ওজাগী নুমিৎ থৌরমদা মরী লৈন্না ফেসবুক পোস্ত অমদা ভারতকী উপ-রাস্ত্রপতি শ্রী এম.ভেনকিয়া নাইদুনা হায়খি হেন্না অফবা ওইনবা থৌনা অমুক হিঙ্গহন্নবা হোৎনবা দরকার ওইরে অমসুং করি অমতা পাংথোক্তনা ইচম-চম্না লৈবা অসি ঐখোয়না কৈদৌঙৈদা চৎনবী অমা ওইহল্লোইদবনি। মতম অমদা ভারত অসি '‘বিশ্বগুরু'’হায়না খঙনরমখি অমসুং মালেমগী লাইরিক তাকপী-তম্বীদা য়াম্না চাউনা মতেং পাংখি।

শ্রী নাইদুনা হায়খি, নালান্দা, তকসাসিলা অমসুং পুস্পাগিরি অসি মমিং লৈরবা মহৈ তম্ফমশিংনি। ভারত লাইরিক তম্বা অসি মগুন লৈনা লৌবা খুন্নাই অমনি অমসুং তাকপী-তম্বীবা অসি য়াম্না ইকায়খুম্নবা অমসুং অশেংবা শীনফম অমনি হায়না খন্নখি।

ফেসবুক পোস্তা উপ-রাস্ত্রপতিনা হায়খি ওজাশিং ঈশ্বরগী শক্তমনি মরমদি নুপা নৎত্রগা নুপী অদুনা হিরম খুদিংদা মতিক চাবা মীওই অমা শেমগৎলি, খ্বাইদগী ফবা ৱাখল্লোনশিং লৈহল্লি, মীরোল কয়াদা অচুম্বশিং অমসুং গুনশিং শন্দোকই অমসুং চিংনবশিং কোকহল্লি অমসুং খঙদবা কয়া খঙহল্লি।

নেসনেল ইজুকেসন পোলিসি ২০২০গী মতাংদা শ্রী নাইদুনা হায়খি, ওজাশিংনা লাইরিক-তাকপী তম্বীবগী থৱায়নি। লৈবাক শেমগৎনবা ওজাশিংনা হোৎনরিবশিং ঐখোয়না মখা তানা ইকায়খুম্নগদবনি। ২১সুবা চহিচা অসি অৱা-অনাশিং থেংনবা অমসুং অহোংবা কয়া পুরকপা মতম অমনি। হৌজিক মালেম অসি খুঙ্গং অমা ওইরে।ভারতকী গুনশিং য়াওহন্দুনা ২১সুবা চহিচাগী মালেমগী থাক্তা মথৌ মশক খঙবা নাগরিকশিং শেম্নবগী থৌদাং ওজাশিংগীনি।

মহাক্না হায়খি লাইরিক তাকপী-তম্বীবা অসি হেন্না নুংঙাইনবা, মহৈরোইশিং য়াইফনবা অমসুং কান্নবা ফংহন্নবা ২১সুবা চহিচাগী ওজাশিংনা তেক্নোলোজিগী কান্নবা লৌগদবনি। হৌজিক থেংনরিবা লাইচৎ অসিদা লাইরিক তম্বদা তেক্নোলোজি হেন্না শীজিন্নবা দরকার ওইরে। হোঙলকলিবা ফিবম অসি অথুবদা চুশিন্নখিবা অমসুং ওনলাইনদা ফজনা লাইরিক তাকপীবগীদমক ওজাশিং থাগৎলি।

মতমগী অহোংবগা ইরোইন্না মখোয়গী লৌশিং অমসুং হৈশিংবা হেনগৎহন্নবা ওজাশিংনা হোৎনরিবশিং মহাক্না থাগৎলদুনা হায়খি মসি খুন্নাই অমদা লৈগদবা থৌনা অমসুং থাজবনি।

উপ-রাস্ত্রপতিনা হায়খি পুন্সি চুপ্পা তম্বা হায়বসি ভারতকী তঙাইফদ্রবা চৎনবী অমনি। ওজাশিংদগী তম্বগী মথক্তা ঐখোয়না মমা-মপাশিং, অহল-লমনশিং অমসুং মরুপ-মপাংশিংদগীসু তমগদবনি। সমুদ্র, নুংশিৎ, নুমিৎ, থা, শামু, ঙা, শজি  অমসুং খোইশিংদগী মমল য়াম্লবা পারা কয়া তমখিবা দাত্তেত্রেয়াগী ৱারি নিংশিংলদুনা শ্রী নাইদুনা হায়খি ঐখোয়না মীওই খুদিংমক্তগী অমসুং মফম খুদিংমক্তগী তমগদবনি। পুন্সি চুপ্পা তম্বা অমসুং অফবা খুদিংমক লৌশিনবা হায়বসি ভারতকী চৎনবীনি।

উপ-রাস্ত্রপতিনা হায়খি খঙনিংবগী লাংতক্নবা লৈগদবনি, ঐখোয়গী লৌশিংগী ঙমখৈ পাকথোক-চাউথোকহন্নবা থৌনা লৈগদবনি অমসুং অনৌবা ৱাখল্লোনশিং লৌশিনবা ঙম্বা ঐখোয়গী থৌনা য়োকখৎকদবনি। মসিগী মাইওন অসিদা চঙশিল্লিবা ওজাশিং ঐখোয়না ইকায়খুম্নবা উৎকদবনি অমসুং অসিগুম্বা মখলগী ওজা কাংলুপ অসি মশিং হেনগৎহন্নবা ঐখোয়না অপুনবগী ওইনা হোৎনগদবনি। মদু খক্তনা শ্রেস্থা ভারত অমা অমসুং সকশাম ভারত অমা শেমগৎপা ঙমগনি।

মহাক্কী মপোক নুমিৎতা ওজাগী নুমিৎ থৌরম পাংথোক্লিবা ভারতকী অহানবা উপ-রাস্ত্রপতি অমসুং অনিসুবা রাস্ত্রপতি দোক্তর এস রাধাকৃষ্ণনগী মফমদা ইকায়খুম্নবা উৎলদুনা শ্রী নাইদুনা হায়খি দোক্তর এস রাধাকৃষ্ণন শক্নাইরবা স্তেৎমেন, ফিলোসোফর অমসুং অইবনি। মহাক লোজিক্স, ফিলোসোফি, সাইকোলোজি অমসুং সোসিএল সাইন্সকী লমদা মতিক চাবা লৌশিং লৈখি। সোক্রেতস,জিন-জেকস রুসো, বেরত্রান্দ রুসেল, জিন-পাউল সারত্রে, কার্ল মাক্স অমসুং ইদমুন্দ বুর্কেগুম্বা শক্নাইরবা অইবা অমনি।

উপা-রাস্ত্রপতিনা হায়খি ওজাগী নুমিৎ লাকপদা, ঐখোয়গী লৈবাক্কী পন্থুংফম শেম্লিবা অমসুং মখা তানা শেম্লিবা দোক্তর এস রাধাকৃষ্ণনগুম্বা মশিং থিঙমদ্রবা অফবা ওজাশিং ঐখোয়না ইকায়খুম্নবা উৎকদবনি।

*****