সংহাই কোওপরেসন ওর্গনাইজেসন(এস সি ও)মীফমগী নাকলদা সেপ্তেম্বর ৪দা রক্ষ মন্ত্রী শ্রী রাজনাথ সিংহনা চাইনাগী স্তেৎ কাউন্সিল্লর অমসুং দিফেন্স মিনিস্তর জেনেরেল ৱৈ ফেংহে উনখ্রে। মিনিস্তর অনিনা ভারত-চাইনা ঙমখৈগী শরুকশিংদা ওইরবা ফিবমশিং অমসুং ভারত-চাইনাগী মরীশিংগী মতাংদা থম্মোয় শেংনা অমসুং কুপ্না ৱা খন্নখি।

হৌখিবা থা খর অসিদা ভারত-চাইনা ঙমখৈগী নোংচুপ থংবা শরুক্কী গলৱান তম্পাক য়াওনা লাইন ওফ একচুএল কন্ত্রেোল(এল এ সি)দা ওইরিবা ফিবমগী মতাংদা রক্ষ মন্ত্রী শ্রী রাজনাথ সিংহনা পাউদমখি। চাইনাগী লান্মীশিংগী থবকশিং, য়াম্লবা লান্মীশিং থোমজিল্লকপা, মখোয়গী অশাওবা মতৌশিং অমসুং নাকল অনিগী য়ানখিবশিং থুগাইনবা হোৎনবা অমসুং নাকল অনি য়ানখ্রবশিং ঙাক্তবগী মতাংদা পাউদমখি। ঙমখৈ ঙাক্নবা ভারতকী লান্মীশিংনা দাইত্ব লৈনা থবক পাংথোক্লি অমসুং ভারতকী মনিংতম্না পানবা অমসুং অপুনবগী ঙমখৈ ঙাক্নবা ঐখোয়গী ফিরেপ্তা চিংনবা লৈতনবা রক্ষ মন্ত্রীনা ফোঙদোকখি।

চাইনাগী স্তেৎ কাউন্সিল্লর অমসুং দিফেন্স মিনিস্তরনা হায়খি প্রধান মন্ত্রী মোদী অমসুং প্রসিদেন্ত সি জিনপিংগী মরক্তা য়ানখিবশিং নাকল অনিমক্না থবক ওইনা পাংথোক্কদবনি অমসুং নাকল অনিগী তোঙান-তোঙানবা য়ানচেশিংগী খুৎথাংদা মুক্নবগী শান্তি ওইনা ৱারি শানদুনা লোইশিনগদবনি। হৌজিক ওইরিবা ফিবম অসি উংখৎনবা হেনগৎলকপা য়াবা করিগুম্বা মখল অমতগী থবকশিং পাংথোক্লোইদবনি। নাকল অনিনা ভারত-চাইনাগী মরীদা মিৎয়েং চঙগদবনি অমসুং ফিবম অসি লাকশিন্নবা অথুবদা অপুনবা ওইনা থবক পায়খৎকদবনি অমসুং ভারত-চাইনাগী ঙমখৈগী শরুকশিংদা শান্তি পুরক্কদবনি। মিনিস্তর অনিগী মরক্তা য়াওনা থাক খুদিংমক্তা পাউ ফাওন্নবা চাইনাগী দিফেন্স মিনিস্তরনা ফোঙদোকখি।

শ্রী রাজনাথ সিংহনা হায়খি ঐখোয়গী নাকল অনিগী মরীশিং মখা তানা ফগৎহন্নবা ভারত-চাইনাগী ঙমখৈ শান্তি ওইনা থম্বা অসি তঙাইফদবনি অমসুং য়ানদবশিং মুক্নবা ওইরকপদা নাকল অনিমক্না য়ারোইদবনি। হৌজিক ওইরিবা ফিবম অসি নাকল অনিনা ৱারোইশিন পুরক্কদবনি অমসুং ৱারি শানদুনা ঙমখৈগী ৱাথোকশিং লোইশিনগদবনি। ৱাফমশিং শান্তি ওইনা লোইশিনবা পাম্মি হায়না চাইনাগী মাইকৈদগী চাইনাগী স্তেৎ কাউন্সিল্লর অমসুং দিফেন্স মিনিস্তরনা ফোঙদোকখি।

শ্রী রাজনাথ সিংহনা হায়খি পাঙ্গোং পাৎ য়াওনা ঙমখৈগী শরুকশিংদা লৈরিবা মুক্নবশিং মপুংফানা লোইশিন্না চাইনাগী মাইকৈদগী ভারতকা থবক তৌমিন্নগদবনি। লাইন ওফ একচুএল কন্ত্রোল ইকায়খুম্নগদবনি অমসুং হৌজিক ওইরিবা ফিবম অসি হোঙহন্নবা হোৎনরোইদবনি। হৌজিক ওইরিবা ফিবম অসি দাইত্ব লৈনা লাকশিনগদবনি অমসুং অরুবা ফিবমদা লাকপা য়াবা মখা তাবা থবক অমতা পাংথোক্লোইদবনি।

মিলিতরি অমসুং দিপ্লোমেতিক চেন্নেলশিংদা নাকল অনিনা মখা তানা ৱারি শান্নবা শ্রী রাজনাথ সিংহনা ফোঙদোকখি।

*****