ঙাকশেল মন্ত্রী শ্রী রাজনাথ সিংহনা ঙসি মফম অসিদা দাইরেক্তোরেৎ জেনেরেল নেস্নেল কেদেৎ কোর্পস (দি.জি.এন.সি.সি.)গী ত্রেনিং মোবাইল এপ লোঞ্চ তৌখ্রে। এপ অসিনা এন.সি.সি. কেদেৎশিংগী লৈবাক শিনবা থুংনা ওনলাইনগী ত্রেনিং পীবদা তেংবাংগনি।

কোবিদ-১৯গী মরমদগী থমখিবা অথিংবশিং অসি য়েংলুরগদি এন.সি.সি.গী ত্রেনিং অসি শোক্ন-শম্নবদা য়ুম্ফম ওইবা ত্রেনিং ওইবনা মসিদা পামদবা চৈথেং কয়া উবা ফংলে। অনকপা মতমদা স্কুল/কোলেজশিং হাংলক্কদবা লৈতবনিনা এন.সি.সি.গী ত্রেনিং অসি দিজিতেলগী খুত্থাংদা পীদবা য়াদবগী তঙাই ফদবা অমা লাক্লে। এপ অসি লোঞ্চ তৌবা মতমদা ঙাকশেল মন্ত্রীনা এন.সি.সি.গী কেদেৎশিংগসু ৱারী শাখি অমসুং মখোয়গী ৱাহংশিংগী পাউখুম পীখি। মহাক্না মখোয়দা মাই পাকপগী য়াইফ পাউজেল পীরদুনা মখোয়না তৌরু তৌরুবা খুদিংদা মাই পাকপা ওইয়ু হায়নসু হায়খি।

ঙাকশেল মন্ত্রীনা এন.সি.সি.গী কেদেৎশিংদা ৱা ঙাংখিবদা মহাক্না এপ অসিনা মখোয়না দিজিতেলগী খুত্থাংদা অনৌবা তম্বদা য়াম্না তেংবাংগনি অমসুং কোবিদ-১৯না মরম ওইদুনা শোক্ন-শম্নবগী মরমদা অথিংবা থম্লিবা অসিবুসু তুংদা থম্বা ঙম্লগনি হায়খ্রে। করিগুম্বা মীওই অমনা অনিংবা অমসুং থাজবা অমগা লোয়ননা মাং থাদুনা চৎলবদি মীওই অদুনা অয়েৎপা খুদিংমক মাইথিবা পীদুনা শোইদনা মাই পাক্কনি হায়খি। এন.সি.সি.গী কেদেৎ লাখ ১ হেনবনা থৌওং কয়া চত্থদুনা ফ্রন্তলাইন্দা লৈরীবা কোরোনাগী লান্মীশিংদা তেংবাংখিবগীদমক্তা শ্রী রাজনাথ সিংহনা মখোয়বু থাগৎপা ফোঙদোকখি। এন.সি.সি.না অমত্তা ওইবা, থকশি-খাশি নাইবা, লৈবাক্কী সেবা তৌবগী ইথিল পী অমসুং এন.সি.সি. কেদেৎ কয়া অমনা প্রধান মন্ত্রী শ্রী নরেন্দ্র মোদী, এয়র মার্শেল অর্জন সিংহ, শান্নরোই অঞ্জলি ভগ্বৎ, হান্নগী এক্সতর্নেল এফিয়ার্স মন্ত্রী ওইরম্বী শুশ্মা স্বরাজ অমসুং মমাংগী ঙাকশেল মন্ত্রী মনোহর পারিকারনচিংবা মীথোই মীহেনবা মীওই কয়া ওইখ্রে হায়না হায়খি। মসিগী মথক্তা ভারতকী ঙাকশেল মন্ত্রী মশামকসু এন.সি.সি. কেদেৎ অমনি।

দি.জি.এন.সি.সি. মোবাইল ত্রেনিং এপ অসিনা এন.সি.সি.গী অপুনবা ত্রেনিং মেতরিএল (সিলেবস, প্রেসি, ত্রেনিং ভিদিও অমসুং তোয়না হংবা ৱাহংশিং) অসি প্লেৎফোর্ম অমদা ফংহন্নবা পান্দম থম্লি। এপ অসি শিজিন্নবা নুংঙাইহন্নবা মসিদা ৱাহং হংবগী ওপসন অমসু য়াওরি। মসিগী ওপসন অসি শিজিন্নদুনা কেদেৎ অমনা ত্রেনিং সিলেবসকা মরী লৈনবা ৱাহং হংবা য়াগনি অমসুং মতিক চারবা ইন্সত্রক্তরশিংগী পেনেল অমনা মসিগী পাউখুম পীগনি।

মসিগী এপ অসিনা প্রধান মন্ত্রী শ্রী নরেন্দ্র মোদীগী দিজিতেল ইন্দিয়াগী মতুং ইন্দুনা এন.সি.সি.গী ত্রেনিংবু ওতোমেসন তৌবগী কান্নবা খোঙথাং অমা শোইদনা ওইগনি অমসুং হৌজিক ওইরিবা লায়চৎ অসিগী লুরবা তাঞ্জা অসিদা এন.সি.সি. কেদেৎশিংদা ত্রেনিং মেতরিএল ফংহন্নবা তেংবাংগনি।

দিফেন্স সেক্রেতরী দাঃ অজয় কুমার, এন.সি.সি.গী দাইরেক্তর জেনেরেল এল.তি. জেনেরেল রজীব চোপ্রা অমসুং মন্ত্রালয় অসিগী সিবিল অমসুং মিলিতরীগী সেনিয়র ওফিসার কয়াসু থৌরম অসিদা শরুক য়াখি।

*****