কোবিদগী অথিংবা মরক্তা প্রধান মন্ত্রী জনঔসাধি পরিয়োজনা-পি.এম.বি.জে.পি থবক ওইনা পাংথোক্লিবা এজেন্সি বিউরো ওফ ফার্মা পি.এস.য়ু ওফ ইন্দিয়া(বি পি পি আই)না ২০২০-২১গী অহানবা ক্বাতরদা লুপা করোর ১৪৬.৫৯গী হিদাক য়োনখি অমসুং মসি ২০১৯-২০গী অহানবা ক্বাতরদা লুপা করোর ৭৫.৪৮ য়োনখিবা অদুগা চাংদম্নরবনি। ২০২০গী জুলাইদা বি.পি.পি.আইনা লুপা করোর ৪৮.৬৬ য়োনখি। ২০২০গী জুলাই ৩১ফাওবা পুন্না লুপা করোর ১৯১.৯০ য়োনখি।

জনঔসাধি কেন্দ্রশিং লোকদাউন মনুংদা থবক তৌখি অমসুং মীয়ামদা তঙাইফদবা হিদাক-লাংথকশিং ফংহনখি। মখোয়না মাক্স লাখ ১৫, হায়দ্রোজিক্লোরিকুইন তেব্লেদ লাখ ৮০ অমসুং পেরাসেতামোল তেব্লেদ লাখ ৮০ রোম য়োন্দুনা মীয়ামগী লুপা করোর ১২৬০ রোম কনখি।

হায়রিবা কেন্দ্রশিং অসিদা হৌজিক হিদাক ১২৫০ অমসুং সর্জিকেলগী খুৎলায় ২০৪ ফংলি। ২০২৪গী মার্চ ৩১ফাওবগী মনুংদা হিদাক ২০০০ অমসুং সর্জিকেলগী খুৎলায় ৩০০দা হেনগৎহন্নবা পান্দম থম্লি। মসিদা তঙাইফদবা হিদাকশিং হায়বদি এন্তি দাইবেতিক্স, কার্দিওভাস্কুলার হিদাকশিং, এন্তি-কেন্সর, এনালজেসিক্স, এন্তিপাইরেতিক, এন্তি এল্লরজিক, গেস্ত্রো ইন্তেসতিনেল এজেন্তশিং, ভিতামিনশিং, মিনরেলশিং , অচা-অথকশিং, ত্রোপিকেল মেদিসিনশিং য়াওরি।

কৈথেলদা ফংলিবা হিদাকশিংগী মমলদগী জনঔসাধি হিদাকশিং চাদা ৫০ মমল তাই অমসুং করিগুম্বা মতমদা চাদা ৮০দগী চাদা ৯০ ফাওবা মমল হোংবা য়াওই। হায়রিবা হিদাকশিং অসি দব্লিউ.ঐ.ও-জি.এম.পিনা অয়াবা পীরবা হিদাক শুংবা কম্পেনিশিংদগী ওপন তেন্দরদা য়ুম্ফম ওইরগা লৈবনি। হায়রিবা হিদাকশিং অদু লৈবাক্কী ওইনা মশক খঙলবা লেবশিংদা তাঙ্কক অনি থোক্নবা চাংয়েং তৌরবনি।

দুকান মশিংগী ওইনা পাবদা , মালেমদা খ্বাইদগী চাউবা হিদাক-লাংথোক চোইনা য়োনবা দুকানশিং ওইদুনা লাইরিক হৈরবা থবক ফংদ্রিবা নহারোল কয়াদা মশানা মশাবু থবক পীজরি অমসুং চাং নাইনা শেল ফংলি অমসুং মসি তশেংনা “সেবা বি, রোজগার বি”গী পান্দম অদু পাংথোকপনি। ওফিসিএল ওইবা দেতাগী মতুংইন্না, স্কিম অসিনা লৈবাক অসিগী লাইরিক হৈরবা থবক ফংদ্রিবা নহারোল ১১৬০ হেন্না থবক পীরে।

কেন্দ্রগী মপুশিংদা হৌজিক লুপা লাখ ২.৫০ পীরিবা অসি লুপা লাখ ৫.০০ ফাওবা পীরগনি, মসি থাগী ওইনা হিদাক লৈখিবা অদুগী চাদা ১৫গী চাংদা পীগদবনি, হায়বদি থা অমদা লুপা ১৫,০০০গী পীগনি। অৱাং-নোংপোক রাজ্যশিং, হিমালয়াগী লমদমশিং, ইথৎশিং, চাউখৎত্রিবা মফমশিংদা হাংবা কেন্দ্রশিংদা অমুক্তংগী ওইনা লুপা লাখ ২ মতেং পীগনি অমসুং নুপীশিং, দিবয়াং, এস.সি অমসুং এস.তিনা হাংবা কেন্দ্রশিংদা ফর্নিচর পীরি।

লৈবাক অসিগী লায়রবা মীওইশিংদা মগুন লৈবা  অফবা হিদাক-লাংথকশিং ফংহন্নবা পান্দমদা ২০০৮গী নবেম্বরদা ফার্মাসিতিকেল দিপার্তমেন্তনা জন ঔসাধি স্কিম হৌদোকখিবনি।

*****