ঐখোয়গী মেদিকেল কাঙবুনা লৈবাকসিবু চাউথোকচবা পোকহল্লে অমদি মালেমগী ওইনা চৎমিন্নবদা লল্লোন ইতিক্তা ভারত ঐসি থাজবা য়াবা খোঙবু অমনি হায়বা মালেমগী মফমদা উৎলে হায়না কম্মর্স অমদি ইন্দস্ত্রী মন্ত্রী শ্রী পিয়ুশ গোয়লনা ফোঙদোকখ্রে‍। ঙসি মফমসিদা পাঙথোকখিবা সি.আই.আই.গী ১২শুবা মেদসেক গ্লোবেল সম্মিত হৌদোকপগী থৌরমদা ৱা ঙাঙলদুনা মহাক্না হায়খিবদা ফার্মাসিউতিকেল কম্পেনীশিংনা ভারত অমসুং মালেমগী ওইনা হিদাক লাংথকশিং মতিক চানা পীননবা হোৎনখি‍। “মেদিকেল খুৎলায়গী ইন্দস্ত্রীশিংনা কন্না হোৎনদুনা কোবিইদ-১৯ লাইচৎ লান্থেংনবদা মথৌ তাবা খুৎলায়শিং ইরমদমসিদা পুথোকচবদা চাউনা মতেং পাংলি‍। ঐখোয়গী দোক্তরশিং, পেরামেদিকশিং অমসুং মেদিকেল কাঙবুশিংনা মখোয়গী ভারতপু শাফনা অমদি তিঙ কায়জঙদনা থমবা হায়বা থৌদাংনা লমজিংদুনা মীচম মীয়ামগীদমক চোকথবা নাইদনা থৌগল তৌরিবা অসিনা লৈবাকসিবু চাউথোকচবা পোকহল্লে‍।”

শ্রী গোয়লনা হায়খিবদা ঙসি অকনবা লোকদাউন অমসুং থুনা ফগৎলকপা হায়বসি কমদৌবগে হায়বা ভারতনা মালেমগী মফমদা উৎলে‍ হায়না ঐখোয়না পোঙনা হায়বা ঙম্লে‍। “ঐখোয়গী কোবিইদ-১৯দগী ফগৎলকপগী মশীং অসি চাদা ৭০গী চাং লান্থোক্তুনা য়াম্না পূক্নীং লুম্নিংঙাই ওইরি‍। হৌজিক ওইরিবা মতম অসি  ঐখোয় পুম্নমক্কীদমক্তা য়াম্না তমজনিংঙাই ওই‍।”

প্রধান মন্ত্রীগী নীংখা তম্বা নুমীৎকী থৌরমদা ৱা ঙাঙখিবদা মহাক্না ইরোমদোম লেপচবা ভারতকী পোরম য়াত্তুনা থমখিবা অমদি মোদিকেল শিনফমবু মরুওইনা মখোয়গী অফবা শক্লোনগীদমক্তা থাগৎখিবা ৱারোল পল্লদুনা, শ্রী গোয়লনা হৌজিক অসি ঐখোয়গী হকশেলগী সিস্তেম অসিবু এ অহুম: এক্সেস, এৱ্যারনেস, এভাইলেবিলিতীনা মথৌ হাপ্পদা তেক্নোলোজীগী খুৎলায়শিং শীজিন্নবা মতম ওইরে হায়না ফোঙদোকখি‍। ইরোমদোম লেপচবা হায়বসিনা মীয়ামগী পুন্সি কনবদা মরুওই হায়বা ৱাফম খঙলকপগা লোয়ননা ঐখোয়গী ফার্মাগী ইন্দস্ত্রীশিং, মেদিকেল খুৎলায়শিং অমসুং মেদিকেল শিন্ফমশিংদা অওনবা লাকখিগনি‍।

“লেপ্তনা হোৎনবনা মহৈদু নমথবা ঙমদবা ওইহল্লি” হায়বা পরমহন্স য়োগানন্দগী ৱাফম পল্লদুনা মহাক্না মেদিকেল অমসুং ফার্মা শিনফমদা লৈরিবশিংবু ইরোমদোম লেপচবা ভারত অমা ওইহন্নবগীদমক্তা মখোয়গী লেপ্তনা হোৎনবা, থৌদাং অমসুং অচেৎপা ফিরেপকীদমক মহাক্না থাগৎপা ফোঙদোকখি‍।

মীয়াবু পুনশিনবা অমদি দেতা অমসুং প্রোসেসিং শীজিন্নবনা ঐখোয়গী হেল্থকেয়র দেলিভরী সিস্তেম মখা তানা ফগৎহনবদা অমদি মরী লৈনবা অনাবশিংগী ইন্ফোর্মেসন অপনবা লৈতনা চৎননবা হোৎনবদা মতেং ওইগনি হায়না শ্রী গোয়লনা ফোঙদোকখি‍। “মসিনা ঐখোয়গী দোক্তরশিংদা মতেং ওইগনি অমসুং অনাবশিং লায়ওং চুম্না খঙদোকপদা অমদি মওং চুম্না লায়েংবদা মতেং পাংগনি,” হায়না মহাক্না হায়খি‍।

‘মালেমগী ফার্মাসী’ ওইবগা লোয়ননা ভারতনা মালেমগী মফম মতৈদা পীগদবা ফেসিলিতীশিং, থাক ৱাংবা মেদিকেল কেয়র অমসুং থাক ৱাংবা লায়েং পথাপশিং মালেম অসিনা শীজিন্নবা য়াগদবা ‘মালেমগী অনা লায়েংশঙ’সু ঐখোয়না ওইগনি হায়না মন্ত্রীনা ফোঙদোকখি‍। মেদিকেল খুৎলায়গী ইন্দস্ত্রীশিংনা ভারত্তা তেক্নোলোজী পুরক্নবগী লমদা মাঙজিল থারকখিগনি অমদি মালেমগী খুৎলোয় লল্লোনবদা অমসুং মালেমগী অনা লায়েংশঙশিংগা পুন্না চৎমিন্নবদা ঐখোয়গী মফম কল্লখিগনি‍।‍

ৱেলনেস সেন্তর অসি প্রধান মন্ত্রী শ্রী নরেন্দ্র মোদীগী অতোপ্পা মীৎয়েং চঙবা মফম অমনি হায়না শ্রী গোয়লনা হায়খি‍। মহাক্না হায়খিবদা মাঙজৌননা ঙাকথোক্নবগী হকশেলগী থৌওং অসিনা তুংদা লাক্কদবা লম্বী ওইরক্লগনি‍। “হকচাঙ ফনা লৈবা হায়বসিনা ঐখোয়গী লৈঙাক অসিগী লায়ৱা ওইদুনা লাক্লি”, হায়না মহাক্না মখা তাখি‍।

প্রধান মন্ত্রীনা লৈবাক পুমবগী হকশেলগী লমদা মথৌ তাবশিং পুম্নমক শেমগৎনবা তরং তরংবা তুংগী পুন্সি অমগী পোরম অমা য়াত্থোক্তুনা থম্লে হায়না মন্ত্রীনা ফোঙদোকখি‍। ভারত মচা খুদিংদা অফবা থাক্কী হেল্থকেয়র, খুৎলায়শিং অমসুং মফমশিং ভারতনা ফংহনগনি হায়না মহাক্না থাজবা ফোঙদোকখি‍।

*****