“এবস্ত্রান ইনফোতেক” কৌবা www.avestran.in গী ৱেবসাইৎ লৈবা লুপ অমনা মমিং চৎপা পাউ-চে খরদা ওগস্ত ৮, ২০২০দা রেলৱেগী কেতেগোরী ৮গী ওইনা আউৎসোর্সিংদা য়ুম্ফম ওইদুনা চহি ১১গী কন্ত্রেক্তা মীওই ৫২৮৫ লৌবগী এপ্লিকেস্ন কৌজরি হায়বা পাউ থোক্লকপা রেলৱে মন্ত্রালয়না থেংনরে। এপ্লিকেসন থারকপা মীওই খুদিংদা ওনলাইন ফী ওইনা লুপা ৭৫০ পীনবা হায়রি অমসুং এপ্লিকেসন থাবগী অরোয়বা নুমিৎনা  সেক্তেম্বর ১০, ২০২০ হায়না পীরি।

রেলৱেজতা থবক চংবগী এদবর্তিজমেন্ত অসি ইন্দিয়ন রেলৱেজ খক্তনা হাপ্পি। অতোপ্পা লন্নাইগী এজেন্সী অমত্তদা মসিগী অয়াবা পীদে। হায়নরিবা এদবর্তিজমেন্ত হাপ্লকপগী থৌওং অসি আইন্না য়াদবা অমসুং মীনম্বনি হায়না রেলৱে শেংদোরক্লি।

হীরম অসিগা মরী লৈননা ইন্দিয়ন রেলৱেজকী গ্রুপ ‘সি.’ অমসুং হান্না ওইরম্বা গ্রুপ ‘দি.’গী পোস্তকী থবক লৌবগী থৌদাং অসি রেলৱে রিক্রুইতমেন্ত বোর্দ (আর.আর.বি.) ২১ অমসুং রেলৱে রিক্রুইতমেন্ত সেল (আর.আর.সি.) ১৬না পায় অমসুং অতোপ্পা অমত্তনা পায়দে হায়না শেংদোরক্লি। ইন্দিয়ন রেলৱেজকী অহাঙবশিং অসি সেন্ত্রেলাইজদ ইমপ্লোয়মেন্ত নোতিফিকেসন (সি.ই.এন.)গী খুত্থাংদা পাক শন্না পাউ থাদোক্তুনা পাঙথোকই। রেলৱেগী ওন-লাইন এপ্লিকেসন অসিসু লৈবাক শিনবা থুংনা লৈবা মতিক চাবা মীওইশিংদগী কৌই। সি.ই.এন. অসি ইমপ্লোয়মেন্ত ন্যুজ/রোজগার সমাচার অমসুং লৈবাক্কী অমসুং রাজ্যগী পাউ-চেশিংদা থোকই। সি.ই.এন. অসি আর.আর.বি./আর.আর.সি.গী ৱেবসাইৎশিংদসু থোকই। আর.আর.বি./আর.আর.সি.গী ৱেবসাইৎ এদ্রেস অসি সি.ই.এন.দা য়াওগনি।

রেলৱেনা অয়াবা পীবা লন্নাইগী এজেন্সী অমত্তা লৈতে অমসুং মথক্তা পল্লিবা এজেন্সী অসিগা হীরম অমত্তদা মরী লৈনদে হায়না রেলৱেনা শেংদোরক্লি।

রেলৱেনা হীরম অসিগী মতাংদা থীগৎপা হৌরে অমসুং মসিদা চেন্নবা মীওই খুদিংমক আইনগী ওইবা অহকপা চৈরাক পীগনি।

*****