কেন্দ্রগী হকশেল অমসুং য়াইফ য়ুম্বাল মন্ত্রী দাঃ হর্শ বর্ধন্না ঙসি নিরমান ভৱন্দা পাংথোকখিবা শংহাই কো-ওপরেসন ওর্গনাইজেসন (এস.সি.ও.) হকশেল মন্ত্রীশিংগী দিজিতেল মীত্তা দিজিতেলগী খুত্থাংদা শরুক য়াখ্রে। মীফম অদু রসিয়ান ফেদেরেসনগী হকশেল মন্ত্রী শ্রী মিখাইল মুরাশকোনা লুচিংখি। হৌজিক চত্থরিবা কোবিদকী ইরাং অসিনা মীফম অসিদা মরু ওইনা খন্নখি।

অহৌবমক্তদা দাঃ হর্শ বর্ধন্না কোবিদ-১৯না মরম অদুনা মালেম শিনবা থুংনা মীওই কয়াগী পুন্সি মাংখিবগী নুংঙাইতবা ফোংদোকখি। লায়চৎ অসিবু লাকশিনন্নবা হায়দুনা ভারতনা চেৎনা লেপ্লিবা অসিগী মতাং হায়রদুনা মহাক্না প্রধান মন্ত্রীনা মতৌ করম্না “মশামক্না ফিভমশিং য়েংশিন্দুনা ভাইরস অসিবু হেন্না শন্দোকহন্দনবা হায়দুনা অতম্নবা, হকথেংনবা অমসুং থাক খায়বা থৌদাং কয়া লৌখৎখিবা” কয়াগী মতাংদা পনখি।

মহাক্না সরকারনা লৌখৎখিবা মরু ওইবা খোঙথাংশিং শন্দোক্না তাকখি। “ত্রাবেল এদবাইজরী পীবা, চংফম য়েংশিনবা, খুন্নাই য়েংশিনবা, লেব ফগৎহনবা অমসুং হোস্পিতাল মশিং হেনগৎহনবা, লায়না শন্দোকপা লাকশিনবগা মরী লৈনবা তেক্নিকেল গাইদলাইন কয়া অমসুং মীয়ামদা পীবনচিংবা থাক খায়দোকপা থবক কয়া পাংথোকখি। ভারত্তা থংন থংননা লোকদাউন থমখিবা অদুনা তেক্নিকেলগী খংবশিং, লেবকী তৌবা ঙম্বশিং, হোস্পিতালগী ইনফ্রাস্ত্রকচরশিং অমসুং ফার্মাস্যুতিকেল অমসুং নন-ফার্মাস্যুতিকেলগী থবকশিং শেম শাবগী মতম অমসুং খুদোংচাবা ময়াম অমা পীখি”।

লোকদাউনগী মহৈগী মতাংদা পল্লদুনা মহাক্না হায়খিবদা, “ভারত্তা হৌজিক ফাওবদা কোবিদ-১৯গী কেস মিলিয়ন ১.২৫ লাক্লে অমসুং মসিদগী মীওই ৩০,০০০ হেন্না লৈখিদ্রে। ঐখোয়গী অপুনবা মীশিংগী ওইনা কেস পর মিলিয়ন ৮৬৪ অমসুং দেথ পর মিলিয়ন ২১দগী হেন্না তানা লৈরি; লায়না পকপগী অমসুং লৈতবগী চাং অসি ভারতকী ওইনা য়াম্না নেম্না লৈরি। ঐখোয়গী নাবা ফবগী চাং অসি ৬৩.৪৫%তা অমসুং মী লৈতবগী চাংনা ২.৩%দা লৈরি” হায়না হায়খি।

কেন্দ্রগী হকশেল মন্ত্রীনা লোকদাউনগী মনুং অমসুং মতুংদা তেস্ত তৌবগী চাং হেনগৎপা অমসুং হকশেলগী ইনফ্রাস্ত্রকচরশিং ফগৎলকপগী মতাংদা হায়খি। মহাক্না লোজিস্তিক্সকী মতাংদা মখা তানা অসুম্না হায়খি, “ভারত্তা পর্সনেল প্রোতেক্তিব ইক্বিপমেন্ত (পি.পি.ই.) শাবা অমত্তা লৈরমদে অমসুং হৌজিক্তি হৌখিবা থা খরা অসিদা লমদমসিদা মতিক চানা শাবা ঙম্বতা নত্তনা মপান লমদা থাদোকপগী মগুন চেনবা পি.পি.ই. ফাওবা শাবা ঙম্লে। অসিগুম্বা মান্নবা মায় পাকপা অসি বেন্তিলেতর অমসুং মেদিকেল ওক্সিজেনগী মতাংদশু ফংদুনা দিমান্দ অমসুং সপ্লাইগী অহাংবশু মেনবা ঙম্লে”।

