্না মখা তানা হায়খি।

চেয়রমেন্না হায়খিবদা খ্বাইদগী অনিশুবা মরু ওইবা অসিনা অমগা অমগগী মরক্তা তেক্ত কায়রোইদবা অরাপ্পা থম্বনি হায়খি। “খ্বাইদগী অনিশুবা মরু ওইবা অসিনা অমগা অমগগী মরক্তা তেক্ত কায়রোইদবা অরাপ্পা, সুরক্সিৎ দুরী, থম্বনি। লায়চৎ অসিনা লোইদ্রিবা ফাওবদি মসি য়াম্না মরু ওইবনি”।

মহাক্না হায়খিবা খ্বাইদগী মরু ওইবা অহুমশুবা ৱাফম অসিনা ইশাগী হাইজিন ঙাক-শেন্দুনা থম্বা অসিনি হায়খি। মহাক্না হায়খি, “অহুমশুবা হীরম অসিনা হাইজিন ঙাক শেনবনি – খুৎ নীংথিনা হাম্বা, দেত্তোল নত্ত্রগা অতোপ্পা শাপোন শিজিন্নদুনা লোয়ননা মতম মতমগী মতুং ইন্না খুৎ হাম্বা অমসুং অশোকপগী মখল অমত্তদগী লাপথোক্না লৈবা অসিনি”।

মরিশুবদা মরু ওইবা ৱাফম অসিনা ইশাগী ইম্ম্যুন কনখৎহনবনি হায়না চেয়রমেন্না হায়খি। ইম্ম্যুনগী থাক ৱাংখৎহনবগী মতাংদা পাউতাক পীবা ওইনা মহাক্না হায়খিবদা, “অফবা চিঞ্জাক চাবা, হকশেল ফনা লৈবা অমসুং চৎপা নত্ত্রগা য়োগগুম্বা শাজেল তৌবা অসিনা মসি ওইথোকপা ঙমহনগনি”।

অফবা চিঞ্জাক চাবা অসি য়াম্না মরু ওই হায়না চেয়রমেন নাইদুনা হায়খি। হকশেল ফবা চিঞ্জাক্কী মতাংদা ৱা ঙাংলদুনা মহাক্না হায়খি, “ নখোয়গী লৈফমশিংদা ইবোক্না হায়বীবা চিঞ্জাকশিংগী মতাং অমসুং মহৌশাগী ওইনা চাক এন্সাং থোংবদা হায়বশিং অদু নীংশিংউ। মদু কাওরোইদবনি”।

চেয়রমেন্না পারলিয়ামেন্তকী মীওইশিংগী তেক্ত-কায়দবগী মতাংদা খনবগী ৱাফম ফোঙদোকপা ওইনা মখোয়শিংদা ফুৎ তরুক্কী অরাপ্পা থমদুনা সেফ দিস্তেন্স লৈবগী মতাংদা হায়খি। শ্রী নাইদুনা মেম্বরশিংনা ওফিসার নত্ত্রগা চেয়রদা করিগুম্বা অমা হকথেংননা লাক্তুনা হায়বগী মহুত্তা চেদা ওইনা ইদুনা পীরক্নবসু হায়খি।

পারলিয়ামেন্ততা পায়খৎলিবা খোঙথাংশিং অমসুং লৈরিবা ফেসিলিতীশিং অসিগী মতাংদা পল্লদুনা চেয়রমেন্না হায়খি, “ হৌজিক চত্থরিবা সেসন অসিগী নুমিৎ খুদিংগী পারলিয়ামেন্ত হাউসকী রিসেপ্সন ওফিস্তা অয়ুক্কী পুং ৮দগী অমসুং নুংথিলগী পুং ২.৩০গী মনুংদা অমসুং পারলিয়ামেন্ত হাউস এনেক্সকী লৈমাইগী ওদিতোরিয়মদনা অয়ুক্কী পুং ১০.৩০দগী নুংথিলগী পুং ৫ ফাওবা রেপিদ এন্তিজেন অমসুং আর.তি.-পি.আই.আর.গী খুদোংচাবা অনিমক লৈবা কোবিদ-১৯ তেস্ত তৌবগী ফেসিলিতী লৈরে। মেম্বরশিংনা মখোয়গী নুংঙাইবা অমসুং তঙাই ফদবগী মতুং ইন্না মফম অসিদা লাক্তুনা তেস্ত তৌথোকপীয়ু। মখা তাবা ওইনা, মেম্বরশিংগী ওক্সিজেন সেচ্যুরেসনগী থাক য়েংনবা পারলিয়ামেন্ত হাউসকী ফর্স্ত এদ পোস্ত অমসুং পারলিয়ামেন্ত হাউস এনেক্সকী মেদিকেল সেন্তরদা ওক্সিমিতরসু লৈরে”।

আই.সি.এম.আর., হকশেল মন্ত্রালয় অমসুং গৃহ মন্ত্রালয়না মখোয়গী তেক্ত কায়দনবা শিল্লিবা কাঙলোনশিং অসি মেম্বরশিংনা ইন্দুনা চৎপদা তেংবাংনবা মহাক্না মখা তানা হায়খি।

মতম য়াম্না লৈতবা অসি য়েংলদুনা মহাক্না মেম্বরশিংনা মখোয়গী মতমশিংবু নীংথিনা শিজিন্নদুনা পারলিয়ামেন্তকী থৌওংশিং অসিবু নীংথিনা অমসুং মমুৎ তানা পাঙথোকপদা তেংবাংনবসু মহাক্না হায়খি।

***********