তসেংবা মমলদা তঙাই ফদবা মেদিকেলগী খুৎলাইশিং ফংহন্নবা হায়দুনা কেমিকেলস অমসুং ফর্তিলাইজর মন্ত্রালয়গী ফার্মাস্যুতিকেলস বিভাগকী মখাদা লৈবা হিদাক্কী মমল লেপ্পগী থৌওং পায়খৎলিবা নেস্নেল ফার্মাস্যুতিকেলস প্রাইসিং ওথোরিতী (এন.পি.পি.এ.)না খু ইমপ্লান্ত তৌবগী সিলিং প্রাইস অসি চহি অমগা হেন্না সেপ্তেম্বর ১৪, ২০২১ ফাওবা শাংদোকখ্রে।

হীরম অসিগী মতাংদা দ্রগ প্রাইস কন্ত্রোল ওর্দর (দি.সি.পি.ও.), ২০১৩ (এনেক্স-২)গী মখাদা এন.পি.পি.এ.না সেপ্তেম্বর ১৫, ২০২০দা ৱারোল অমা থোকখ্রে।

এন.পি.পি.এ.গী ওগস্ত ১৬, ২০১৭কী ওর্দর মশিং এস.ও. ২৬৬৮(ই.)গী মতুং ইন্না ওর্থোপেদিক নি ইমপ্লান্তকী হেনবা য়াদবা মমল অসি চহি অমগী ওইনা লেপখিবনি। মসিবু চহি অমগা অমুক ওগস্ত ১৩, ২০১৮ ফাওবা অমসুং মখা তাবা ওইনা ওগস্ত ১৫, ২০১৯ ফাওবা শাংদোক্তুনা লাকখিবনি। মথক্তা পীরিবা অসিগী মতুং ইন্না মতম অসি ওগস্ত ১৫, ২০২০দা লোইখ্রবনি অমসুং নি ইমপ্লান্ত রীপ্লেস্মেন্ত সীস্তেমগী হেনবা য়াদবা মমল য়েংশিনবা অসি ওগস্ত ১৫, ২০২০ ফাওবগী মনুংদা পাঙথোক্কদবনি।

এন.পি.পি.এ.না জুলাই ২০২০দা প্রাইমরী অমসুং রিবিজন নি সীস্তেম মপান্দগী পুশিল্লক্লিবা মীওইশিংদা জুলাই ২০১৮ অমসুং জুন ২০২০গী মনুংদা পোত্থোকশিং অসি য়োনবগী অকুপ্পা মরোলশিং অসি পীরক্নবা হায়দুনা কম্পেনীশিংদা হায়খিবা লৈখ্রবনি। ওগস্ত ৬, ২০২০দা পাঙথোকখিবা মীফমদা এন.পি.পি.এ.না কম্পেনী ১৪দগী খোমজিল্লবা দেতাশিং (মীরমদগী পোত্থোক পুশিল্লকপা ১০ অমসুং লৈবাকসিদা পোত্থোক শাজবা ৪) অসি নীংথিনা য়েংশিল্লবা মতুংদা ওগস্ত ১৫, ২০২০ ফাওবা চৎনরম্বা নি ত্রান্সপ্লান্ত তৌবগী মমল অসি সেপ্তেম্বর ১৫, ২০২০ ফাওবা চৎনগনি হায়খিবনি।

সেপ্তেম্বর ১৪, ২০২০দা পাঙথোকপা মীফম অনদা হীরম অসিগী মতাংদা অমুক্কা হন্না খন্নখি। মীফম অসিদা খঙখিবদা ২০১৭তা ওর্থোপেদিক নি ত্রান্সপ্লান্ত তৌবগী মমল অসিদা ৬৯%গী চাংদা তাথবা লৈখি অমসুং চহি অনিগী মনুংদা সরকারনা “আত্মানির্ভর ভারত”কী খোল্লাও লাউরিবা অসিগা লোয়ননা হীরম অসিগী ওইনা লৈবাক অসিদা পোত্থোক পুথোকপগী মার্কেতকী শ্যার অসিনা ১১% হেনবগী চাংদা হেনগৎখি।

হীরমশিং অসি য়েংদুনা মীয়ামগী অপাম্বগীদমক্তা মমল য়েংশিনবগী থবক অসি মখা তানা চত্থবগী তঙাই ফদবশিং খঙখি। মসিগী মতুং ইন্না মরী লৈনবা মীওইশিংনা হৌজিক লৈরিবা মমল অসিবু চহি অমগা হেন্না (সেপ্তেম্বর ১৪, ২০২১) শাংদোকপগী ৱারেপ লৌখি অমসুং সেপ্তেম্বর ১৫, ২০২০দা ৱারোল অমা থোকখি। মসিগী থৌওং অসিনা লৈবাক অসিগী অচম্বা মীওইশিংগী লুপা করোর ১৫০০মুক তুংশিলহনবা ঙম্লগনি।

*********