কেন্দ্রগী হকশেল অমসুং য়াইফ য়ুম্বাল মন্ত্রী দাঃ হর্শ বর্ধন্না ঙসি হকশেল অমসুং য়াইফ য়ুম্বালগী রাজ্য মন্ত্রী শ্রী অশ্বিনি কুমার চৌবেগা লোয়ননা দবল্যু.ঐচ.ও. সাউথ ইস্ত এসিয়া রিজনগী ৭৩শুবা সেসন্দা ভিদিও কনফরেনশিংগী খুত্থাংদা শরুক য়াখ্রে। দবল্যু.ঐচ.ও. এস.ই.এ.আর.ও.গী দাইরেক্তর দাঃ পুনম খেত্রপালসু থৌরম অদুদা শরুক য়াখি।

নুমিৎ নিনি চত্থবা থৌরম অসি কোবিদ-১৯গী লায়চৎনা মরম ওইদুনা বর্চুএলগী খুত্থাংদা মপুং ওইনা পাঙথোকপা অসি হন্দক্কী অসিনা অহানবনি। ৭৩শুবা সেসন অসি থাইলেন্দগী বেঙ্কোক্তা য়ুম্বু ওইদুনা পাঙথোকপনি অমসুং মমাংগী থৌরম অদুনা নই-দিল্লীদা পাঙথোকখি। মীফম অদুদা দাঃ হর্শ বর্ধন্না অহানবা ওইনা ৭২শুবা সেসনগী লুচিংবা অমা ওইনা ৱা ঙাংলবা মতুংদা থাইলেন্দগী দেপ্যুতী প্রধান মন্ত্রী অমসুং হকশেলগী মন্ত্রী শ্রী অনুতিন চরনিভিরাকুলদা অনৌবা লুচিংবগী ফম শিন্নরবা তুংদা ভারতকী মীহুৎ শিন্দুনা তিল্লিবা মীয়ামদা মখা তানা ৱা ঙাংখি।

ফম থাদোক্লবা লুচিংবা অমা ওইনা তিল্লিবা মীয়ামদা ৱা ঙাংলদুনা মহাক্না কোবিদ-১৯না মরম ওইদুনা মফমশিং অসিদা পুন্সি কয়া মাঙখিবা অদুগী নুংঙাইতবা ফোঙদোকখি। মহাক্না মফম অসিগী থৌনা ফরবা ফ্রন্তলাইনগী থৌমীশিংদা পুকচেল শেংনা থাগৎপা ফোঙদোক্লদুনা অসুম্না হায়খি, “মখোয় মশাগী তেক্ত কায়দবা য়েংদনা মখোয়না পাঙথোক্লিবা থবক থৌরমশিং অসিনা মীওই কয়াগী পুন্সি কনবদা তেংবাংবতা নত্তনা লুরবা তাঞ্জা অসিদা খোঙফম চেৎনা মীয়ামগী মতেং পাংনিংবগী ইথিলসু উৎলি”।

দাঃ হর্শ বর্ধন্না অসিগুম্বা রিজনেল কম্মিত্তীগী প্লেৎফোর্মশিং লৈবগী মরু ওইবা হীরম কয়াদা মিৎয়েং চঙলদুনা অসুম্না হায়খি, “থৌওংশিং অসিনা ঐখোয় পুন্না থবক তৌমিন্নবগী থৌওংশিং অসিনা চাউখৎপা মহৈ পুরকপা ঙম্বতা নত্তনা মসিনা ঐখোয়গী মফমশিংদা অমসুং মালেমদা থেংনরিবা হকশেলগী খুদোংচাদবশিং অসিগী মরমদা খন্নদুনা তুং লমচৎকী হীরম কয়া অমগী মতাংদসু থবক পায়খৎপদা তেংবাংলি”। মেম্বর ওইবা লৈবাক ১১ লৈবা খা-নোংপোক এসিয়াগী মফমশিং অসিনা মালেমগী অপুনবা মীশিংগী শরুক মরি থোকপগী অমগী মীহুৎ শিদুনা মেম্বর লৈবাকশিং অসিগী হকশেলগী পথাপশিং মপাঙ্গল কনখৎহনবা অসিনা বিলিয়ন অহুম অমসুং তুং কোইনা চাউখৎপগী পান্দম থম্লিবা অসিসু ফংদুনা মালেমগী হকশেলগী ফিভম ফগৎহনবদসু তেংবাংগনি।

“ঐখোয়গী ‘পুম্নমক হকশেল ফনা লৈবা’ হীরম অসিগী মান্নবা পান্দম অমা লৈরিবা অসিনা ঐখোয়না মাইল লিশিং কয়া লাপ্ননা লৈজরবসু অমত্তা ওইনা পুন্সিনবদা তেংবাংলি অমসুং মসিগী পান্দম অসিনা ঐখোয়গী মফমশিং অসিবু শাফনা লৈহনবদা তেংবাংগনি” হায়রদুনা লাক্কদৌরিবা মতমশিং অসিদা হকচাং ফনা অমুক্কা হন্না হকথেংননা উননিংবগী অপাম্বা ফোঙদোকখি।

মীফম অদুদা ভারতকী মহুৎ শিল্লদুনা দাঃ হর্শ বর্ধন্না প্রধান মন্ত্রী শ্রী নরেন্দ্র মোদীগী লুচিং মখাদা লৈবাক অসিনা লায়চৎ অসিদগী মীয়ামগী পুন্সি কন্নবা অমসুং পুন্সি মহিং ঙাক শেন্নবা হায়দুনা পায়খৎফম থোকপা থবক অমত্তা চিত্থদনা পাঙথোক্তুনা ভাইরস অসিনা শোকহল্লিবা কয়া অসিবু হন্থহন্নবা অচৌবা খোঙথাং পায়খৎলিবা অসিগী মতাংদসু মীয়ামগী পুক্নিং চিংশিনখি।

