কেন্দ্রগী এজুকেসন মন্ত্রী শ্রী রমেশ পোখ্রিয়াল ‘নিশাঙ্ক’না ঙসি নই-দিল্লীদা পাঙথোকপা ওনলাইনগী থৌরম অমদা সি.বি.এস.ই.দা এফিলিএৎ তৌবা স্কুলশিংগী ওজা অমসুং প্রিন্সিপাল ৩৮দা ইকায় খুম্নবা উৎপগা লোয়ননা “সি.বি.এস.ই. ওজাশিংগী মনা” পীখ্রে। থৌরম অসিদা এজুকেসনগী রাজ্য মন্ত্রী শ্রী শঞ্জয় ধোত্রেসু শরুক য়াখি। স্কুল এজুকেসন অমসুং লিতরেসী বিভাগকী সেক্রেতরী শ্রীমতি অনিতা করৱাল অমসুং সি.বি.এস.ই.গী চেয়রমেন শ্রী মনোজ অহুজাসু থৌরম অদুদা শরুক য়াখি। এজুকেসন মন্ত্রালয়, এন.ভি.এস., কে.ভি.এস.,সি.বি.এস.ই., প্রিন্সিপালশিং, ওজাশিং, মহৈরোইশিং, মমা-মপাশিং অমসুং মফম খুদিংদগী ইমুং মনুংগী মীওইশিংনা ওনলাইন্দা পাঙথোকপা থৌরম অসিবু য়েংনখি। মসিগী মনাশিং অসি ২০১৯-২০গী ওইনা স্কুলগী এজুকেসন হেন্না ফগৎহনবা, অনৌবা থৌওং পাঙথোকপা অমসুং থৱাই য়াওনা হোৎনদুনা এজুকেসনগী হীরমদা অচৌবা থৌদাং য়াখিবা ওজাশিং অমসুং প্রিন্সিপালশিংবু ইকায় খুম্নবা ওইনা পীবনি।

থৌরম অসিদা ৱা ঙাংবদা শ্রী পোখ্রিয়ালনা ওজাশিং অসিনা এজুকেসনগী তঙাই ফদবা লম্বী য়াৎলিবনি হায়খি। মহাক্না হায়খিবদা মহৈ তম্বীবা অসি খ্বাইদগী ইকায় খুম্ননিংঙাই ওইবা শিনফমনি অমসুং মসিগী মনা পীবগী মরু ওইবা ৱাহন্থোক্তি লৈবাক অসিগী খ্বাইদগী অফবা ওজাশিংনা তোপ তোপ্পা মওংদা হীরম অসিদা তেংবাংখিবা অদুগী হরাওবা ফোঙদোক্তুনা মখোয়বু ইকায় খুম্নবনি। মখোয়না মখোয়গী খোঙফম চেৎপা থৌওংশিং অদুনা স্কুলদা মহৈ তম্বীবগী মগুন হেনগৎহনবতা নত্তনা মখোয়গী মহৈরোইশিংগী পুন্সিবুসু মগুন লৈহনখ্রিবনি।

অনৌবা এজুকেসন পোলিসী ২০২০দা স্কুলদা মহৈ তম্বীবগী পথাপ্তা ওজাশিং অসিবু খ্বাইদগী ময়ায়দা থম্লি হায়না মন্ত্রীনা নৌহৌননা মীয়ামগী পুক্নিং চীংশিনখি। পোলিসী অসিগী মতুং ইন্না স্কুল খুদিংমক্তা মতিক চাবা ওজাশিংগী মশিং লৈহনগদবনি অমসুং স্কুলগী মনুংদা থবক পাঙথোকপগী থৌওং ফগৎহনবদা চানগদবা অকোয়বগী ফিভমসু শেম শাদুনা লৈহনগদবনি হায়রিবনি। মন্ত্রীনা মনা ফংলবা ওজাশিংবু এজুকেসনগী মরী লৈননা মখোয়না নীংথিনা থবক পাঙথোকপা, মথৌদা পুকচেল শেংবা অমসুং তোঙান্না তাবা থৌওং কয়া পাঙথোকপগীদমক্তা থাগৎপা ফোঙদোকখি।

শ্রী সঞ্জয় ধোত্রেনা মনা ফংলবা ওজাশিংবু থাগৎখি অমসুং মখোয়না তাকপী তম্বীবগী মরু ওইবা থৌদাং লৌদুনা মথৌ নীংথিনা পাঙথোকপগীদমক্তা ইকায় খুম্নবা উৎখি। মহাক্না হায়খিবদা মহৈরোই খুদিংমক অসি তোঙানবা অমসুং তোপ তোপ্পা ওইবনা মখোয় অমমমগী তঙাই ফদবা অমসুং মওং মতৌগী মতুং ইন্না মখোয়বু থৌনা ফবা, মশানা মশাদা থাজবা অফবা লিচৎ চেনবা মীওইবা অমা ওইহন্দুনা মশাগী অফবা পুন্সি অমা শেম্বা ঙমহন্নবা মওংদা লাইরিক তাকপীবগী থবক পাঙথোক্কদবনি হায়খি।

মনা খুদিংদা মেরিৎ সর্তিফিকেৎ অমা, শাল অমা অমসুং লুপা ৫০,০০০গী শেলগী মনা য়াওরি। ইং ২০১৮দগী হৌরগা সি.বি.এস.ই.না ওনলাইনগী খুত্থাংদা মতিক চাবা মীওই খনবগী থৌওং চত্থদুনা লাক্লি। লৈরিবা কাংলুপ খুদিংগী ওইনা ময়ামগী ওইবা অমসুং অকক্নবা চংদ্রবা য়াদ্রবা হীরমশিং অমসুং স্কুলদা মহৈ তম্বীবা অমসুং মসিদা মখোয়না লৌখিবা থৌদাংশিংদা য়ুম্ফম ওইদুনা এপ্লিকেন্তশিং অসি য়েংশিনবগী থৌওং পাঙথোকই। মনা ফংলবা ৩৮ অদুদি প্রাইমরী অমসুং ময়ায় থাক্কী ওজাশিং, লোলগী ওজাশিং, সাইন্স, সোসিএল সাইন্স, ফিজিকেল এজুকেসন, অঙ্ক, ইকোনোমিক্স, আই.তি., ফাইন আর্তকী ওজাশিং, স্কুলগী কাউন্সেল্লরশিং, ভাইস-প্রিন্সিপালশিং অমসুং প্রিন্সিপালশিংনি।

মনা ফংলবা মীওইশিংগী ৱারোল খঙনবা মসিদা ক্লিক তৌবীয়ু

*****