কোবিদ শেন্ননবা হীরম খুদিংদা অনৌবা ইনফোর্মেসন তেক্নোলোজীগী থৌওং কয়া পাক শন্না শিজিন্নবগী মতাংদশু মহাক্না পনখি। “আরোগ্য সেতু এপ অমসুং ইতিহাস হায়রিবা সেল্যুলারগী মওংদা য়ুম্ফম ওইবা ত্রেক্কিং তেক্নোলোজী অসি লায়না নাবা মীওই কুংনা লৈবা মফমশিং মশক খংদোক্নবা অমসুং য়েংশিন্নবা শিজিন্নরি, তেস্তিংগীদমক্তা আর.তি.-পি.সি.আর. এপ, হোস্পিতালগী ফমুংগী মশিংগী মতাং অমসুং মসিদা পুরকপা অনাবশিংগী ৱারোল শেন্ননবা ফেসিলিতী এপ কয়া অসি পোর্তেল অমত্তদা পুনশিল্লি” হায়না মহাক্না হায়খি।

দাঃ হর্শ বর্ধন্না কোবিদ-১৯গী মনুং অসিদা ভারতকী নাৎকী ওইবা হিদাক্কী পথাপ অসিনা মীওই কয়া অমগী ইম্ম্যুন সীস্তেম হেনগৎনবা তেংবাংখিবা ময়াগী মরমদশু মহাক্না মীয়ামদা পাউদমখি। মহাক্না অসুম্না হায়খি, “দবল্যু.ঐচ.ও. ত্রেদিস্নেল মেদিসিন স্ত্রেতজী ২০১৪-২০২৩গী পান্দম ফংহনবা ঙমগদবা ত্রেদিস্নেল মেদিসিনগী মতাংদা খুৎশম্নবগী খন্ননবা ইন্সতিত্যুস্নেল মেকানিজম অমত্তা হৌজিক লৈরিবা এস.সি.ও. হকশেল মন্ত্রীশিংগী মীফম অসিগী মনুংদা লৈতে  অমসুং ইন ২০১৮দা কিংদাও সম্মিত্তা খুৎয়েক পীনখিবা লায়চৎ থেংননবা খুৎশম্ননা চৎপগী অপুনবা ৱারোলশিং অদুবু নিংথিনা থবক ওইনা পাংথোকহন্নবা হোৎনবশু লৈতে”। হায়রিবশিং অসি ঐখোয়গী এস.সি.ও.গী মীহুৎ ওইরিবা লৈবাকশিংগী মনুংদা অসিগুম্লবা কমপ্লিমেন্তরী মেদিসিনগী পথাপশিং অসি পাক শন্না চৎন চৎননি। মরম অদুনা হৌজিক লৈরিবা এস.সি.ও. হকশেল মন্ত্রীশিংগী মীফম অসিগী মখাদা ত্রেদিস্নেল মেদিসিনগী সব-গ্রুপ অমা শেম্নবা মহাক্না মীয়ামদা হৌদোকখি।

দাঃ হর্শ বর্ধন্না মেম্বর ওইরিবা লৈবাক খুদিংমক্তা ইরাং অসিগী মনুংদা থোক্লক্তুনা কোবিদনা হকশেল অমসুং শেন্মিৎলোন্দা পীরিবা চৈথেং অসি হন্থহনসি হায়খি। মহাক্না মহাক্কী ৱারোল অসি লায়চৎ অসি থেংনরিবা ফ্রান্তলাইন্দা লৈরিবা মীওইশিংবু থাগৎলদুনা মখোয়বু “মীওইবা খুন্নাইগী ওইনা লাইদগী হেন্না তাদবশিং” হায়না মিংথোন্দুনা লোয়শিনখি।

****