হকশেলগী পান্দম ফংনবা ভারতনা খোঙফম চেৎলিবা অসিগী মতাংদা ৱা ঙাংলদুনা মহাক্না ভারতকী মীয়াম খুদিংনা শেল য়াম্না চঙদনা হেল্থকেয়র ফঙহন্নবা পান্দম থম্লিবা নেস্নেল হেল্থ পোলিসী ২০১৭ অমসুং য়ুনিবর্সেল হেল্থ কবরেজ ফংহন্নবা মাইকৈদা মশক থোকপা থবক পায়খৎপা ঙমখিবা ইং ২০১৮দা হৌদোকখিবা অয়ুশমান ভারতকী মতাংদা শুগাইনা তাকখি অমসুং হায়রিবা খোঙথাং মসিনা মালেমগী ওইনা সরকারনা শেল পুথোকপা খ্বাইদগী চাউবা লেম্না হেল্থকেয়র এসস্যুরেন্স পীবা প্রোগ্রাম অমনি হায়খি। মহাক্না মখা তানা হায়খিবদা জন ঔশধি কেন্দ্র হৌবা ভারতকী অহোংবা হিদাক-লাংথক য়োনবগী দুকান অসিনা তঙাই ফদবা মীওইশিংদা অহোংবা মমলদা মগুন লৈবা হিদাক-লাংথক ফংহন্দুনা মশক থোকপা মাই পাকপা ফংবগী থৌওংগী মতাংদা মীয়ামদা পাউদমখি।

কেন্দ্রগী হকশেল মন্ত্রীনা মেম্বর লৈবাকশিংদা পোলিওমাইলিতিস, মেতর্নেল অমসুং নিওনেতেল তিতানস অমসুং য়াউস মুথৎপা অমসুং মমা ওইবী অমসুং নৌনা পোকপা অঙাংশিং শিবগী চাং হন্থহনবা ঙম্বগী থৌওংদা মশক থোক্না মাই পাকপগী মতাংদসু পাউদমখি। মহাক্না মালেমগী পান্দমদগী চহি ৫ ঙনখৎনা ভারতনা ইং ২০২৫ ফাওবগী মনুংদা ত্যুবরকুলোসিস মুথৎনবা পান্দম থম্লিবা অচৌবা থাজবা থমদুনা পাঙথোক্লিবা থবকশিং অমসুং লিম্ফেতিক ফিলারিএসিস অমসুং কালা-অজারগুম্বা মীয়াম্না লুনা খঞ্জিন্দবা ত্রোপিকেলগী লায়নাশিং মুথৎনবা খোঙফম চেৎনা লেপ্লিবা অসিগী মতাংদসু ৱাফম কয়া ফোঙদোকখি।

তসেং তসেংনা কান্নবা ফংহন্নবা ৱারোইশিন, রিসোর্স অমসুং থবক ওইনা পাঙথোকপগী থৌওং কয়াগী তঙাই ফদবা লৈবা হকশেলগী ওইবা লৈঙাক্কী মশক য়াম্বা অমসুং কাংলুপ য়াম্বা থৌওংশিং অসিগী মতাংদা ৱা ঙাংলদুনা মহাক্না হায়খি, “স্বচ্ছ ভারত অভিয়ান, ইং ২০২২ ফাওবগী মনুংদা মীপুম খুদিংগী য়ুম শাবা, স্কিল দিবেলপমেন্ত, স্মার্ত সিতী, ইৎ রাইত, ফিৎ ইন্দিয়া অমসুং মলতি-সেক্তরেল ওইবা খোঙথাং কয়া অমা পাঙথোকখ্রে অমসুং মখোয়শিং অসিনা ঐখোয়গী মীয়ামগী পুন্সি মহিংগী থাক ৱাংখৎহন্দুনা মীওই পুম্বগী হকশেলগী ফিভমদা ফগৎপগী কান্নবা কয়া অমা পীরি”।

প্রধান মন্ত্রীগী “হকশেলগী মতাংদা শেল থাদবা অসিনা লৈবাক অমনা মখোয়গী মীয়ামগীদমক্তা পাঙথোকপা খ্বাইদগী চাউবা অমসুং মরু ওইবা শেল থাদবগী থৌওংনি” হায়বা মঙলান অসিগী মতাংদা অকুপ্পা ৱারোল পীরদুনা মহাক্না দিজিতেল হেল্থ ইকোসীস্তেম অমা শেমদুনা ভারতকী মীয়াম খুদিংগী তোপ তোপ্পা হেল্থ আই.দি.শিং, দিজিতেলগী খুত্থাংদা হেল্থ রেকোর্দ অমসুং দাক্তরশিং অমসুং হকশেলগী ফেসিলিতীশিংগী অকুপ্পা ৱারোলশিং থমদুনা লৈবাক শিনবা থুংনা অয়েৎপা লৈতবা হকশেলগী সেবাশিং ফংহন্নবা পায়খৎলিবা নেস্নেল দিজিতেল হেল্থ মিসনগী মতাংদসু মীয়ামদা পাউদমখি। দাঃ সর্শ বর্ধন্না মহাক্কী ৱা ঙাংবা লোইশিনবা ওইনা মীপুম খুদিংমক্না হকশেলদা শেল থাদবগী ৱারেপ লৌমিন্নসি হায়রদুনা অসুম্না হায়খি, “ঙসি মফম অসিদা পুল্লিবা ঐখোয় খুদিংমক্না অতোপ্পশিংদা ইথিল পীদুনা হেল্থকেয়রদা অহেনবা শেল থাদহনবা ঙম্বগী থাক্তা লৈ”।

****