রোদ ত্রান্সপোর্ত, হাইৱেজ অমসুং এম.এস.এম.ইগী য়ুনিয়ন মিনিস্তর নিতিন গাদকরিনা হায়খি লৈবাক শীনবা থুংনা লম্বী শেমগৎপদা অনৌবা অমসুং গ্রিন তেক্নোলোজি শীজিন্নগদবনি। ঙসি ভিদিও কনফরেন্সিংগী খুৎথাংদা নিউ গ্রিন হাইৱেজ পোলিসি(প্লান্তেসন) হন্না য়েংশিনবা অমসুং লম্বী শেম্বদা অনৌবা তেক্নোলোজিশিং শীজিন্নবগী মতাংদা পাংথোকখিবা মীফম অমদা মিনিস্তরনা হায়খি লম্বী শেম্বদা চঙবা শেনফম য়ামদ্রবদা চাদা ২৫ হন্থহনবা অসি ঐখোয়গী পান্দমনি অমসুং মসিদা অনৌবা তেক্নোলোজি দরকার ওই। 

জিও-তেগ্গিং অমসুং ৱেব-বেজ সি.আই.এস খুৎলায়শিং শীজিন্নদুনা উ পাম্বীশিং য়েংশিন্নবা মোইবাইল এপ্প ‘হারিত পাথ’ মিনিস্তরনা হৌদোকখি। উ থাবগী প্রোজেকশিংগী মখাদা থারিবা উশিং য়েংশিন্নবা, পাম্বী মখলশিংগী অকুপ্পা মরোলশিং, পান্দমশিং য়েংশিন্নবা এপ্পা অসি নেসনেল হাইৱেজ ওথোরিতি ওফ ইন্দিয়ানা পুথোকপনি। উ থাবগী থবকশিং কুপ্না য়েংশিন্নবা মোবাইল এপ্পা হাংদোকপা থৌরমদা মিনিস্তরনা তকশিনখি।

মিনিস্তরনা হায়খি হাইৱেজশিংগী পরিংশিংদা উ পাম্বীশিং থানবা অখন্নবা মীওইশিং/এজেন্সিশিং নেক্কদবনি। থবক অসিদা এন.জি.ওশিং, সেল্প হেল্প গ্রুপশিং অমসুং হোর্তিকলচর অমসুং ফোরেস্ত দিপার্তমেন্ত শরুক য়াহনগদবনি।২০২২গী মার্চ ফাওবদা হাইৱেজশিংদা উ থাবগী থবকশিং চাদা ১০০ মাইপাক্না পাংথোক্কনি হায়না ওফিসিএলশিংনা থাজবা পীখি।

উ পাম্বীশিং মফম হোংদোকপগী মতাংদা য়ুনিয়ন মিনিস্তরনা হায়খি, উ খুদিংমক য়ান্দবা অসি ঐখোয়গী পান্দমনি অমসুং থবক অসিগীদমক অনৌবা তেক্নোলোজিশিং শীজিন্নবা অখন্নবা এজেন্সিশিং নেক্কদবনি। লৈবাক অসিদা মশানা পুথোকচবা লিমোন অমসুং য়ুবী মশিং শীজিন্নগদবনি। মফম অমগা চুনবা পাম্বী মখলশিং খনবা অসি য়াম্না মরুওই।

লম্বী শেম্বদা অনৌবা তেক্নোলোজিশিং শীজিন্নবগী মতাংদা মহাক্না হায়খি, লম্বী শেম্বদা চঙবা শেনফম য়ামদ্রবদা চাদা ২৫ হন্থহনবা অসি ঐখোয়গী পান্দমনি অমসুং মসিগীদমক অনৌবা তেক্নোলোজিশিং দরকার ওই। চীংগী লমশিং, ঙমখৈগী লমশিং অমসুং সমুদ্র মপানগী লমশিংদা তোঙানবা থৌরাং অমসুং তেক্নোলোজিশিং দরকার ওই। অন্দমান অমসুং নিকোবরদা লম্বী শেম্বদা অনৌবা তেক্নোলোজি শীজিন্নবা অসি মহাক্না থাগৎখি অমসুং অতৈ লেমহৌরিবা প্রোজেকশিং মতৌ তম্নবা এন.ঐচ.আই.দি.সি.এলগী পুক্নিং থৌগৎখি।

*****