ক্লিন এয়র ফোর ব্লু স্কাইসকী অহানবা মালেমগী নুমিৎকী ৱেবিনারদা ৱা ঙাংলদুনা কেন্দ্রগী ইনভাইরোন্মেন্ত মন্ত্রী প্রকাশ জাবরেকরনা হায়খি মদুদি সরকার অসিনা খ্বাইদগী নুংশিৎ মোৎলবা শহর ১২২দা এয়র পোলুসনগী থাক হন্থনবা হোৎননবা লেপ্লি হায়না ফোংদোকখি। এয়র পোলুসনগী খুদোংচাদবশিংগী মতাংদা পল্লদুনা কেন্দ্রগী ইনভাইরোন্মেন্ত মন্ত্রীনা হায়খি মদুদি ২০১৪দা, সরকার অসিনা এয়র ক্বালিতী ইন্দেক্স (এ.ক্যু.আই.) মোনিতরিং হৌদোকখি, অমসুং ঙসিদি ঐখোয়না পেরামিতর নিপালদা মোৎশিনবগী চাং য়েংশিল্লি। মন্ত্রী অসিনা প্রধান মন্ত্রী শ্রী নরেন্দ্র মোদীবু মহাক্কী নীং তম্বা নুমিৎ পালনগী ৱারোলদা নুংশিৎ মোৎশিনবগী সমস্যা পুখৎপীখিবগীদমক অমসুং শহর ১০০দা অপুনবা ওইনা ফগৎনবা হোৎনবগী পান্দম থমখিবগীদমক থাগৎপা ফোংদোকখি। প্রধান মন্ত্রী মশামক্না অহোংবা অসি পুরক্নবা হোৎনরি হায়না ইনভাইরোন্মেন্ত মন্ত্রীনা ফোংদোকখি। শ্রী জাবরেকরনা রাজ্যগী মন্ত্রী শ্রী বাবুল সুপ্রিয়ো অমসুং সেক্রেতরী, ইনভাইরোন্মেন্ত মন্ত্রালয়, শ্রী আর.পি. গুপ্তানা নেসনেল ক্লিন এয়র প্রোগ্রাম (এন.সি.এ.পি.)গী মখাদা ইন্তিগ্রেতেদ মিজর তু কোম্বেত এয়র পোলুসনগী মতাংদা ব্রোক্যুর অমা ফোংখি। মন্ত্রীনা হায়খি মদুদি লৈবাক অসিনা বি.এস.-৪গী থাক্তা হোংখ্রবনা মগুন লৈবা পেত্রোল অমসুং দিজল পীরে, হায়রিবসি পোলুসন লান্থেংননবগী মরুওইবা খোংথাং অমনি। মহাক্না হায়খি, হৌখিবা চহি খরসিদা, লম্বী অমসুং হাইৱেশিং সরকারনা খোংজেল য়াঙনা শেমগৎলক্লি অমসুং মসিনা মরম ওইদুনা মমাং মতমগা চাংদম্নবদা পোলুসনগী চাং হন্থরক্লি। শহর অমগা অমগা পোলুসন থোকহনবগী মরম মান্নদবনা রাজ্যশিংনা শহরগী ওইবা অখন্নবা খোংথাংশিং লৌখৎকদবনি হায়রদুনা ইনভাইরোন্মেন্ত মন্ত্রীনা ইলেক্ত্রিক্কী গারী শীজিন্নববু পুক্নিং থৌগৎকদবনি হায়খি। মহাক্না হায়খিবদা, ব্রিক কিল্ননা তোঙান-তোঙানবা রাজ্যশিংদা মখোয়দগী থোক্লকপা পোলুসন হন্থনবগীদমক থেকোই নাকোই তৌবা তেক্নোলোজী পুথোক্কদবনি হায়খি। কেন্দ্রগী মন্ত্রীনা নুংশিৎ মোৎহন্দনবা হোৎনবদা মীয়াম হুপ্না শরুক য়াবা চঙই হায়খি। কার পুলিং অমসুং পব্লিক ত্রান্সপোর্ত শীজিন্নবগী চাং ৱাংহন্নবা হোৎনগদবনি। হৌখিবা চহিগী জনুৱারীদা, ইনভাইরোন্মেন্ত মন্ত্রালয়না অপুনবা ওইনা নুংশিৎ মওৎশিনবগী সমস্যাবু পি.এম. ১০ অমসুং পি.এম. ২.৫ কন্সেন্ত্রেসন্দা ২০২৪ ফাওবদা ২০১৭বুনা অহানবগী চহি ওইনা পান্দম থমদুনা চাদা ২-দগী ৩০ ফাওবা হন্থনবগী পান্দমদা নেসনেল ক্লিন এয়র প্রোগ্রাম (এন.সি.এ.পি.) হৌদোকখি। মমাংদা থৌরাং অসিনা রাজ্য অমসুং য়ূ.তি. ২৩দা নন-এতেন্মেন্ত শহর ১০২ খন্দোকখি। অহেনবা নন-এতেন্মেন্ত শহর ২০ অমসু এন.সি.এ.পি.দা খ্বাইদগী নৌবা নুংশিৎকী মগুনগী দেতাগী মতুং ইন্না হাপচিনখ্রে। অহানবা ক্লিন এয়র ফোর ব্লু স্কাইগী মালেমগী নুমিত্তা ইনভাইরোন্মেন্ত, ফোরেস্ত অমসুং ক্লাইমেৎ চেঞ্জ মন্ত্রালয়না শীনখিবা ৱেবিনার অদুদা রাজ্য ২৮ অমসুং য়ু.তি. ৮গী অর্বান দিবেলপমেন্ত দিপার্ত্মেন্ত অমসুং ইনভাইরোন্মেন্ত দিপার্ত্মেন্তকী প্রিন্সিপাল সেক্রেতরীশিংনা শরুক য়াখি। এন.সি.এ.পি. প্রোগ্রামগী মখাদা খন্দোক্লবা শহ্র ১২২গী কম্মিসনরশিংসু মখোয়না থেংনরকপশিং অমসুং খ্বাইদগী ফবা থৌওংশিং ফোংদোক্লদুনা শরুক য়াখি। য়ুনাইতেদ নেসন্সকী জেনরেল এসেমব্লীনা দিসেম্বর ১৯, ২০১৯দা ক্লিন এয়র ফোর ব্লু স্কাইগী মালেমগী নুমিৎ পালন ২০২০দগী হৌদুনা সেপ্তেম্বর ৭তা চহি খুদিংগী পাংথোক্নবা ৱারেপ লৌখি।

*****