খুঙ্গং চাউখৎপা অমসুং পঞ্চায়তী রাজ, লৌঊ-শিংঊ অমসুং লৌউবশিংগী য়াইফ য়ুম্বালগী কেন্দ্র মন্ত্রী শ্রী নরেন্দ্র সিংহ তোমারনা জুলাই ২৪দা “খুঙ্গং চাউখৎপগী প্রোগ্রামশিংগী রিস্কতা য়ুম্ফম ওইবা ইন্তর্নেল ওদিৎ তৌববু মপাঙ্গল কনখৎহনবা”গী মতাংদা ভিদিও কনফরেন্স অমা হৌদোকখ্রে। খুঙ্গং চাউখৎপগী রাজ্য মন্ত্রী শ্রী সাধবি নিরঞ্জন জ্যোতি; খুঙ্গং চাউখৎপগী সেক্রেতরী শ্রী এন.এন. সিনহা অমসুং খুঙ্গং চাউখৎপগী মন্ত্রালয়গী সেনিয়র ওফিসিএলশিংনা থৌরম অদুদা শরুক য়াখি। খুঙ্গং চাউখৎপগী এদিস্নেল চীফ সেক্রেতরী/প্রিন্সিপাল সেক্রেতরী অমসুং রাজ্য ১০- অসম, বিহার, হিমাচল প্রদেশ, করনাতকা, মধ্য প্রদেশ, ওরিশা, রাজস্থান, তেলঙ্গানা, উত্তর প্রদেশ অমসুং নোংচুপ বেঙ্গল-গী সেনিয়র ওফিশারশিংশু থৌরমদুদা শরুক য়াখি।

থৌরম হৌদোকপগী ৱা ঙাংবদা মন্ত্রীনা হায়খিবদা খুঙ্গং চাউখৎপগী মন্ত্রালয়দা লৈবাক অসিগী খুঙ্গংগী মফমশিংদা পাংথোক্কদবা খুন্নাই অমসুং শেন্মিৎলোন চাউখৎপগী প্রোগ্রামশিংদা রাজ্যশিংগা নক্ননা খুৎশম্নদুনা শেম-শাবা অমসুং থবক ওইনা পাংথোকপগী থৌদাং শিন্নরে হায়খি। প্রোগ্রামশিং অসিগী খুত্থাংদা লৈবাক অসিগী মীয়ামগী তুং কোয়না চৎপা অমসুং অপুনবা চাউখৎপা পুরকপগী মন্ত্রালয়না পান্দম থম্লি। মসিগীদমক্তা খুৎশুমন অমসুং মশানা মশা থবক পীজবা, খুঙ্গংগী য়ুম শাবিবা, লম্বি শোরোক্কী ইনফ্রাস্ত্রকচর অমসুং সোসিএল সেফতী নেৎনচিংবগী খুত্থাংদা মখোয়গী পুন্সি মহিং হেন্না পাকথোক চাউথোকহন্নবা অচৌবা থৌরাং অমা য়াৎপা লোয়খ্রে। মসিগী ওইনা শেনবা চহী ২০২০-২১গী বজেৎ ইস্তিমেত্তা লুপা কোতি ১২০০০০গী শেনফমশু য়াওহনখ্রে। কোবিদ-১৯গী লায়চৎ অসিনা ওইহল্লকপা হীরমশিং অসি য়েংলদুনা হৌজিক চৎলিবা শেনবা চহী অসিগী ওইনা মহাত্মা গান্ধী নেস্নেল রুরেল ইমপ্লোয়মেন্ত গেরেন্তী স্কিমদা অহেনবা লুপা কোতি ৪০,০০০ হেনবগী শেনফমশু পীথখ্রবনি। খুঙ্গং চাউখৎপগী মন্ত্রালয়না খুঙ্গংগী মফমশিং অমসুং মীওইশিংগী চাউখৎনবা লুপা কোতি লাখ ২ চাদিং তৌগদৌরি। হৌজিক চৎলিবা শেনবা চহীগী মনুংশিদা রাজ্য/য়ু.তি.শিংদা মন্ত্রালয়না হান্ননা লুপা কোতি ৯০০০০ থাদোকখ্রবনি।

থৌরম অসিদা অনৌবা খোংথাং অমা ওইনা শ্রী নরেন্দ্র সিংহ তোমারনা মখাদা পীরিবা হীরমশিং অসিদা রাজ্যশিংগী থবক তৌবগী মথং মনাও খায়নবা “খুঙ্গং চাউখৎপগী ফাইনেন্সিএল মেনেজমেন্ত ইন্দেক্স” অমা পুথোকখ্রে। হীরমশিং অদুদিঃ

• চহীগী থৌরাং শেম্বা, শেনবা চহীগী তঙাইফদনা তাগদবা শেনফম হান্ননা হায়বা, রাজ্যগী শরুক পাক শন্না পীথোকপা, মতম চানা শেনফম শিজিন্ননবা অমসুং য়ুতিলাইজেসন সর্তিফিকেৎ পীশিনবনচিংবা
• পব্লিক ফাইনেন্সিএল মেনেজমেন্ত সীস্তেম (পি.এফ.এম.এস.) অমসুং দাইরেক্ত বেনেফিৎ ত্রান্সফর মতিক চানা থবক পাংথোকপা
• ইন্তর্নেল ওদিৎ অমসুং
• সোসিএল ওদিৎ

শ্রী তোমারনা ইন্দেক্স অসিগী হীরমশিংগী মতুং ইন্না রাজ্যশিংনা থবক তৌবা অসিনা রাজ্যশিংগী মনুংদা চাংয়েংনবা, কো-ওপরেতিব ফেদেরেলিজমগী ইথিলশু পীগনি। রাজ্য সরকারশিংনা চলায়রিবা মহাত্মা গান্ধী নেস্নেল রুরেল ইমপ্লোয়মেন্ত গেরেন্তী স্কিম, দীন দয়াল অন্তোদয়া য়োজনা-নেস্নেল রুরেল লাইবলিহুদ মিসন, প্রধান মন্ত্রী অৱস য়োজনা-গ্রামীন অমসুং প্রধান মন্ত্রী গ্রাম শরক য়োজনানচিংবা স্কিমশিং অসি নিংথিনা চলায়বা ঙম্নবা ফন্দশিং অসি নিংথিনা শিজিন্ননবা রাজ্যশিংদা হায়খি।

শ্রী তোমারনা গ্রাম পঞ্চায়ত্তা থাদখিবা শেনফম খুদিংমক খুঙ্গংগী থাক্তা পায়খৎলিবা চাউখৎপগী থবক কয়াদা শোয়দনা শিজিন্ননবা রাজ্যশিংদা হায়খ্রে। ইন্তর্নেল ওদিৎ সীস্তেম অসিনা অসিগুম্বা খুঙ্গং চাউখৎপগী পায়খৎলিবা প্রোগ্রামশিং অসি নিংথিনা পাংথোকপা অমসুং শেনফমশিংবু নিংথিনা শেন্নবদা চয়েৎনবা লৈবশিং, করিগুম্বা লৈরম্লবদি, অদুবু খংদোক্তুনা অহৌবমক্তদা ৱারোইশিন পুরকপদা তাংবাংগনি। লোয়শিল্লকপদা, হায়রিবা প্রোগ্রামশিং অসিবু ময়েক লানা পাংথোকপা অসিনা সরকারগী মিৎয়েংফম্নি হায়খ্রে।

****