হৌজিক্তি অদোম্না অদোমগী ইমুংদা অখন্নবা খাদিগী মুগানা শাবা ফেস মাস্কশিং খুদোলপোৎ ওইনা পীবা য়ারগনি। কেন্দ্রগী এম.এস.এম.ই. মন্ত্রী শ্রী নিতিন গদকারীনা ঙরাং খাদি অমসুং ভিলেজ ইন্দস্ত্রীজ কম্মিসন (কে.ভি.আই.সি.)না পুথোকপা খুদোলপোৎকী উপু অসিবু হৌদোকখি। খুদোলপোৎকী উপু অসিদা খুৎনা শাবা মুগাগী মাস্কশিং তোঙান-তোঙানবা মচু অমসুং ময়েকশিংদা য়াওরি। মাস্কশিং অসি খুৎনা নিংথীনা শেম্বা অমুবা মচুদা সনা মচুনা হকপা ময়েকশিংগী চেগী উপুদা হাপলি।

শ্রী গদকারীনা খুদোলপোৎ উপু অসিবু থাগৎপা ফোংদোক্লদুনা মসি কুমহৈ অসিগী ৱাখল্লোনবুসু য়োকখৎপগা লোইননা চেকশিন থৌরাংসু লৌখৎলবা য়াম্না চুন্নরবা পোত্থোক অমনি। কে.ভি.আই.সি.না লৌখৎলক্লিবা মাস্ক শাবগী খোংথাং অসিদা হরাউবা ফোংদোক্লদুনা মহাক্না হায়খি মদুদি মসিনা খুৎশা হৈবশিংবু অসিগুম্বা কোরোনাগী খুদোংচাদ্রবা মতম অসিদা শেন্দাল লম্বী অমা পীবীরে।

মুগাগী মাস্ক য়াওবা খুদোলপোৎ উপু অসি উপু অমদা লুপা ৫০০তমক পী অমসুং হৌজিক দিল্লী এন.সি.আর.দা লৈবা কে.ভি.আই.সি.গী আউৎলেৎশিংদা ফংগনি।

কে.ভি.আই.সি.গী চীয়রমেন, শ্রী ভিনাই কুমার সক্সেনানা খুদোলপোৎ উপু অসি হৌদোকপগী ৱাখল্লোন্দি মপান লমগী কৈথেলশিং অসিগী মহুত্তা য়াম্লবা ভারতকী প্রজা মীয়াম্না কুমহৈগী মতম অসিদা মখোয়গী নক্না-চান্নবশিংদা চুন্নরবা মমলদা খুদোলপোৎ তমহনবা ফংহনবনি।

খুদোলপোৎ উপুশিং অসিদা সিল্ক মাস্ক হায়না থাবা অমগা অতোপ্পা নীংথীজরবা মচুগী মাস্ক অহুম অমগা য়াওরি। মসিগী মরোল অহুম নাইবা মাস্ক অসি উনশাদা অকায়বা পীদে, শুবা চাম্বা য়াই, নৌনা শীজিন্নবা য়াই অমসুং মশানা তুমজবা ঙম্বা পোৎ অমনি। সিল্ক মাস্ক অসিদা ফিগী লৈরোল অহুম তাইশিন্নরি অমসুং মসিদা নাকোংদা পন্নন্নবা শরুক অমগা লোইননা নীংথীবা লিক্লাংসু য়াওরি। মসিগী মনুং থংবা শরুক্তা খাদিগী চাদা ১০০ লশিং ওইবা ফি অমসুং মপান থংবদা মুগাগী লৈরোল য়াওরি।

*******